ទណ្ឌិត ៣២១នាក់បានស្នើសុំបន្ធូរបន្ថយ និងលើកលែងទោសក្នុងឱកាសបុណ្យចូលឆ្នាំ
2018.04.04
រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ថ្លែងក្នុងជំនួបជាមួយព្រះរាជអាជ្ញានៃអយ្យការអមសាលាដំបូងទូទាំងប្រទេស នាទីស្ដីការក្រសួង កាលពីព្រឹកថ្ងៃទី១៨ ខែធ្នូ ឆ្នាំ២០១៥។
រដ្ឋមន្ត្រីក្រសួងយុត្តិធម៌នៅថ្ងៃទី០៤ ខែមេសានេះ បានពិនិត្យសំណើសុំបន្ធូរបន្ថយ និងលើកលែងទោសដល់ទណ្ឌិតចំនួន ៣២១នាក់ ក្នុងឱកាសបុណ្យចូលឆ្នាំខ្មែរប្រពៃណីជាតិខាងមុខនេះ។
កាសែតក្នុងស្រុកភ្នំពេញប៉ុស្តិ៍ (Phnom Penh Post) ដកស្រង់សំដី អគ្គនាយករងនៃអគ្គនាយកដ្ឋានកិច្ចការអយ្យការនៃក្រសួងយុត្តិធម៌លោក សុច សុផាណារ៉ា ថា មានទណ្ឌិតសរុប ៣២១ នាក់ បានស្នើសុំបន្ធូរបន្ថយ និងលើកលែងទោស ក្នុងនោះមានស្ត្រី ២៨ នាក់ ដោយទណ្ឌិតទាំងនោះកំពុងជាប់ពន្ធនាគារក្នុងខេត្តក្រុងចំនួន២០ និងមណ្ឌលអប់រំកែប្រចំនួន៤។ លោកបញ្ជាក់ថា ក្រសួងនឹងសម្រេចករណីនេះ អាស្រ័យលើការកែប្រែអត្តចរិត កិរិយាមារយាទរបស់ទណ្ឌិតក្នុងពន្ធនាគារ ភ្ជាប់ជាមួយឯកសារពាក់ព័ន្ធ ជាពិសេសសាលក្រម ឬសាលដីកាស្ថាពរ។ លោកឱ្យដឹងបន្តថា ក្រសួងនឹងមិនពិចារណាលើការស្នើសុំរបស់ទណ្ឌិតដែលមិនរាងចាល ឬបានប្រព្រឹត្តបទល្មើសកាចសាហាវដែលមានព្យសនកម្មធ្ងន់ធ្ងរ។ ក្នុងចំណោម ៣២១នាក់ មានជនបរទេសប្រហែល ១០ ភាគរយ រួមមានជនជាតិចិនផងដែរ។
ទាក់ទងនឹងអ្នកទោសនយោបាយ ឬអ្នកទោសមនសិការ លោក សុច សុផាណារ៉ា បានឱ្យដឹងថា ក្នុងតារាងបញ្ជីឈ្មោះអ្នកទោសទាំង៣២១នេះ មិនមានបញ្ជាក់ថា អ្នកណាមានតួនាទីអ្វីនោះទេ ដោយសារគណៈកម្មការ ពិនិត្យតែឈ្មោះបទល្មើស ការកែប្រែខ្លួន និងឯកសារដែលភ្ជាប់មកជាមួយប៉ុណ្ណោះ។
ស្របនឹងការលើកឡើងនេះ សកម្មជនដីធ្លីតំបន់បឹងកក់ អ្នកស្រី បូវ សោភា បានឱ្យអាស៊ីសេរីដឹងនៅថ្ងៃទី០៤ ខែមេសា នេះដែរថា អ្នកស្រី ទេព វន្នី មិនបានដាក់ពាក្យស្នើសុំទៅរដ្ឋមន្ត្រីក្រសួងយុត្តិធម៌ទេ ប៉ុន្តែក្រុមគ្រួសារអ្នកស្រី ទេព វន្នី កាលពីថ្ងៃទី១៣ ខែមីនា បានដាក់ពាក្យស្នើសុំទៅលោកនាយករដ្ឋមន្ត្រី ហ៊ុន សែន ជួយអន្តរាគមន៍ដល់ព្រះមហាក្សត្រឱ្យលើកលែងទោស និងដោះលែងអ្នកស្រី ទេព វន្នី។ បើទោះបីជាអ្នកស្រី ទេព វន្នី មិនបានដាក់ពាក្យស្នើសុំលើកលែងទោសក៏ដោយ ក៏អ្នកស្រី បូវ សោភា នៅតែសង្ឃឹមថា តុលាការនឹងការដោះលែងអ្នកស្រី ទេព វន្នី នៅក្នុងអំឡុងពេលបុណ្យចូលឆ្នាំខ្មែរនេះ៖ «អ្នកស្រី ទេព វន្នី ត្រូវជាប់ពន្ធនាគារនឹងវាចំនួន២ឆ្នាំកន្លះ ហើយចំនួន០២ឆ្នាំកន្លះនឹង ឥឡូវនឹងគាត់ជាប់បានមួយឆ្នាំប្រាំបីខែហើយបើគិតដល់ថ្ងៃ១៥ ហើយអ៊ីចឹងវានៅសល់ចំនួនទោសនឹងដប់ខែនៃការជាប់ពន្ធនាគារ។ អ៊ីចឹងអាចបន្ធូរបន្ថយ ឬមួយក៏ព្យួរទោសគាត់បានឱ្យមានការដោះលែងដើម្បីឱ្យមានគាត់មានសេរីភាពជួបជុំក្រុមគ្រួសារវិញ»។
លោក ហ៊ុន សែន កាលពីខែមីនា កន្លងទៅនេះបានថ្លែងថា លោកនឹងមិនលើកលែងទោសឱ្យក្រុមមន្ត្រីបក្សប្រឆាំងឡើយ។
ជាគោលការណ៍ច្បាប់ ទណ្ឌិតដែលស្នើសុំបន្ធូរបន្ថយទោសត្រូវអនុវត្តទោសឱ្យបាន១ភាគ៣ ចំណែកទណ្ឌិតសុំលើកលែងទោស ត្រូវអនុវត្តទោស២ភាគ៣ ហើយទណ្ឌិតអាចស្នើសុំបានក្នុងពិធីបុណ្យប្រពៃណីជាតិដូចជា ពិធីបុណ្យចូលឆ្នាំប្រពៃណីខ្មែរ ពិធីបុណ្យពិសាខបូជា និងពិធីបុណ្យអុំទូកបណ្ដែតប្រទីប សំពះព្រះខែ និងអកអំបុក។
របាយការណ៍របស់ក្រសួងមហាផ្ទៃបានឱ្យដឹងថា ឆ្នាំ២០១៧កន្លងទៅនេះ ព្រះមហាក្សត្របានបន្ធូរបន្ថយ និងលើកលែងទោសដល់ទណ្ឌិតសរុបចំនួន១៥៧នាក់ ក្នុងនោះ ស្រី២០នាក់ ក្នុងពីធីបុណ្យចូលឆ្នាំប្រពៃណីខ្មែរចំនួន ៧២នាក់ ពិធីបុណ្យពិសាខបូជាចំនួន៣៥នាក់ និងពិធីបុណ្យអុំទូកបណ្ដែតប្រទីបសំពះព្រះខែ និងអកអំបុក ៥០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