លោក ស ខេង និង​លោក សាយ ឈុំ ទទួល​គោរមងារ​ជា "សម្ដេច"

ដោយ យាង សុជាមេត្តា
2015-06-14
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​មហាផ្ទៃ លោក ស ខេង (ឆ្វេង) និង​ប្រធាន​ព្រឹទ្ធ​សភា លោក សាយ ឈុំ។
រដ្ឋមន្ត្រី​ក្រសួង​មហាផ្ទៃ លោក ស ខេង (ឆ្វេង) និង​ប្រធាន​ព្រឹទ្ធ​សភា លោក សាយ ឈុំ។
Photo: RFA

ព្រះមហាក្សត្រ សម្ដេច​ព្រះ​បរមនាថ នរោត្តម សីហមុនី នៅ​ថ្ងៃ​ទី​១៤ ខែ​មិថុនា ប្រោស​ព្រះរាជទាន​គោរមងារ​ជា "សម្ដេច" ដល់​សមាជិក​ថ្នាក់ដឹកនាំ​កំពូល​របស់​គណបក្ស​ប្រជាជន​កម្ពុជា ២​រូប គឺ​លោក ស ខេង លោក សាយ ឈុំ។ ចំណែក​គណបក្ស​ប្រឆាំង​វិញ យល់​ឃើញ​ថា ការ​ព្រះ​រាជទាន​គោរមងារ "សម្ដេច" ទៅ​ឲ្យ​មន្ត្រី​ណា​ម្នាក់ គឺ​ជា​សិទ្ធិ​របស់​ព្រះមហាក្សត្រ។

លោក ស ខេង និង​លោក សាយ ឈុំ គឺ​ជា​បុគ្គល​ទី​៦ និង​ទី​៧ ហើយ​ដែល​ចេញ​មក​ពី​គណបក្ស​ប្រជាជន​កម្ពុជា ដែល​ត្រូវ​បាន​ព្រះមហាក្សត្រ​ខ្មែរ​ប្រទាន​គោរមងារ​ជា "សម្ដេច"។

លោក ស ខេង បច្ចុប្បន្ន​គឺ​ជា​សមាជិក​គណៈ​អចិន្ត្រៃយ៍​នៃ​គណៈកម្មាធិការ​កណ្ដាល​គណបក្ស​ប្រជាជន​កម្ពុជា និង​ជា​រដ្ឋមន្ត្រី​ក្រសួង​មហាផ្ទៃ ត្រូវ​បាន​ព្រះមហាក្សត្រ ព្រះរាជទាន​គោរមងារ​ជា "សម្ដេច​ក្រឡាហោម ស ខេង"។ ចំណែក​ឯ​លោក សាយ ឈុំ ដែល​ជា​សមាជិក​គណៈ​អចិន្ត្រៃយ៍​នៃ​គណៈកម្មាធិការ​កណ្ដាល​គណបក្ស​ប្រជាជន​កម្ពុជា និង​ជា​ប្រធាន​ព្រឹទ្ធ​សភា​ទទួល​គោរមងារ​ជា "សម្ដេច​វិបុល​សេនា​ភក្ដី សាយ ឈុំ"។

​ព្រះរាជក្រឹត្យ​របស់​ព្រះមហាក្សត្រ​បញ្ជាក់​ថា លោក ស ខេង និង​លោក សាយ ឈុំ គឺ​ជា​អ្នក​ដឹកនាំ​ដ៏​ឆ្នើម​ជា​ទី​គោរព​ស្រឡាញ់​របស់​ប្រជារាស្ត្រ បាន​ចូល​រួម​ដឹកនាំ​ប្រជាជាតិ​កម្ពុជា បាន​កសាង​នូវ​សន្តិភាព ស្ថិរភាព ឯកភាព សេដ្ឋកិច្ច និង​ការ​អភិវឌ្ឍ​ជាតិ​លើ​គ្រប់​វិស័យ បាន​ចូលរួម​កសាង​ប្រព័ន្ធ​ច្បាប់​ការពារ​លទ្ធិប្រជាធិបតេយ្យ បាន​រក្សា​នូវ​ឯករាជ្យ​ជាតិ បូរណភាព​ទឹក​ដី មាន​ស្វាមី​ភក្តិ​ចំពោះ​រាជ​បល្ល័ង្ក ការពារ​និង​គោរព​ព្រះពុទ្ធ​សាសនា ព្រមទាំង​ការពារ​យុត្តិធម៌​សង្គម ដើម្បី​និរន្ត​ភាព​រាជា​និយម​ជាដើម។

