រដ្ឋសភាឯកបក្សបង្កើនខ្ទង់ចំណាយ សម្រាប់ឆ្នាំ២០១៩
2018.10.26
អ្នកនាំពាក្យរដ្ឋសភា លោក ឡេង ប៉េងឡុង (ឆ្វេង) ថ្លែងក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភា កាលពីថ្ងៃទី២៨ ខែកញ្ញា ឆ្នាំ២០១៦។
RFA
គណៈកម្មាធិការអចិន្ត្រៃយ៍នៃរដ្ឋសភាឯបក្សរបបក្រុងភ្នំពេញ បានសម្រេចបង្កើនខ្ទង់ចំណាយ សម្រាប់ចាយវាយលើស្ថាប័នរដ្ឋ សម្រាប់ឆ្នាំ២០១៩។ ប៉ុន្តែមន្រ្តីរដ្ឋសភា បដិសេធមិនបញ្ជាក់តួលេខពិតប្រាកដនៃការចំណាយនោះទេ។ អតីតអគ្គលេខាធិការរងរដ្ឋសភាមកពីកូតាគណបក្សសង្គ្រោះជាតិ ឲ្យដឹងថា កន្លងមករដ្ឋសភា បានចាយវាយថវិកាជាតិខ្ជះខ្ជាយខ្លាំងណាស់។
រដ្ឋសភាឯកបក្សរបបក្រុងភ្នំពេញ ចេញសេចក្តីប្រកាសព័ត៌មានថា គណៈកម្មាធិការអចិន្ត្រៃយ៍ បានបើកកិច្ច និងពិភាក្សា អនុម័តលើគម្រោងថវិការបស់រដ្ឋសភាប្រចាំឆ្នាំ២០១៩ រួចហើយ នៅព្រឹកថ្ងៃទី២៥ តុលា ដើម្បី ផ្ញើជូនរបបក្រុងភ្នំពេញ ដាក់បញ្ចូលក្នុងសេចក្តីព្រាងច្បាប់ ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៩។
អគ្គលេខាធិការរដ្ឋសភា និងជាអ្នកនាំពាក្យ លោក ឡេង ប៉េងឡុង ថ្លែងក្នុងសន្និសីទសារព័ត៌មាន នៅក្រោយកិច្ចប្រជុំថា គម្រោងចំណាយថវិកាឆ្នាំ២០១៩ របស់រដ្ឋសភាឯកបក្ស បានកើនឡើងជាងឆ្នាំ២០១៨ រហូតដល់ជិតពីរភាគរយ ដោយសារឆ្នាំ២០១៩ រដ្ឋសភាឯកបក្សនឹងត្រូវធ្វើជាម្ចាស់ផ្ទះកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិក ដែលត្រូវរៀបចំធ្វើនៅខេត្តសៀមរាប។ ម្យ៉ាងទៀត រដ្ឋសភាឯកបក្ស ត្រូវជួសជុល និងផ្លាស់ប្តូរប្រព័ន្ធបច្ចេកទេសក្នុងសាលប្រជុំរដ្ឋសភា។
បន្ថែមពីនេះ លោក ឡេង ប៉េងឡុង ឲ្យអាស៊ីសេរីដឹងថា ការបង្កើនថវិកាសម្រាប់ចំណាយក្នុងស្ថាប័នរដ្ឋសភា ដោយសាររដ្ឋសភា ចង់ឲ្យមានសុគតភាព ឬថវិកាភាពស្មើគ្នា រវាងស្ថាប័នរដ្ឋសភា និងព្រឹទ្ធសភា។ រដ្ឋសភាឯកបក្ស ក៏ត្រូវបង្កើនប្រាក់ខែ ប្រាក់បំណាច់ ធ្វើកំណែទម្រង់មុខងារសាធារណៈ ដើម្បីឆ្លើយតបតាមគោលនយោបាយរបស់ទីស្ដីការគណៈរដ្ឋមន្ត្រី និងត្រូវចំណាយលើការទិញសម្ភារៈប្រើប្រាស់សម្រាប់រដ្ឋសភាឯកបក្ស៖ «គឺយើងតម្រឹមឲ្យវាមានសុក្រឹត្យភាពជាមួយនឹងព្រឹទ្ធសភា ហើយមន្ត្រីខ្លះត្រូវឡើងប្រាក់ខែទៅតាមគោលការណ៍របស់គណៈរដ្ឋមន្ត្រី ត្រូវឡើងប្រាក់ខែទៅតាមដំណាច់មុខងារ ត្រូវឡើងប្រាក់ខែតាមប្រពន្ធមុខងារសារធារណៈនឹងត្រូវទិញសម្ភារៈ រួមទាំងរបស់របរថ្មីៗ មកជំនួសដាក់ប្រើប្រាស់របស់ចាស់ៗ»។
