លោក សម រង្ស៊ី គ្រោងជួបពលរដ្ឋខ្មែរនិងតំណាងរាស្ត្រអូស្ត្រាលីប្រាប់ពីគម្រោងវិលចូលស្រុក
2019.08.14
លោក សម រង្ស៊ី នឹងទៅបំពេញបេសកកម្មនៅប្រទេសអូស្ត្រាលីជាច្រើនថ្ងៃក្នុងតំបន់មួយចំនួនដើម្បីជួបអ្នកគាំទ្ររបស់ខ្លួន និងសមាជិកសភាអូស្ត្រាលីក្នុងគោលបំណងប្រាប់ពីគម្រោងវិលចូលស្រុកវិញរបស់លោកក្នុងឆ្នាំ២០១៩នេះ។
តាមគម្រោងលោក សម រង្ស៊ី ទៅដល់អូស្ត្រាលីចាប់ពីថ្ងៃទី១៧ រហូតដល់ថ្ងៃទី២៥ ខែសីហា នៅទីក្រុងសំខាន់ៗមួយចំនួនដែលពលរដ្ឋខ្មែររស់នៅច្រើនដូចជា៖ ទីក្រុងស៊ីដនី (Sydney) ទីក្រុងអាដដេលេត និងទីក្រុងម៉ែលប៊ន (Melbourne) ជាដើម។
ក្រុមមន្ត្រីគណបក្សសង្គ្រោះជាតិក្រុងម៉ែលប៊ន បានបង្ហោះវីដេអូតាមបណ្ដាញសង្គមឱ្យដឹងថា ពួកគេបានទៅជួបសមាជិកសភា នៃរដ្ឋវ៉ិកតូរីយ៉ា (Victoria) លោក ជូលៀន ហ៊ីល (Julian Hill) ដើម្បី សម្របសម្រួលឱ្យមានជំនួបរវាងលោក សម រង្ស៊ី និងតំណាងរាស្ត្រអូស្ត្រាលី។
តំណាងចលនាស្ត្រីសង្គ្រោះជាតិបណ្ដាញសកលនៃទីក្រុងម៉ែលប៊ន អ្នកស្រី សៀម អេង ដែលបានជួបតំណាងរាស្ត្រអូស្ត្រាលី ឱ្យដឹងថា លោក ជូលៀន ហ៊ីល នឹងជួបសន្ទនាជាមួយលោក សម រង្ស៊ី នៅពេលមេដឹកនាំគណបក្សសង្គ្រោះជាតិរូបនេះមកដល់ទីក្រុងម៉ែលប៊ន នៅថ្ងៃទី២៥ ខែសីហា។ អ្នកស្រីឱ្យទៀតថា ពេលនោះក៏នឹងមានធ្វើការវេទិកាសាធារណៈនៅវត្តពុទ្ធរង្សី ហៅវត្តធំ ដោយលោក សម រង្ស៊ី នឹងប្រាប់ពីគោលបំណងនៃការធ្វើមាតុភូមិនិវត្តរបស់លោក រួមទាំងឆ្លើយសំនួរអ្នកគាំទ្ររបស់លោកក្នុងពិធីនោះ៖ «ថ្ងៃនេះពួកខ្ញុំទាំងអស់គ្នាបានជួបលោក ជូលៀន ហ៊ីល គាត់ជាតំណាងរាស្ត្រប្រទេសអូស្ត្រាលីហើយថ្ងៃនេះយើងក៏បានជោគជ័យខ្លាំងដែរ ព្រោះគាត់បានសន្យាជួយយើង ហើយគាត់មានទំនាក់ទំនងជាមួយតំណាងរាស្ត្រតាមរដ្ឋនីមួយៗដើម្បីជួយយើងទាំងអស់គ្នា»។
លោក សម រង្ស៊ី បញ្ជាក់ជំហរថា លោកនិងថ្នាក់ដឹកនាំបក្សប្រឆាំង នៅតែវិលចូលប្រទេសកម្ពុជា នៅឆ្នាំ២០១៩នេះ ប៉ុន្តែលោកមិនទាន់ប្រាប់ ប្រាប់ផ្លូវ និងថ្ងៃចូលប្រទេសកម្ពុជាជាក់លាក់ ដោយសារ លោកចង់ឱ្យ លោក ហ៊ុន សែន ដេកភ័យ និងចលាចលផ្ទៃក្នុងបក្សជាមុនសិន។
ចំណែករបបក្រុងភ្នំពេញក៏តែបង្ហាញសារព្រមានជាញឹកញាប់ពីចំណាត់ការលើលោក សម រង្ស៊ី និងអ្នកអមដំណើរដោយព្រមាន ចាប់ខ្លួន វាយបង្ក្រាប រហូតបាញ់សម្លាប់ថែមទៀតផង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន សរសេរលើប្រព័ន្ធតេឡេក្រាមរបស់លោកថ្ងៃទី១៤ ខែសីហា ដោយហៅលោក សម រង្ស៊ី ថា ទណ្ឌិតឧទ្ទាមក្រៅច្បាប់។ អ្នកនាំពាក្យរូបនេះលើកឡើងថា ទោះលោក សម រង្ស៊ី ចូលតាមច្រកណាមិនសំខាន់ទេ ឱ្យតែឃើញគឺចាប់នោះគ្រប់ពេល។ ចំណែក វិធានការផ្លូវច្បាប់ចំពោះអ្នកល្មើសច្បាប់ផ្សេងទៀតក៏ធ្វើគ្រប់ពេល មិនប្រកាន់ទីកន្លែងឡើយ។
ប៉ុន្តែ លោក សម រង្ស៊ី យល់ថា ការព្រមាននានាលើរូបលោក ជាការបង្ហាញថា ពេលនេះក្រុមលោក ហ៊ុន សែន កំពុងភ័យស្លន់ស្លោនឹងវត្តមានរបស់លោកដែលនឹងវិលត្រឡប់ទៅកម្ពុជាក្នុងពេលខាងមុខដ៏ខ្លីនេះ៖ «ខ្ញុំគ្រាន់តែចង់ឱ្យពួកហ្នឹងចលាចលបន្តិច យើងបង្ហោះព័ត៌មាននេះ យើងលើកឱ្យពួកហ្នឹងគិតអញ្ចេះទៅ គិតខុស គិតត្រូវស្រែកតែគេទៅណា ហើយខ្ញុំចង់ធ្វើឱ្យ ហ៊ុន សែន ឆ្កួតព្រោះយើងធ្វើឱ្យ ហ៊ុន សែន ច្រឡោត ហ៊ុន សែន ប្រតិកម្មកាន់តែវង្វេងហ្នឹងរបប ហ៊ុន សែន កាន់តែជិតចប់»។
ការវិលត្រឡប់ចូលមាតុភូមិខ្មែរលើកនេះ លោក សម រង្ស៊ី លោកប្ដេជ្ញាតតាំងទាមទារ សិទ្ធិសេរីភាព យកប្រជាធិបតេយ្យមកវិញជូនពលរដ្ឋខ្មែរ។
អ្នកវិភាគនយោបាយលោក គឹម សុខ សង្កេតឃើញថា លោក សម រង្ស៊ី តែងតែធ្វើដំណើរទៅបណ្ដាប្រទេសនានា និងជួបអ្នកគាំទ្ររបស់លោក ដែលនេះជាការស្វែងរកការគាំទ្រពីសហគមន៍អន្តរជាតិ និងខ្មែរនៅក្រៅស្រុក។ លោក គឹម សុខ យល់ថា ការបំពេញបេសកកម្មរបស់លោក សម រង្ស៊ី នៅប្រទេសអូស្ត្រាលីនឹងទទួលការគាំទ្រពីសមាជិកសភាអូស្ត្រាលី ព្រោះប្រទេសនេះតាំងពីដើមរៀងមកតែងបានស្វះស្វែងរកសន្តិភាពភាពជូនកម្ពុជា៖ «ខ្ញុំគិតថា តំណាងរាស្ត្រនៃប្រទេសអូស្ត្រាលីនឹងបង្ហាញគាំទ្រការស្ដារឡើងវិញប្រជាធិបតេយ្យនៅប្រទេសកម្ពុជា យើងព្រោះអូស្ត្រាលីក៏មានតួនាទីសំខាន់មួយដែរតាមរយៈកិច្ចព្រមព្រៀងទីក្រុងប៉ារីស»។
ក្នុងអំឡុងទសវត្សទី៩០ ប្រទេសអូស្ត្រាលីធ្លាប់ដើរតួសំខាន់ក្នុងការផ្ដួចផ្ដើមឱ្យមាន ដំណោះស្រាយនយោបាយនៅកម្ពុជា។ អតីតរដ្ឋមន្ត្រីការបរទេសអូស្ត្រាលី នាសម័យ នោះគឺលោក ហ្គារ៉េត អេវាន គឺជាស្ថាបនិកនៃកិច្ចព្រមព្រៀងសន្តិភាពក្រុងប៉ារីស។
លោកធ្លាប់មានសមានចិត្តទៅលើលោក ហ៊ុន សែន។ ក៏ប៉ុន្តែពេលនេះ លោកប្ដូរចិត្ត ហើយអំពាវនាវដល់សហគមន៍អន្តរជាតិ រួមនឹងរដ្ឋាភិបាលអូស្ត្រាលីផង ឱ្យដាក់គំនាបលើរបបលោក ហ៊ុន សែន និងឱ្យហ៊ានរិះគន់ត្រង់ៗ ជៀសវាងកុំឱ្យប្រើភាសាការទូតជាមួយលោក ហ៊ុន សែន ទៀតផង។
សហគមន៍ខ្មែរនៅអូស្ត្រាលី ក៏ចង់ឃើញរដ្ឋាភិបាលអូស្ត្រាលីមានវិធានការលើរបបក្រុងភ្នំពេញ ដូចដែលសហភាពអឺរ៉ុប និងសហរដ្ឋអាមេរិកកំពុងដាក់សម្ពាធសេដ្ឋកិច្ច និងកិច្ចការងារការទូតលើរបបលោក ហ៊ុន សែន ដែលរបបនេះបានចាកចេញឆ្ងាយពីគន្លងប្រជាធិបតេយ្យ៕