​ចាប់​តាំង​ពី​ឆ្នាំ​១៩៩៣ មក ព្រះមហាក្សត្រ​បាន​ព្រះរាជទាន​គោរមងារ​ដល់​ថ្នាក់ដឹកនាំ​ជាន់​ខ្ពស់ និង​មន្ត្រី​គណបក្ស​ប្រជាជន​កម្ពុជា សរុប​ចំនួន ៧​រូប​ហើយ ក្នុង​នោះ​រួម​មាន​សព​លោក ជា ស៊ីម ដែល​មាន​គោរមងារ​ជា "សម្ដេច​អគ្គ​មហា​ធម្ម​ពោធិសាល ជា ស៊ីម" លោក ហេង សំរិន ជា "សម្តេច​អគ្គ​មហា​ពញា​ចក្រី ហេង សំរិន" លោក ហ៊ុន សែន ជា "សម្តេច​អគ្គ​មហា​សេនាបតី​តេជោ ហ៊ុន សែន" លោក គង់ សំអុល ជា "សម្ដេច​ចៅហ្វា​វាំង វរវៀងជ័យ អធិបតី​ស្រឹង្គារ គង់ សំអុល" ភរិយា​លោក ហ៊ុន សែន គឺ​អ្នកស្រី ប៊ុន រ៉ានី មាន​គោរព​ងារ​ជា "សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន" និង​ពេល​នេះ​គឺ "​សម្ដេច​ក្រឡាហោម ស ខេង" និង "សម្ដេច​វិបុល​សេនា​ភក្ដី សាយ ឈុំ"។

​ជុំវិញ​ការ​ប្រទាន​គោរមងារ​ជា "សម្ដេច" ដល់​លោក ស ខេង និង​លោក សាយ ឈុំ នេះ ត្រូវ​បាន​គណបក្ស​សង្គ្រោះ​ជាតិ លើក​ឡើង​ថា វា​ជា​សិទ្ធិ និង​ជា​ព្រះរាជ​តម្រិះ​របស់​ព្រះមហាក្សត្រ។

អ្នក​នាំ​ពាក្យ​គណបក្ស​សង្គ្រោះ​ជាតិ លោក យឹម សុវណ្ណ ថ្លែង​ថា លោក​មិន​អាច​ធ្វើ​អត្ថាធិប្បាយ​ចំពោះ​ការ​សម្រេច​ព្រះទ័យ​របស់​ព្រះមហាក្សត្រ​ថា បែប​ណា​នោះ​ទេ ចំពោះ​ព្រះរាជទាន​គោរមងារ​ដល់​មន្ត្រី​ជាន់​ខ្ពស់​របស់​គណបក្ស​កាន់​អំណាច​ពេល​នេះ។ យ៉ាង​ណា​ក៏ដោយ លោក​មាន​ប្រសាសន៍​ថា ទង្វើ​របស់​មនុស្ស​គ្រប់​រូប​គឺ​មាន​គុណសម្បត្តិ​ផង និង​គុណវិបត្តិ​ផង ហើយ​លោក​ថា ការ​វិនិច្ឆ័យ​ទៅ​លើ​បុគ្គល​អ្នក​នយោបាយ​ណា​ម្នាក់​ថា ល្អ ឬ អាក្រក់​នោះ វា​នឹង​ឆ្លុះ​បញ្ចាំង​ទៅ​តាម​ឆន្ទៈ​របស់​ប្រជាពលរដ្ឋ។

​លោក យឹម សុវណ្ណ៖ «ខ្ញុំ​យល់​ឃើញ​ថា អ្នក​នយោបាយ​ទាំង​អស់ អ្នក​ដែល​ទទួល​បាន​នូវ​តួនាទី​ទាំង​អស់ ទទួល​នូវ​តំណែង​ទាំង​អស់ ខិតខំ​ធ្វើ​នូវ​ទង្វើ​ល្អ ការពារ​ផលប្រយោជន៍​ជាតិ ប្រជាពលរដ្ឋ រួម​គ្នា​ដោះស្រាយ​បញ្ហា បង្កើត​នូវ​វប្បធម៌​មួយ​ដែល​មាន​សន្តិភាព​ប្រកប​ដោយ​យុត្តិធម៌ ហើយ​ធ្វើ​ឲ្យ​ប្រជាពលរដ្ឋ​មាន​ជំនឿ មាន​ការ​ទុក​ចិត្ត​ទៅ​លើ​អ្នកនយោបាយ»

ការ​ប្រោស​ព្រះរាជទាន​គោរមងារ "សម្ដេច" ដល់​លោក ស ខេង និង​លោក សាយ ឈុំ ដោយ​ព្រះមហាក្សត្រ​នៅ​ពេល​នេះ ធ្វើ​ឡើង​មិន​ដល់​មួយ​សប្ដាហ៍​ផង​ក្រោយ​ពី​លោក ជា ស៊ីម អតីត​ប្រធាន​គណបក្ស​ប្រជាជន​កម្ពុជា និង​ជា​ប្រធាន​ព្រឹទ្ធ​សភា​ទទួល​មរណភាព និង​ក្រោយ​ពី​លោក សាយ ឈុំ ត្រូវ​បាន​សមាជិក​ព្រឹទ្ធ​សភា បោះឆ្នោត​ជ្រើសតាំង​ជា​ប្រធាន​ព្រឹទ្ធ​សភា​ទទួល​តំណែង​ពី​សព​លោក ជា ស៊ីម កាល​ពី​ថ្ងៃ​ទី​៩ ខែ​មិថុនា។

