អង្គការផែកគ្រោងរៀបចំការប្រគំតន្រ្តីដើម្បីប្រឆាំងនឹងអំពើពុករលួយ
2009.05.28
ការប្រគំតន្រ្តីដែលមានទាំងការឆ្លើយសំណួរងាយៗដោយមានការប្រគល់រង្វាន់ផងនោះនឹងរៀបចំឡើងនៅឯពហុកីឡដ្ឋានជាតិអូឡាំពិក នៅទីក្រុងភ្នំពេញ នាថ្ងៃសៅរ៍ ទី៣០ ខែឧសភា ឆ្នាំ២០០៩នេះ ចាប់ពីម៉ោង៤កន្លះរសៀលដល់ម៉ោង៩យប់ ម៉ោងនៅទីក្រុងភ្នំពេញ។
ការប្រគំតន្រ្តីបាតដៃស្អាតស្អំរៀបចំឡើងក្នុងបំណងប្រឆាំងអំពើពុករលួយដើម្បីកាត់បន្ថយភាពក្រីក្រនៅក្នុងប្រទេសកម្ពុជា។ កម្មវិធីនេះឧបត្ថម្ភថវិកាដោយអង្គការ USAID។
អង្គការផែកបានបញ្ជាក់ឲ្យដឹងបន្ថែមថា ការប្រគំតន្រ្តីបាតដៃស្អាតស្អំនិងមានតារាកំប្លែងនិងតារាចម្រៀងល្បីៗ រួមមាននាយកុយ និង DJ ឃ្លាំង ជាដើម ចូលរួមសម្តែងដើម្បីរំឭកខួបមួយឆ្នាំដែលអង្គការសង្គមស៊ីវិលចុះប្រមូលស្នាមមេដៃបានចំនួន១លានស្នាមមេដៃពីពលរដ្ឋនៅទូទាំងប្រទេសរួមគ្នាធ្វើញត្តិដាក់ជូនរដ្ឋាភិបាលកម្ពុជាឲ្យលោកធ្វើច្បាប់ប្រឆាំងអំពើពុករលួយឲ្យបានលឿនឲ្យចេញប្រើបានជាផ្លូវការ៕