របបលោក ហ៊ុន សែន អាចចំណាយប្រាក់ជិត ២,៤ លានដុល្លារ ថ្លៃជួលយន្តហោះទៅចូលរួមមហាសន្និបាតអង្គការសហប្រជាជាតិ
2018.10.09
មន្រ្តីបក្សកាន់អំណាច បញ្ជាក់ថ្លៃជួលយន្តហោះ ដែលដឹកលោក ហ៊ុន សែន និង មន្រ្តីរបបនេះ ទៅចូលរួមមហាសន្និបាតអង្គការសហប្រជាជាតិ ដែលត្រូវចំណាយលុយជាតិ ៧ម៉ឺន ដុល្លារក្នុងមួយម៉ោង។ មន្រ្តីដដែលរូបនេះ អះអាងថា របបនេះមិនខ្លាចចាយលុយទេ ព្រោះដើម្បីសុវត្ថិភាពថ្នាក់ដឹកនាំ។ ប៉ុន្តែ មន្រ្តីអង្គការសង្គមស៊ីវិល ថាលោក ហ៊ុន សែន ក្បត់ពាក្យសន្យា ដែលថា ចង់កាត់បន្ថយការចំណាយ ក្នុងការធ្វើដំណើរនេះ។
រដ្ឋលេខាធិការក្រសួងព័ត៌មាន និង ជាសមាជិកគណៈកម្មាធិការមជ្ឈិមបក្ស គណបក្សប្រជាជនកម្ពុជា លោក ជុំ កុសល ឆ្លើយតបទាំងក្រេវក្រោធ ទៅនឹងលោក វិសាល ដែលទូរស័ព្ទចូលក្នុង “កម្មវិធីសំឡេងការពិត ដើម្បីប្រជាជន” ដែលផ្សាយបន្តតាមវិទ្យុបាយ័ន កាលពីថ្ងៃទី៣ ខែ តុលា ដោយបញ្ជាក់ថា របបនេះពិតជាបានចាយលុយ ៧ម៉ឺនដុល្លារក្នុងមួយម៉ោង លើថ្លៃជួលយន្តហោះនោះ៖ «លោកថាឃើញហ្វេសប៊ុកគេចុះថាសម្តេច ហ៊ុន សែន ជួលយន្តហោះមួយម៉ោង ៧សែនដុល្លារ ខុសហើយ! លោកបានព័ត៌មានហ្នឹងមកពីណា? ៧ម៉ឺនដុល្លារទេ មិនមែន ៧សែនទេ»។
របបលោក ហ៊ុន សែន បានជួលយន្តហោះទំនើបប្រភេទ បូអ៊ីង (Boeing) ៧៨៧ ពីក្រុមហ៊ុនឯកជនចិនឈ្មោះ Deer Jet ដើម្បីដឹកលោក និងគណៈប្រតិភូរបបលោកប្រមាណ ៤០នាក់ផ្សេងទៀត រួមមានឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រីផង ទៅចូលរួមមហាសន្និបាតអង្គការសហប្រជាជាតិ នៅទីក្រុងញូយក សហរដ្ឋអាមេរិក កាលពីចុងខែកញ្ញាកន្លងទៅនេះ។
តម្លៃក្រៅផ្លូវការ សម្រាប់ជួលយន្តហោះប្រភេទនេះ គឺចាប់ពីចន្លោះពី ២០.០០០ ដុល្លារ ដល់ ៧៣.០០០ ឬ ៧៤.០០០ ដុល្លារ ក្នុងមួយម៉ោង។ បើតាមការអះអាងរបស់លោក ជុំ កុសល ដែលថា ត្រូវបង់ ៧ម៉ឺន ដុល្លារក្នុងមួយម៉ោង សម្រាប់ការហោះហើរត្រង់ ពីកម្ពុជាទៅអាមេរិក ដែលសរុប ៣៤ម៉ោងនោះ គឺកម្ពុជាត្រូវចំណាយប្រាក់ប្រហែល ២,៤ លានដុល្លារ (២.៣៨០.០០០ ដុល្លារ) សម្រាប់ថ្លៃជួលយន្តហោះមួយលើកនេះ ដោយមិនគិតទាំងថ្លៃពន្ធព្រលានយន្តហោះ និង ថ្លៃចតយន្តហោះនៅអាមេរិក ពេលលោក ហ៊ុន សែន កំពុងស្នាក់នៅទីនោះផងទេ។
ទោះជាយ៉ាងនេះក្តី លោក ជុំ កុសល ថ្លែងការពារការចំណាយដ៏សន្ធឹកសន្ធាប់បែបនេះ ដោយអះអាងថា ទោះត្រូវចំណាយប៉ុណ្ណា ក៏មិនត្រូវរាថយដែរ ព្រោះវាជាការចាំបាច់៖ «អ៊ីចឹងការចំណាយថវិកាជាតិត្រឹមប៉ុណ្ណឹង ដើម្បីមេដឹកនាំប្រទេសមួយទៅចូលរួមប្រជុំពិភពលោក ដើម្បីការពារសុវត្ថិភាព សឹងតែគណៈរដ្ឋមន្រ្តីមួយទាំងមូល លើយន្តហោះ រឿងអីរាជរដ្ឋាភិបាល មិនខ្លាចក្នុងការចំណាយថវិកាជាតិ»។
ចំណែកលោក ហ៊ុន សែន វិញ បានថ្លែងសារឌឺដងឡងសម្ដី ឲ្យអ្នកដែលហ៊ានរិះគន់ រឿងថ្លៃចំណាយលើការជួលយន្តហោះនេះ ដោយលោកធ្វើជាសួរសំណួរបែបចម្អក ថាបើមិនឲ្យលោកជួលហោះ តើឲ្យលោក ទៅចូលរួមមហាសន្និបាតអង្គការសហប្រជាជាតិនោះ ដោយរបៀបណាទៅវិញ?៖ «អានេះគិតឲ្យឯងដើរឬស្អី? ឲ្យឯងហែលទឹកឬស្អី?»។
មិនតែប៉ុណ្ណោះ លោក ហ៊ុន សែន ថែមទាំងវាយប្រហារ អ្នករិះគន់រឿងថ្លៃយន្តហោះនោះ ថាសុទ្ធតែជាមនុស្សបក្សប្រឆាំង ដែលលោកចោទថា ជាមនុស្សឧត្បាត និង សមតែលោកធ្វើទុក្ខបុកម្នេញមែន៖ «បើវាចង្រៃយ៉ាងហ្នឹង! វាអ៊ីចឹងហើយ បានជាខ្ញុំនិយាយថា បើពួកអាចង្រៃនេះនៅ សង្គ្រាមវានឹងផ្ទុះ ព្រោះវាអាក្រក់ពេក! អាក្រក់ហួសហេតុ! អាក្រក់ជូរជាតិ។ បើវាចង្រៃម្លឹងៗ វាសមតែនឹងជាប់គុកហ្នឹង អាពួកហ្នឹង!»។
មន្រ្តីគណបក្សប្រឆាំង ច្រានចោលការចោទប្រកាន់របស់លោក ហ៊ុន សែន ដែលចោទគណបក្សប្រឆាំង ថាបំផ្លើសព័ត៌មាន រឿងថ្លៃជួលយន្តហោះនេះ។ ប្រធានចលនាយុវជនគណបក្សសង្គ្រោះជាតិ លោក ហ៊ីង សុខសាន្ត ចាត់ទុកសារវាយប្រហាររបស់លោក ហ៊ុន សែន មកលើគណបក្សសង្គ្រោះជាតិ រឿងថ្លៃជួលយន្តហោះទំនើបនោះ ថា ជាការលាបពណ៌អាក្រក់ មានចរិតកេងចំណេញនយោបាយ ក្នុងចេតនាបន្ទាបបន្ថោកតម្លៃគណបក្សប្រឆាំង និងដើម្បីឲ្យមានការភាន់ច្រឡំ ថាគណបក្សប្រឆាំង ចេះតែចោទរបបលោក ហ៊ុន សែន។
ប្រទេសកម្ពុជា នៅតែជាប្រទេសក្រីក្រមួយ ដែលប្រជាពលរដ្ឋភាគច្រើន រកប្រាក់បានជាមធ្យមក្រោម ១,៩០ដុល្លារ ក្នុងមួយថ្ងៃ បើផ្អែកលើសន្ទស្សន៍សាកលពីភាពក្រីក្រ ពហុសមាសភាគ ឆ្នាំ ២០១៨ (Multidimensional Poverty Index ឬ MPI)។ ស្ថានភាពក្រីក្រទាំងនេះ គឺមកពីការខ្វះទឹកស្អាត ខ្វះអនាម័យ គ្មានអាហារូបត្ថម្ភគ្រប់គ្រាន់ មានបញ្ហាសុខាភាព ឬខ្វះការអប់រំកម្រិតបឋមជាដើម។ ជាពិសេស គឺពួកគាត់ ខ្វះប្រាក់ចំណូល។
ក្នុងស្ថានភាព ដែលប្រទេសកម្ពុជា កំពុងស្ថិតក្នុងភាពក្រីក្របែបនេះ របបលោក ហ៊ុន សែន រងការរិះគន់ជាទូទៅថា ចំណាយថវិកាជាតិយ៉ាងច្រើនសន្ធឹកសន្ធាប់ ដោយឥតប្រយោជន៍ ដើម្បីគ្រាន់តែបញ្ជូនមន្ត្រីរបស់លោករាប់សិបនាក់ ហែហមអមដំណើរលោក ទៅចូលរួមមហាសន្និបាតអង្គការសហប្រជាជាតិ ដែលប្រទេសខ្លះបញ្ជូនមនុស្សមិនដល់ ១០នាក់ផង និងចំណាយប្រាក់តិចជាងកម្ពុជាឆ្ងាយណាស់។ បន្ថែមលើមន្ត្រីគ្រាក់ៗប្រមាណ ៤០នាក់ ដែលធ្វើដំណើរតាមជើងយន្តហោះឯកជនជាមួយលោក នៅមានមន្ត្រីរបបលោកជាច្រើននាក់ផ្សេងទៀត ដែលត្រូវធ្វើដំណើរតាមជើងយន្តហោះផ្សេង ទៅចាំមុន ដើម្បីរៀបចំទទួលដំណើររបស់លោក និង គណៈប្រតិភូ និងដើម្បីទៅចូលរួមបាតុកម្មគាំទ្រវត្តមានលោក នៅទីក្រុងញូវយ៉ក។
របបនេះ ក៏រងការរិះគន់ ក្នុងការចំណាយពេលវេលា និងថវិការដ្ឋខ្ជះខ្ជាយ ព្រោះលោក ហ៊ុន សែន ពេលទៅណាម្តងៗ មានមន្រ្តីហែហមយ៉ាងច្រើនសន្ធឹក ដែលត្រូវចំណាយពេលអង្គុយកំដរ ការថ្លែងសុន្ទរកថាលោក ហ៊ុន សែន ម្តងៗរាប់ម៉ោង។ ដោយសារការរិះគន់នេះ លោក ហ៊ុន សែន ធ្លាប់បានសន្យា កាលពីខែមីនា ឆ្នាំ២០១៣ ក្នុងមហាសន្និបាតវិសាមញ្ញ នៅកោះពេជ្រ ថា“មន្រ្តីជាន់ខ្ពស់របស់បក្សលោក មិនចាំបាច់អមដំណើរលោកច្រើនពេកទេ ព្រោះវាគ្មានប្រយោជន៍សម្រាប់ប្រជាជន ប៉ុន្តែ ផ្ទុយទៅវិញវាចំណាយពេល និងថវិកាច្រើន”។
ប៉ុន្តែ ចាប់តាំងពីពេលនោះមក រៀងរាល់ការរៀបចំវេទិកាសាធារណៈ ជាពិសេសពេលចុះជួបកម្មកររោងចក្រ លោក ហ៊ុន សែន នៅតែបន្តយកមន្រ្តីហែហមលោក យ៉ាងច្រើនសន្ធឹកដដែល។ ចំណែកឯការ ធ្វើដំណើរទៅក្រៅប្រទេសទៀតសោត ជាពិសេស ដំណើរទៅមហាសន្និបាតអង្គការសហប្រជាជាតិ ដែលមានតែរូបលោកម្នាក់ឯង ប៉ុណ្ណោះជាអ្នកថ្លែងសុន្ទរថាក៏ដោយ ក៏លោកនាំមន្រ្តីហែហម ទៅជាមួយស្ទើរអស់ពីគណៈរដ្ឋមន្រ្តី។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថាលោក ហ៊ុន សែន គួរកាត់បន្ថយចំនួនមន្រ្តី និង ការចំណាយយ៉ាងសន្ធឹករបស់រដ្ឋ ក្នុងការធ្វើដំណើរបែបនេះ ដើម្បីសន្សំថវិកាជាតិផង និង ដើម្បីឲ្យស្របតាមអ្វីដែលលោក ហ៊ុន សែន ធ្លាប់សន្យាកាលពីឆ្នាំ ២០១៣ នោះផង៖ «ខ្ញុំថាក្នុងករណី ដែលមានការធ្វើដំណើរដែលមានតម្លៃថ្លៃ ការកំណត់ចំនួនមន្រ្តីហែហម ទៅចូលរួមហ្នឹង គួរតែការគិតគូដែរ។ កន្លងសម្តេច ហ៊ុន សែន ក៏គាត់ធ្លាប់លើកឡើងដែរ ការហែហមច្រើនហ្នឹង ការធ្វើបេសកកម្មទៅក្រៅប្រទេសនោះ ធ្វើឲ្យខ្ជះខ្ជាយថវិការជាតិដែ»។
ទោះបីជាលោក ហ៊ុន សែន មិនចាំបាច់ដើរ ឬ ហែលទឹក ទើបអាចទៅចូលរួមមហាសន្និបាតនៅអង្គការសហប្រជាជាតិបានក៏ដោយ ក៏កន្លងមកមន្រ្តីជាន់ខ្ពស់របបនេះ អាចធ្វើដំណើរតាមជើងយន្តហោះដឹកអ្នកដំណើរធម្មតា ដែលអាចចំណាយថវិកា អស់តិចជាងនេះឆ្ងាយណាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។