រដ្ឋមន្ត្រីការពារជាតិចិនមកបំពេញទស្សនកិច្ចនៅកម្ពុជាមុនការបោះឆ្នោតមកដល់
2018.06.17
ប្រមុខការពារជាតិចិនមកបំពេញទស្សនកិច្ចផ្លូវការនៅកម្ពុជារយៈពេល ៥ថ្ងៃ ចាប់ពីថ្ងៃទី១៦ រហូតដល់ថ្ងៃទី២០ ខែមិថុនា ខាងមុខ ដើម្បីពង្រឹងចំណងទាក់ទងនៃវិស័យការពារជាតិរបស់ប្រទេសទាំងពីរ ស្របពេលការបោះឆ្នោតដ៏ចម្រូងចម្រាសគ្រោងប្រព្រឹត្តទៅនៅចុងខែក្រោយនេះ។ អ្នកវិភាគយល់ឃើញថា ការបំពេញទស្សនកិច្ចរបស់មេដឹកនាំជាន់ខ្ពស់ផ្នែកយោធានៃរបបក្រុងប៉េកាំងនៅមុនការបោះឆ្នោតនេះ មិនមែនជារឿងចៃដន្យឡើយ ប៉ុន្តែអាចជាការបង្ហាញកាន់តែច្បាស់ថា ចិនគាំទ្ររបបក្រុងភ្នំពេញក្នុងដំណើរការរៀបចំការបោះឆ្នោត ដែលកំពុងរងការរិះគន់ពីក្រុមប្រទេស និងអ្នកនិយមប្រជាធិបតេយ្យនោះ។
រដ្ឋមន្ត្រីការពារជាតិនៃរបបក្រុងភ្នំពេញ លោក ទៀ បាញ់ អះអាងថា ដំណើរទស្សនកិច្ចរបស់រដ្ឋមន្ត្រីការពារជាតិចិន លោក វៃ ហ្វេងហេ (Wei Fenghe) នេះ គឺជាការបង្ហាញពីកិច្ចសហប្រតិបត្តិការល្អ និងស្អិតល្មួតនៃវិស័យការពារជាតិរបស់ប្រទេសទាំងពីរ ដែលជាវិស័យដ៏សំខាន់ក្នុងការរួមចំណែកពង្រឹងសន្តិសុខក្នុងប្រទេសនីមួយៗ និងសន្តិសុខក្នុងតំបន់ទាំងមូល។
លោក ទៀ បាញ់ ថ្លែងក្រោយជំនួបជាមួយរដ្ឋមន្ត្រីការពារជាតិចិននៅថ្ងៃទី១៧ មិថុនា ថា កម្ពុជា និងចិន នឹងសហការគ្នារៀបចំសមយុទ្ធយោធានាគមាស ឆ្នាំ២០១៩ ខាងមុខនេះបន្តទៀត ដើម្បីរឹតចំណងមិត្តភាព និងវិស័យការពារនៃប្រទេសទាំងពីរឱ្យកាន់តែជិតស្និទ្ធថែមទៀត។ លោកអះអាងទៀតថា កម្ពុជាក៏ត្រៀមខ្លួនដើម្បីទទួលការសំចតរបស់នាវាកងទ័ពជើងទឹកចិន ដើម្បីផ្លាស់ប្ដូរបទពិសោធន៍ជាមួយគ្នានៅពេលខាងមុខផងដែរ។
នៅក្នុងទស្សនកិច្ចផ្លូវការរបស់រដ្ឋមន្ត្រីការពារជាតិចិនមកកម្ពុជានេះ ភាគីចិនក៏បានប្រកាសផ្ដល់ជំនួយឥតសំណងជាទឹកប្រាក់ចំនួន ៦៤៥លានយ័ន ឬប្រហែល ១០០លានដុល្លារអាមេរិក សម្រាប់វិស័យយោធាដល់ភាគីកម្ពុជាផងដែរ។
ទោះបីជាយ៉ាងណា អ្នកវិភាគនយោបាយ និងអ្នកឃ្លាំមើលបញ្ហាសង្គមយល់ឃើញស្របគ្នាថា ដំណើរទស្សនកិច្ចរបស់ប្រមុខការពារជាតិចិននេះ មិនមែនជារឿងសាមញ្ញនោះទេ ដ្បិតវាធ្វើឡើងក្នុងពេលដែលកម្ពុជាកំពុងរៀបចំការបោះឆ្នោតដ៏ចម្រូងចម្រាស និងមិនទទួលបានការស្វាគមន៍ពីក្រុមប្រទេសប្រជាធិបតេយ្យនោះ។
អ្នកវិភាគនយោបាយវ័យក្មេង លោក ហង្ស វិទូ យល់ឃើញថា ដំណើរទស្សនកិច្ចរបស់ប្រមុខការពារជាតិចិននេះ គឺជាការផ្តល់ទំនុកចិត្តបន្ថែមទៀតដល់របបក្រុងភ្នំពេញដែលកំពុងហ៊ុមព័ទ្ធដោយការរិះគន់ និងសម្ពាធពីក្រុមប្រទេសប្រជាធិបតេយ្យ និងប្រទេសដៃគូអភិវឌ្ឍន៍នានា បន្ទាប់ពីរបបនេះបានរំលោភសិទ្ធិមនុស្ស និងបំផ្លាញប្រជាធិបតេយ្យនៅកម្ពុជា។ លោកបន្តថា ការគាំទ្ររបស់ចិនចំពោះការរំលាយគណបក្សសង្គ្រោះជាតិ ការចាប់ខ្លួនលោក កឹម សុខា និងការបំបិទសំឡេងឯករាជ្យនោះ មិនមែនជារឿងល្អឡើយ ផ្ទុយទៅវិញមានតែធ្វើឱ្យរបបក្រុងភ្នំពេញកាន់តែដើរឃ្លាតចេញពីគន្លងប្រជាធិបតេយ្យ ហើយវានឹងធ្វើឱ្យពលរដ្ឋកាន់តែបាត់ទំនុកចិត្តលើការដឹកនាំរបស់ក្រុមមេដឹកនាំនៃរបបលោក ហ៊ុន សែន បន្ថែមទៀត៖ «ប្រទេសចិនមើលឃើញថា កម្ពុជាអាចនឹងទទួលរងសម្ពាធពីប្រទេសលោកខាងលិច ដូច្នេះចិនព្យាយាមមកទស្សនកិច្ចនៅកម្ពុជា មានគ្មានអ្វីក្រៅពីដើម្បីលើកទឹកចិត្តកម្ពុជាកុំឱ្យខ្លាចប្រទេសទាំងនោះទេ មានន័យថា គ្រប់កាលៈទេសៈ គឺថាចិននៅជាមួយកម្ពុជាជានិច្ច។ ទោះបីជាយ៉ាងនេះក្តី ទស្សនកិច្ច និងការផ្ដល់ជំនួយយោធាដល់កម្ពុជានេះ ខ្ញុំគិតថា វាមិនមែនជារឿងល្អទេសម្រាប់កម្ពុជា ដោយសារចិនជាប្រទេសកុម្មុយនិស្ត ដូច្នេះប្រសិនបើប្រទេសកុម្មុយនិស្តផ្ដាច់ការស្និទ្ធនឹងកម្ពុជា មានន័យថា កម្ពុជានឹងមានផលប៉ះពាល់ធំទៅថ្ងៃអនាគត និងពេលបច្ចុប្បន្ន»។
ចំណែក ប្រធានអង្គការសម្ពន្ធគណនេយ្យភាពសង្គមកម្ពុជា លោក សន ជ័យ វិញ ថ្លែងថា ចិនបានបង្កើនឥទ្ធិពលរបស់ខ្លួនកាន់តែខ្លាំងមកលើកម្ពុជាទាំងក្នុងវិស័យសេដ្ឋកិច្ច នយោបាយ និងការអភិវឌ្ឍ ហើយឥទ្ធិពលនេះមើលឃើញកាន់តែច្បាស់នៅពេលដែលកម្ពុជាកំពុងមានវិបត្តិនយោបាយ និងកំពុងរៀបចំការបោះឆ្នោតតំណាងរាស្ត្រដ៏ចម្រូងចម្រាសនៅខែក្រោយនេះ៖ «មិនមែនជារឿងចៃដន្យពេកនោះទេដែលទស្សនកិច្ចរបស់មន្ត្រីជាន់ខ្ពស់ចិនមកកម្ពុជា មុនពេលការបោះឆ្នោតមកដល់នៅខែកក្កដាខាងមុខនេះ។ ចំណុចនេះយើងអាចមើលឃើញពីការចង់ធ្វើឱ្យមានឥទ្ធិពលកាន់តែខ្លាំងរបស់ចិនមកលើកម្ពុជា ពេលដែលចិនព្យាយាមជួយកម្ពុជាម្ដងហើយម្តងទៀតទាំងការអភិវឌ្ឍ និងកិច្ចការនយោបាយ»។
ចិនជាប្រទេសមហាអំណាចតែមួយគត់ដែលបានប្រកាសទុកជាមុនថា ខ្លួននឹងទទួលស្គាល់លទ្ធផលបោះឆ្នោតនៅខែកក្កដាខាងមុខ។ តាមរយៈគាំទ្រនេះ ចិនគឺជាអ្នកគាំទ្ររបបក្រុងភ្នំពេញពេញទំហឹងចំពោះការរំលោភសិទ្ធិមនុស្ស និងការបំផ្លាញលទិ្ធប្រជាធិបតេយ្យនៅកម្ពុជា។ ថ្នាក់ដឹកនាំចិនជាបន្តបន្ទាប់ បានប្រកាសជាចំហថា ចិនមានជំហរឥតងាករេ ក្នុងការគោរពឯករាជ្យ អធិបតេយ្យ និងការចាត់វិធានការនានារបស់របបក្រុងភ្នំពេញ ចំពោះកិច្ចការពារសន្តិសុខ និងស្ថិរភាពសង្គម។ បន្ថែមពីលើនេះ ចិនក៏បានប្រកាសថា ខ្លួននឹងធ្វើជាខ្នងបង្អែកដ៏រឹងមាំរបស់លោក ហ៊ុន សែន និងគណបក្សប្រជាជនកម្ពុជា ក្នុងការដឹកនាំប្រទេសប្រកបដោយសុខសន្តិភាព។ តាមរយៈការគាំទ្រជាបន្តបន្ទាប់ដល់រដ្ឋាភិបាលក្រុងភ្នំពេញ ដោយមិនខ្វល់ពីរឿងរបបនេះបានរំលាយគណបក្សប្រឆាំងដែលតំណាងអោយម្ចាស់ឆ្នោតជាង ៣លាននាក់ ចាប់អ្នកនយោបាយដាក់គុក និងបិទប្រព័ន្ធផ្សព្វផ្សាយព័ត៌មានឯករាជជាច្រើននោះ ចិនត្រូវគេមើលឃើញថា កំពុងចូលដៃរំលោភសិទ្ធិមនុស្ស និងការបំផ្លាញលទ្ធិប្រជាធិបតេយ្យនៅកម្ពុជា។
ការប្រកាសពីជំហររបស់ខ្លួនជាបន្តបន្ទាប់បែបនេះ បានធ្វើឱ្យមេដឹកនាំរបបក្រុងភ្នំពេញ លោក ហ៊ុន សែន សារភាពជាលើកទីមួយបង្អស់ កាលពីដើមខែឧសភាកន្លងទៅថា លោកពិតជាកំពុងដឹកនាំប្រទេសទៅរកចិនកុម្មុយនិស្តពិតប្រាកដមែន ព្រោះលោកងាយស្រួលធ្វើការជាមួយភាគីចិន៖ «អ្នកខ្លះគេថា ម៉េចក៏ចិនច្រើនម្ល៉េះឥលូវនេះ? ការដ្ឋានរាប់សិប បើបូកទាំងគម្រោងវិនិយោគផង ការដ្ឋានមានដល់រាប់រយ មិនឱ្យមានចិនច្រើនយ៉ាងម៉េច? ប្រទេសដទៃទៀតបើចង់មកច្រើន ទាល់តែមកបើកការដ្ឋានឱ្យច្រើនដូចគ្នា នោះវាច្រើនទៅហើយ វាមានស្អីទៀត។ ដល់ពេលឃើញចិនមកច្រើន មកច្រណែនចិនឯណេះទៅវិញ វាសុទ្ធតែថាកម្ពុជាដឹកនាំប្រទេសទៅជិតចិន ចុះបើចិនគេស្រួលជាមួយខ្ញុំ មិនឱ្យទៅជិតជាមួយគ្នាយ៉ាងម៉េច»។
ជំនួយដែលចិនផ្តល់មកកម្ពុជា សុទ្ធសឹងជាជំនួយគ្មានលក្ខខណ្ឌដែលនាំឱ្យមានការបារម្ភអំពីការប្រើប្រាស់ជំនួយទាំងនោះ មិនចំគោលដៅ និងការបាត់បង់ទៅលើអំពើពុករលួយ ចំណែកឯគម្រោងវិនិយោគខ្នាតធំរបស់ចិននៅកម្ពុជា ភាគច្រើនសុទ្ធសឹងតែជាដើមហេតុនៃទំនាស់ច្រើនយ៉ាង ជាពិសេស គឺទំនាស់ដីធ្លីរ៉ាំរ៉ៃជាមួយក្រុមប្រជាពលរដ្ឋ។ ក្នុងរយៈពេល ១៣ឆ្នាំចុងក្រោយនេះ ជំនួយអភិវឌ្ឍន៍របស់ចិននៅកម្ពុជា មានចំនួនសរុប ៥៧ គម្រោង ក្នុងនោះ ៤៧ គម្រោង គឺជាប្រភេទប្រាក់កម្ចីមានទឹកប្រាក់សរុបជិត ៣ពាន់លានដុល្លារអាមេរិក និងប្រភេទជំនួយឥតសំណងមានចំនួន ១០គម្រោង ដែលមានទឹកប្រាក់សរុបជិត ១៨០លានដុល្លារអាមេរិក។
អ្នកវិភាគអះអាងថា ការគាំទ្ររបស់ចិនចំពោះរបបក្រុងភ្នំពេញនោះ នឹងធ្វើឱ្យគណបក្សប្រជាជនកម្ពុជា ដែលជាបក្សកាន់អំណាច មិនខ្លាចនឹងរៀបចំការបោះឆ្នោតដែលគ្មានលក្ខណៈសេរី និងយុត្តិធម៌នោះឡើយ ហើយការគាំទ្រនេះនឹងធ្វើឱ្យបក្សកាន់អំណាចកាន់តែមានទឹកចិត្តខ្លាំងក្លាបន្ថែមទៀត ក្នុងការផាត់គណបក្សសង្គ្រោះជាតិដែលជាបក្សប្រឆាំងធំជាងគេនៅកម្ពុជា ចេញពីសង្វៀននយោបាយ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ នៃរដ្ឋសភា នៅខែកក្កដា ខាងមុខនេះ។ ម្យ៉ាងវិញទៀត ការដឹកនាំលម្អៀងទៅរកចិននេះនឹងធ្វើឱ្យកម្ពុជាកាន់តែឃ្លាតឆ្ងាយពីក្រុមប្រទេសលោកខាងលិចដែលជាអ្នកជួយកម្ពុជាក្នុងការពង្រឹងវិស័យអភិបាលកិច្ច និងប្រឆាំងអំពើពុករលួយ ដែលកម្ពុជាត្រូវការជាចាំបាច់ប្រែក្លាយខ្លួនជាប្រទេសអភិវឌ្ឍន៍ដ៏ពិតប្រាកដមួយទៅថ្ងៃមុខ៕