សកម្មជនបក្សប្រឆាំង៖ សមត្ថកិច្ចខេត្តកំពង់ធំ រារាំងមិនឲ្យពួកគេបរិភោគនំបញ្ចុកជុំគ្នា
2019.05.23
ក្រុមប្រឹក្សាជាប់ឆ្នោតរបស់គណបក្ស សង្គ្រោះជាតិ នៅខេត្តកំពង់ធំ ចាត់ទុកសកម្មភាពប៉ូលិសរារាំងពិធីហូបនំបញ្ចុកជុំគ្នាថា ជាការគំរាមកំហែង និងបំបិទសេរីភាពជួបជុំបរិភោគអាហាររបស់ពួកគេ។ មន្ត្រីរដ្ឋាភិបាលថា សមត្ថកិច្ចមានសិទ្ធិចុះទៅសួរនាំ បើសង្ស័យកម្មវិធីបរិភោគនំបញ្ចុកបង្កប់រឿងនយោបាយ។ តែសង្គមស៊ីវិលថា មន្ត្រីបក្សប្រឆាំង មានសិទ្ធិជួបប្រជុំ និងជជែក គាំទ្រនយោបាយ ដូចពលរដ្ឋទូទៅ។
ជំទប់ទី២ ជាប់ឆ្នោតនៅឃុំស្វាយភ្លើង ស្រុកតាំងគោក លោក ប្រែង គឹមសឿន ប្រាប់ថា សមត្ថកិច្ចស្លៀកពាក់ឯកសណ្ឋានប្រហែល ២០នាក់ បានទៅសួររកលោកដល់ផ្ទះ នៅព្រឹកថ្ងៃទី២២ ឧសភា ខណៈលោកកំពុងបរិភោគនំបញ្ចុកជាមួយសមាជិកក្រុមប្រឹក្សាជាប់ឆ្នោត និងសកម្មជនគណបក្សសង្គ្រោះជាតិ ផ្សេងទៀត នៅក្នុងឃុំស្វាយភ្លើង។ លោកថា ក្រោយពេលសមត្ថកិច្ចទៅសួរនាំរកលោកប្រពន្ធរបស់លោក បានទូរស័ព្ទប្រាប់ឲ្យលោកគេចខ្លួនសិន កុំទាន់ចូលផ្ទះ ដោយសារបារម្ភខ្លាចត្រូវចាប់ខ្លួន៖ «ឥឡូវនេះ គាត់ (ប្រពន្ធ) មិនទាន់ឲ្យខ្ញុំទៅទេ។ មិនទាន់ឲ្យខ្ញុំចូលផ្ទះទេ។ ឲ្យនៅផ្ទះម៉ែខ្ញុំសិនទៅ ហើយខ្ញុំក៏មិនទាន់ហ៊ានទៅទេ ព្រោះសភាពការណ៍មិនទាន់ស្រួល»។
ចំណែកសមាជិកក្រុមប្រឹក្សាជាប់ឆ្នោតនៅខេត្តកំពង់ធំ ២នាក់ទៀត ក៏រងការឃ្លាំមើល និងមានសមត្ថកិច្ចចុះទៅសួររកដល់ផ្ទះរៀងៗ ខ្លួនដែរ គឺលោក ស៊ុន ធន់ និងលោក ថោង វិបុលសុខុម។
លោក ស៊ុន ធន់ ប្រាប់អាស៊ីសេរីថា ប៉ូលិសស្លៀកពាក់ស៊ីវិលច្រើននាក់ បានទៅសួរនាំលោក ករណី ធ្វើបុណ្យសង្ឃទាន ឲ្យប្រពន្ធកំពុងដេកឈឺនៅផ្ទះ ហើយមានការជួបជុំក្រុមប្រឹក្សាជាប់ឆ្នោត និងសកម្មជនគណបក្សសង្គ្រោះជាតិនៅផ្ទះរបស់លោក ស្ថិតនៅឃុំទ្រាល ស្រុកបារាយណ៍។ លោក ស៊ុន ធន់ អះអាងថា នៅព្រឹកថ្ងៃទី២២ ឧសភា លោកបានអញ្ជើញមិត្តភក្ដិធ្លាប់ធ្វើការជាមួយគ្នា នៅគណបក្សសង្គ្រោះជាតិទូទាំងខេត្តកំពង់ធំ មកធ្វើបុណ្យសង្ឃទាន ឲ្យប្រពន្ធ រួចហើយក៏អញ្ជើញភ្ញៀវបរិភោគនំបញ្ចុករួមគ្នា ហើយមិនបានថ្លែងសារនយោបាយអ្វីទេ។ ប៉ុន្តែក្រោយកម្មវិធី ហូបនំបញ្ចុករួច ម៉ោងប្រហែល ១២ថ្ងៃត្រង់ សមត្ថកិច្ចច្រើននាក់ បានមកសួរនាំលោក ដល់ផ្ទះ ខណៈលោកធ្វើកម្មវិធីបុណ្យបែបនេះ កន្លងមក មិនធ្លាប់រងការសួរនាំទេ។ លោក ស៊ុន ធន់ ថា ក្នុងពេលបរិភោគនំបញ្ចុក សមត្ថកិច្ច បានលួចថតរូប អ្នកចូលរួម។
ឯសមាជិកក្រុមប្រឹក្សាជាប់ឆ្នោតខេត្តកំពង់ធំ ម្នាក់ទៀត គឺលោក ថោង វិបុលសុខុម ប្រាប់ថា សមត្ថកិច្ចក៏បានទៅឃ្លាំមើល និងសួរនាំកម្មវិធីហូបនំបញ្ចុករួមគ្នា នៅផ្ទះរបស់លោក កាលពីថ្ងៃទី១៩ ឧសភាដែរ។ លោក ចាត់ទុកថា នេះជាសកម្មភាពតាមរំខាន រារាំង សិទ្ធិជួបប្រជុំគ្នារបស់ពួកគាត់។
លោក អះអាងថា ដោយសារការនឹករលឹកគ្នា និងចង់ជជែកអតីតកាលក្នុងពេលធ្វើការជាមួយគ្នា ក្រុមប្រឹក្សាជាប់ឆ្នោតគណបក្ស សង្គ្រោះជាតិ ដែលរងការដកហូតតំណែង បានរ៉ៃអង្គាសគ្នា ក្នុងម្នាក់ពី ១ពាន់រៀល ទៅ ៥ពាន់រៀល ដើម្បីធ្វើនំហូបរួមគ្នានៅផ្ទះរបស់លោក។ លោកថា ការរំខានរបស់សមត្ថកិច្ច រឹតតែធ្វើឲ្យក្រុមប្រឹក្សាជាប់ឆ្នោត បន្តជួបប្រជុំគ្នាញឹកញាប់ ដើម្បីបង្ហាញថា មិនខ្លាចការគំរាម ព្រោះគ្មានច្បាប់ ចែងហាមឃាត់ការជួបជុំគ្នាបរិភោគនំបញ្ចុកឡើយ៖ «ពួកខ្ញុំត្រូវការជួបជុំគ្នា។ សូមកុំលឲ្យមានការរារាំងពួកខ្ញុំ។ កុំប្រមាថពួកខ្ញុំអ៊ីចឹង។ សូមឲ្យផ្ដល់សិទ្ធិពួកខ្ញុំ ឲ្យបានគ្រប់គ្រាន់»។
អាស៊ីសេរីមិនអាចសុំការបញ្ជាក់ពីស្នងការនគរបាលខេត្តកំពង់ធំ លោក អ៊ុក កុសល្យ និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន នៅថ្ងៃទី២២ ឧសភា ដោយសារមិនទទួលទូរស័ព្ទ។ ប៉ុន្តែអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ប្រាប់អាស៊ីសេរីថា សមត្ថកិច្ចមានសិទ្ធិកោះហៅ និងសាកសួរ ប្រសិនបើសមត្ថកិច្ចមានការសង្ស័យ ឬរកឃើញភាពមិនប្រក្រតី ណាមួយ ក្នុងពេលបរិភោគនំបញ្ចុក៖ «បើកាលណា យើងប្រើពាក្យថា គ្រាន់តែជួបជុំគ្នាហូបនំបញ្ចុក ដូចជាអត់មានរឿងអ្វីទេ។ គ្មានច្បាប់ណាចែងហាមមិនឲ្យជួបជុំគ្នា ហូបនំបញ្ចុក។ ក៏ប៉ុន្តែក្រែងមានសកម្មភាពអ្វីផ្សេងទៀត ដែលយើងអត់ដឹង ផ្ទៃក្នុងណា។ ទាល់តែសមត្ថកិច្ចណា ដែលគេឃាត់ហ្នុង ច្បាស់ជាគេមានអង្គហេតុត្រឹមត្រូវហើយ។ អាហ្នឹងទាល់តែយើងសួរទៅរកអ្នកដែលឃាត់ឃាំងហ្នឹងឯង ថាតើមានអង្គហេតុអ្វី ដែលចាត់ទុកថា ការជួបជុំហ្នឹងមិនសមស្រប»។
អ្នកសម្របសម្រួលសមាគមការពារសិទ្ធិមនុស្ស អាដហុក ខេត្តកំពង់ធំ លោក សុក រដ្ឋា អះអាងថា មន្ត្រីគណបក្សសង្គ្រោះជាតិទាំងនោះ មានសិទ្ធិលើសពីការជួបប្រជុំ ពោល គឺពួកគេមានសិទ្ធិជជែកវែកញែក រឿងនយោបាយ ឬ គាំទ្រនយោបាយបាន ដោយគ្មានការរារាំងឡើយ។ សង្គមស៊ីវិលរូបនេះ ចាត់ទុកថា ការឃ្លាំមើល ឬការលួចថតរូប ថតសំឡេង ពីសំណាក់សមត្ថកិច្ច ជាអំពើខុសច្បាប់ រំលោភសិទ្ធិបុគ្គលធ្ងន់ធ្ងរ៖ «ខ្ញុំគិតថា មិនគួរ មិនគួរបន្តទេ ករណីហ្នឹង គឺរដ្ឋាភិបាលមិនគួរឃ្លាំមើលពួកគាត់បន្តទេ ហើយក៏មិនគួរណា ត្រូវអញ្ជើញពួកគាត់ (ក្រុមប្រឹក្សាជាប់ឆ្នោត) ចូលបំភ្លឺអ្វីតទៀតដែរ»។
សមត្ថកិច្ច កាលពីពេលថ្មីៗនេះ បានកោះហៅសកម្មជន និងសមាជិកក្រុមប្រឹក្សាជាប់ឆ្នោត របស់គណបក្សសង្គ្រោះជាតិនៅខេត្តកំពង់ធំ ចំនួន៣៥នាក់រួចហើយ ឲ្យចូលឆ្លើយបំភ្លឺ ករណីហូបអាហារសាមគ្គី និងថ្លែងសារនយោបាយគាំទ្រ លោក សម រង្ស៊ី ប្រធានស្ដីទីគណបក្សសង្គ្រោះជាតិ ឲ្យវិលចូលស្រុកវិញ នៅឆ្នាំ២០១៩។ ការកោះហៅរបស់សមត្ថកិច្ចធ្វើឡើង ក្រោយពេលមេដឹកនាំរបបក្រុងភ្នំពេញ លោក ហ៊ុន សែន ដាក់បទបញ្ជាឲ្យបង្ក្រាប អ្នកហ៊ានចេញមុខគាំទ្រនយោបាយលោក សម រង្ស៊ី ទោះម្នាក់ ឬពីរនាក់ ក៏ត្រូវវាយបង្ក្រាបភ្លាមៗដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។