មេធាវីការពារក្តីរបស់មេឃុំគណបក្ស សម រង្ស៊ី ដែលកំពុងជាប់ឃុំនឹងដាក់ពាក្យស្នើសុំទៅតុលាការឲ្យកូនក្តីរបស់ខ្លួន គឺលោក ស៊ាង ចែត ឲ្យនៅក្រៅឃុំបណ្តោះអាសន្ន។ មេធាវី លោក សំ សុគង់ ឲ្យដឹងថា ក្រុមគ្រួសារលោក ស៊ាង ចែត និងលោក ស៊ាង ចែត ផ្ទាល់អះអាងថា នឹងមិនរត់គេចខ្លួនទេ។
ការអះអាងរបស់មេធាវីការពារក្តី និងក្រុមគ្រួសាររបស់លោក ស៊ាង ចែត បែបនេះ ក្នុងពេលពួកគេមកសាលាដំបូងរាជធានី ឃ្លាំមើលការសាកសួររបស់តុលាការទៅលើលោក ស៊ាង ចែត បន្ថែម នៅថ្ងៃទី១១ ខែឧសភា។ ប៉ុន្តែការសាកសួរនេះ ត្រូវបានតុលាការលើកពេលទៅថ្ងៃទី១៨ ខែឧសភា ក្រោមហេតុផលថា តុលាការជាប់រវល់។
មេធាវីការពារក្តីលោក ស៊ាង ចែត គឺលោក សំ សុគង់ និយាយថា ក្រោយកូនក្ដីលោកចូលបំភ្លឺបន្ថែមនៅថ្ងៃទី១៨ ខែឧសភា ខាងមុខ លោកនឹងស្នើទៅតុលាការដើម្បីឲ្យកូនក្តីរបស់លោកបាននៅក្រៅឃុំដោយការធានាពីក្រុមគ្រួសារលោក ស៊ាង ចែត និងលោក ស៊ាង ចែត ផ្ទាល់៖ «បើសិនមានការបំភ្លឺបន្ថែមនៅថ្ងៃទី១៨ ខែឧសភា ខាងមុខនេះ ក្រុមមេធាវីនឹងដាក់ពាក្យមួយសុំនៅក្រៅឃុំជាបណ្ដោះអាសន្ន ដោយមានគ្រួសារលោក ស៊ាង ចែត និងលោកផ្ទាល់ថា គាត់នឹងមិនគេចវែស និងចូលបំភ្លឺគ្រប់នីតិវិធីរបស់តុលាការ»។
កាលពីថ្ងៃទី២៧ ខែមេសា សាលាដំបូងរាជធានីភ្នំពេញ បានសម្រេចបញ្ជូនមេឃុំ ស៊ាង ចែត ទៅឃុំខ្លួនបណ្ដោះអាសន្ននៅពន្ធនាគារព្រៃស ពាក់ព័ន្ធនឹងបទចោទសូកប៉ាន់សាក្សីតាមមាត្រា ៥៤៨ នៃក្រមព្រហ្មទណ្ឌ។
ភរិយារបស់លោក ស៊ាង ចែត លោកស្រី ស្រេង សុខឃឿន ស្ទាក់ស្ទើរក្នុងការផ្តល់បទសម្ភាសន៍មកវិទ្យុអាស៊ីសេរី តាមទូរស័ព្ទ។ ទាក់ទងការសន្ទនាតាមទូរស័ព្ទនេះដែរ ហ្វេសប៊ុក (Facebook) ឈ្មោះ "រឿងពិត CNRP” កាលពីថ្ងៃទី២៨ ខែមេសា បានទម្លាយកិច្ចសន្ទនាមួយឈុតថ្មីទៀតដែលគេអះអាងថា ជាសំឡេងរបស់លោក កឹម សុខា ដែលនិយាយទៅលោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម ឲ្យប្រាប់ទៅអ្នកនាង ខុម ចាន់តារាទី ហៅ ស្រីមុំ ឲ្យរក្សាជំហរដូចដែលនាងបានបកស្រាយប្រាប់សមត្ថកិច្ច និងអង្គការសិទ្ធិមនុស្សលើកដំបូង។
មេធាវីការពារក្តីលោក ស៊ាង ចែត លោក សំ សុគង់ ឲ្យដឹងទៀតថា នៅពេលនេះ ក្រុមមេធាវីកំពុងស្វែងរកភស្តុតាងដើម្បីដោះបន្ទុកទាក់ទងការចោទប្រកាន់ថា កូនក្ដីរបស់លោកយកប្រាក់ពីរលានរៀល ឬ ៥០០ដុល្លារ ចំពោះការចោទប្រកាន់របស់អ្នកនាង ខុម ចាន់តារាទី៖ «ក្រុមមេធាវីការពារឲ្យលោកមេឃុំក៏ព្យាយាមលុប ឬក៏ភស្តុតាងដោះបន្ទុកដើម្បីបង្ហាញទៅតុលាការថា ភស្តុតាងលុយពីរលានរៀល និងភស្តុតាងផ្សេងៗហ្នឹង ជាភស្តុតាងដែលយើងមិនអាចដាក់បន្ទុកលើកូនក្ដី»។
កាលពីថ្ងៃទី២៤ ខែមេសា អង្គភាពប្រឆាំងអំពើពុករលួយនាំលោក ស៊ាង ចែត មកអង្គភាពដើម្បីសាកសួរជុំវិញរឿងទឹកប្រាក់ ៥០០ដុល្លារ បម្រុងនឹងប្រគល់ឲ្យក្រុមគ្រួសារអ្នកនាង ខុម ចាន់តារាទី ហៅ ស្រីមុំ។ ការនាំខ្លួននោះ បន្ទាប់ពីអ្នកនាង ខុម ចាន់តារាទី បានសរសេរលិខិតចំហមួយលើកឡើងថា លោក ស៊ាង ចែត ផ្ដល់ប្រាក់ ៥០០ដុល្លារដើម្បីឲ្យនាងនិយាយកុហកថា គ្មានទំនាក់ទំនងស៊ីជម្រៅជាមួយលោក កឹម សុខា អនុប្រធានគណបក្សសង្គ្រោះជាតិ។
សំណុំរឿងនេះដែរ មន្ត្រីសិទ្ធិមនុស្សសមាគមអាដហុក (ADHOC) ៤រូប រួមមានលោក នី សុខា លោក ណៃ វ៉ង់ដា លោក យី សុខសាន្ត និងអ្នកស្រី លឹម មុន្នី ត្រូវបានតុលាការចោទប្រកាន់ពីបទសូកប៉ាន់សាក្សីតាមមាត្រា ៥៤៨ នៃក្រមព្រហ្មទណ្ឌ។ ចំណែកអគ្គលេខាធិការរង គ.ជ.ប លោក នី ចរិយា និងមន្ត្រីអង្គការសហប្រជាជាតិ លោក សឺន សាលី ត្រូវបានតុលាការចោទពីបទសមគំនិតសូកប៉ាន់សាក្សី តាមមាត្រា២៩ និងមាត្រា៥៤៨ ក្រមព្រហ្មទណ្ឌ។ ប៉ុន្តែលោក សឺន សាលី មិនទាន់ចូលខ្លួនបំភ្លឺនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។