សមាជិកគ.ជ.បថ្មីទាំង៩នាក់ស្បថចូលបំពេញការងារ
2015.04.11
សមាជិក គ.ជ.បថ្មី ចូលស្បថកាន់តំណែងនៅព្រះបរមរាជវាំង នៅថ្ងៃទី១១ ខែមេសា ឆ្នាំ២០១៥។
សមាជិក គ.ជ.បថ្មី ៩រូបដែលត្រូវបានរដ្ឋសភាបោះឆ្នោតផ្តល់សេចក្តីទុកចិត្តកាលពីពេលថ្មីៗនេះ នាំគ្នាស្បថចូលកាន់តំណែងនៅក្នុងព្រះបរមរាជវាំង នៅរសៀលថ្ងៃទី១១ មេសា។ ពិធីសម្បថនេះ ធ្វើឡើងពីរថ្ងៃមុនពេលពិធីផ្ទេរតំណែងពីប្រធាន គ.ជ.បចាស់ ដែលគ្រោងប្រព្រឹត្តទៅនៅថ្ងៃទី១៣ ខែមេសា ខាងមុខ។
ក្នុងសម្លៀកបំពាក់ជាមន្ត្រីដែលមានអាវកត្រង់ពណ៌ស សំពត់ចងក្បិនពណ៌គ្រាប់អំពិល ស្របទៅតាមបែបផែនសម្លៀកបំពាក់ទាំង ៧ពណ៌តាមប្រពៃណីខ្មែរសម្រាប់ថ្ងៃសៅរ៍ សមាជិក គ.ជ.បថ្មីទាំង ៩រូប ត្រូវបានរថយន្តដឹកចេញពីមន្ទីររដ្ឋសភា នៅម៉ោងប្រមាណ ៤រសៀល ឆ្ពោះទៅកាន់ព្រះបរមរាជវាំង ទីដែលពួកគេត្រូវធ្វើការស្បថស្បែមុននឹងចូលកាន់តួនាទីនៅក្នុង គ.ជ.បថ្មី។
មួយសន្ទុះក្រោយមក ក្បួនរថយន្តរបស់សម្ដេចព្រះមហាសង្ឃរាជទាំងពីរគណៈ គឺសម្ដេចព្រះមហាសង្ឃរាជ ទេព វង្ស និងសម្ដេចព្រះមហាសង្ឃរាជ ប៊ូ គ្រី បានយាងមកដល់។
ពិធីស្បថស្បែបានធ្វើឡើងប្រហែល ១ម៉ោង ក្រោមរាជាធិបតីភាពនៃសម្ដេចព្រះមហាសង្ឃរាជទាំងពីរ ប៉ុន្តែមិនមានព្រះរាជវត្តមានរបស់ព្រះករុណា ព្រះបាទសម្ដេចព្រះនរោត្តម សីហមុនី នោះទេ ព្រោះព្រះអង្គកំពុងគង់សម្រាកនៅក្នុងប្រទេសចិន។
ក្រោយពិធីសម្បថនោះ ក្បួនរថយន្តព្រះបរមរាជវាំងបានដឹកសមាជិក គ.ជ.ប ត្រឡប់ទៅកាន់មន្ទីររដ្ឋសភាវិញ ដោយមិនបានឈប់ដើម្បីឲ្យអ្នកកាសែតសាកសួរឡើយ។
ថ្លែងនៅមន្ទីររដ្ឋសភា បន្ទាប់ពីចូលស្បថនៅព្រះបរមរាជវាំងរួច សមាជិក គ.ជ.បថ្មី លោក រ៉ុង ឈុន ឲ្យដឹងថា ខ្លឹមសារនៃពាក្យសម្បថ គឺសំដៅទៅលើការការពារអាយុជីវិតរបស់ជាតិ ក្នុងនោះមានដូចជា សមាជិក គ.ជ.បថ្មី ត្រូវតែស្មោះត្រង់ចំពោះជាតិ ចំពោះប្រជាពលរដ្ឋ និងការការពារបូរណភាពទឹកដីពីការឈ្លានពានរបស់បរទេស ជាដើម។ លោក រ៉ុង ឈុន បញ្ជាក់ថា ខ្លឹមសារនៃពាក្យសម្បថ គឺល្អ ហើយលោកថា ប្រសិនបើមន្ត្រី គ.ជ.ប គ្រប់គ្នាអាចធ្វើបានតាមពាក្យពេចន៍ក្នុងសម្បថមែន នោះប្រទេសកម្ពុជា នឹងទទួលបានលទ្ធិប្រជាធិបតេយ្យ និងការគោរពសិទ្ធិមនុស្សពេញលេញ។ លោក រ៉ុង ឈុន អះអាងក្នុងទឹកមុខស្មើថា លោកមានអារម្មណ៍ធម្មតាបន្ទាប់ពីស្បថស្បែរួច៖ «ខ្ញុំធ្វើការងារសង្គមច្រើនហើយមិនមានអ្វីដែលប្លែកទេ ការងារថ្មីជាបន្ទុកធំមួយទៀតរបស់ខ្ញុំ ហើយខ្ញុំនឹងខិតខំធ្វើយ៉ាងណាឲ្យ គ.ជ.ប ហ្នឹង មានដំណើរការល្អប្រសើរ មានលក្ខណៈឯករាជ្យ សេរី យុត្តិធម៌ ធ្វើម៉េចយើងត្រូវតែការពារនូវសន្លឹកឆ្នោតរបស់ប្រជាពលរដ្ឋ និងធ្វើឲ្យប្រជាពលរដ្ឋគ្រប់រូបចូលរួមការបោះឆ្នោតឲ្យបានច្រើន»។
លោក រ៉ុង ឈុន មានប្រសាសន៍ថា លោកបានត្រៀមខ្លួនរួចហើយក្នុងការសហការជាមួយសហការីរបស់លោកទាំង ៨រូប និងជាមួយសង្គមស៊ីវិលនានា ក្នុងការបំពេញការងារនៅ គ.ជ.ប។
សមាជិក គ.ជ.បថ្មីទាំង ៩រូប ត្រូវបានរដ្ឋសភាបោះឆ្នោតផ្តល់សេចក្តីទុកចិត្តកាលពីថ្ងៃទី៩ មេសា មួយថ្ងៃបន្ទាប់គណបក្សនយោបាយទាំងពីរបានបញ្ជូនបញ្ជីឈ្មោះបេក្ខជនពីកូតាគណបក្សរៀងៗខ្លួនទៅកាន់រដ្ឋសភា។ ក្នុងនោះ លោក ស៊ិក ប៊ុនហុក មកពីកូតាគណបក្សប្រជាជនកម្ពុជា ត្រូវបានរដ្ឋសភាបោះឆ្នោតជ្រើសជាប្រធាន គ.ជ.ប ខណៈដែល លោក គួយ ប៊ុនរឿន មកពីកូតាគណបក្សសង្គ្រោះជាតិ ជាប់ជាអនុប្រធាន។
សមាជិក គ.ជ.ប ៧រូបផ្សេងទៀត ក្នុងនោះរួមមាន អ្នកស្រី តែ ម៉ានីរ៉ុង លោក ហង្ស ពុទ្ធា លោក រ៉ុង ឈុន លោក ហ៊ីង ធីឫទ្ធិ លោក មាន សទី លោក ឌុច សុន និងលោក ឯម សុផាត។ ពួកគេមានអាយុចន្លោះពី ៤៦ ទៅ ៦៩ឆ្នាំ និងមានបទពិសោធន៍ការងារពី ១៥ ទៅ ៣៩ឆ្នាំ។
ពិធីផ្ទេរតំណែងប្រធាន គ.ជ.បថ្មី គ្រោងនឹងធ្វើឡើងនៅព្រឹកថ្ងៃទី១៣ មេសា នៅទីស្នាក់ការ គ.ជ.ប នាក្រសួងមហាផ្ទៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា