ស្នងការខេត្តស្វាយរៀងរងការចោទថា ប្រព្រឹត្តអំពើពុករលួយ ធ្វើបាបមន្ត្រីស្លូតត្រង់ និងបក្សពួកនិយម
2019.03.14
ឧត្ដមសេនីយ៍ទោ កឹង ឃន ស្នងការខេត្តស្វាយរៀង
រូប៖ ហ្វេសប៊ុក Koengkorn Khlrn
នគរបាលជាង ២០រូប និងប្រជាពលរដ្ឋ ចោទស្នងការនគរបាលខេត្តស្វាយរៀង គឺលោក កឹង ឃន ថា រំលោភអំណាច ប្រព្រឹត្តអំពើពុករលួយ និងទទួលសំណូកពីឈ្មួញជនជាតិវៀតណាម ជាថ្នូរអនុញ្ញាតឲ្យនាំទំនិញចូលកម្ពុជាតាមច្រករបៀង ៩កន្លែងក្នុងខេត្តជាប់ព្រំដែនខាងកើតមួយនេះ។ ពួកគេអះអាងថា ស្នងការរូបនេះបានបញ្ជូនសាច់ញាតិឲ្យទៅគ្រប់គ្រងច្រករបៀងគ្រប់ច្រក ដើម្បីចាំទទួលលុយពីឈ្មួញជនបរទេសនាំទំនិញខូចគុណភាពចូលដោយសេរី គ្មានការត្រូតពិនិត្យពីមន្ត្រីជំនាញ។
ពលរដ្ឋ និងនគរបាលខេត្តស្វាយរៀងនៅថ្ងៃទី១៣ មីនា អំពាវនាវឲ្យក្រសួងមហាផ្ទៃ និងអង្គភាពប្រឆាំងអំពើពុករលួយ ស៊ើបអង្កេតស្នងការខេត្តស្វាយរៀង លោក កឹង ឃន ដែលពួកគេចោទថា បានប្រព្រឹត្តអំពើពុករលួយជាច្រើនឆ្នាំមកហើយ ដោយទទួលសំណូកតាមច្រករបៀងព្រំដែនកម្ពុជា-វៀតណាម។ អំពើពុករលួយដែលស្នងការរូបនេះរងការចោទនោះ រួមមានការយកលុយពីអ្នកដឹកទំនិញ ក្នុងមួយរថយន្តចាប់ពី ២៥ម៉ឺនរៀល ដល់ ៦០ម៉ឺនរៀល និងមានទំនិញខ្លះទៀតចាប់ពី ១០០ដុល្លារ ដល់ ១៥០ដុល្លារ ជាថ្នូរអនុញ្ញាតឲ្យនាំចូលមកកម្ពុជា។
នគរបាលម្នាក់ថ្លែងក្នុងលក្ខខណ្ឌមិនបញ្ចេញឈ្មោះ និងសំឡេងអះអាងថា ស្នងការខេត្តស្វាយរៀង លោក កឹង ឃន បានប្រើអំណាចគាបសង្កត់មន្ត្រីស្លូតត្រង់ និងបញ្ជូនសាច់ញាតិឲ្យទៅគ្រប់គ្រងប៉ុស្តិ៍របៀងគ្រប់ច្រក ដើម្បីយកលុយពីឈ្មួញនាំទំនិញចូលកម្ពុជា គ្មានការត្រួតពិនិត្យលក្ខណៈបច្ចេកទេស។ លោកអះអាងថា ទំនិញដែលឈ្មួញជនជាតិវៀតណាមនាំចូល ដូចជា បន្លែ ផ្លែឈើ ត្រីសាច់ និងសាច់ជ្រូកជាដើម ពួកគេត្រូវបង់ប្រាក់ឲ្យមន្ត្រីនគរបាលតាមច្រករបៀងទាំងនោះ ពុំមែនបង់ពន្ធចូលរដ្ឋនោះទេ។
លោកបន្ថែមថា ច្រកសំខាន់ៗ ដូចជា ច្រកសំរោងក្នុងស្រុកចន្ទ្រា ក្នុងមួយយប់ៗ ស្នងការរួបនេះអាចប្រមូលលុយបានមិនក្រោម ១ម៉ឺនដុល្លារនោះទេ និងច្រកបុសមនរបស់ស្រុករំដូល ក្នុងមួយយប់មិនក្រោម ១ម៉ឺនដុល្លារដែរ ជាថ្នូរអនុញ្ញាតឲ្យនាំទំនិញចូលមកកម្ពុជាដោយសេរី។
លិខិតដែលមានហត្ថលេខារបស់មន្ត្រីនគរបាលខេត្តស្វាយរៀងជាង ២០រូប ដែលអាស៊ីសេរីទទួលបញ្ជាក់ថា នគរបាលខេត្តនេះភាគច្រើន អស់ជំនឿលើការដឹកនាំរបស់ស្នងការនគរបាលលោក កឹង ឃន ដែលពួកគេចោទថា តែងប្រើអំណាចធ្វើបាបមន្ត្រីស្មោះត្រង់ បក្សពួកនិយម និងបញ្ជូនកូនចៅសាច់ញាតិគ្រប់គ្រងច្រកព្រំដែន ឬហៅថា កន្លែងខ្លាញ់គ្រប់ទីកន្លែង។ ពួកគេស្នើសុំថ្នាក់ដឹកនាំ មេត្តាចុះស្រាវជ្រាវជាក់ស្ដែង និងផ្លាស់ប្ដូរស្នងការរូបនេះចេញពីតំណែង។ ពួកគេអះអាងថា ស្នងការរូបនេះ បានបញ្ជូនប្អូនបង្កើតជាមេវរៈការពារព្រំដែន ប្អូនធម៌ ជាមេប៉ុស្តិ៍ព្រំដែនទួលស្ដី ក្នុងស្រុកចន្ទ្រា និងប្អូនបង្កើតម្នាក់ទៀត ជាមេប៉ុស្តិ៍បុសមន ក្នុងស្រុករំដួល និងក្មួយប្រុសបង្កើតម្នាក់ទៀត ជាអធិការស្រុករំដួល។ លើសពីនេះស្នងការរូបនេះបានបើកប៉ុស្តិ៍ភាស៊ីមួយចំនួនទៀត តាមច្រកព្រំដែនក្រុងបាវិត ដូចជា នៅច្រកកំពង់ស្ពាន និងច្រកកីម៉ែ បំណងអនុញ្ញាតឲ្យឈ្មួញបង់លុយ ជាថ្នូរនាំទំនិញចូលកម្ពុជា។
ស្នងការខេត្តស្វាយរៀង លោក កឹង ឃន បានបដិសេធមិនផ្ដល់បទសម្ភាសន៍ដល់អាស៊ីសេរី ជុំវិញការចោទប្រកាន់នេះ ដោយលោកចុចផ្ដាច់ទូរស័ព្ទនៅថ្ងៃទី១៣ និង ១៤ មីនា នៅពេលអាស៊ីសេរីហៅទៅ។
អាស៊ីសេរីបានព្យាយាមទាក់ទង ប្រធានអង្គភាពប្រឆាំងអំពើពុករលួយ លោក ឱម យិនទៀង និង អ្នកនាំពាក្យក្រសួងមហាផ្ទៃ លោក ខៀវ សុភ័គ ដើម្បីសុំការអធិប្បាយរឿងនេះ តែទូរស័ព្ទហៅចូលគ្មានអ្នកទទួល និងខ្លះទៀត ចុចបិទទូរស័ព្ទនៅថ្ងៃដដែលនេះ។
ចំណែកអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ក៏មិនអាចទាក់ទងបានដែរ ព្រោះទូរស័ព្ទហៅចូលគ្មានអ្នកទទួល។
ពលរដ្ឋរស់នៅជិតព្រំដែនកម្ពុជាវៀតណាម នៃស្រុកចន្ទ្រា លោក ណិម សុខា ឲ្យដឹងថា ពួកគេតែងប្រទះឃើញ ពាណិជ្ជករជនជាតិវៀតណាមដឹកទំនិញ ដូចជា ត្រីសាច់ បន្លែ ផ្លែឈើ ជ្រូក និង ទំនិញផ្សេងៗ ទៀតជាច្រើន មកលក់នៅកម្ពុជា ដោយអាជ្ញាធរជំនាញមិនបានពិនិត្យគុណភាពទំនិញទាំងនោះឲ្យបានត្រឹមត្រូវនោះទេ ព្រោះការនាំទំនិញចូលកម្ពុជាភាគច្រើនធ្វើឡើងនៅពេលយប់។ លោកថា បាតុភាពនេះកើតឡើងជាច្រើនឆ្នាំមកហើយ មិនឃើញមានស្ថាប័នជាតិណាមួយ ស៊ើបអង្កេត ដែលជាដើមចម បង្កឲ្យប៉ះពាល់មុខរបរ សុខភាព និងអាយុជីវិតពលរដ្ឋ៖ «នាំសាច់ជ្រូក ត្រីចិញ្ចឹមដែលនាំចូលមក យើងចេញតែមានការព្រួយបារម្ភ តែមិនដឹងថាអាជ្ញាធរ និងសមត្ថកិច្ចគេគិតយ៉ាងណាទេ? ព្រោះគេច្រើនតែចេញចូលនៅពេលយប់ អំពាវនាវឲ្យ ដែនសមត្ថកិច្ចក្រសួងមហាផ្ទៃសូមមានវិធានការទប់ស្កាត់បញ្ហា ទំនិញដែលខូចគុណភាព មានជាតិគីមីច្រើនមេត្តាជួយ ត្រួតពិនិត្យផង ដើម្បីសុខភាពពលរដ្ឋទូទៅ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ចាត់ អំពើពុករលួយ ជាអាវុធសម្លាប់មនុស្សដោយប្រយោល ព្រោះទំនិញខូចគុណភាព នឹងបង្កគ្រោះថ្នាក់ដល់អាយុជីវិតពលរដ្ឋ ជីវភាព និង សេដ្ឋកិច្ចជាតិ។ លោកយល់ថា បណ្ដឹងរបស់នគរបាល មានទម្រង់គួរឲ្យចាប់អារម្មណ៍ ហើយអង្គភាពប្រឆាំងអំពើពុករលួយ និងក្រសួងមហាផ្ទៃគួរតែស៊ើបអង្កេតរឿងនេះជាបន្ទាន់ និងត្រូវមានវិធានការច្បាប់ បើរកឃើញអំពើពុករលួយ។ លោកយល់ថា ល្មមដល់ពេលវេលា អ្នកដែលស្អប់ខ្ពើមអំពើពុករលួយ ត្រូវក្រោកឈរប្រឆាំងអំពើពុករលួយ ស្របពេលដែលថ្នាក់ដឹកនាំរដ្ឋ លោក ហ៊ុន សែន ធ្លាប់ប្រកាសជំហរប្រឆាំងអំពើពុករលួយដែរនោះ ពោលគឺឈប់និយាយតែមាត់ទៅ៖ «ប្រសិនបើគេពុករលួយឲ្យនាំទំនិញដែលមានជាតិគីមី ទំនិញដែលខូចគុណភាព ពេលនោះអ្នកប្រើប្រាស់មិនដឹងទៅទិញទំនិញអស់នោះយកមក ធ្វើឲ្យខូចសុខភាពអ្នកខ្លះឈឺរហូតដល់បាត់បង់ជីវិត។ អ៊ីចឹងដើមចមវា មកពីពុករលួយដែលគេបើកដៃឲ្យមានការនាំចូលទំនិញ អ្នកដែលបើកដៃគេបានផលប្រយោជន៍ គេហៅថា ផលប្រយោជន៍ពុករលួយ ពុំមែនជារឿងតូចតាចទេ វាជារឿងធំដុំ ហើយនិយាយពីទឹកលុយ និងទឹកប្រាក់វាជារឿងមួយច្រើនដែរ បានជាមនុស្សគ្រប់គ្នាត្រូវតែចូលរួម ដើម្បីប្រឆាំងអំពើពុករលួយ ជាប្រយោជន៍ ដើម្បីការពារនូវការបាត់បង់ ទាំងធនធានសាធារណៈ និងការពារនូវអាយុជីវិតរបស់មនុស្សដែរ»។
មន្ត្រីសង្គមស៊ីវិលរូបនេះបារម្ភថា ឫសគល់នៃអំពើពុករលួយមិនត្រឹមតែបំផ្លាញធនធានសាធារណៈ និងប៉ះពាល់គោលនយោបាយកាត់បន្ថយភាពក្រីក្រយ៉ាងធំសម្បើមប៉ុណ្ណោះទេ វាជាឃាតកសម្លាប់សេដ្ឋកិច្ចជាតិលាក់មុខ ខណៈដែលការនាំចូលទំនិញខូចគុណភាព និងមានសាធារណៈគីមីមកលក់នៅកម្ពុជា នឹងបង្កឲ្យប៉ះពាល់សុខភាពពលរដ្ឋ ធ្វើឲ្យធនធានមនុស្សខ្មែរនៅថ្ងៃអនាគចុះខ្សោយបញ្ញាស្មារតី។
នគរបាលខេត្តស្វាយរៀងមួយចំនួនក៏ធ្លាប់បានផ្ញើសារទៅហ្វេសប៊ុក លោក ហ៊ុន សែន ដោយសរសេរក្នុងប្រអប់បញ្ចេញមតិ ឬ ខំមិន (Comment) របស់នាយករដ្ឋមន្ត្រីថា អំពើពុករលួយរបស់ស្នងការនគរបាលខេត្តស្វាយរៀង ខ្លាំងជាងលោក គឹម រស្មី អតីតមេបញ្ជាការអាវុធហត្ថខេត្តរតនគិរី ១០ដង។ ពួកគេក៏បានចោទថា ស្នងការនគរបាលខេត្តស្វាយរៀង លោក កឹង ឃន មានទ្រព្យមហាសាលមិនប្រក្រតី ដូចជាមានវិឡាជាច្រើនកន្លែង និងមានដីច្រើនប្លង់ មានតម្លៃរាប់លានដុល្លារ ហើយពួកគេបានស្នើសុំស្ថាប័នមានសមត្ថកិច្ចឲ្យស៊ើបអង្កេត និងអនុវត្តច្បាប់ជាធរមាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