លីកាដូ​ស្នើ​បញ្ឈប់​ការ​ឃុំ​ខ្លួន​បណ្ដោះអាសន្ន​ដែល​មិន​ចាំបាច់​​ខណៈ​ពន្ធនាគារ​​​ចង្អៀត​ខ្លាំង

2018-11-02
អ៊ីម៉ែល
មតិ
Share
បោះពុម្ព
មណ្ឌល​អប់រំ​កែប្រែ​ទី​១ ឬ​ពន្ធនាគារ​ព្រៃស។ រូបថត​ថ្ងៃ​ទី​៩ ខែ​សីហា ឆ្នាំ​២០១៤។
មណ្ឌល​អប់រំ​កែប្រែ​ទី​១ ឬ​ពន្ធនាគារ​ព្រៃស។ រូបថត​ថ្ងៃ​ទី​៩ ខែ​សីហា ឆ្នាំ​២០១៤។
RFA

អង្គការ​សម្ព័ន្ធ​ខ្មែរ​ជំរឿន​ និង​ការពារ​សិទ្ធិមនុស្ស ហៅ​កាត់​ថា លីកាដូ (LICADHO) រក​ឃើញ​ថា ​សភាព​ចង្អៀត​ណែន​ក្នុង​ពន្ធនាគារ​បាន​ក្លាយ​ជា​បញ្ហា​មួយ​ដ៏​សំខាន់ ដែល​បង្ក​ផល​ប៉ះពាល់​ដល់​សិទ្ធិ​អ្នក​ជាប់​ឃុំ​ និង​ផ្ដល់​ផល​វិបាក​ដល់​មន្ត្រី​ពន្ធនាគារ​ និង​សង្គម​ទាំងមូល។ អង្គការ​នេះ​ស្នើ​ឱ្យ​តុលាការ​បញ្ឈប់​ការ​ឃុំ​ខ្លួន​បណ្ដោះអាសន្ន​ដែល​មិន​ចាំបាច់ ដើម្បី​ឱ្យ​អាច​ដោះស្រាយ​បញ្ហា​នេះ​បាន។

អង្គការ​សិទ្ធិមនុស្ស​លីកាដូ សម្ដែង​ក្តី​ព្រួយ​បារម្ភ​យ៉ាង​ខ្លាំង​ជុំវិញ​បញ្ហា​ចង្អៀត​ណែន​ក្នុង​ពន្ធនាគារ​ ក្រោយ​រក​ឃើញ​ថា ចំនួន​អ្នក​ជាប់​ឃុំ​បាន​កើន​ឡើង​ជា​គំហុក​ មិន​ធ្លាប់​មាន​ពី​មុន​មក។

សេចក្ដី​ថ្លែង​ការណ៍​របស់​អង្គការ​លីកាដូ​ចេញផ្សាយ​នៅ​រសៀល​ថ្ងៃទី១ វិច្ឆិកា ឱ្យ​ដឹង​ថា ពន្ធនាគារ​ចំនួន​ ១៨ ក្នុង​ចំណោម​ ២៨ កន្លែង​នៅ​ទូទាំង​ប្រទេស ដែល​អង្គការ​នេះ​បាន​ឃ្លាំមើល មាន​អ្នក​ជាប់​ពន្ធនាគារ​ច្រើន​ជាង​មួយ​ភាគ​បី គឺ​ជា​អ្នក​ដែល​ត្រូវ​បាន​ឃុំ​ខ្លួន​បណ្ដោះអាសន្ន​រង់ចាំ​សវនាការ។ ​អ្នក​ជាប់​ឃុំ​ក្នុង​ពន្ធនាគារ​ទាំង ១៨ នោះ មាន​ចំនួន​ជិត ២ ម៉ឺន ៦ពាន់​នាក់ (២៥,៩២៦០) ក្នុង​នោះ​ជិត ១​ ម៉ឺន​នាក់ (,៥២៧) គឺ​ជា​អ្នក​ជាប់​ឃុំ​បណ្ដោះអាសន្ន។ អង្គការ​លីកាដូ​រក​ឃើញ​ទៀត​ថា ក្នុង​ពន្ធនាគារ​មួយ​ចំនួន​ មាន​អ្នក​ជាប់​ឃុំ​ច្រើន​ជាង​ពាក់​កណ្តាល​ មិន​ទាន់​ត្រូវ​បាន​តុលាការ​បើក​សវនាការ​ជំនុំ​ជម្រះ​នៅ​ឡើយ ខណៈ​ច្បាប់​មិន​អនុញ្ញាត​ឱ្យ​ឃុំ​ខ្លួន​ជន​ជាប់​ចោទ លើស​រយៈពេល​ ២២ ខែ​នោះ​ឡើយ។

