ស្នងការនគរបាលរាជធានីភ្នំពេញ ប្រកាសជំហរថា នឹងគាំទ្រតំណាងរាស្ត្រគណបក្សប្រជាជនកម្ពុជា និងជាកូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី ក្នុងការដឹកនាំសន្តិភាពជូនជាតិ និងប្រជាជន។ ការប្រកាសនេះ សំដៅដល់ការទទួលបានពានរង្វាន់របស់កូនប្រុសរបស់ លោក ហ៊ុន សែន កាលពីពេលថ្មីៗនេះ។ អង្គការមិនមែនរដ្ឋាភិបាល លើកឡើងថា កងកម្លាំងអាជ្ញាធរត្រូវការពារប្រយោជន៍ជាតិ ដោយពុំមានការរើសអើងជាជាងប្រយោជន៍បុគ្គល ឬប្រយោជន៍បក្សនយោបាយ។
ប្រសាសន៍របស់ស្នងការនគរបាលរាជធានីភ្នំពេញ លោក ជួន សុវណ្ណ ត្រូវបានគេហទំព័ររបស់អគ្គស្នងការនគរបាលជាតិផ្សព្វផ្សាយ នៅថ្ងៃទី២៨ ខែវិច្ឆិកា។ ក្នុងនោះ លោក ជួន សុវណ្ណ មានប្រសាសន៍ថា នាយ នាយរងនគរបាលទាំងអស់នៃស្នងការដ្ឋាននគរបាលរាជធានីភ្នំពេញ ប្ដេជ្ញាយកអស់កម្លាំងកាយចិត្ត និងប្រើអស់លទ្ធភាព គាំទ្ររាល់បុព្វហេតុរបស់ លោក ហ៊ុន ម៉ានី តំណាងរាស្ត្រវ័យក្មេង និងជាប្រធានសហភាពសហព័ន្ធយុវជនកម្ពុជា ដែលបាននាំសន្តិភាពជូនជាតិ និងប្រជាជនកម្ពុជា ទាំងមូល។
ការប្រកាសនេះ គឺបន្ទាប់ពីថ្ងៃទី២៥ ខែវិច្ឆិកា លោក ហ៊ុន ម៉ានី ទទួលបានពានរង្វាន់សន្តិភាព ហ្គុស៊ី (The Gusi Peace Prize) នៅប្រទេសហ្វីលីពីន ក្នុងភាពជាអ្នកដឹកនាំយុវជន ការគោរពសិទ្ធិ និងជាអ្នកការពារស្រឡាញ់សម្បត្តិវប្បធម៌បេតិកភណ្ឌពិភពលោក។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ការប្រកាសរបស់ស្នងការនគរបាលនៅពេលនេះ គ្រាន់តែជាការយកចិត្តលោកនាយករដ្ឋមន្ត្រី ហ៊ុន សែន ប៉ុណ្ណោះ។ លោកបន្តថា ជាការល្អដែលកងកម្លាំងអាជ្ញាធរប្រកាសការពារ លោក ហ៊ុន ម៉ានី ដែលលោកជាអ្នកទទួលបានពានរង្វាន់ផង ជាអ្នកតំណាងរាស្ត្រផង ប៉ុន្តែវានឹងប៉ះពាល់ដល់ឯករាជភាពរបស់កងកម្លាំងសមត្ថកិច្ច ប្រសិនបើគេប្រើដើម្បីការពារប្រយោជន៍បុគ្គល ឬប្រយោជន៍គណបក្សនយោបាយ។ លោកចង់ឃើញការងាររបស់កងកម្លាំងសមត្ថកិច្ច ត្រូវជាការងារដែលពុំមានការរើសអើង៖ «ប៉ូលិស ទាហាន តែងប្រកាសការពារគាំទ្របែបហ្នឹង ប៉ុន្តែសំខាន់បំផុតការប្រកាសការបង្ហាញរបស់គាត់ហ្នឹង បានធ្វើឲ្យមានការបាត់បង់ជំហរជារួមរបស់កងកម្លាំងប្រដាប់អាវុធ។ យើងមើលទៅកងកម្លាំងប្រដាប់អាវុធ តែងបង្ហាញសមានចិត្តចំពោះគណបក្សប្រជាជន ដ្បិតមន្ត្រីភាគច្រើនជាសមាជិកគណបក្សប្រជាជនកម្ពុជា»។
ទាក់ទិននឹងបញ្ហានេះ ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក (ADHOC) លោក នី ចរិយា មានប្រសាសន៍ថា ការប្រកាសបែបនេះរបស់កងកម្លាំងប្រដាប់អាវុធ បង្ហាញឲ្យឃើញថា កងកម្លាំងនគរបាលហាក់បម្រើឲ្យតែបុគ្គល ឬក្រុមបក្ខពួករបស់ខ្លួន ដែលមតិជាតិ និងអន្តរជាតិតែងរិះគន់៖ «កងកម្លាំងប្រដាប់អាវុធអត់មានករណីពិសេសទេ លើកលែងតែកាតព្វកិច្ចការពារថ្នាក់ដឹកនាំចេញដំណើរទៅណាមកណា គឺជានីតិវិធី តែបើថាឲ្យមានការប្ដេជ្ញាចិត្តថាការពារអ្នកនេះពិសេសជាងអ្នកនោះ គឺខុស។ ចឹងហើយដែលសហគមន៍ជាតិ អន្តរជាតិ រិះគន់ថា កងកម្លាំងប្រដាប់អាវុធគ្មានឯករាជភាពទេ ការពារតែក្រុមណា បុគ្គលណាដែលមានអំណាច។ កងកម្លាំងសម្រាប់ការពារតែអ្នកបានពានរង្វាន់ ឯអ្នកផ្សេងអត់ការពារ គឺអត់អាចធ្វើចឹងបានទេ»។
កាលពីខែកញ្ញា លោក ជា តារា ដែលកាលណោះលោកជាអគ្គមេបញ្ជាការរងកងយោធពលខេមរភូមិន្ទ និងជាតំណាងគណៈមេបញ្ជាការឯកភាពសមរភូមិប្រាសាទព្រះវិហារ ផ្កាយមាស៤ លើកឡើងថា ទាហាននៃកងយោធពលខេមរភូមិន្ទ ជារបស់គណបក្សប្រជាជនកម្ពុជា ព្រោះ លោក ហ៊ុន សែន ដែលជាប្រធានគណបក្សនេះជាអ្នកផ្គត់ផ្គង់ទាហាននាពេលបច្ចុប្បន្ន។
អ្នកវិភាគនយោបាយលើកឡើងថា ការថ្លែងបែបនេះជាកាយវិការមួយចង់បង្ហាញថា កងកម្លាំងឯករាជ្យរបស់រដ្ឋ ក្លាយទៅជាកម្មសិទ្ធិផ្ដាច់មុខរបស់គណបក្សកាន់អំណាច ហើយក៏អាចឆ្លុះបញ្ចាំងពីឥទ្ធិពលកងកម្លាំងយោធាក្នុងការការពារគណបក្សនេះនៅពេលចាញ់ឆ្នោតក៏ថាបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។