ប្រធានាធិបតីកូរ៉េខាងត្បូងគ្រោងទស្សនកិច្ចនៅកម្ពុជាលើកដំបូងរយៈពេល ៣ថ្ងៃ
2019.03.05
ប្រធានាធិបតីកូរ៉េខាងត្បូង លោក មូន ជេអ៊ីន (Moon Jae-In) នឹងមកទស្សនកិច្ចនៅកម្ពុជាជាលើកដំបូង រយៈពេល ៣ថ្ងៃចាប់ពីថ្ងៃទី១៤ ដល់ ១៦ ខែមិនា ខាងមុខ តាមការអញ្ជើញរបស់ព្រះមហាក្សត្រ ព្រះបរមនាថ នរោត្តម សីហមុនី។
សេចក្តីប្រកាសព័ត៌មានរបស់ក្រសួងការបរទេស កាលពីថ្ងៃទី៤ ខែមិនា ឱ្យដឹងថា ក្នុងដំណើរទស្សនកិច្ចនេះ លោក មូន ជេអ៊ីន នឹងចូលគាល់ព្រះមហាក្សត្រ។ លោកក៏នឹងជួបពិភាក្សាជាមួយលោក ហ៊ុន សែន ស្ដីពីការជំរុញទំនាក់ទំនងទ្វេភាគី និងពង្រឹងកិច្ចសហប្រតិបត្តិការ លើវិស័យនានា ព្រមទាំងផ្លាស់ប្ដូរទស្សនៈស្ដីពីបញ្ហានៅក្នុងតំបន់ និងអន្តរជាតិ។
ក្រោយកិច្ចពិភាក្សានេះ មេដឹកនាំប្រទេសទាំងពីរ នឹងចុះហត្ថលេខាលើកិច្ចព្រមព្រៀងមួយចំនួន ព្រមទាំងចេញសេចក្ដីថ្លែងការណ៍រួម បង្ហាញពីលទ្ធផលជំនួបនេះ។
ដំណើរទស្សនកិច្ចរបស់លោក មូន ជេអ៊ីន (Moon Jae-In) ធ្វើឡើងស្របពេលដែលប្រធានសភាពាណិជ្ជកម្មកម្ពុជា លោក គិត ម៉េង និងប្រធានសមាគមពាណិជ្ជកម្មអន្តរជាតិកូរ៉េ លោក ថៃហ្កឺ ម៉ិនសុកជូ (Tiger Min-sok Chu) គ្រោងជជែកពិភាក្សាស្ដីពីការជំរុញ ឱ្យមានការវិនិយោគផ្នែកសេដ្ឋកិច្ច និងពាណិជ្ជកម្ម នៃប្រទេសទាំងពីរផងដែរ។
ទិន្នន័យរបស់ក្រុមប្រឹក្សាអភិវឌ្ឍន៍កម្ពុជា (CDC) ឱ្យដឹងថា ចាប់ពីខែមិនា ឆ្នាំ២០១៧ មក ការវិនិយោគរបស់កូរ៉េខាងត្បូងនៅកម្ពុជា មានចំនួនទឹកប្រាក់ ៤ពាន់លាន ៥សែនដុល្លារអាមេរិក ក្នុងនោះទឹកប្រាក់ ៣ រយលានដុល្លារអាមេរិក ផ្ដោតលើវិស័យកសិកម្ម៕