នៅពេលអ្នកសារព័ត៌អាស៊ីសេរី សាកសួរពីគម្រោងចំណាយថវិការដ្ឋ លោក ឡេង ប៉េងឡុង អះអាងថា លោកមិនបានដឹងពីចំនួនតួលេខនៃថវិកាជាក់លាក់ទេ និងមិនអាចប្រាប់ពីកិច្ចការទាំងនេះបានទេ គឺដឹងតែកើនឡើងចំនួនជាងឆ្នាំ២០១៨។ លោកណែនាំឲ្យទៅសួរប្រធានគណៈកម្មការជំនាញទី២ នៃរដ្ឋសភា ដែលទទួលបន្ទុកផ្នែកហិរញ្ញវត្ថុ និងសវនកម្ម។ អាស៊ីសេរី មិនអាចសុំការឆ្លើយតបពីប្រធានគណៈកម្មការជំនាញហិរញ្ញវត្ថុ និងសវនកម្ម លោក ជាប យៀប បានទេ នៅថ្ងៃទី២៥ តុលា ដោយសារទូរស័ព្ទមិនចូល។
អតីតអគ្គលេខាធិការរងរដ្ឋសភា មកពីកូតាគណបក្សសង្គ្រោះជាតិ លោក ហ៊ីង សុខសាន្ដ ពន្យល់ថា ជានីតិវិធី និងស្ថានភាពជាក់ស្ដែងនៅរដ្ឋសភា គឺខ្ទង់ចំណាយរបស់រដ្ឋសភា ត្រូវផ្ដួចផ្ដើមដោយអគ្គនាយកដ្ឋានហិរញ្ញវត្ថុ ក្រោមការសម្របសម្រួលពីអគ្គលេខាធិការរងរដ្ឋសភាម្នាក់ ឈ្មោះ មិត្ត ការ៉េន។ បន្ទាប់មកត្រូវដាក់ទៅគណៈកម្មការទី២ របស់លោក ជាប យៀប ដើម្បីបន្ដទៅប្រធានរដ្ឋសភា លោក ហេង សំរិន ហើយត្រូវដាក់ចូលកិច្ចប្រជុំអចិន្ត្រៃយ៍ បញ្ជូនបន្ដទៅរបបក្រុងភ្នំពេញ ដើម្បីដាក់បញ្ជូលក្នុងកញ្ចប់ថវិកាជាតិជាមួយស្ថាប័នដទៃ រួចទើបបញ្ជូលមករដ្ឋសភាវិញ បើកកិច្ចប្រជុំរដ្ឋសភាពេញអង្គអនុម័ត។
លោក ហ៊ីង សុខសាន្ដ សង្កេតឃើញថា កញ្ចប់ថវិកាជាតិ សម្រាប់ចំណាយលើស្ថាប័នរដ្ឋសភា បានកើនឡើងរាល់ឆ្នាំ និងត្រូវបានចាយខ្ជះខ្ជាយខ្លាំងបំផុត តាមរយៈបេសកម្មរបស់តំណាងរាស្ត្រ ក្រុមគណៈកម្មការជំនាញរដ្ឋសភា និងកាន់តែខ្ជះខ្ជាយខ្លាំង លើការចំណាយឥតប្រយោជន៍របស់ក្រុមមន្ត្រីរដ្ឋសភា ចេញទៅប្រជុំនៅក្រៅប្រទេសម្ដងៗ តែងដាក់ចំនួនមនុស្សច្រើន លើសពីតម្រូវការជាក់ស្ដែង។ លោកថា កញ្ចប់ថវិកាជាតិចំណាយលើរដ្ឋសភា ត្រូវរ៉ាប់រងទាំងសំបុត្រយន្ដហោះ សណ្ឋាគារ ការហូបចុក ថ្លៃធ្វើដំណើរផ្ទាល់ខ្លួន សោហ៊ុយដាក់តាមហោប៉ៅ គឺរាល់ការចំណាយ របស់ក្រុមមន្ត្រីទាំងនោះ ជាបន្ទុករបស់ថវិកាជាតិ។
ចំណែកសម្ភារៈដែលរដ្ឋសភាទិញ អតីតអគ្គលេខាធិការរងរូបនេះថា តែងមានតម្លៃថ្លៃជាងទីផ្សារជាច្រើនដង។ រដ្ឋសភាបានខ្ជះខ្ជាយលើរថយន្ដរបស់តំណាងរាស្ត្រ ការសាង់សង់អគារមិនមានតម្លាភាព បើទោះជាក្រោមរូបភាពដេញថ្លៃ ប៉ុន្ដែគ្រាន់តែជាល្បែងឆ្ពិនភ្នែក។ ចំណាយលើទីប្រឹក្សា ជំនួយការ ថ្នាក់ដឹកនាំរដ្ឋសភាជាច្រើនរយនាក់ ដោយឥតប្រយោជន៍។
លើសពីនេះ លោក ហ៊ីង សុខសាន្ដ ឲ្យដឹងថា ក្រោយពេលក្រុមតំណាងរាស្ត្រគណបក្សប្រជាជនកម្ពុជាបានបណ្ដេញ លោក កឹម សុខា ពីអនុប្រធានទី១ រដ្ឋសភា ក្រុមតំណាងរាស្ត្រទាំងនោះ បានអនុម័តឲ្យមានកញ្ចប់ថវិកាបន្ថែមសម្រាប់ប្រធាន និងអនុប្រធានរដ្ឋសភាទាំង២ ចាយវាយជាប្រចាំសប្ដាហ៍។ លោកបន្ដថា នៅក្រោយការរំលាយគណបក្សប្រឆាំង រដ្ឋសភាឯកបក្សបានបន្ថែមជំនួយការ សម្រាប់ឲ្យតំណាងរាស្ត្រនីមួយៗ គឺអាចមានជំនួយការ ២នាក់ និងអ្នកបើកឡានម្នាក់ ដោយបៀវត្សរ៍ ជំនួយការម្នាក់ ២លានរៀល និងអ្នកបើកបរម្នាក់ ១លាន ៦សែនរៀល៖ «គ្រាន់តែប្រធានសភា កាលដែលខ្ញុំនៅ ប្រធានសភាគ្រាន់តែក្នុង ១សប្តាហ៍ មានសិទ្ធិចាយចំនួនដប់លានរៀល ចាយអ្វីចាយទៅគេមិនដឹងទេ គេមានសម្រាប់ឲ្យចាយតែម្តង។ អ៊ីចឹងមិនដឹងថា ដប់លានរៀលហ្នឹងចាយលើអីមិនដឹងទេ គេដាក់ថា ចាយលើសង្គមកិច្ចតែប៉ុណ្ណឹង។ អត់ធ្វើអីសោះ ក៏ប្រធានសភាចាយសែសិបលានរៀលក្នុង ១ខែ។ ចំណែកអនុប្រធានទី១ សភា ១សប្តាហ៍ប្រាំបីលានរៀល ហើយអនុប្រធានទី២ ប្រាំពីរលាន។ អត់ដឹងទេ អត់ដឹងគេចាយទៅលើអីទេ។ ការរៀបចំហ្នឹង រៀបនៅពេលគេចាប់ផ្តើមដកលោកប្រធាន កឹម សុខា ចេញ បានគេចាប់ផ្តើមនាំគ្នាចាយ»។
នាយកប្រតិបត្តិមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព លោក យង់ គឹមអេង សង្កេតឃើញថា បើទោះជារដ្ឋសភាជូនដំណឹងពីកិច្ចប្រជុំអនុម័តថវិកាសម្រាប់ចំណាយ ប៉ុន្ដែ ខ្ទង់ចំណាយជាក់លាក់ និងនីតិវិធីចាយវាយរបស់រដ្ឋសភាកន្លងមក មិនត្រូវបានផ្សព្វផ្សាយជាទូលាយទេ ដែលធ្វើឲ្យពលរដ្ឋមានមន្ទិលសង្ស័យពីតម្លាភាពក្នុងការចាយវាយរបស់រដ្ឋសភា៖ «ជាទូទៅយើងមិនសូវបានដឹង ឮ ឃើញ អីច្បាស់លាស់ច្រើននោះទេ ហើយចំណាយទាំងអស់ហ្នឹង សូមដាក់តាមវេបសាយឲ្យប្រជាពលរដ្ឋបានដឹងឮ ផង»។
នៅមុនតុលាការរបបក្រុងភ្នំពេញ រំលាយគណបក្សសង្គ្រោះជាតិ ក្រុមតំណាងរាស្ត្របក្សប្រឆាំង និងអនុប្រធានគណៈកម្មការជំនាញទី២ គឺសេដ្ឋកិច្ច ហិរញ្ញវត្ថុ ធនាគារ និងសវនកម្ម លោក សុន ឆ័យ តែងទាមទារ និងកោះអញ្ជើញអ្នកទទួលខុសត្រូវក្នុងរដ្ឋសភា មកសាកសួរជាញឹកញាប់ ពីភាពមិនប្រក្រតី និងអំពើពុករលួយ ក្នុងស្ថាប័នរដ្ឋសភា។
តំណាងរាស្ត្រគណបក្សសង្គ្រោះជាតិរកឃើញថា មន្ត្រីច្រើនរយនាក់ មានឈ្មោះ និងមិនដែលបានទៅធ្វើការនៅរដ្ឋសភា។ អគ្គលេខាធិការរងរដ្ឋសភាម្នាក់ គឺលោក មិត្ត ការ៉េន មានសាច់ញាតិជាច្រើនធ្វើការក្នុងស្ថាប័នរដ្ឋសភា ទាំងប្រពន្ធ កូនប្រុសស្រីបង្កើត និងកូនប្រសារ។ គណបក្សសង្គ្រោះជាតិ ក៏រកឃើញភាពមិនប្រក្រតីនៃការដេញថ្លៃគម្រោងសាងសង់ដងទង់ជាតិនៅរដ្ឋសភា ដែលមានតម្លៃជាង ៣ម៉ឺនដុល្លារ និងការចំណាយ ក្នុងឆ្នាំ២០១៤ មានបញ្ហាសង្ស័យក្នុងទំហំជាង ១១លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន