ក្រុមប្រឹក្សា​ឃ្លាំមើល​កម្ពុជា​ថា ជា​រឿង​អាម៉ាស់ ដែល​របប​ក្រុង​ភ្នំពេញ​ខឹង​សម្បារ​នឹង​ការ​ពិត​រឿង​​វៀតណាម​ឈ្លានពាន​កម្ពុជា

ដោយ ទីន ហ្សាការីយ៉ា
2019-06-10
អ៊ីម៉ែល
មតិ
Share
បោះពុម្ព

ក្រុម​ប្រឹក្សា​ឃ្លាំមើល​កម្ពុជា​ដែល​មាន​មូលដ្ឋាន​នៅ​ប្រទេស​ន័រវេស (Norway) ​ជំរុញ​​របប​ក្រុង​ភ្នំពេញ​ឱ្យ​​បញ្ឈប់​ប្រតិកម្ម​តប​ត​នឹង​មេ​ដឹក​នាំ​សិង្ហបុរី ជុំ​វិញ​រឿង​វៀតណាម​ឈ្លាន​ពាន​កម្ពុជា​នៅ​ទសវត្ស​ទី៨០។ ក្រុម​ប្រឹក្សា​នេះ​ថា អ្វី​ដែល​របប​ក្រុង​ភ្នំពេញ​ត្រូវ​ធ្វើ​នោះ គឺ​ស្ដារ​ឡើង​វិញ​នូវ​លទ្ធិ​ប្រជាធិបតេយ្យ និង​ការ​គោរព​សិទ្ធិ​មនុស្ស ដែល​របប​នេះ​បាន​វាយ​បំផ្លាញ​ចោល កាល​ពី​ពេល​កន្លង​ទៅ។

ក្រុម​ប្រឹក្សា​ឃ្លាំមើល​កម្ពុជា​សម្ដែង​ការ​សោក​ស្ដាយ​ចំពោះ​របប​លោក ហ៊ុន សែន ដែល​បញ្ចេញ​ប្រតិ​កម្ម​មិន​ទទួល​ស្គាល់​ប្រវត្តិ​សាស្ត្រ​ពិត​របស់​ខ្លួន ហើយ​នាំគ្នា​ទៅ​វាយ​ប្រហារ​នាយក​រដ្ឋ​មន្ត្រី​សិង្ហបុរី លោក លី សៀនឡុង (Lee Hsien Loong) ដែល​ហ៊ាន​និយាយ​ការ​ពិត​រឿង​វៀតណាម​ចូល​លុក​លុយ​កម្ពុជា​ក្នុង​ទសវត្ស​ទី៨០។

ប្រធាន​ក្រុម​ប្រឹក្សា​ឃ្លាំមើល​កម្ពុជា លោក ម៉ែន ណាត ថ្លែងប្រាប់​អាស៊ី​សេរី​នៅ​ថ្ងៃ​ទី៩ មិថុនា​ថា កាយ​វិការ​របស់​ក្រុម​មេដឹកនាំ​របប​ក្រុង​ភ្នំពេញ មាន​ន័យ​ស្មើ​នឹង​ការ​គាំទ្រ​ការ​ឈ្លាន​ពាន​របស់​វៀតណាម។ លោក​បន្ត​ថា ដោយ​សារ​តែ​ការ​មិន​ទទួល​ស្គាល់​ការពិត​នេះ​ហើយ ទើប​បាន​ជា​របប​លោក ហ៊ុន សែន បាន​ធ្វើ​កិច្ច​ការ​ជាច្រើន​ដែល​ហុច​ផល​ចំណេញ​ទៅ​ឱ្យ​ប្រទេស​វៀតណាម ជា​ពិសេស​រឿង​ទឹកដី និង​ការ​ស្នាក់​នៅ​ខុស​ច្បាប់​របស់​​ជន​អន្តោប្រវេសន៍​វៀតណាម៖ «តើ លី សៀនឡុង ជា​អ្នក​កសាង​កំហុស​សម្រាប់​កម្ពុជា​ក្នុង​ការ​លើក​ឡើង​ហ្នឹង ឬ​ក៏​របប​ភ្នំពេញ​ហ្នឹង ជា​អ្នក​ដែល​មិន​ទទួល​ស្គាល់​កំហុស? បើ​មិន​ទទួល​ស្គាល់​កំហុស អ៊ីចឹង​របប​ហ្នឹង​មិន​អាច​សង្ឃឹម​ជា​មុខ​ជា​មាត់​អី ក្នុង​ការ​ធ្វើ​ឱ្យ​ប្រទេស​ហ្នឹង​រីក​លូត​លាស់​បាន​ទេ។ ហើយ​ពលរដ្ឋ​​ខ្មែរ​អាច​ធ្វើ​ការ​ពិចារណា​ទៅ ថ្ងៃក្រោយ​តើ​យើង​រើស​មេ​ដឹក​នាំ​ជា​កូន​ជា​ចៅ​របស់​ពួក​មន្ត្រី​គ្រាក់ៗ​ បច្ចុប្បន្ន​ហ្នឹង បន្ត​ដឹកនាំ​អំណាច​ទៀត​ដែរ​ឬ​ទេ

មួយ​រយៈពេល​ចុងក្រោយ​នេះ ក្រុម​មេ​ដឹក​នាំ និង​មន្ត្រី​គ្រាក់ៗ នៃ​របប​លោក ហ៊ុន សែន បាន​នាំគ្នា​វាយ​ប្រហារ​​លោក​ លី សៀនឡុង ដោយ​ឥត​សំចៃ​មាត់ បន្ទាប់​ពី​មេ​ដឹក​នាំ​សិង្ហបុរី​រូប​នេះ បាន​រំឭក​ពី​ប្រវត្តិសាស្ត្រ​តំបន់​អាស៊ាន​ក្នុង​សម័យ​សង្គ្រាម​ត្រជាក់ និង​កិច្ច​ខិត​ខំ​​ប្រឹងប្រែង​របស់​អាស៊ាន ដើម្បី​ទប់​ទល់​នឹង​ការ​រីក​រាល​ដាល​នៃ​លទ្ធិ​កុម្មុយនិស្ត តាម​រយៈ​ការ​ជំទាស់​នឹង​ការ​​ឈ្លាន​ពាន​របស់​​វៀតណាម​លើ​កម្ពុជា។ លោក​បាន​ថ្លែង​ថា ថ្នាក់​ដឹក​នាំ​អាស៊ាន​នៅ​ពេល​នោះ បាន​ប្រឹង​ប្រែង​យ៉ាង​ខ្លាំង​ក្នុង​ការ​ប្រឆាំង​នឹង​អំពើ​ឈ្លាន​ពាន​នេះ ដែល​ធ្វើ​ឱ្យ​របប​ថ្មី​ដែល​វៀតណាម​លើក​បន្តុប​ក្រោយ​សម័យ​ខ្មែរ​ក្រហម មិន​ត្រូវ​បាន​ទទួល​ស្គាល់​តាម​ផ្លូវ​ច្បាប់។

ទោះ​ជា​យ៉ាង​ណា ក្រុម​មេដឹកនាំ​របប​ក្រុង​ភ្នំពេញ ហាក់​បន្ថយ​កំហឹង​របស់​ខ្លួន​មក​វិញ បន្ទាប់​ពី​មន្ត្រី​ជាន់ខ្ពស់​សិង្ហបុរី​បាន​ពន្យល់​អំពី​បំណង​នៃ​សេចក្ដី​ថ្លែង​ការណ៍​របស់​លោក លី សៀនឡុង។

រដ្ឋ​មន្ត្រី​ការ​បរទេស​សិង្ហបុរី​ លោក វីវៀន បាឡាគ្រីសណាន់ (Vivian Balakrishnan) បាន​ប្រាប់​មក​សមភាគី​កម្ពុជា​លោក ប្រាក់ សុខុន ថា លោក លី សៀនឡុង ពុំ​មាន​ចេតនា​អាក្រក់​ណាមួយ​ក្នុង​ការ​បញ្ចេញ​សារ​នោះ​ឡើយ។ លោក​ថា​ លោក លី សៀនឡុង គ្រាន់​តែ​ចង់​រំឭក​អំពី​ស្ថានភាព និង​ការ​ប្រឈម​នៅ​ក្នុង​សម័យ​កាល​នោះ ដែល​រឿង​ទាំង​នេះ​សុទ្ធ​តែ​ធ្លាប់​បាន​ផ្សព្វផ្សាយ​សាធារណៈ​រួច​មក​ហើយ។ លោក​បញ្ជាក់​ថា សិង្ហបុរី​ចង់​បាន​តែ​សន្តិភាព និង​វិបុល​ភាព​សម្រាប់​កម្ពុជា​តែប៉ុណ្ណោះ ពុំ​មាន​បំណង​ណា​មួយ​គាំទ្រ​ខ្មែរ​ក្រហម​ឡើយ ហើយ​រឹតតែ​មិន​ចង់​ឃើញ​របប​នេះ​វិល​ត្រឡប់​មក​កម្ពុជា​សា​ជា​ថ្មី​ទៀត​ដែរ។ នេះ​បើ​យោង​តាម​សេចក្ដី​ប្រកាស​ព័ត៌មាន​របស់​ក្រសួង​ការ​បរទេស​កម្ពុជា កាល​ពី​ថ្ងៃ​ទី៧ មិថុនា កន្លង​ទៅ។

ក៏​ប៉ុន្តែ​យោង​តាម​សេចក្ដី​ប្រកាស​ព័ត៌មាន​ដដែល​នេះ ភាគី​សិង្ហបុរី​មិន​បាន​កែប្រែ​នូវ​ពាក្យ​ពេចន៍​របស់​លោក លី សៀន​ឡុង នោះ​ឡើយ ពោល​គឺ​សិង្ហបុរី​ហាក់​ដូច​ជា គ្រាន់​តែ​ចង់​សម្រួល​ទំនាក់​ទំនង​ការទូត កុំ​ឱ្យ​មាន​ភាព​​តាន​តឹង​ជាមួយ​របប​លោក ហ៊ុន សែន ប៉ុណ្ណោះ។

អាស៊ី​សេរី​បាន​ព្យាយាម​ទាក់ទង​អ្នក​នាំ​ពាក្យ​ក្រសួង​ការ​បរទេស​កម្ពុជា លោក កេត សោផាន់ ជា​ច្រើន​ដង​នៅ​ថ្ងៃ​ទី៩ មិថុនា ដើម្បី​សុំ​ប្រតិកម្ម​តប​នឹង​រឿង​នេះ​ដែរ ប៉ុន្តែ​ទូរស័ព្ទ​របស់​លោក​មិន​អាច​ទាក់ទង​បាន។

ប្រធាន​ក្រុម​ប្រឹក្សា​ឃ្លាំមើល​កម្ពុជា លោក ម៉ែន ណាត អំពាវនាវ​ដល់​របប​លោក ហ៊ុន សែន ឱ្យ​បញ្ឈប់​ប្រតិកម្ម​ត្រឹម​នេះ ដើម្បី​កុំ​ឱ្យ​បង្កើត​អរិភាព​ ឬ​ភាព​ជា​សត្រូវ​ជាមួយ​សិង្ហបុរី ពី​ព្រោះ​ប្រទេស​ទាំង​ពីរ​សុទ្ធ​សឹង​តែ​ជា​សមាជិក​អាស៊ាន​ដូច​គ្នា។ ម្យ៉ាង​វិញ​ទៀត លោក​ថា បញ្ហា​ចំពោះ​មុខ​ដែល​របប​នេះ​ត្រូវ​ដោះ​ស្រាយ​នោះ គឺ​ត្រូវ​ប្រញាប់​ស្ដារ​លទ្ធិ​ប្រជាធិបតេយ្យ​ឡើង​វិញ ដើម្បី​រក្សា​ផល​ប្រយោជន៍​របស់​កម្ពុជា ក្នុង​បរិបទ​នៃ​រឿង​ប្រព័ន្ធ​អនុគ្រោះ​ពន្ធ EBA របស់​សហភាព​អឺរ៉ុប និង GSP របស់​សហរដ្ឋ​អាមេរិក៖ «រឿង​សំខាន់​ជាង​គេ​បំផុត គឺ​ត្រូវ​តែ​រក្សា​ប្រព័ន្ធ​អនុគ្រោះ​ពន្ធ EBA ហ្នឹង​ឱ្យ​បាន​ ដែល​អឺរ៉ុប​គេ​ត្រូវ​តែ​ពិនិត្យ​សម្រេច​ចុងក្រោយ​នៅ​ពីរ​ខែ​ខាង​មុខ​ទៀត​នេះ។ ទីពីរ​ត្រូវ​ស្ដារ​ប្រជាធិបតេយ្យ​កម្ពុជា​ហ្នឹង​ឡើង​វិញ ហើយ​ដោះលែង កឹម សុខា ទៅ ផ្ដល់​សុពល​ភាព​ឱ្យ​គណបក្ស​ប្រឆាំង​អី​រស់​ឡើង​វិញ​ធ្វើ​ការងារ​ជា​ធម្មតា​ទៅ។ អា​ហ្នឹង​វា​ជា​ជំហាន​វិជ្ជមាន​ដែល​យើង​ត្រូវ​ដោះ​ស្រាយ»

អ្នក​វិភាគ និង​អ្នក​តាមដាន​សង្គម​យល់​ឃើញ​ស្របគ្នា​ថា មូលហេតុ​ដែល​ថ្នាក់​ដឹក​នាំ​របប​ក្រុង​ភ្នំពេញ ​ចេញមុខ​ប្រតិកម្ម​នឹង​ប្រសាសន៍​របស់​មេ​ដឹក​នាំ​សិង្ហបុរី​នេះ គឺ​ដើម្បី​ជួយ​ការពារ​មុខ​មាត់​របស់​វៀតណាម និង​ដើម្បី​បិទ​បាំង​ភាព​អាម៉ាស់​របស់​ខ្លួន ​ដែល​ធ្លាប់​ត្រូវ​បាន​វៀតណាម​លើក​បន្តុប​ឱ្យ​កាន់​អំណាច​ដោយ​មិន​ស្រប​ច្បាប់ ក្នុង​​អតីតកាល។ ក៏​ប៉ុន្តែ​នេះ គឺ​ជា​ការ​ពិត​នៃ​ប្រវត្តិ​សាស្ត្រ​​ដែល​មិន​អាច​ប្រកែក​បាន ហើយ​គ្រប់​យន្ត​ការ​អន្តរជាតិ​ សុទ្ធតែ​​បាន​កត់​ត្រា​ទុក​ថា អន្តរាគមន៍​របស់​វៀតណាម​នៅ​ពេល​នោះ ជា​ការ​លុក​លុយ​ឈ្លាន​ពាន​កម្ពុជា មិន​មែន​ជា​ការសង្គ្រោះ​ពលរដ្ឋ​ខ្មែរ​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

HS is uneducated MORON ever...

1,000,000,000% NVC invaded in Cambodia 1979-1993"war looting,war criminal conspiracy,war crime against humanity,war crime to wipe out Cambodia from the world map like Champa country"Vichey city 17th to 19th century",now is called Hanoi city today and Khmer Kampuch krom in 1949s,is call Prey Nokor city,and changed to Saigon before Vietnam war,and now the communism of Hanoi took over the Saigon city "south Vietnam 1975"after the the north and south ended the war.NVC still control behind Hun Sen puppet govm't today"Hun Sen like NVC,NVC like Hun Sen with untouchable them.If,anyone said something bad,or touch NVC's personal issue,Hun Sen will responses quickly"uneducated moron=jungle man".

Jun 12, 2019 03:52 PM

គេហទំព័រ​ទាំងមូល