គ.ជ.ប នឹងចុះឈ្មោះបោះឆ្នោតសាជាថ្មីជូនពលរដ្ឋនៅដើមឆ្នាំ២០១៦
2015.10.28
ទីស្ដីការគណៈកម្មាធិការជាតិរៀបចំការបោះឆ្នោត (គ.ជ.ប)
គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា បានត្រៀមរៀបចំលក្ខណៈរួចរាល់ហើយ ដើម្បីរៀបចំការចុះឈ្មោះបោះឆ្នោតសាជាថ្មីឡើងវិញ ជូនប្រជាពលរដ្ឋប្រមាណ ១០លាននាក់នៅដើមឆ្នាំ២០១៦ ខាងមុខនេះ។ អង្គភាពនេះអះអាងថា ការចុះឈ្មោះដើម្បីរៀបចំបញ្ជីបោះឆ្នោតថ្មីឲ្យមានភាពងាយស្រួល និងធានាឲ្យបានស្មើភាព ដោយសេរី ត្រឹមត្រូវ និងយុត្តិធម៌ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧។
គណៈកម្មាធិការជាតិរៀបចំការបោះឆ្នោត អះអាងថា បញ្ជីឈ្មោះបោះឆ្នោតចាស់ នឹងមិនត្រូវបានប្រើប្រាស់ទៀតទេ គឺទាមទារឲ្យពលរដ្ឋអ្នកបោះឆ្នោត ត្រូវទៅចុះឈ្មោះបោះឆ្នោតក្នុងបញ្ជីឈ្មោះថ្មី ដើម្បីទទួលបានសិទ្ធិបោះឆ្នោត។
គ.ជ.ប បានប៉ាន់ប្រមាណថា មានពលរដ្ឋជិត ១០លាននាក់ដែលគ្រប់អាយុ និងមានសិទ្ធិចុះឈ្មោះបោះឆ្នោត និងត្រូវចុះឈ្មោះផ្លូវការទូទាំងប្រទេសនៅដើមខែមីនា ឆ្នាំ២០១៦ ខាងមុខនេះ។ គ.ជ.ប ឲ្យដឹងថា រយៈពេលចុះឈ្មោះផ្លូវការនេះមានចំនួន ៣ខែ ហើយ ២ខែសម្រាប់រក្សាទុកពេលវេលាប្ដឹងផ្ដល់ និងដោះស្រាយបណ្ដឹង។
សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ដែលបានចេញផ្សាយនៅថ្ងៃទី២៦ ខែតុលា បានឲ្យដឹងថា ការចុះឈ្មោះអ្នកបោះឆ្នោតសាជាថ្មីឡើងវិញជូនប្រជាពលរដ្ឋប្រមាណជិត ១០លាននាក់នេះ ដើម្បីងាយស្រួលរៀបចំបញ្ជីបោះឆ្នោតថ្មី គោលដៅបង្កើតជំនឿទុកចិត្តដល់អ្នកបោះឆ្នោត និងភាគីពាក់ព័ន្ធនានា។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានប្រាប់វិទ្យុអាស៊ីសេរី នៅថ្ងៃទី២៨ ខែតុលា ថា ការចុះឈ្មោះអ្នកបោះឆ្នោតសាជាថ្មីឡើងវិញជូនប្រជាពលរដ្ឋប្រមាណជិត ១០លាននាក់នេះ នឹងធ្វើឡើងក្រោយការចុះឈ្មោះសាកល្បងនៅខែវិច្ឆិកា ឆ្នាំ២០១៥ ខាងមុខនេះបានបញ្ចប់។ លោកបន្តថា ការចុះឈ្មោះ នឹងធ្វើឡើងតាមប្រព័ន្ធកុំព្យូទ័រដែលស្របទៅតាមកិច្ចព្រមព្រៀងរវាងគណបក្សនយោបាយទាំងពីរ កាលពីខែកក្កដា ឆ្នាំ២០១៤៖ «បញ្ជីឈ្មោះបោះឆ្នោតថ្មីនេះ ផ្អែកទៅតាមកិច្ចព្រមព្រៀងរវាងបក្សទាំងពីរ ដែលបានព្រមព្រៀងនៅថ្ងៃទី២២ ខែកក្កដា ឆ្នាំ២០១៤។ ចឹងក្តីសម្រេចរបស់បក្សទាំងពីរ បានសម្រេចដោយសភា ចឹងបញ្ជីឈ្មោះនេះ មិនធ្វើឡើងតាមបញ្ជីចាស់កន្លងទៅទេ»។
អ្នកនាំពាក្យគណៈកម្មាធិការជាតិរៀបចំការបោះឆ្នោត បន្តថា ទោះបីពលរដ្ឋមានឈ្មោះបោះឆ្នោតក្នុងបញ្ជីឈ្មោះចាស់ក្តី ក៏មិនអាចបោះឆ្នោតបានដែរ។ ដូច្នេះ ការចុះឈ្មោះសាជាថ្មី ផ្តល់សារសំខាន់ដល់អ្នកបោះឆ្នោត ដើម្បីសម្រេចជោគវាសនាប្រទេសជាតិ៖ «ដើម្បីបោះឆ្នោតបាន គ.ជ.ប ត្រូវរៀបចំឲ្យមានការចុះឈ្មោះ ហើយពលរដ្ឋវិញដើម្បីបោះឆ្នោត ត្រូវតែទៅចុះឈ្មោះ ដើម្បីឆ្ពោះទៅរកសិទ្ធិបោះឆ្នោតពេញលេញ ជ្រើសរើសអ្នកនយោបាយត្រូវ»។
គណៈកម្មាធិការជាតិរៀបចំការបោះឆ្នោត ក៏បានអំពាវនាវឲ្យពលរដ្ឋអ្នកបោះឆ្នោត ត្រៀមលក្ខណៈ (អត្តសញ្ញាណប័ណ្ណសញ្ជាតិខ្មែរ) ដើម្បីឲ្យដំណើរការចុះឈ្មោះបោះឆ្នោតថ្មីនៅដើមឆ្នាំ២០១៦ ខាងមុខនេះ មានដំណើរការរលូន។ ជាងនេះទៀត គ.ជ.ប កំពុងសហការជាមួយក្រសួងមហាផ្ទៃ ដើម្បីពន្លឿនធ្វើអត្តសញ្ញាណប័ណ្ណដល់ពលរដ្ឋដែលគ្រប់អាយុបោះឆ្នោត ដើម្បីឲ្យដំណើរការចុះឈ្មោះនេះ ប្រព្រឹត្តទៅតាមការគ្រោងទុក។ លើសពីនេះ ក៏ដើម្បីត្រៀមរៀបចំឲ្យការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងប្រព្រឹត្តទៅនៅឆ្នាំ២០១៧ ឲ្យមានតម្លាភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
នយោបាយ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង