តុលាការថានឹងបន្តស៊ើបសួរសំណុំរឿងបណ្ឌិត កែម ឡី ទោះគ្រួសារមិនទាន់ប្ដឹង
2016.10.17
អ្នកនាំពាក្យសាលាដំបូងរាជធានីភ្នំពេញ លោក លី សុផាណា អះអាងនៅថ្ងៃទី១៧ តុលា ថា ចៅក្រមស៊ើបសួរ នៅបន្តស៊ើបសួរសំណុំរឿងឃាតកម្មបណ្ឌិត កែម ឡី ទោះបីជា ភរិយាលោក កែម ឡី អ្នកស្រី ប៊ូ រចនា មិនមកតាមការកោះហៅជាលើកទីពីរនេះក្ដី។
បច្ចុប្បន្ន អ្នកស្រី ប៊ូ រចនា មិននៅក្នុងប្រទេសកម្ពុជាទេ ដោយអ្នកស្រីនិងកូនៗទាំង៥របស់អ្នកស្រី កំពុងភៀសខ្លួននៅក្រៅប្រទេស ដើម្បីរង់ចាំទៅជ្រកកោននៅប្រទេសទី៣។ រហូតមកដល់ពេលនេះ អ្នកស្រីទើបសម្រាលកូនប្រុសទី៥ បានជាង១០ថ្ងៃប៉ុណ្ណោះ។
អ្នកស្រី ប៊ូ រចនា បានអះអាងប្រាប់អាស៊ីសេរីកាលពីថ្ងៃទី១៥ តុលា ថា អ្នកស្រីនឹងមិនមកតាមការកោះហៅរបស់តុលាការឡើយ ព្រោះមកទល់ពេលនេះ អ្នកស្រីមិនបានទទួលបានដីកាកោះទាំងលើកទី១ និងលើកទី២ ហើយក៏មិនទាន់ពឹងពាក់មេធាវីសម្រាប់រឿងនេះទៅឡើយទេ។
កាលពីថ្ងៃទី៤ តុលា អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានអះអាងថា ចៅក្រមស៊ើបសួរបានកោះហៅអ្នកស្រី ប៊ូ រចនា ក្នុងនាមជាដើមបណ្ដឹងរដ្ឋប្បវេណី នៃឃាតកម្មនេះ២លើកមកហើយ។
បើទោះបីជា តុលាការក្រុងភ្នំពេញអះអាងថា ខ្លួននៅបន្តស៊ើបសួរ និងស៊ើបអង្កេតករណីបាញ់សម្លាប់បណ្ឌិត កែម ឡី ក្ដី ក៏ពន្លឺនៃអំពីឃាតកម្មនេះត្រូវបានអ្នកឃ្លាំមើលសិទ្ធិមនុស្សលើកឡើងថា ករណីនេះ ហាក់មានការលាក់លៀម និងគ្មានតម្លាភាព ព្រោះកាមេរ៉ាសុវត្ថិភាពនៅក្នុងស្ដារម៉ាត (Star Mart) ស្ដុបកាល់តិច (Caltex) និងនៅក្បែរនោះជាច្រើនកន្លែង មិនទាន់ត្រូវបានសមត្ថកិច្ចបង្ហាញជាសាធារណៈ ដូចករណីឃាតកម្មផ្សេងៗទៀតឡើយ។ ចំណែកមេខ្លោងនៅពីក្រោយនៃឃាតកម្មនេះ ក៏មិនត្រូវបានសមត្ថកិច្ចចាប់ខ្លួនមកផ្ដន្ទាទោសនោះទេ ក្រៅពីជនជាប់ចោទម្នាក់ ឈ្មោះ អឿត អាង ហៅជួប សម្លាប់៕