មេធាវីការពារឱ្យអតីតបុគ្គលិកអាស៊ីសេរីគ្រោងប្ដឹងសាទុក្ខករណីសុំនៅក្រៅឃុំបណ្ដោះអាសន្ន
2017.12.26
អតីតបុគ្គលិកវិទ្យុអាស៊ីសេរីលោក យាង សុជាមេត្តា (ឆ្វេង) និងលោក អ៊ួន ឈិន (ស្ដាំ)។
Photo: RFA
មេធាវីការពារក្តីឱ្យអតីតអ្នករាយការណ៍ព័ត៌មានអាស៊ីសេរីពីររូប គ្រោងប្ដឹងសាទុក្ខនឹងសាលដីកាសម្រេចបដិសេធមិនឱ្យកូនក្តីរបស់លោកនៅក្រៅឃុំជាបណ្ដោះអាសន្ននៅដើមសប្ដាហ៍ក្រោយនេះ។ លោកមេធាវី កែវ វ៉ាន់នី ការពារក្តីឱ្យ លោក អ៊ួន ឈិន និងលោក យាង សុធារិន្ទ បានឱ្យអាស៊ីសេរីដឹងថា ក្រុមប្រឹក្សាជំនុំជម្រះសាលាឧទ្ធរណ៍នៅព្រឹកថ្ងៃអង្គារទី២៦ ខែធ្នូនេះ បានសម្រេចបដិសេធពាក្យសុំនៅក្រៅឃុំរបស់លោក ដោយតម្កល់ដីកាសម្រេចឃុំខ្លួនរបស់សាលាដំបូងរាជធានីភ្នំពេញទុកជាបានការដដែល ដោយលើកមូលហេតុថា រឿងក្តីនេះកំពុងស្ថិតក្នុងការស៊ើបអង្កេត។
អតីតអ្នករាយការណ៍ព័ត៌មានអាស៊ីសេរី ត្រូវបានតំណាងអយ្យការអមសាលាដំបូងរាជធានីភ្នំពេញ ចោទប្រកាន់ពីបទលួចផលិត ព័ត៌មានបញ្ជូនមករដ្ឋធានីវ៉ាស៊ីនតោន តាមមាត្រា ៤៤៥ នៃក្រមព្រហ្មទណ្ឌ។ អ្នកទាំងពីរអាចប្រឈមមុខជាប់ពន្ធនាគារពី៧ ទៅ ១៥ឆ្នាំ។
លោក កែវ វ៉ាន់នី បញ្ជាក់ថា មូលហេតុនេះលោកមិនអាចទទួលយកការសម្រេចរបស់តុលាការបាន ដោយហេតុថា កូនក្តីរបស់លោកមិនបានប្រព្រឹត្តបទល្មើសដូចការចោទប្រកាន់នេះឡើយ ហើយគ្មានហេតុផលណាមួយដែលត្រូវតុលាការបន្តឃុំខ្លួនកូនក្តីរបស់លោកទាល់តែសោះ ដោយសារតែគោលការណ៍ច្បាប់ជនត្រូវចោទត្រូវតែមានសេរីភាព ហើយកូនក្តីរបស់លោកនៅក្រៅឃុំនឹងមិនបង្កសណ្ដាប់ធ្នាប់សាធារណៈឱ្យមានការច្របូកច្របល់ឡើយ។
លោក កែវ វ៉ាន់នី បានឱ្យដឹងថា កូនក្តីទាំងពីររបស់លោក បានលើកមូលហេតុថា ពួកគាត់មិនបានប្រព្រឹត្តបទល្មើសបញ្ជូនព័ត៌មានសម្ងាត់របស់ជាតិទៅឱ្យបរទេសណាឡើយ ព្រោះកាលនៅធ្វើការឱ្យវិទ្យុអាស៊ីសេរី ពួកគាត់រាយការណ៍ព័ត៌មានពាក់ព័ន្ធនឹងបញ្ហាដីធ្លី សង្គម ដែលច្បាប់មិនបានហាមឃាត់ឡើយ។ ពួកគាត់ក៏បានសន្យាថានឹងមិនគេចវេះទៅណាឡើយ ដោយនឹងចូលឆ្លើយបំភ្លឺតាមការកោះហៅរបស់តុលាការគ្រប់ពេល ហើយពួកគាត់ក៏បានប្រគល់លិខិតឆ្លងដែនឱ្យតុលាការអស់ហើយ។
កាលពីថ្ងៃទី២៥ ធ្នូ លោក អ៊ួន ឈិន និងលោក យាង សុធារិន្ទ ក៏បានចូលឆ្លើយបំភ្លឺតាមការកោះហៅរបស់សាលាដំបូងរាជធានីភ្នំពេញផងដែរ ជុំវិញបទចោទប្រកាន់បញ្ជូនព័ត៌មានឱ្យបរទេស។អ្នកច្បាប់ជាតិ និងអង្គការអន្តរជាតិអះអាងថា ការចោទប្រកាន់លើអតីតអ្នករាយការណ៍ព័ត៌មានអាស៊ីសេរីជាការចោទប្រកាន់គ្មានមូលដ្ឋាន និងអយុត្តិធម៌ ហើយទាមទារឲ្យដោះលែងអ្នកទាំងពីរជាបន្ទាន់ដោយគ្មានលក្ខខណ្ឌ។ មកទល់ថ្ងៃទី២៦ ខែធ្នូនេះ ចូលថ្ងៃទី៤៣ហើយ ដែលតុលាការបានឃាត់ និងឃុំខ្លួនអ្នកទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