មន្ត្រីសង្កាត់វាយតប់គ្នានៅការិយាល័យចុះឈ្មោះបោះឆ្នោតសង្កាត់ចាក់អង្រែលើ
2016.10.31
គំរូការិយាល័យចុះឈ្មោះបោះឆ្នោត ឆ្នាំ២០១៦ ដែលរៀបរៀងដោយគណៈកម្មាធិការជាតិរៀបចំការបោះឆ្នោត (គ.ជ.ប)។
NEC Website
ការិយាល័យចុះឈ្មោះបោះឆ្នោតនៅសាលាសង្កាត់ចាក់អង្រែលើ ខណ្ឌមានជ័យ រាជធានីភ្នំពេញមានរឿងរ៉ាវវាយតប់គ្នាមួយកើតឡើងនៅព្រឹកថ្ងៃទី៣០ តុលា។ អាជ្ញាធរសង្កាត់ និងភាគីពាក់ព័ន្ធក្នុងរឿងនេះ ចាប់ផ្ដើមបង្កជម្លោះឡើងដោយសារតែរឿងធានាអ្នកចុះឈ្មោះបោះឆ្នោត។
ចៅសង្កាត់រងទី២ នៃសង្កាត់ចាក់អង្រែលើ ពីគណបក្សសង្គ្រោះជាតិ គឺលោក ស្រី ញាណ ថ្លែងថា លោកបានដាក់ពាក្យប្ដឹងទៅនគរបាលហើយ រឿងដែលសមាជិកក្រុមប្រឹក្សាសង្កាត់ចាក់អង្រែលើ វាយតប់លោក និងប្រពន្ធ នៅឯការិយាល័យបោះឆ្នោតនោះ។
លោក ស្រី ញាណ អះអាងថា លោក និងប្រពន្ធរបស់លោកឈ្មោះ ឈុំ សុជាតិ ត្រូវបានសមាជិកក្រុមប្រឹក្សាសង្កាត់ចាក់អង្រែលើ មកពីគណបក្សប្រជាជនកម្ពុជា ឈ្មោះ តាំង ច័ន្ទសុខខៃ វាយ និងធាក់លោក នៅពេលដែលលោកឃាត់សមាជិកក្រុមប្រឹក្សារូបនេះ មិនឲ្យថតប្រពន្ធរបស់លោកយំ៖ «ដល់ពេលប្រពន្ធខ្ញុំយំខឹងវាហ្នឹង ដើរចេញទៅក្រៅ វាតាមថត។ តាមថត ឆ្លងកាត់កន្លែងចុះឈ្មោះហ្នឹង ខ្ញុំក៏ទៅខ្ទប់វាថា ខៃ អត់ត្រូវការថតទេ ក្នុងការិយាល័យចុះឈ្មោះបោះឆ្នោត។ អត់ត្រូវថតទេ! ខ្ញុំក៏ឃាត់វា។ ដល់ពេលឃាត់ទៅ ដៃខ្ញុំហ្នឹងឃាត់ទៅគ្រវីប៉ះទូរស័ព្ទវាបន្តិចធ្លាក់ទៅ ហើយក៏ចាប់វាយខ្ញុំមួយដៃ។ ដល់ពេលវាយមួយដៃ ប្រពន្ធខ្ញុំឃើញស្ទុះទៅ វាដាល់ប្រពន្ធខ្ញុំមួយដៃហើយ ធាក់មួយជើងទៀត។ រួចគេចូលមកឃាត់អីទៅ បានចៅសង្កាត់ចូលមកហៅទៅសម្របសម្រួលខាងក្នុង»។
នៅថ្ងៃដដែល ភាគីសមាជិកក្រុមប្រឹក្សាសង្កាត់ចាក់អង្រែលើ លោក តាំង ច័ន្ទសុខខៃ បដិសេធការធ្វើអត្ថាធិប្បាយបញ្ជាក់អំពីរឿងវាយតប់នេះ ដោយលោកឆ្លើយខ្លីថា លោកជាប់រវល់។
ទាក់ទងបញ្ហានេះ ចៅសង្កាត់ចាក់អង្រែលើ លោក កែវ សាវឿន មានប្រសាសន៍បញ្ជាក់ថា ពិតជាមានបញ្ហាវាយតប់គ្នាមែន ហើយការវាយតប់នៅពេលព្រឹកនោះ គឺដោយសារលោក ស្រី ញាណ ចៅសង្កាត់រងទី២ វាយលោក តាំង ច័ន្ទសុខខៃ ពេលចូលទៅរារាំងមិនឲ្យលោក សុខខៃ ថតប្រពន្ធរបស់លោក៖ «មកវាយ។ ទះទូរស័ព្ទហើយវាយទៀត។ ទូរស័ព្ទធ្លាក់ហើយ វាយមួយដៃហើយ គាត់យកដៃឃុំរងមុខនេះ ត្រូវដៃជាំទាំងសងខាង ហើយគាត់ថយក្រោយក្រឡាច់ជើង។ ជើងដើរអត់ចង់រួចផងឥឡូវ។ ខាងប្ដីអ្នកវាយ ប្រពន្ធរត់មកក្រោយទៀត។ ប្រពន្ធរត់មកប្រតាយទៀត»។
លោក ស្រី ញាណ ទទួលស្គាល់ថា ពេលលោកចូលរារាំងនោះ លោកបានវាសដៃធ្វើឲ្យធ្លាក់ទូរស័ព្ទថតរបស់លោក តាំង ច័ន្ទសុខខៃ មែន។
ទាំងលោក កែវ សាវឿន លោក ស្រី ញាណ និងលោកស្រី ឈុំ សុជាតិ បញ្ជាក់ដូចគ្នាថា បញ្ហានេះគឺផ្ដើមចេញពីរឿងដែលលោកស្រី ឈុំ សុជាតិ ចង់ធានាអ្នកមកស្នាក់នៅក្នុងសង្កាត់ម្នាក់ឲ្យបានចុះឈ្មោះបោះឆ្នោត ប៉ុន្តែបញ្ហានេះកើតឡើងនៅដំណាក់កាលបញ្ជាក់អត្តសញ្ញាណ គឺមិនទាន់ទៅដល់ក្រុមការងារចុះឈ្មោះបោះឆ្នោតនៅឡើយទេ។
ទោះបីជាយ៉ាងណា មានព័ត៌មានរួមដូចគ្នាក្ដី ក៏ករណីនេះត្រូវបានភាគីចៅសង្កាត់ និងចៅសង្កាត់រង ផ្ដល់ហេតុផលរៀងៗខ្លួន។ លោក ស្រី ញាណ ចៅសង្កាត់រង និងលោកស្រី ឈុំ សុជាតិ ជាប្រពន្ធថ្លែងថា ខាងក្រុមអ្នកបញ្ជាក់អត្តសញ្ញាណកម្មមិនចង់បញ្ជាក់ឲ្យអ្នកមកស្នាក់នៅក្នុងសង្កាត់នោះទេ បើទោះជាក្រុមការងារចុះឈ្មោះចង់ចុះឈ្មោះឲ្យក៏ដោយ។ រីឯភាគីចៅសង្កាត់ថ្លែងថា ខាងលោកចង់បានតែអ្នកមកចុះឈ្មោះ មិនរារាំងទេ ព្រោះក្នុងចំណោមអ្នកគ្រប់អាយុក្នុងសង្កាត់របស់លោកជាង ១ម៉ឺន (១៣.២២៦នាក់) លោកទើបតែចុះបាន ៧.៣៥២នាក់ប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