លោក ហ៊ុន សែន ទម្លាយរឿងពុករលួយរបស់ចៅក្រមរឿងលែងឪពុកម្តាយលោក ថោង សារ៉ាត់
2015.02.17
លោកនាយករដ្ឋមន្ត្រី ហ៊ុន សែន ថ្លែងក្នុងថ្ងៃសម្ពោធបើកការដ្ឋានសាងសង់ស្ពានអាកាសស្តុបទួលគោក រាជធានីភ្នំពេញ នៅថ្ងៃទី០៩ ខែកញ្ញា ឆ្នាំ ២០១៤។
Photo: RFA
លោកនាយករដ្ឋមន្ត្រី ហ៊ុន សែន ទម្លាយរឿងពុករលួយរបស់ចៅក្រមនៃសាលាដំបូងរាជធានីភ្នំពេញ ក្នុងសំណុំរឿងដោះលែងឪពុកម្តាយ លោក ថោង សារ៉ាត់។ ការបញ្ជាក់ជាសាធារណៈនេះ ធ្វើឡើងក្នុងពិធីចែកសញ្ញាបត្រដល់និស្សិតសកលវិទ្យាល័យមួយនាព្រឹកថ្ងៃទី១៧ ខែកុម្ភៈ នៅវិទ្យាស្ថានជាតិអប់រំ។
ប្រមុខរាជរដ្ឋាភិបាលកម្ពុជា ស្នើឲ្យឧត្តមក្រុមប្រឹក្សានៃអង្គចៅក្រមស៊ើបអង្កេតសំណុំរឿងប្ដីប្រពន្ធជនជាតិវៀតណាម ជាឪពុកម្តាយ លោក ថោង សារ៉ាត់។
ចំណាត់ការនេះ ធ្វើឡើងដើម្បីលុបលាងភាពអាម៉ាស់របស់អាជ្ញាធរ បន្ទាប់ពីអ្នកលេងហ្វេសប៊ុក (facebook) បានយកករណីដោះលែងប្ដីប្រពន្ធអ្នកមាននេះ ទៅធៀបនឹងសំណុំរឿងរបស់សកម្មជនដីធ្លីជាង ១០នាក់ ដែលកំពុងជាប់គុកក្នុងបទចោទធ្វើឲ្យស្ទះចរាចរណ៍។ ឪពុកម្តាយរបស់ លោក ថោង សារ៉ាត់ ដែលជាប់ចោទពីបទលាក់ទុកអាវុធខុសច្បាប់ ត្រូវបានតុលាការដោះលែងឲ្យនៅក្រៅឃុំបណ្ដោះអាសន្នកាលពីថ្ងៃទី៧ ខែកុម្ភៈ។ បន្ទាប់ពីដោះលែងរួច អ្នកលេងហ្វេសប៊ុកបានរិះគន់ថា លោក ហ៊ុន សែន ទទួលសំណូកជនជាប់ចោទ អ្នកខ្លះថាវៀតណាម បញ្ជាឲ្យរាជរដ្ឋាភិបាលដោះលែង ជាដើម។ ទោះជាបែបណាក្តី អាជ្ញាធរបានតាមចាប់ខ្លួនជនជាប់ចោទយកទៅដាក់គុកវិញ នៅពេលដែលពួកគាត់ប្រុងគេចខ្លួនទៅប្រទេសវៀតណាម។
លោក ហ៊ុន សែន ថ្លែងទាំងសម្ដីខ្លាំងៗថា ហេតុអ្វីបានជាអ្នកក្រគ្រាន់តែលើកព្រនង់សោះជាប់គុក? ឯអ្នកមានទុកអាវុធ ៨ដើមខុសច្បាប់ ហើយនៅតែរួចខ្លួនបាន? លោកបន្តថា លោកមិនសុខចិត្តទេ! លោកបញ្ជាឲ្យរដ្ឋមន្ត្រីក្រសួងយុត្តិធម៌ ចាត់ការរឿងនេះជាបន្ទាន់ ដើម្បីកុំឲ្យពលរដ្ឋរិះគន់រដ្ឋាភិបាលតទៅទៀត។ លោកបញ្ជាក់ថា ចៅក្រមសាលាដំបូងរាជធានីភ្នំពេញនេះ អាចបានទទួលសំណូករាប់លានដុល្លារ៖ «រឿងហ្នឹងមានភាពមិនប្រក្រតីទេ គ្រប់ភាគីមិនអាចទទួលយកបានឡើយ ចៅក្រមប្រហែលជាកាត់ក្តីតាមលុយ»។
លោកបានរំឭកពីប្រវត្តិដែលលោកបញ្ជាឲ្យសមត្ថកិច្ចចាប់ខ្លួនចៅក្រមពុករលួយ និងលើកយកករណីតុលាការស៊ីលុយចោរ មកអត្ថាធិប្បាយថែមទៀត។
ទាក់ទងនឹងករណីនេះ ប្រធានផ្នែកបច្ចេកទេសអង្កេតអង្គការការពារសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា លោកគាំទ្រឲ្យឧត្តមក្រុមប្រឹក្សានៃអង្គចៅក្រមស៊ើបអង្កេតលើសំណុំរឿងណាមួយដែលមានភាពមិនប្រក្រតី ប៉ុន្តែឧត្តមក្រុមប្រឹក្សានៃអង្គចៅក្រម មិនដែលបញ្ចេញសកម្មភាពទាល់តែសោះក្នុងសំណុំរឿងមុនៗ ដែលនាយករដ្ឋមន្ត្រីមិនបានលើកយកមកនិយាយជាសាធារណៈនោះ៖ «កុំអន្តរាគមន៍អារឿងណាដែលនាយករដ្ឋមន្ត្រីស្នើសុំពិនិត្យ មើលរឿងរាស្ត្រតូចតាចផង»។
បច្ចុប្បន្ននេះ ឪពុកម្តាយរបស់ លោក ថោង សារ៉ាត់ ត្រូវបានតុលាការសម្រេចឃុំខ្លួនបណ្ដោះអាសន្នក្នុងពន្ធនាគារព្រៃស ពីបទលាក់ទុកអាវុធខុសច្បាប់។
លោក ហ៊ុន សែន បញ្ជាក់ថា គ្រួសាររបស់ លោក ថោង សារ៉ាត់ ជាប់ពាក់ព័ន្ធនឹងករណីឃាតកម្មលើរូបឧកញ៉ា អ៊ឹង ម៉េងជឺ។ លោករំឭកថា ចៅក្រមម្នាក់ធ្លាប់ចេញមុខការពារ លោក ថោង សារ៉ាត់ ប៉ុន្តែលោកតបទៅវិញថា បើ លោក ថោង សារ៉ាត់ មិនពាក់ព័ន្ធនឹងការបាញ់សម្លាប់លោកឧកញ៉ា អ៊ឹង ម៉េងជឺ គឺមានតែស្នងការនគរបាលរាជធានីភ្នំពេញ លោក ជួន សុវណ្ណ ចាប់មនុស្សខុស។ លោកការពារស្នងការនគរបាលរាជធានីភ្នំពេញ ថាមិនបានចាប់មនុស្សខុសឡើយ។
យ៉ាងណាក៏ដោយ របាយការណ៍ចុងក្រោយរបស់អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី (Surya Subedi) ចំពោះប្រព័ន្ធយុត្តិធម៌ បញ្ជាក់ថា ប្រព័ន្ធយុត្តិធម៌នៅកម្ពុជា មិនបានបែងចែកអំណាចឲ្យដាច់ស្រឡះពីរដ្ឋាភិបាលឡើយ មានន័យថា តុលាការឋិតក្រោមស្ថាប័ននីតិប្រតិបត្តិដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
នយោបាយ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង