ប្រជាពលរដ្ឋ​នៅ​ខេត្ត​ប៉ៃលិន​បារម្ភ​ពី​បញ្ហា​អសន្តិសុខ

បញ្ហា​សន្តិសុខ​នៅ​ក្នុង​ខេត្ត​ប៉ៃលិន កំពុង​មាន​ស្ថានភាព​អាក្រក់​ទៅៗ ដោយសារ​ករណី​ចោរ​ប្លន់​ប្រដាប់​អាវុធ​បាន​កើត​មាន​ឡើង​ជា​បន្តបន្ទាប់ ប៉ុន្តែ​ក្រុម​សមត្ថកិច្ច​របស់​ខេត្ត​នេះ​មិន​ដែល​ចាប់​បាន​ក្រុម​ចោរ​ប្លន់​ទាំង​នោះ ដើម្បី​យក​មក​ផ្ដន្ទា​ទោស​តាម​ច្បាប់​ឡើយ។
ដោយ សួន សុផលមុន្នី
2011.07.09
Share on WhatsApp
Share on WhatsApp

អ្នក​ស្រុក​រស់​នៅ​ខេត្ត​ប៉ៃលិន បាន​អំពាវនាវ​សុំ​ឲ្យ​រាជ​រដ្ឋាភិបាល​កម្ពុជា និង​ក្រសួង​មហាផ្ទៃ ចាត់​វិធានការ​ពង្រឹង​តួនាទី​ក្រុម​មន្ត្រី​ប៉ូលិស​ផ្នែក​ព្រហ្មទណ្ឌ ដែល​បាន​ខកខាន​មិន​បាន​ចាប់​ក្រុម​ចោរ​ប្លន់​ប្រដាប់​អាវុធ​ទាំង​នោះ បើ​ទោះ​បី​មាន​ករណី​ចោរ​ប្លន់​ប្រដាប់​អាវុធ​បាន​កើត​មាន​ឡើង​ជា​បន្តបន្ទាប់​នៅ​ក្នុង​ខេត្ត​ប៉ៃលិន​នា​ឆ្នាំ​២០១១ នេះ។

ប្រភព​ពី​ក្រុម​អ្នក​ភូមិ​ដែល​សុំ​មិន​បញ្ចេញ​ឈ្មោះ បាន​ថ្លែង​ឲ្យ​ដឹង​នៅ​ថ្ងៃ​សៅរ៍ ទី​៩ ខែ​កក្កដា ថា ភាព​ភ័យ​ខ្លាច​ពី​កត្តា​សន្តិសុខ​ក្នុង​មូលដ្ឋាន​កំពុង​កើត​មាន​ទៅ​លើ​ប្រជាពលរដ្ឋ​គ្រប់​មជ្ឈដ្ឋាន ទាំង​ក្រុម​អាជីវករ និង​អ្នក​ស្រុក​ធ្វើ​ស្រែ​ចម្ការ ដោយសារ​ករណី​ប្លន់​ប្រដាប់​អាវុធ​នៅ​ក្នុង​ខេត្ត​ប៉ៃលិន ៖ «ប្រជាពលរដ្ឋ​នៅ​ខេត្ត​ប៉ៃលិន គាត់​ភ័យ​ខ្លាច​ករណី​ហ្នឹង​ឯង អ្នក​ខ្លះ​គាត់​ល្ងាច​ឡើង​ម៉ោង ៤​មិន​ទាន់​គាត់​បិទ​ទ្វារ​អស់​ហើយ។ ប្លន់​ច្រើន​ដង។ ករណី​ប្លន់​ទូរ​មាស​មួយ​ទៀត ប្លន់​ដោយ​ស្ងាត់ ចូល​ទៅ​ភ្ជង់​យក​លុយ ប៉ុន្តែ​គេ​បិទ គេ​អត់​និយាយ​ទេ​អា​ហ្នឹង»

ក្ដី​កង្វល់​របស់​អ្នក​ភូមិ​កើត​មាន​កាន់​តែ​ខ្លាំង​ថែម​ទៀត នៅ​គ្រា​ដែល​ក្រុម​ចោរ​មាន​គ្នា​ពីរ​នាក់ បាន​ធ្វើ​សកម្មភាព​ចូល​ប្លន់​គ្រឹះស្ថាន​មីក្រូ​ហិរញ្ញវត្ថុ​ប្រាសាក់ ស្ថិត​នៅ​ភូមិ​អូរតាពុកលើ សង្កាត់​ប៉ៃលិន ខេត្ត​ប៉ៃលិន កាល​ពី​រសៀល​ថ្ងៃ​សុក្រ ទី​៨ ខែ​កក្កដា ឆ្នាំ​២០១១។

ប្រភព​ពី​សាក្សី​ឃើញ​ហេតុការណ៍​ឲ្យ​ដឹង​ថា ក្រុម​ចោរ​មាន​គ្នា ២​នាក់ ជិះ​ម៉ូតូ ១​គ្រឿង ស្លៀក​ពាក់​ស៊ីវិល ម្នាក់​ពាក់​មួក​សុវត្ថិភាព និង​ម្នាក់​ទៀត​ពាក់​ម៉ាស់​មុខ ប្រដាប់​ដោយ​អាវុធ​ខ្លី​ពីរ​ដើម បាន​ចូល​ទៅ​ធ្វើ​សកម្មភាព​ប្លន់​នៅ​ពេល​ដែល​សន្តិសុខ​ម្នាក់ និង​បុគ្គលិក​ស្ត្រី​ផ្នែក​គណនេយ្យ​ម្នាក់​នៃ​គ្រឹះស្ថាន​មីក្រូ​ហិរញ្ញវត្ថុ​ប្រាសាក់ កំពុង​ធ្វើ​ការ​នៅ​គ្រា​នោះ។

ប្រភព​បាន​បន្ត​ថា ក្រោយ​ពី​ធ្វើ​សកម្មភាព​ប្លន់​ប្រមូល​លុយ​បាន​រួច​ហើយ ក្រុម​ចោរ​ប្លន់​បាន​ជិះ​ម៉ូតូ​ចេញ​ទៅ​បាត់ ដោយ​ពុំ​មាន​ឃើញ​សមត្ថកិច្ច​ប៉ូលិស​ដេញ​តាម​ចាប់​ឡើយ។ នៅ​ក្នុង​សកម្មភាព​ប្លន់​នេះ ក្រុម​ចោរ​បាន​បាញ់​ទៅ​លើ​សន្តិសុខ​ម្នាក់​ឱ្យ​រង​របួស​ស្រាល បន្ទាប់​មក​ក្រុម​ចោរ​បាន​ចូល​ទៅ​ភ្ជង់​លើ​បុគ្គលិក​របស់​ស្ថាប័ន​មីក្រូ​ហិរញ្ញវត្ថុ​ប្រាសាក់​ដើម្បី​យក​ប្រាក់ ៖ «បើ​យើង​គិត​ជា​លុយ​បាត លុយ​ខ្មែរ លុយ​ដុល្លារ សរុប​ទាំង​អស់​ជិត ១​ម៉ឺន​ដុល្លារ។ លុយ​ដុល្លារ​អស់ ៥.៦០៣​ដុល្លារ ហើយ​លុយ​បាត​អស់ ២៥.៥៨៥​បាត និង​លុយ​ខ្មែរ​អស់ ៩.១២៧.២០០​រៀល»

ក្រុម​អ្នក​ភូមិ​បាន​រិះគន់​ថា នៅ​ក្រោយ​ការ​ប្លន់ ក្រុម​ប៉ូលិស​ព្រហ្មទណ្ឌ​នៃ​ស្នងការដ្ឋាន​នគរបាល​ខេត្ត​ប៉ៃលិន បាន​ចុះ​ទៅ​ធ្វើ​កំណត់​ហេតុ ប៉ុន្តែ​គេ​មិន​ឃើញ​ក្រុម​ប៉ូលិស​បញ្ជា​កង​កម្លាំង​ក្នុង​ការ​ដេញ​តាម​ចាប់​ក្រុម​ចោរប្លន់​ទាំង​ពីរ​នោះ​ឡើយ។

លោក ជា ចាន់ឌិន ស្នងការ​រង​ទទួល​បន្ទុក​ព្រហ្មទណ្ឌ នៅ​មិន​ទាន់​អាច​ទាក់ទង​សុំ​សេចក្ដី​បញ្ជាក់​ទាក់ទិន​ករណី​ប្លន់​ខាង​លើ​នេះ និង​ក្ដី​ព្រួយ​បារម្ភ​របស់​អ្នក​ភូមិ​នេះ​បាន​ឡើយ។ ប៉ុន្តែ​លោក អ៊ួន វិន អធិការ​នគរបាល​ក្រុង​ប៉ៃលិន បាន​មាន​ប្រសាសន៍​ថា សមត្ថកិច្ច​កំពុង​ធ្វើការ​ស្រាវជ្រាវ​ក្នុង​ករណី​នេះ ៖ «ឥឡូវ​ហ្នឹង យើង​កំពុង​ធ្វើការ​ស្រាវជ្រាវ​ទៀត មាន​ខាង​ការិយាល័យ​កោសល្យវិច័យ គេ​កំពុង​ធ្វើ​ជាមួយ​ខាង​ខេត្ត»

ក្រុម​អ្នក​ភូមិ​បាន​ដាក់​ការ​សង្ស័យ​ថា ករណី​ប្លន់​ប្រដាប់​អាវុធ​កើត​ឡើង​ច្រើន​លើក​នៅ​ក្នុង​ខេត្ត​ប៉ៃលិន បណ្ដាល​មក​ពី​មាន​មនុស្ស​នៅ​ខាង​ក្នុង​ខេត្ត​ប៉ៃលិន ជា​អ្នក​ផ្ដល់​ព័ត៌មាន​ឲ្យ​ចោរ​ពី​ខាង​ក្រៅ​ចូល​ទៅ​ធ្វើ​សកម្មភាព​ប្លន់ ៖ «ការ​ពិត​វា​មាន​អ្នក​នៅ​ក្នុង​គូស​ផែន​ទី​ឲ្យ មិន​មែន​ប្រជាជន​គាត់​ទៅ​ធ្វើ​អ៊ីចឹង​កើត​ទេ ទាល់​តែ​ចាប់​ចោរ​ហ្នឹង​បាន ចោរ​ឆ្លើយ​ដាក់​បាន​វា​ចេញ។ រាជ​រដ្ឋាភិបាល​ជួយ​មើល​ខេត្ត​ប៉ៃលិន តែ​ពីរ​ស្រុក​សោះ ហើយ​ចោរ​ប្លន់​ទាំង​ថ្ងៃៗ មិន​ដែល​ចាប់​ចោរ​បាន​ផង​ហ្នឹង តើ​សមត្ថកិច្ច​អស់​លោក​គាត់​ធ្វើ​អី​ខ្លះ?»

ទាក់ទិន​ក្តី​ព្រួយ​បារម្ភ​របស់​ប្រជាពលរដ្ឋ​នេះ លោក សៅ សារ៉ាត់ នាយ​ខុទ្ទកាល័យ​សាលា​ខេត្ត​ប៉ៃលិន បាន​មាន​ប្រសាសន៍​ថា គណៈ​បញ្ជា​ការ​ឯកភាព​ខេត្ត បាន​ធ្វើ​ការ​កោះ​ស្នងការ ស្នងការ​រង​នៃ​នគរបាល​ខេត្ត​ប៉ៃលិន និង​ស្ថាប័ន​ពាក់ព័ន្ធ ដើម្បី​ប្រជុំ​ធ្វើ​ការ​ណែនាំ​ជា​បន្តបន្ទាប់ ប៉ុន្តែ​មាន​ករណី​មួយ​ចំនួន ក្រុម​សមត្ថកិច្ច​ប៉ូលិស​ធ្វើ​ពុំ​បាន​សម្រេច​តាម​សំណូមពរ​នោះ​ឡើយ។

ប្រភព​ពី​អ្នក​ខេត្ត​ប៉ៃលិន បាន​ឲ្យ​ដឹង​ថា នៅ​ឆ្នាំ​២០១១​នេះ យ៉ាង​ហោច​ណាស់​មាន​ករណី​ប្លន់​ទូរ​មាស ប្លន់​កន្លែង​ប្តូរ​ប្រាក់ បូក​នឹង​ការ​ប្លន់​គ្រឹះស្ថាន​មីក្រូ​ហិរញ្ញវត្ថុ​ប្រាសាក់ កាល​ពី​ពេល​ថ្មីៗ​នេះ ប៉ុន្តែ​ក្រុម​នគរបាល​ខេត្ត​ប៉ៃលិន នៅ​មិន​ទាន់​បាន​ចាប់​ក្រុម​ចោរ​ប្លន់​ទាំង​នោះ​យក​មក​ផ្ដន្ទា​ទោស​តាម​ច្បាប់​បាន​នោះ​ឡើយ ដែល​បញ្ហា​នេះ​បាន​ធ្វើ​ឲ្យ​ក្រុម​ប្រជាពលរដ្ឋ​មាន​ក្ដី​ព្រួយ​បារម្ភ​កាន់​តែ​ខ្លាំង​ថែម​ទៀត៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Jul 11, 2011 08:56 PM

SaMai Dacho? Dacho regime, the police are not well paid. They may do the robbery. Because ordinary people have no access to weapon.