ប្រធាន​គ្រប់​គ្រង​ការិយាល័យ​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត ថ្លែង​ថា ស្ថានភាព​ចង្អៀត​ណែន​ក្នុង​ពន្ធនាគារ​នេះ កើត​ឡើង​ក្រោយ​មាន​យុទ្ធនាការ​ប្រយុទ្ធ​ប្រឆាំង​គ្រឿង​ញៀន និង​មាន​ការ​អនុវត្ត​នីតិវិធី​ឃុំ​ខ្លួន​បណ្ដោះអាសន្ន ដែល​មិន​ចាំបាច់​ជាច្រើន​ករណី។ លោក​បន្ត​ថា ស្ថាន​ភាព​ចង្អៀត​ណែន​បែបនេះ ប៉ះពាល់​ដល់​សិទ្ធិ​អ្នក​ជាប់​ឃុំ​ធ្ងន់ធ្ងរ ​ហើយ​ក៏​​បង្ក​ការ​លំបាក​ដល់​មន្ត្រី​ពន្ធនាគារ​ផង​ដែរ«ដោយ​សារ​តែ​កន្លែង​ស្នាក់​នៅ និង​កន្លែង​ដេក​ហ្នឹង​ ​មាន​ភាព​ចង្អៀត​ណែន​​ ហើយ​អ្នក​ទោស​ខ្លះ​អាច​​ផ្លាស់​ប្ដូរ​វេន​គ្នា​គេង​​ ហើយ​ការ​ចេញ​ចូល​យក​ខ្យល់​អាកាស​ហ្នឹង​ ក៏​វា​មិន​គ្រប់​គ្រាន់​ដែរ​ គឺ​ត្រូវ​ប្ដូរ​​វេន​គ្នា​​​ ហើយ​ទាក់​ទង​នឹង​សម្ភារៈ​ប្រើប្រាស់ និង​​​ម្ហូប​អាហារ​​ ក៏​មាន​ការ​ខ្វះ​ខាត​ផង​ដែរ។ បញ្ហា​ស្ត្រី​ដែល​មាន​កូន​​រស់​​នៅ​តាម​ម្ដាយ​​​នៅ​ក្នុង​ពន្ធនាគារ ​​គឺ​មាន​ការ​កើន​ឡើង។ បច្ចុប្បន្ន​ គឺ​មាន​ស្ត្រី​ច្រើន​ដែល​មាន​កុមារ​តូច​​តាម​ម្ដាយ​ទៅ​រស់​នៅ​ក្នុង​ពន្ធនាគារ​ក្រោម​អាយុ​ ៣ឆ្នាំ​ ​ហើយ​មួយ​ទៀត​គឺ​ស្រ្តី​ដែល​មាន​ផ្ទៃ​ពោះ​ក៏​ត្រូវ​មានផល​លំបាក​​ផ្នែក​សុខភាព​​​ ​​ហើយ​និង​ស្ត្រី​ដែល​ពពោះ​ ហើយ​​សម្រាល​កូន​ហ្នឹង ក៏​ត្រូវ​ទទួល​រង​​បញ្ហា​សុខភាព​នេះ​ដែរ»

ន្ត្រី​សិទ្ធិមនុស្ស​រូប​នេះ កត់​សម្គាល់​ថា ច្បាប់​របស់​កម្ពុជា​ចែង​អំពី​គោលការណ៍​​សិទ្ធិ​សេរីភាព​ជា​មូលដ្ឋាន​ ជា​ជាង​ការ​ឃុំ​ខ្លួន​បណ្ដោះអាសន្ន​ ប៉ុន្តែ​ការ​អនុវត្ត​ជាក់ស្ដែង​របស់​អាជ្ញាធរ និង​តុលាការ​ គឺ​មិន​ទាន់​បាន​ត្រឹម​ត្រូវ​ និង​ពេញ​លេញ​នៅឡើយ។

អង្គការ​លីកាដូ​រក​ឃើញ​ថា ការ​ប្រើប្រាស់​នីតិវិធី​ឃុំ​ខ្លួន​បណ្ដោះអាសន្ន​ច្រើន​ហួស​ហេតុ​ ធ្វើ​ឱ្យ​ស្ថានភាព​ពន្ធនាគារ​ដែល​ចង្អៀត​ណែន​ស្រាប់​ កាន់​តែ​ធ្ងន់​ធ្ងរ​ឡើង ហើយ​ធនធាន​សម្រាប់​ប្រើប្រាស់​ក្នុង​ពន្ធនាគារ​ដែល​កំពុង​មាន​តិច​តួច​ស្រាប់ កាន់តែ​ខ្វះខាត។ ​បញ្ហា​នេះ​ប៉ះពាល់​យ៉ាង​ខ្លាំង​ដល់​ជន​ងាយ​រងគ្រោះ​មួយ​ចំនួន ដូចជា កុមារ​ដែល​រស់​នៅ​ជាមួយ​ម្ដាយ​ក្នុង​ពន្ធនាគារ ឬ​ស្ត្រី​មាន​ផ្ទៃ​ពោះ​ដែល​សម្រាល​កូន​ក្នុង​ពន្ធនាគារ ជាដើម។ អង្គការ​លីកាដូ​រក​ឃើញ​ថា បច្ចុប្បន្ន​នេះ​មាន​ស្ត្រី​មាន​ផ្ទៃពោះ​ចំនួន ៣០​នាក់ ម្ដាយ​ចំនួន ១៣៥​នាក់ និង​កុមារ​អាយុ​ក្រោម​ ៣ ឆ្នាំ​ចំនួន ១៣៨ នាក់ កំពុង​រស់​នៅ​ក្នុង​ពន្ធនាគារ​ចំនួន​ ១៨​កន្លែង​នៅ​ទូទាំង​ប្រទេស។ ក្នុង​ចំណោម​ស្ត្រី​ដែល​កំពុង​ជាប់​ពន្ធនាគារ​ទាំងអស់​នោះ មាន​ជាង​ពាក់​កណ្តាល​មិន​ទាន់​ត្រូវ​បាន​តុលាការ​ផ្ដន្ទាទោស​ពី​បទល្មើស​ជាក់​លាក់​ណាមួយ​នៅឡើយ​ ហើយ​អំឡុង​​ពេល​នៃ​ការ​វិវឌ្ឍ​របស់​កុមារ ស្ត្រី​មាន​ផ្ទៃពោះ និង​ស្ត្រី​ដែល​បំបៅ​ដោះកូន​ ពួក​គេ​មិន​សូវ​ទទួល​បាន​អាហារូបត្ថម្ភ​បន្ថែម​នោះ​ទេ។

អាស៊ីសេរី​បាន​ព្យាយាម​ទាក់ទង​អ្នក​​នាំ​ពាក្យ​ក្រសួង​យុត្តិធម៌ លោក គឹម សន្តិភាព តាម​ទូរស័ព្ទ​ជាច្រើន​ដង នៅ​ថ្ងៃទី១ វិច្ឆិកា ក៏ប៉ុន្តែ​លោក​មិន​លើក​ទូរស័ព្ទ។ ចំណែក​អ្នកនាំពាក្យ​អគ្គនាយកដ្ឋាន​ពន្ធនាគារ​ក្រសួង​មហាផ្ទៃ លោក នុត សវនា ក៏​មិន​លើក​ទូរស័ព្ទ​ដូចគ្នា​ ក៏​ប៉ុន្តែ​លោក​ធ្លាប់​បាន​ទទួល​ស្គាល់​ថា ពន្ធនាគារ​ពិត​ជា​មាន​សភាព​ចង្អៀត​ណែន​ខ្លាំង​ពិត​ប្រាកដ​មែន​ ក្រោយ​ពេល​របប​ក្រុង​ភ្នំពេញ​​អនុវត្ត​យុទ្ធនាការ​បង្ក្រាប​គ្រឿង​ញៀន​ខុស​ច្បាប់​ កាល​ពី​ឆ្នាំ​២០១៧ នោះ​មក។

លោក អំ សំអាត ថ្លែង​ថា ដំណោះស្រាយ​រឿង​នេះ គឺ​តុលាការ​ត្រូវ​ដោះលែង​ជនជាប់ចោទ​មួយ​ចំនួន​ឱ្យ​នៅ​ក្រៅ​ឃុំ​បណ្ដោះអាសន្ន​ដោយ​ភ្ជាប់​នូវ​លក្ខខណ្ឌ​ចាំបាច់​នានា រហូត​ដល់​ថ្ងៃ​សវន​ការ​ជំនុំ​ជម្រះ​រឿង​ក្តី​ជន​ទាំងនោះ​។ លោក​បញ្ជាក់​ថា ការ​ធ្វើ​បែបនេះ​ជា​ការ​គោរព​សិទ្ធិ​ពលរដ្ឋ និង​កាត់​បន្ថយ​សម្ពាធ​ទៅ​លើ​ជន​ជាប់​ឃុំ​រាប់​ពាន់​នាក់ និង​មន្ត្រី​ពន្ធនាគារ​ជាច្រើន ដែល​កំពុង​ជួប​ប្រទះ​ស្ថានភាព​លំបាក និង​យ៉ាប់យ៉ឺន​ជា​រៀង​រាល់​ថ្ងៃ​ ក្នុង​ពន្ធនាគារ​ទាំងអស់​នៅ​កម្ពុជា៖ «យើង​ពិនិត្យ​មើល​ដូច​ជា​បទល្មើស​ណា ដែល​វា​​​មជ្ឈិម​កម្រិត​ស្រាល​​ដែល​គួរ​តែ​អនុញ្ញាត​ឱ្យ​នៅ​ក្រៅ​ឃុំ​ យើង​គួរ​តែ​អនុញ្ញាត​ទៅ​។ ហើយ​បទ​ល្មើស​មជ្ឈិម​ណា​ដែល​គាត់​មាន​លក្ខខណ្ឌ​គ្រប់គ្រាន់​ហ្នឹង ​​គួរ​តែ​អនុញ្ញាត​​ឱ្យ​​នៅ​ក្រៅ​ឃុំ​ គួរ​តែ​​ឱ្យ​គាត់​នៅ​ក្រៅ​ឃុំ​បណ្ដោះ​អាសន្ន ហើយ​យើង​មាន​វិធានការ​ផ្សេង​ទៀត​​ ដូច​ជា​ការ​ដាក់​ប្រាក់​តម្កល់​​ ដាក់​ឱ្យ​នៅ​ក្រោម​ការ​ត្រួត​ពិនិត្យ​​របស់​ប្រ​ព័ន្ធ​តុលាការ។ នេះ​ជា​ការ​ជួយ​​សម្រួល​​ទៅដល់​ភាព​ចង្អៀត​ណែន​នៃ​ពន្ធនាគារ​ផង​ដែរ​​ ប្រសិន​បើ​​យើង​អនុវត្ត​ឱ្យ​បាន​ត្រឹម​ត្រូវ​ និង​ខ្ជាប់​ខ្ជួន​នោះ»

អង្គការ​សិទ្ធិមនុស្ស​លីកាដូ​អះអាង​ថា ការ​ប្រើប្រាស់​នីតិវិធី​ដោះលែង​ឱ្យ​នៅ​ក្រៅ​ឃុំ​បណ្ដោះអាសន្ន​បាន​ត្រឹម​ត្រូវ ចំពោះ​បទល្មើស​ដែល​មិន​មាន​ហិង្សា នឹង​ផ្ដល់​ប្រយោជន៍​ច្រើន​ដល់​ប្រព័ន្ធ​យុត្តិធម៌​ព្រហ្មទណ្ឌ​ទាំង​មូល។ ការ​អនុវត្ត​បែបនេះ ជា​ការ​លើក​ទឹក​ចិត្ត​ឱ្យ​មាន​ការ​ចាត់​អាទិភាព​រឿង​ក្តី​ទៅ​តាម​ភាព​ធ្ងន់ធ្ងរ​របស់​ករណី​នីមួយៗ និង​កាត់​បន្ថយ​ការងារ​ច្រើន​ហួសហេតុ​របស់​ស្ថាប័ន​តុលាការ។ បន្ថែម​ពី​លើ​នេះ វិធី​នេះ​ក៏​អាច​ផ្ដល់​ផល​វិជ្ជមាន​ដល់​សង្គម​ផង​ដែរ គឺ​កាត់​បន្ថយ​ភាព​ចង្អៀត​ណែន​ក្នុង​ពន្ធនាគារ ថែរក្សា​ចំណង​គ្រួសារ​ឱ្យ​នៅ​ល្អ និង​ការពារ​កុមារ​ពី​ការ​ទទួល​យក​ឥទ្ធិពល​អវិជ្ជមាន​ពី​ការ​រស់​នៅ​ក្នុង​ពន្ធនាគារ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល