យុវជន​បក្ស​សង្គ្រោះ​ជាតិ​ម្នាក់​ចូល​បំភ្លឺ​នៅ​តុលាការ​ជុំវិញ​ការ​ចូលរួម​ធ្វើ​កុបកម្ម

ដោយ ខែ សុណង
2014.09.30
Share on WhatsApp
Share on WhatsApp
ឃិន ជំរឿន ៦២០ យុវជន​គណបក្ស​សង្គ្រោះ​ជាតិ លោក ឃិន ជំរឿន ផ្ដល់​បទសម្ភាសន៍​នៅ​មុខ​សាលា​ដំបូង​រាជធានី​ភ្នំពេញ នៅ​ថ្ងៃ​ទី​៣០ ខែ​កញ្ញា ឆ្នាំ​២០១៤។
RFA/Khe Sonorng

ចៅក្រម​សាលា​ដំបូង​រាជធានី​ភ្នំពេញ បាន​កោះ​ហៅ​យុវជន​គណបក្ស​សង្គ្រោះ​ជាតិ ម្នាក់​ក្នុង​ចំណោម ៣​នាក់ ឲ្យ​បំភ្លឺ​ជុំវិញ​ការ​ចូលរួម​ធ្វើ​កុបកម្ម​ប្រឆាំង​អាជ្ញាធរ​មាន​សមត្ថកិច្ច នៅ​តំបន់​ស្ពាន​នាគ កាល​ពី​ថ្ងៃ​ទី​១៥ ខែ​កក្កដា ឆ្នាំ​២០១៤។

លោក ឃិន ជំរឿន ដែល​បាន​ចូល​បំភ្លឺ​តាម​ដីកា​កោះ​របស់​ចៅក្រម នៅ​ថ្ងៃ​ទី​៣០ កញ្ញា ថ្លែង​ថា ចៅក្រម​បាន​សាកសួរ​ពាក់ព័ន្ធ​នឹង​បទ​ចោទ​៣ គឺ​បទ​ចូលរួម​ធ្វើ​កុបកម្ម​ប្រឆាំង​នឹង​អ្នក​រាជការ​សាធារណៈ បទ​ហិង្សា​ដោយ​ចេតនា និង​បទ​ផ្ដើម​គំនិត​ក្នុង​អំពើ​ហិង្សា​ដោយ​ចេតនា មាន​ស្ថាន​ទម្ងន់​ទោស ដែល​ប្រព្រឹត្ត​ទៅ​កាល​ពី​ថ្ងៃ​ទី​១៥ កក្កដា នៅ​ក្បែរ​ទីលាន​ប្រជាធិបតេយ្យ។ លោក​ថា បន្ទាប់​ពី​សាកសួរ ចៅក្រម​មិន​បាន​កំណត់​ថ្ងៃ​ចូល​ជា​ថ្មី ឬ​ថា​យ៉ាង​ណា​នោះ​ទេ។

លោក ឃិន ជំរឿន៖ «ចំពោះ​នីតិវិធី​របស់​តុលាការ បើ​និយាយ​ពី​កិច្ចការ​រដ្ឋបាល​ខាង​ច្បាប់ គេ​ត្រូវ​តែ​ហៅ​យើង​មក​ស៊ើបសួរ​ចឹង​ហើយ។ អ្វី​ដែល​ជា​រឿង​អយុត្តិធម៌​សម្រាប់​ខ្ញុំ​នោះ គឺ​ជាប់​គុក ២១​ថ្ងៃ ដែល​វា​អត់​មាន​មូលហេតុ​សោះ ខ្ញុំ​ជា​អ្នក​ជន​រងគ្រោះ បែរ​ជា​តុលាការ​ចាប់​ខ្ញុំ​ដាក់​គុក​ទៅ​វិញ នេះ​សូម​បញ្ជាក់។ ខ្ញុំ​ថ្ងៃ​ទី​១៥ នោះ គឺ​អត់​បាន​ទៅ​យក​ព្រនូង​អី​វាយ​ប្រជាពលរដ្ឋ វាយ​សន្តិសុខ​ដូច​ការ​ចោទ​របស់​តុលាការ​នោះ​ទេ មាន​តែ​ខ្ញុំ​ហ្នឹង​ហាម​ឃាត់​ថា​អហិង្សា»

យុវជន​ពីរ​រូប​ទៀត គឺ​លោក សាន គឹមហេង ក៏​ត្រូវ​ចូល​ទៅ​បំភ្លឺ​ដែរ​នៅ​ថ្ងៃ​ទី​១ ខែ​តុលា ហើយ លោក នាង សុឃុន ចូល​ទៅ​បំភ្លឺ​នៅ​ថ្ងៃ​ទី​២ ខែ​តុលា។ អ្នក​ទាំង​បី ត្រូវ​តុលាការ​ចាប់​ដាក់​ពន្ធនាគារ​បណ្ដោះអាសន្ន​ម្ដង​រួច​មក​ហើយ កាល​ពី​ដើម​ខែ​សីហា កន្លង​ទៅ ហើយ​មេធាវី​ប្ដឹង​ឧទ្ធរណ៍​សុំ​នៅ​ក្រៅ​ឃុំ ហើយ​ចុង​បញ្ចប់ សាលា​ឧទ្ធរណ៍​ក៏​សម្រេច​ដោះ​លែង​ពួក​គេ​នោះ​វិញ កាល​ពី​ថ្ងៃ​ទី​២២ សីហា។

សាលា​ដំបូង​រាជធានី​ភ្នំពេញ ក៏​ធ្លាប់​កោះ​ហៅ​សកម្មជន​គណបក្ស​សង្គ្រោះ​ជាតិ ៥​នាក់ ឲ្យ​ចូល​ខ្លួន​បំភ្លឺ​ទាក់ទង​រឿង​ប្រើ​អំពើ​ហិង្សា​នៅ​ទីលាន​ប្រជាធិបតេយ្យ កាល​ពី​ថ្ងៃ​ទី​១៥ កក្កដា ដែរ កាល​ពី​ចុង​ខែ​សីហា ប៉ុន្តែ​មិន​មាន​ការ​ចាប់​ឃាត់​ខ្លួន​ទេ ដោយ​គ្រាន់​តែ​សម្រេច​ដាក់​អោយ​ស្ថិត​នៅ​ក្រោម​ការ​តាម​ដាន​របស់​តុលាការ បន្ទាប់​ពី​ធ្វើ​ការ​សាកសួរ​រួច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។