មន្ត្រី​CPP៖ ពេល​លោក ហ៊ុន សែន អវត្តមាន​ក្នុង​ប្រទេស​លោក​នឹង​ផ្ទេរ​សិទ្ធិ​ឲ្យ​អ្នក​ដទៃ

ដោយ ជុន ច័ន្ទបុត្រ
2017-07-11
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន ថ្លែង​ក្នុង​ពិធី​សំណេះសំណាល​ជាមួយ​បេក្ខជន​ដែល​ប្រឡង​ជាប់​មធ្យម​សិក្សា​ទុតិយភូមិ​និទ្ទេស​អេ (A) នា​វិមាន​សន្តិភាព នៅ​ថ្ងៃ​ទី​២១ កញ្ញា ឆ្នាំ​២០១៦។
លោក​នាយករដ្ឋមន្ត្រី ហ៊ុន សែន ថ្លែង​ក្នុង​ពិធី​សំណេះសំណាល​ជាមួយ​បេក្ខជន​ដែល​ប្រឡង​ជាប់​មធ្យម​សិក្សា​ទុតិយភូមិ​និទ្ទេស​អេ (A) នា​វិមាន​សន្តិភាព នៅ​ថ្ងៃ​ទី​២១ កញ្ញា ឆ្នាំ​២០១៦។
RFA screenshot

មន្ត្រី​គណបក្ស​កាន់​អំណាច​អះអាង​ថា នៅ​ពេល​លោក​នាយក​រដ្ឋមន្ត្រី ហ៊ុន សែន អវត្តមាន​នៅ​ក្នុង​ប្រទេស លោក​នឹង​ផ្ទេរ​សិទ្ធិ​ទៅ​ឲ្យ​មន្ត្រី​ថ្នាក់​ក្រោម​របស់​លោក។ ការ​អះអាង​ដូចនេះ​ក្នុង​ពេល​ដែល​មាន​ការ​លេច​ឮ​ថា លោក ហ៊ុន សែន មិន​ឋិត​នៅ​ក្នុង​ប្រទេស និង​ក្រោយ​ពី​លោក ហ៊ុន សែន បាន​សរសេរ​នៅ​លើ​ទំព័រ​ហ្វេសប៊ុក (facebook) ថា ទោះ​លោក​ផ្ទេរ​សិទ្ធិ ឬ​មិន​ផ្ទេរ​សិទ្ធិ ទោះ​លោក​នៅ​ទីណា ក៏​លោក​នៅ​តែ​មាន​លទ្ធភាព​ដឹកនាំ​កិច្ចការ​ប្រទេស​ជាតិ​បាន​ដដែល។

ហាក់​ជា​ការ​ឆ្លើយតប​ទៅ​នឹង​មនុស្ស​មួយ​ចំនួន​ដែល​កំពុង​មាន​មន្ទិល​ចំពោះ​អវត្តមាន​របស់​លោក ហ៊ុន សែន នៅ​ក្នុង​ប្រទេស លោក ហ៊ុន សែន កាល​ពី​ថ្ងៃ​ទី​១០ កក្កដា បាន​សរសេរ​នៅ​លើ​ទំព័រ​ហ្វេសប៊ុក​ថា «នេះ​ហើយ​គឺ​ខ្ញុំ​ជា ហ៊ុន សែន ដែល​ពួក​ជន​ពាល​កំពុង​ស្វែងរក»

ក្នុង​ពេល​ជាមួយ​គ្នា លោក ហ៊ុន សែន ក៏​បាន​បង្ហោះ​រូបថត​មួយ​ចំនួន​ជាមួយ​ភរិយា កូន ចៅ និង​មន្ត្រី​មួយ​ចំនួន​របស់​លោក មាន​ដូចជា​លោក គន់ គីម លោក ជា សុផារ៉ា និង​អ្នក​ជំនួញ លោក គិត ម៉េង ជាដើម។ អម​ជាមួយ​រូបថត​ទាំងអស់​នេះ លោក ហ៊ុន សែន សរសេរ​ថា «តើ​ខ្ញុំ​មាន​សិទ្ធិ​សប្បាយ​រីករាយ​ជួបជុំ​កូន​ចៅ​ដូច​ក្នុង​រូបថត​នេះ​ដែរ​ឬ​ទេ? តើ​ខ្ញុំ​ត្រូវ​ប្រាប់​មនុស្ស​គ្រប់​គ្នា ពិសេស​ពួក​ជន​ពាល​ថា ខ្ញុំ​កំពុង​ឋិត​នៅ​ទីនេះ ឬ​ទីនោះ​ដែរ​ឬ​ទេ

បន្ថែម​ពី​លើ​នេះ លោក ហ៊ុន សែន ថា​បើ​ទោះ​លោក​ផ្ទេរ​សិទ្ធិ ឬ​មិន​ផ្ទេរ​សិទ្ធិ ទោះ​លោក​ឋិត​នៅ​ទីណា ក៏​លោក​នៅ​តែ​មាន​លទ្ធភាព​ដឹកនាំ​ប្រទេស​ជាតិ ពិសេស​បង្ក្រាប​លើ​ការ​បង្ក​ចលាចល​របស់​ក្រុម​ដែល​លោក​ចាត់​ទុក​ថា​ជា​ជន​ពាល ជា​ក្រុម​ជ្រុល​និយម និង​ក្រុម​កូន​អ្នក​ក្បត់​ជាតិ ជាដើម។ លើស​ពី​នេះ លោក ហ៊ុន សែន បាន​សរសេរ​ព្រលយ​ពាក្យ​ហាក់​ឌឺដង​ថា បើ​ចង់​ដឹង សុំ​សាកមើល​ទៀត​ផង។

រូបថត​ដែល​លោក​នាយក​រដ្ឋមន្ត្រី​បង្ហោះ​កាល​ពី​ថ្ងៃ​ទី​១០ កក្កដា មាន​សភាព​ខុស​គ្នា​ស្រឡះ​ពី​រូប​ដែល​លោក​បង្ហោះ​កាល​ពី​ចុង​សប្ដាហ៍​កន្លង​ទៅ ពេល​ដែល​ដំណឹង​ថា​លោក​នាយក​រដ្ឋមន្ត្រី​ចាប់​ផ្ដើម​បែក​ធ្លាយ​ថា លោក​មាន​ជំងឺ ហើយ​កំពុង​ព្យាបាល​នៅ​ក្រៅ​ប្រទេស។ រូបថត​កាល​ពី​ចុង​សប្ដាហ៍​នោះ បង្ហាញ​រូប​លោក​នាយក​រដ្ឋមន្ត្រី​កំពុង​យារ​ដៃ​វាយ​កូន​ហ្គោល (Golf) ដែល​ហាក់​ដូចជា​ចង់​បង្ហាញ​ថា លោក​មាន​សុខភាព​ល្អ​ដែល​អាច​នៅ​លេង​កីឡា​បាន និង​ហាក់​ដូចជា​មាន​គោល​បំណង​ច្រានចោល​ការ​ផ្សព្វផ្សាយ​ថា​លោក​កំពុង​មាន​ជំងឺ​នោះ។ ប្រហែល​ជា​មិន​អាច​ផ្អឹប​ព័ត៌មាន​បាន​តទៅទៀត នៅ​ដើម​សប្ដាហ៍​នេះ លោក​ក៏​បង្ហោះ​រូប​ប៉ុន្មាន​សន្លឹក​ទៀត​ដែល​លោក​ថត​ជាមួយ​គ្រួសារ និង​ក្រុម​អ្នក​ហែហម​មួយ​ចំនួន។ ទោះ​ជា​យ៉ាង​ណា​ក៏ដោយ រូប​ទាំងនេះ​ហាក់​មិន​បង្ហាញ​ស្ថានភាព​ស្វាហាប់​របស់​លោក​ប៉ុន្មាន​ទេ ហើយ​ឃើញ​ហាក់​ដូចជា​មាន​បង់​រុំ​ជុំវិញ​ចង្កេះ​លោក​ថែម​ទៀត​ផង។

កាល​ពី​ថ្ងៃ​ទី​៣០ មិថុនា អគ្គលេខាធិការ​រាជ​រដ្ឋាភិបាល បាន​ផ្ញើ​លិខិត​ជម្រាប​ពី​ការ​លើក​ពេល​កិច្ចប្រជុំ​ពេញ​អង្គ​គណៈរដ្ឋមន្ត្រី​ចំនួន ២​សប្ដាហ៍ គឺ​នៅ​ថ្ងៃ​សុក្រ ទី​៧ និង​ទី​១៤ កក្កដា។ ការ​ប្រកាស​លើក​ពេល​កិច្ចប្រជុំ​ទៅ​ពេល​ក្រោយ​នេះ ស្រប​ពេល​ដែល​មាន​ការ​លេច​ឮ​ថា លោក​នាយក​រដ្ឋមន្ត្រី ហ៊ុន សែន កំពុង​សម្រាក​ព្យាបាល​ជំងឺ​នៅ​ក្រៅ​ប្រទេស។

ផៃ ស៊ីផាន ៨៥៥ ២០១៧
អ្នកនាំពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ផ្ដល់​បទសម្ភាសន៍​ដល់​អ្នក​សារព័ត៌មាន​ក្នុង​កិច្ច​ប្រជុំ​នា​ខេត្ត​សៀមរាប នៅ​ថ្ងៃ​ទី​២១ ខែ​មីនា ឆ្នាំ​២០១៧។ RFA/Hang Savyouth RFA/Hang Savyouth

ទោះ​ជា​យ៉ាង​ណា មន្ត្រី​រដ្ឋាភិបាល និង​ជា​អ្នក​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន នៅ​តែ​ប្រកែក​ថា លោក ហ៊ុន សែន មិន​មាន​ឈឺ​អ្វី​ឡើយ ហើយ​ក៏​កំពុង​ឋិត​នៅ​ក្នុង​ប្រទេស​កម្ពុជា។ ចំពោះ​ការ​លើក​ពេល​ប្រជុំ​ចំនួន ២​សប្ដាហ៍​ទៅ​ពេល​ក្រោយ​នេះ លោក ផៃ ស៊ីផាន ថ្លែង​ថា លោក​មិន​ដឹង​មូលហេតុ​ច្បាស់​នោះ​ទេ ដោយ​លោក​ថា​វា​ជា​ការ​ចាត់ចែង​របស់​អគ្គលេខាធិការ​រាជ​រដ្ឋាភិបាល ឬ​ក៏​មាន​របៀបវារៈ​រវល់​យ៉ាង​ណា លោក​ក៏​មិន​ដឹង។

ជាទូទៅ កិច្ចប្រជុំ​ពេញ​អង្គ​គណៈរដ្ឋមន្ត្រី ច្រើន​ធ្វើ​ឡើង​នៅ​រៀង​រាល់​ថ្ងៃ​សុក្រ នា​វិមាន​សន្តិភាព ក្រោម​ការ​ដឹកនាំ​កិច្ចប្រជុំ​របស់​លោក​នាយក​រដ្ឋមន្ត្រី ហ៊ុន សែន។ ស្រប​ពេល​ដែល​គណៈរដ្ឋមន្ត្រី​លើក​ពេល​កិច្ចប្រជុំ ២​សប្ដាហ៍​នេះ​ដែរ នៅ​ពេល​រដ្ឋសភា ក៏​មាន​បើក​កិច្ចប្រជុំ​ពេញ​អង្គ​កាល​ពី​ថ្ងៃ​ទី​១០ កក្កដា ដើម្បី​ពិភាក្សា​អនុម័ត​ការ​កែប្រែ​ច្បាប់​គណបក្ស​នយោបាយ ដែល​ឈាន​ដល់​ការ​ដក​ហូត​សិទ្ធិ​ទណ្ឌិត​មិន​ឲ្យ​លូកលាន់​ជាមួយ​គណបក្ស​នយោបាយ តាម​សំណើ​របស់​លោក ហ៊ុន សែន នោះ គឺ​ពុំ​មាន​វត្តមាន​ចូលរួម​របស់​លោក ហ៊ុន សែន ដែល​ជា​អ្នក​បញ្ជា​ឲ្យ​កែប្រែ​ច្បាប់​នេះ​ដូច​ពេល​កន្លង​ទៅ​ឡើយ។

ខណៈ​ដែល​មាន​ហេតុការណ៍​កើត​ឡើង​ផ្ទួន​បែប​នេះ ប្រភព​ច្បាស់​ការ​គួរ​ឲ្យ​ទុក​ចិត្ត​បាន​មួយ​សុំ​មិន​បញ្ចេញ​ឈ្មោះ ឲ្យ​អាស៊ីសេរី​ដឹង​ថា លោក ហ៊ុន សែន កំពុង​សម្រាក​ព្យាបាល​របួស​នៅ​ក្រៅ​ប្រទេស។ ប្រភព​ដដែល​ឲ្យ​ដឹង​ថា ក្នុង​ពេល​លេង​វាយ​កូន​ហ្គោល​កាល​ពី​ពេល​ថ្មីៗ​នេះ លោក ហ៊ុន សែន បាន​ដួល​បាក់​ឆ្អឹង​ត្រគាក រួច​បាន​ចេញ​ទៅ​សម្រាក​ព្យាបាល​របួស​នៅ​មន្ទីរពេទ្យ​នៅ​ក្រៅ​ប្រទេស។ ប្រភព​ដដែល​នេះ​បន្ត​ថា គ្រូពេទ្យ​តម្រូវ​ឲ្យ​លោក ហ៊ុន សែន នៅ​សម្រាក​ព្យាបាល​របួស​រហូត​ដល់​រយៈពេល ១​ខែ។

សុខ ឥសាន ២០១៦ ៨៥៥
អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ចេញ​ពី​សាលា​ដំបូង​រាជធានី​ភ្នំពេញ កាល​ពី​ព្រឹក​ថ្ងៃ​ទី​៦ ខែ​ឧសភា ឆ្នាំ​២០១៦។ RFA/Brach Chev RFA/Brach Chev

ទោះ​ជា​យ៉ាង​ណា ថ្លែង​ប្រាប់​អាស៊ីសេរី​នៅ​ថ្ងៃ​ទី​១១ កក្កដា អ្នក​នាំ​ពាក្យ​គណបក្ស​ប្រជាជន​កម្ពុជា (CPP) លោក សុខ ឥសាន ថា​មិន​មាន​អ្វី​កើត​ឡើង​ចំពោះ​លោក​នាយក​រដ្ឋមន្ត្រី​ឡើយ ហើយ​ថា​លោក ហ៊ុន សែន កំពុង​ឋិត​នៅ​ក្នុង​ប្រទេស​បំពេញ​ការងារ​ធម្មតា។ លោក​ថា ដោយសារ​តែ​មាន​អ្នក​ដុត​កំហឹង​លោក ហ៊ុន សែន ពី​រឿង​អវត្តមាន​នៅ​ក្នុង​ប្រទេស​នេះ​ហើយ ទើប​លោក ហ៊ុន សែន ឆ្លើយតប​វិញ​តាម​រយៈ​ហ្វេសប៊ុក​របស់​លោក។

ទាក់ទង​នឹង​ការ​លើក​ពេល​កិច្ចប្រជុំ​គណៈរដ្ឋមន្ត្រី​វិញ លោក សុខ ឥសាន ថា​វា​ជា​សិទ្ធិ​របស់​នាយក​រដ្ឋមន្ត្រី។ ចំពោះ​អវត្តមាន​របស់​លោក ហ៊ុន សែន ក្នុង​កិច្ចប្រជុំ​សភា​កាល​ពី​ថ្ងៃ​ទី​១០ កក្កដា ត្រូវ​បាន​លោក សុខ ឥសាន បកស្រាយ​ថា បើ​ទោះ​ជា​លោក ហ៊ុន សែន មិន​ចូលរួម ក៏​បក្ស​កាន់​អំណាច​មាន​សំឡេង​គ្រប់គ្រាន់​ដើម្បី​អនុម័ត​ច្បាប់​ដែរ៖ «គ្មាន​អី​ប្រែប្រួល គ្មាន​អី​ចម្លែក​ទេ នាយក​រដ្ឋមន្ត្រីលោក​មាន​សិទ្ធិ​ក្នុង​ការបង្ហាញ​មុខ ឬ​មិន​បង្ហាញ​មុខ វា​មាន​ទាស់​អី ប៉ុន្តែ​ការ​ដឹកនាំ​ប្រទេស​វា​នៅ​តែ​មាន​ដំណើរការ​និរន្តរភាព​ដដែល អត់​មាន​បញ្ហា​អី​ពាក់ព័ន្ធ​ដល់​ការ​ដឹកនាំខ្វះ​ចន្លោះ​អ្វី​ទេ»

កន្លង​ទៅ នៅ​ពេល​លោក​នាយក​រដ្ឋមន្ត្រី ហ៊ុន សែន ធ្វើ​ដំណើរ​ទៅ​ពិនិត្យ​សុខភាព​នៅ​ក្រៅ​ប្រទេស ជាពិសេស​នៅ​មន្ទីរពេទ្យ​ក្នុង​ប្រទេស​សិង្ហបុរី លោក​តែង​បង្ហោះ​ហ្វេសប៊ុក ពេល​ខ្លះ​អម​ដោយ​រូបថត​សម្រាក​ព្យាបាល​នៅ​មន្ទីរពេទ្យ​ផង ដើម្បី​ឲ្យ​ពលរដ្ឋ​ដឹង​ពី​ស្ថានភាព​សុខភាព​របស់​លោក។

លោក សុខ ឥសាន ថ្លែង​ថា ជា​គោលការណ៍ នៅ​ពេល​នាយក​រដ្ឋមន្ត្រី​ទៅ​បំពេញ​បេសកកម្ម ឬ​អវត្តមាន​នៅ​ក្នុង​ប្រទេស នាយក​រដ្ឋមន្ត្រី​តែង​ផ្ទេរ​សិទ្ធិ​ទៅ​ឲ្យ​នាយក​រដ្ឋមន្ត្រី​ស្តីទី។ ប៉ុន្តែ​លោក​ថា ដោយសារ​តែ​លោក ហ៊ុន សែន មិន​ចេញ​ទៅ​ក្រៅ​ប្រទេស​នេះ​ហើយ ទើប​វា​មិន​មាន​ការ​ផ្ទេរ​សិទ្ធិ​នោះ។

ចំណែក​អ្នក​ជំនាញ​វិទ្យាសាស្ត្រ​នយោបាយ បណ្ឌិត ចាន់ វិបុល មាន​ប្រសាសន៍​ថា នាយក​រដ្ឋមន្ត្រី​មាន​សិទ្ធិ​ផ្តល់ ឬ​មិន​ផ្តល់​ព័ត៌មាន​ដល់​សាធារណជន​ថា​លោក​ទៅ​ទីណា​នោះ​ទេ បើ​ស្រុក​ទេស​មិន​មាន​ភាព​អាសន្ន​នោះ ហើយ​លោក​ថា គឺ​មាន​តែ​រដ្ឋសភា ឬ​គណៈរដ្ឋមន្ត្រី​ទេ​ដែល​អាច​ចង់​ដឹង​រឿង​នេះ​បាន។ ទាក់ទង​នឹង​ការ​ផ្ទេរ​សិទ្ធិ​ពេល​អវត្តមាន​នាយក​រដ្ឋមន្ត្រី​វិញ បណ្ឌិត ចាន់ វិបុល ថា​ជា​គោលការណ៍ គឺ​ត្រូវ​តែ​មាន៖ «ជា​គោលការណ៍​ច្បាប់ គឺ​តែងតែ​មាន​លិខិត​ផ្ទេរ​សិទ្ធិ​ជា​លាយលក្ខណ៍​អក្សរ​ពី​នាយក​រដ្ឋមន្ត្រី​ទៅ​ឧបនាយករដ្ឋមន្ត្រី​ណា​មួយ​នៅ​ក្នុង​ក្រុមប្រឹក្សា​រដ្ឋមន្ត្រី តាម​គោលការណ៍​ច្បាប់​មិន​អាច​រំលង​បាន​ទេ»

ទាក់ទង​នឹង​សារ​របស់​លោក ហ៊ុន សែន ដែល​ឲ្យ​ក្រុម​ដែល​លោក​ចាត់​ទុក​ថា​ជា​ជន​ពាល ក្រុម​ជ្រុល​និយម និង​ក្រុម​កូន​អ្នក​ក្បត់​ជាតិ សាក​ជាមួយ​លោក បើ​ចង់​ដឹង​ថា​លោក​បង្ក្រាប​ការ​បង្ក​ចលាចល​បាន ឬ​មិន​បាន​នោះ ត្រូវ​បាន​បណ្ឌិត ចាន់ វិបុល ផ្តល់​ទស្សនៈ​ថា មនុស្ស​នៅ​ក្នុង​សង្គម ពិសេស​អ្នក​នយោបាយ​គ្រប់​និន្នាការ​ទាំងអស់ គួរ​ថ្លែង​សារ​ទាំងឡាយ​ណា​ដែល​រួម​ចំណែក​ក្នុង​ការ​អភិវឌ្ឍ​អភិបាលកិច្ច​ល្អ លើក​កម្ពស់​ដល់​ការ​គោរព​សិទ្ធិ​សេរីភាព​ពលរដ្ឋ ឬ​សារ​ដែល​លើក​ទឹក​ចិត្ត​ពលរដ្ឋ គិត​ពី​ការ​វិវឌ្ឍន៍​របស់​សង្គម​ដែល​អាច​ឲ្យ​មនុស្ស​ក្នុង​សង្គម​រស់នៅ​បាន​សុខសាន្ត​ទាំងអស់​គ្នា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (4)
Share

HS closer to the dead end tunnel

Every dictators always threaten,do bully/foully all of u around to keep him in power...say one thing and do other thing"useless/worthless",but his pragmatic keep do the dirty job for him"like S.Issan,C.Vun and Pay Siphan".Every dictators has no clear vision,no wisdom,no inspiration,no high education,don't believe any god,hatred democracy,and whatever.Every dictators recruited bad people to work around him and protect him for long power greed,with promote them to a high rank officials,he need only bad pple who threat him well like a kingkong"most dictators fear to die,but all their words are stronger than gun"to make pple fear him and work for him.

Jul 21, 2017 07:06 PM

អ្នក​អាន​អនាមិក

ពី USA

well, well how hard to know where is Hun Sen, it is a piece of cake. for sure Hun Sen did not walk there naked. do you get it? keep all records of what CPP said for later study to show people they are right or wrong.

Jul 12, 2017 03:40 AM

អ្នក​អាន​អនាមិក


សម្តេចហៅប្រជារាស្ត្រថាជនពាល? ប្រជារាស្ត្រចង់ដឹងពេលលោកធ្វើដំណើរទៅណាមកណីព្រោះលោកជាជនសាធារណះ ហើយរាស្ត្រចង់ដឹងថាចំណាយប្រាក់រដ្ឋប៉ុន្មាន។ សម្តេចទៅរកជនពាលអែណាទៀត សម្តេចខ្លួនអែងសោះហ្នឹងណាស់! ចំណែកទណ្ឌិតវិញ ខ្ញុំគិតថា សម្តេចជាបេក្ខជនសមច្រើនជាង នេះបើយោងតាមទង្វើរបស់សម្តេចក្នុងរយះពេលជិតសែសិបឆ្នាំកន្លងមក។

ខ្ញុំនឹកសម្តេចណាស់ ចុះបើសម្តេចឥតវិលមកវិញរហូត ឲ្យរាស្ត្រយំឬក៍សើចសម្តេច?

Jul 11, 2017 09:01 PM

ចំរើន

ពី កំពត

អវត្តមាន? ប្រាកដជាលួចទៅដេកពេទ្យនៅសាំងហ្គាពួទៀតហើយ។ គាត់រវល់តែរកវិធីបង្ក្រាបលោកសមរង្សីខ្លាំងពេក រហូតដល់លាប់ជម្ងឺ..

Jul 11, 2017 01:28 PM

គេហទំព័រ​ទាំងមូល