សារព័ត៌មានគាំទ្រលោក ហ៊ុន សែន មួយកាលពីថ្ងៃទី៣ តុលា បានស្រង់សម្ដីរបស់លោក ម៉ៅ សុផាន់ មេបញ្ជាការកងពលតូចលេខ៧០ថា ទំព័រហ្វេសប៊ុក (Facebook) ផ្លូវការរបស់កងពលតូច និងគណនីហ្វេសប៊ុករបស់ នាយទាហានម្នាក់នៃកងពលនេះឈ្មោះ យុង ខេមរា ត្រូវជនអនាមិកលួចចូលទៅគ្រប់គ្រង។
សារព័ត៌មានដដែលផ្សាយថា ជនអនាមិក បានបង្ហោះព័ត៌មានមួយចំនួន ដែលលោក ម៉ៅ សុផាន់ ចាត់ទុកថាជាព័ត៌មានមិនពិត។ លោក ម៉ៅ សុផាន់ បានប្រកាសមិនទទួលស្គាល់ ចំពោះការបង្ហោះព័ត៌មានទាំងនោះឡើយ។
បច្ចុប្បន្ន ជនអនាមិក បានដកព័ត៌មានទាំងអស់ចេញ ទំព័រហ្វេសប៊ុក ផ្លូវការរបស់កងពលតូចលេខ៧០។ ដោយឡែក គណនីហ្វេសប៊ុកឈ្មោះ យុង ខេមរា វិញពុំឃើញមានព័ត៌មានអ្វីប្លែកខុសធម្មតាត្រូវបង្ហោះឡើយ ហើយព័ត៌មានចាស់ៗ ដែលធ្លាប់មានពីមុនគឺនៅទីនោះដដែល។
ប៉ុន្តែ ជនអនាមិកបានផ្សព្វផ្សាយសារវីដេអូបែកធ្លាយមួយរបស់ គណនីហ្វេសប៊ុកឈ្មោះ យុង ខេមរា អំពីទំនាក់ទំនងស្នេហាជាមួយ គណនីហ្វេសប៊ុកមួយទៀតឈ្មោះ ហ៊ុន ម៉ាណែត។ នៅក្នុងវីដេអូនោះក៏មានសារជាសំឡេង របស់គណនីហ្វេសប៊ុកឈ្មោះ យុង ខេមរា ឆ្លើយឆ្លង នឹងគណនីហ្វេសប៊ុកឈ្មោះ ហ៊ុន ម៉ាណែត។ លោក ហ៊ុន ម៉ាណែត និង កញ្ញា យុង ខេមរា នៅមិនទាន់ឆ្លើយតបនឹងសំណួររបស់អាស៊ីសេរី ជុំវិញការផ្សព្វផ្សាយព័ត៌មាននៃការលេចសារស្នេហា គណនីហ្វេសប៊ុកឈ្មោះ ហ៊ុន ម៉ាណែត និង យុង ខេមរា នៅឡើយទេ កាលពីថ្ងៃទី៣ តុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។