អ្នក​វិភាគ​នយោបាយ​ឯករាជ្យ លោក​បណ្ឌិត រស់ រ៉ាវុធ កត់សម្គាល់​ថា ការ​ប្រទាន​គោរមងារ​ដល់​លោក ស ខេង និង​លោក សាយ ឈុំ ក្នុង​ពេល​នេះ គឺ​ធ្វើ​ឡើង​ដើម្បី​ឲ្យ​ស្រប​ទៅ​នឹង​សភាពការណ៍ បន្ទាប់​ពី​លោក ជា ស៊ីម ទទួល​មរណភាព​ប៉ុណ្ណោះ៖ «ការ​ផ្ដល់​គោរមងារ​នេះ គឺ​អាស្រ័យ​ទៅ​លើ​ព្រះមហាក្សត្រ​ដែល​លោក​ទត​ឃើញ​ថា បុគ្គល​ណា​ដែល​មាន​ស្នាដៃ​សម្រាប់​ជាតិ នោះ​លោក​មាន​សិទ្ធិ​ប្រគល់ នេះ​ជា​សិទ្ធិ​របស់​ព្រះមហាក្សត្រ»

​លោក ស ខេង គឺ​ជា​សមាជិក​ជាន់​ខ្ពស់​របស់​គណបក្ស​ប្រជាជន​កម្ពុជា លំដាប់​ទី​៤ បន្ទាប់​ពី​សព​លោក ជា ស៊ីម ដែល​ជា​អតីត​ប្រធាន លោក ហ៊ុន សែន ជា​អនុ​ប្រធាន និង​លោក ហេង សំរិន ជា​ប្រធាន​កិត្តិយស។ ការ​ប្រទាន​គោរមងារ "សម្ដេច" ដល់​លោក ស ខេង ខណៈ​ដែល​គណបក្ស​ប្រជាជន​កម្ពុជា កំពុង​ត្រៀម​បោះឆ្នោត​ជ្រើសរើស​ប្រធាន និង​អនុ​ប្រធាន​គណបក្ស​ក្នុង​ពេល​ខាង​មុខ​នេះ ដែល​អ្នក​វិភាគ​មើល​ឃើញ​ថា លោក ស ខេង អាច​នឹង​ត្រូវ​គណបក្ស​ជ្រើសរើស​ធ្វើ​ជា​អនុ​ប្រធាន​បក្ស​ជំនួស​លោក ហ៊ុន សែន ដែល​គេ​រំពឹង​ថា នឹង​ឡើង​ទៅ​កាន់​តំណែង​ជា​ប្រធាន​បក្ស​បន្ត​ពី​សព​លោក ជា ស៊ីម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (23)
Share

អឹម ឡៃ

ពី ភ្នំពេញ

នេះជាលើកទឹកចិត្តដល់បុគ្គលដែលមានស្នាដៃចំពោះប្រទេសជាតិ ក្នុងនាមខ្ញុំបាទជាពលរដ្ឋខ្មែរ សូមគាំទ្រនូវទឹកប្រទៃដ៍ល្អរបព្រះមហាក្សត្រ ។

Jul 25, 2015 11:46 PM

អ្នក​អាន​អនាមិក

ហ្វូងអស់នេះថយក្រោយលែងបានហើយ ចាំតែថ្ងៃ ដូច្នេះពួយម៉ាអស់ដៃហ្ម័ង់

Jun 17, 2015 01:02 AM

Kum Nith Thmey

ពី PP

បើនរណាមានសមត្ថភាព ទៅដោះស្រាយបញ្ហាព្រំប្រទល់ "ខ្មែរ-យួន" បានតាមបំណងរបស់ប្រជារាស្រ្ត ដោយផ្អែកលើផែនទីត្រឹមត្រូវដែលអន្តរជាតិ -អង្គការសហប្រជាជាតិទទួលស្គាល់ គោរម្យងារជា "សម្តេច"​ ពិតជាប្រសើពេកពន់។

Jun 16, 2015 09:46 PM

អ្នក​អាន​អនាមិក

នេះហើយសុទ្ធតែពួកទ្រឹស្ដី ទុកក៏មិនចំណេញ ដកចេញក៏មិនខាត

Jun 15, 2015 10:36 PM

អ្នក​អាន​អនាមិក

It's very shameful, Cambodia is full KINGS while 90% of the population live under the world poverty line. Those KINGS should be ashamed of themselves because they failed to perform their duties as KING. They failed to improve the lives of their fellow citizens, they're only look out for themselves!

Jun 15, 2015 06:34 PM

មើល​មតិ​ទាំង​អស់.

គេហទំព័រ​ទាំងមូល