គណបក្ស២ដាក់ពាក្យប្ដឹងអ្នកបំផ្លាញស្លាកគណបក្សនៅបាត់ដំបង
2016.07.10
មន្ត្រីគណបក្សសង្គ្រោះជាតិ ក្រុងបាត់ដំបង និងមន្ត្រីគណបក្សខ្មែរដើម្បីខ្មែរ បានដាក់ពាក្យប្ដឹងទៅអង្គការសង្គមស៊ីវិល និងនគរបាលរដ្ឋបាលប៉ុស្តិ៍សង្កាត់រតនៈ ដើម្បីជួយអន្តរាគមន៍ចាប់ជនដែលបានបំផ្លាញស្លាកគណបក្សទាំង២ ផ្ដន្ទាទោសតាមផ្លូវច្បាប់។
ស្លាកសញ្ញាគណបក្សសង្គ្រោះជាតិ និងគណបក្សខ្មែរដើម្បីខ្មែរ នៅជាប់ផ្លូវជាតិលេខ៥ ខេត្តបាត់ដំបង ត្រូវបានម្ចាស់ស្ថានីយសាំងសូគីម៉ិច សាខាក្បែរលោកតាដំបងគ្រញូង ដកចោល ដោយចោទប្រកាន់ថា ដាក់នៅលើដីរបស់ខ្លួន។
មន្ត្រីគណបក្សខ្មែរដើម្បីខ្មែរ និងគណបក្សសង្គ្រោះជាតិ ក្រុងបាត់ដំបង បានប្រតិកម្មភ្លាមៗ ទៅនឹងការបំផ្លាញស្លាកសញ្ញាគណបក្សរបស់ខ្លួននេះ ថាជាការរើសអើងគណបក្សនយោបាយហួសហេតុ មិនអាចទទួលយកបានឡើយ។
អនុប្រធានគណបក្សខ្មែរដើម្បីខ្មែរ អ្នកស្រី ឃីង ម៉េងលី មានប្រាប់វិទ្យុអាស៊ីសេរី ពីទីកន្លែងបំផ្លាញស្លាកគណបក្ស នៅចិញ្ចើមផ្លូវជាតិលេខ៥ ក្បែររង្វង់មូលលោកដំបងគ្រញូង ក្រុងបាត់ដំបងថា ម្ចាស់ស្ថានីយសាំងសូគីម៉ិច សាខាលោកដំបងគ្រញូង កាលពីព្រឹកថ្ងៃទី៩ ខែកក្កដា បានបញ្ជាឲ្យបុគ្គលិករបស់ខ្លួនដកបង្គោលស្លាកគណបក្សរបស់អ្នកស្រីផ្ដួលទៅនឹងដី និងបាននិយាយគំរាមកំហែងអ្នកស្រីដោយប្រាប់ថា ប្រញាប់ដកស្លាកចេញពីដីក្រុមហ៊ុនជាបន្ទាន់ បើមិនដូច្នោះទេប្រយ័តមិនរួចខ្លួន។
អ្នកស្រីហៅការគំរាមកំហែងនេះថា ជាការរើសអើងនយោបាយមកលើគណបក្សអ្នកស្រីមិនអាចទទួលយកបានឡើយ៖ «ខ្ញុំរត់មកប្រាប់គាត់ ឲ្យកូនចៅដាំស្លាកឲ្យខ្ញុំវិញ ហើយគាត់កុំខ្លាំងប្រយ័ត្នរត់មិនផុតពីកន្លែងសូគីម៉ិចនេះ ខ្ញុំនិយាយថា បងឯងចង់សម្លាប់ខ្ញុំដោយសារតែរើសអើងនយោបាយឬ? ព្រោះខ្ញុំមិនបានធ្វើអ្វីខុសនោះទេ»។
ស្លាកគណបក្សទាំងពីរនេះនៅចម្ងាយពីគ្នាប្រមាណ ២០ម៉ែត្រ ត្រូវគេដកចោលក្នុងថ្ងៃតែមួយ នៅចិញ្ចើមផ្លូវជាតិលេខ៥ សង្កាត់រតនៈ ក្រុងបាត់ដំបង។ ចំពោះស្លាកគណបក្សសង្គ្រោះជាតិ ចំនួនមួយផ្ទាំងត្រូវគេបំផ្លាញដោយកាត់សរសេររួចយកទៅបោះចោលជាប់របងស្ថានីយសាំងសូគីម៉ិច។
អនុប្រធានគណៈកម្មការប្រតិបត្តិគណបក្សសង្គ្រោះជាតិ លោក យួម ដូង មានប្រសាសន៍ខណៈចុះទៅពិនិត្យស្លាកគណបក្សកាលពីរសៀលថ្ងៃទី៩ កក្កដា ថា ស្លាកគណបក្សរបស់ខ្លួនលើកបញ្ឈរនៅទីកន្លែងកើតហេតុ តាំងពីឆ្នាំ២០១៣ មក ដោយពុំមានបញ្ហាអ្វីនោះទេ។
លោកបញ្ជាក់ថា ករណីនេះជាលើកទី២ហើយក្នុងឆ្នាំ២០១៦ ដែលជនមិនស្គាល់មុខលួចកាត់បំផ្លាញស្លាកគណបក្សសង្គ្រោះជាតិ យកទៅបោះចោលនោះ។ ទោះបីជាយ៉ាងណា លោកអះអាងថា ពុំដឹងថាជនមិនស្គាល់មុខដែលលួចបំផ្លាញស្លាកគណបក្សជានរណានៅឡើយ។ លោកហៅការបំផ្លាញស្លាកគណបក្សនេះថា ជនមិនស្គាល់មុខមានចេតនាគំរាមកំហែងផ្នែកនយោបាយមកលើគណបក្សប្រឆាំងថ្នាក់មូលដ្ឋាន៖ «ខ្ញុំប្ដឹងទាមទារចំនួន ២ករណីទីមួយ ទាមទារសំណងខូចខាត ៤លានរៀល និងសុំឲ្យសមត្ថកិច្ចតាមដាន និងផ្ដន្ទាទោសជនល្មើសទៅតាមផ្លូវច្បាប់»។
វិទ្យុអាស៊ីសេរី មិនអាចទាក់ទងម្ចាស់ស្ថានីយសាំងសូគីម៉ិច សាខារង្វង់មូលក្រុងបាត់ដំបង ដើម្បីឆ្លើយតបជុំការចោទប្រកាន់នេះបានទេ នៅថ្ងៃទី១០ ខែ កក្កដា។ ដោយអ្នកទទួលទូរស័ព្ទរបស់លោកប្រាប់ថា មេរបស់ខ្លួនមិននៅក្បែរលោកនោះទេ៖ «បាទ! អត់ទេ ចាំខ្ញុំទូរស័ព្ទប្រាប់គាត់ឲ្យទាក់ទងទៅបងវិញ»។
រីឯនាយប៉ុស្តិ៍នគរបាលសង្កាត់រតនៈ លោក សេង ឌី មានប្រសាសន៍ថា បន្ទាប់ពីទទួលដំណឹងភ្លាមលោកបានទៅពិនិត្យដល់ទីកន្លែង និងបានធ្វើរបាយការណ៍បញ្ជូនថ្នាក់លើដើម្បីដោះស្រាយបញ្ហានេះបន្តទៀត៖ «បាទ! រឿងនេះខ្ញុំបានចារបញ្ជូនទៅថ្នាក់ក្រុងដោះស្រាយហើយ ព្រោះរឿងដាក់ស្លាកគណបក្សនយោបាយ ជាការងារដែលគណបក្សបានសុំច្បាប់ទៅសាលាសង្កាត់ និងខាងក្រុង»។
ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី ដែលបានចុះទៅអង្កេតដល់ទីកន្លែងបំផ្លាញស្លាកគណបក្ស មានប្រសាសន៍ថា ស្លាកគណបក្សទាំង២ ដាក់នៅចិញ្ចើមផ្លូវសាធារណៈ មិនប៉ះពាល់ទៅលើដីឯកជននោះឡើយ។
លោកហៅការដកស្លាកគណបក្សទាំង២នេះ ថាជាការបំផ្លាញទ្រព្យសម្បត្តិឯកជនដោយខុសច្បាប់ ដែលអាជ្ញាធរពាក់ព័ន្ធត្រូវចាប់ជនបង្កបញ្ហាមកផ្ដន្ទាទោសទៅតាមនីតិវិធី ដើម្បីជាគំរូល្អនៅក្នុងសង្គមជាតិ៖ «ស្លាកគណបក្សសង្គ្រោះជាតិ បានដាក់យូរឆ្នាំមកហើយ ហេតុអីបានជារឿងនេះទើបមានអ្នកមកបំផ្លាញស្លាកគណបក្សនៅពេលនេះទៅវិញ? ប្រសិនបើមានអ្នកមិនពេញចិត្តគណបក្សក៏មិនគួរធ្វើបែបនេះឡើយ»។
លោក យិន ម៉េងលី កត់សំគាល់ទៀតថា សកម្មភាពនេះជាករណីនយោបាយកើតឡើងដោយសារជិតដល់ថ្ងៃបោះឆ្នោតឃុំសង្កាត់នៅកម្ពុជា នាខែមិថុនា ឆ្នាំ២០១៧។
គណបក្សទាំង២ បានដាក់ពាក្យប្ដឹងទៅមន្ត្រីនគរបាលរដ្ឋបាលប៉ុស្តិ៍ សង្កាត់រតនៈ និងប្ដឹងទៅសមាគមការពារសិទ្ធិមនុស្សអាដហុក ខេត្តបាត់ដំបង ដើម្បីទាមទារសំណងខូចខាតពីជនបង្ក និងសុំឲ្យសមត្ថកិច្ចចាប់ជនដៃដល់ផ្ដន្ទាទោសតាមច្បាប់ឲ្យបានឆាប់រហ័ស។
ច្បាប់រដ្ឋធម្មនុញ្ញមាត្រា ៤២ចែងថា ប្រជាពលរដ្ឋខ្មែរមានសិទ្ធិបង្កើតសមាគមនិងគណបក្សនយោបាយ។ សិទ្ធិនេះត្រូវកំណត់ក្នុងច្បាប់។ ពលរដ្ឋខ្មែរទាំងឡាយអាចចូលរួមក្នុងអង្គការមហាជន ជួយគ្នាទៅវិញទៅមកការពារសមិទ្ធិផលជាតិ និងសណ្ដាប់ធ្នាប់សង្គម៕