ទូត​អាមេរិក និង​ចិន​បន្ត​សង្គ្រាម​តាម​ហ្វេសប៊ុក​ពី​ជម្លោះ​ពាណិជ្ជកម្ម​រវាង​ប្រទេស​ទាំងពីរ

ដោយ មាន ឫទ្ធិ
2019-06-20
អ៊ីម៉ែល
មតិ
Share
បោះពុម្ព
សារ​ឆ្លើយឆ្លង​តាម​ហ្វេសប៊ុក​ពី​ជម្លោះ​ពាណិជ្ជកម្ម​រវាង​អាមេរិក និង​ចិន។
សារ​ឆ្លើយឆ្លង​តាម​ហ្វេសប៊ុក​ពី​ជម្លោះ​ពាណិជ្ជកម្ម​រវាង​អាមេរិក និង​ចិន។
Screenshot

សង្គ្រាម​ពាក្យ​សម្តី​រវាង​ស្ថានទូត​អាមេរិក និង​ចិន ជុំវិញ​ជម្លោះ​ពាណិជ្ជកម្ម​រវាង​មហាយក្ស​ចិន និង​សហរដ្ឋអាមេរិក នៅ​មិនទាន់​បិទ​បញ្ចប់​នៅឡើយ​ទេ។ ស្ថានទូត​សហរដ្ឋអាមេរិក​ប្រចាំ​ក្រុងភ្នំពេញ បាន​ចេញ​សេចក្ដី​ពន្យល់​សង្ខេប​មួយ​ជុំវិញ​មូលហេតុ​ដែល​នាំ​ឱ្យ​កើតមាន​ជម្លោះ​ពាណិជ្ជកម្ម​រវាង​សហរដ្ឋអាមេរិក និង​ចិន​បច្ចុប្បន្ន​នេះ ក្រោយ​ចិន​ចោទ​អាមេរិក​ថា ជា​អ្នក​បង្ក។

ស្ថានទូត​សហរដ្ឋអាមេរិក​ប្រចាំ​ក្រុងភ្នំពេញ សរសេរ​យ៉ាង​ខ្លី​លើ​ទំព័រ​ហ្វេសប៊ុក (Facebook) ផ្លូវការ កាលពី​ថ្ងៃទី១៩ មិថុនា ថា មានការ​ពិភាក្សា​គ្នា​ច្រើន​ស្ដីពី​ទំនាក់ទំនង​ពាណិជ្ជកម្ម​រវាង​អាមេរិក និង​ចិន​។ ដូច្នេះ ស្ថានទូត​ពន្យល់​ថា សហរដ្ឋអាមេរិក ចង់​ឃើញ​មាន​នូវ​ទំនាក់ទំនង​ពាណិជ្ជកម្ម​មួយ​ជាមួយ​ចិន​ប្រកបដោយ​ភាព​យុត្តិធម៌ ឬ​ស្មើភាព​ទាំង​សង្ខាង ហើយ​ថា វត្ថុបំណង​នៃ​ការចរចា​ពាណិជ្ជកម្ម​ជាមួយ​ចិន​នា​ពេល​នេះ គឺ​ដើម្បី​ធានា​ថា ប្រទេស​ចិន អនុវត្ត​ស្របតាម​បទប្បញ្ញត្តិ​របស់​អង្គការ​ពាណិជ្ជកម្ម​ពិភពលោក ឬ​ហៅថា WTO ដែល​ចិន​បាន​ចូល​ជា​សមាជិក​កាលពី​ឆ្នាំ​២០០១ កន្លងទៅ​។ សេចក្តី​ពន្យល់​នេះ ទំនងជា​ការ​ឆ្លើយ​តប​ទៅ​នឹង​អត្ថបទ​របស់​ឯកអគ្គរដ្ឋទូត​ចិន​ប្រចាំ​កម្ពុជា។

កាលពី​ថ្ងៃទី១៥ មិថុនា ឯកអគ្គរដ្ឋទូត​ចិន​ប្រចាំ​កម្ពុជា​លោក វ៉ាង វិនទៀន (Wang Wentian) បាន​សរសេរ​អត្ថបទ​មួយ​ជា​ភាសា​ចិន និង​បក​ប្រែជា​ភាសា​ខ្មែរ បង្ហោះ​នៅ​ទំព័រ​ហ្វេសប៊ុក​ផ្លូវការ​របស់​ស្ថានទូត​ចិន​ប្រចាំ​កម្ពុជា ក្រោម​ចំណងជើង​ថា «​ព្រិល​ក្រាស់​សង្កត់​ពី​លើ​ស្រល់ តែ​ស្រល់​នៅតែ​ឈរ​ត្រង់​យ៉ាង​រឹងមាំ»។ ក្នុង​អត្ថបទ​នោះ ឯកអគ្គរដ្ឋទូត​ចិន​លោក វ៉ាង វិនទៀន បាន​សរសេរ​រិះគន់​សហរដ្ឋអាមេរិក​ធ្ងន់ៗ ដោយ​ចោទ​ប្រកាន់​ថា សហរដ្ឋអាមេរិក គឺជា​ដើមចម​នៃ​ជម្លោះ​ពាណិជ្ជកម្ម​រវាង​ចិន និង​អាមេរិក​នេះ និង​ថា​សហរដ្ឋអាមេរិក​ជា «​បុគ្គល​បង្ក​ភាព​ស្មុគស្មាញ​» ធ្វើ​ឱ្យ​ប៉ះពាល់​ដល់​សេដ្ឋកិច្ច​ពិភពលោក និង​របៀប​រៀបរយ​ពាណិជ្ជកម្ម​អន្តរជាតិ​។ ឯកអគ្គរដ្ឋទូត​រូប​នេះ បញ្ចេញ​សារ​ជំនួស​ឱ្យ​ជំហរ​កម្ពុជា ថា ប្រទេស​ចិន​នឹង​ចាប់ដៃ​ជាមួយ​កម្ពុជា រួម​ជាមួយ​ប្រទេស​ដទៃ ដើម្បី​រួមគ្នា​ថែរក្សា​ប្រព័ន្ធ​ពហុភាគី​និយម និង​របៀបរៀបរយ​នៃ​ពាណិជ្ជកម្ម​អន្តរជាតិ។

គិត​មកទល់​ម៉ោង​ផ្សាយ​នេះ របប​ក្រុងភ្នំពេញ នូវ​មិនទាន់​បញ្ចេញ​ប្រតិកម្ម​ផ្លូវការ​ណាមួយ​ជុំវិញ​សង្គ្រាម​ពាក្យ​សម្តី​ចុងក្រោយ រវាង​ស្ថានទូត​ទាំងពីរ​នេះ ដោយ​ប្រើប្រាស់​បណ្ដាញ​សង្គម នៅឡើយ​ទេ​។ ក៏ប៉ុន្តែ អ្នកនាំពាក្យ​របប​ក្រុងភ្នំពេញ លោក ផៃ ស៊ីផាន ថ្លែងប្រាប់​អាស៊ីសេរី​តាម​ទូរស័ព្ទ​កាលពី​ថ្ងៃទី១៨ មិថុនា ថា កម្ពុជា​មិន​ចង់​ឃើញ​ប្រទេស​មហាអំណាច​ទាំងពីរ​យក​ប្រទេស​ខ្លួន​ធ្វើជា​កន្លែង​ប្រជែង​នៃ​ឥទ្ធិពល​រវាង​ប្រទេស​ទាំងពីរ​នេះ​ទេ និង​ចង់​ឃើញ​មាន​ការ​សម្រប​សម្រួល​រវាង​ភាគី​ទាំងពីរ​ដោះស្រាយ​បញ្ហា​នេះ៖ «ចំពោះ​កម្ពុជា យើង​ជា​ប្រទេស​មួយ​យើង​គោរព។ យើង​សុំ​ឱ្យ​ភាគី​ទាំងពីរ​ហ្នឹង​ទៅ​រក​ច្រក​ណាមួយ​ដើម្បី​សម្របសម្រួល​ក្នុង​បញ្ហា​ប្រឈម​ក្នុង​វិស័យ​ពាណិជ្ជកម្ម​នេះឯង​។ ការ​ប្រឈម​ក្នុង​វិស័យ​ពាណិជ្ជកម្ម​រវាង​អាមេរិក និង​ចិន គ្មាន​ពី​ណាមួយ​ឈ្នះ​ទេ​។ ភាគី​ទាំងពីរ​នេះ​គឺ​ចាញ់ ហើយ​យើង​ជឿ​ថា សហរដ្ឋអាមេរិក និង​ចិន គឺ​មាន​សមត្ថភាព​ក្នុង​ការ​ដោះស្រាយ»

យ៉ាងណាក៏ដោយ លោក ផៃ ស៊ីផាន បាន​បង្ហាញ​ជំហរ​គាំទ្រ​ចិន​ដែល​ចោទ​ថា សហរដ្ឋអាមេរិក​គឺជា​អ្នក​បង្ក​រឿង​ឱ្យ​មាន​ជម្លោះ​ពាណិជ្ជកម្ម​នេះ​ឡើង។ លោក​សំណូមពរ​ឱ្យ​ប្រទេស​មហាអំណាច​ទាំងពីរ កុំ​ប្រើប្រាស់​ទឹកដី​កម្ពុជា ធ្វើជា​មូលដ្ឋាន​នៃ​ការប្រកួតប្រជែង​ឥទ្ធិពល​របស់​ខ្លួន។

ផ្ទុយ​ពី​ការចោទប្រកាន់​របស់​ចិន និង​លោក ផៃ ស៊ីផាន នេះ ស្ថានទូត​សហរដ្ឋអាមេរិក​ពន្យល់​ថា ខ្លួន​ចង់​ឃើញ​ចិន​បញ្ឈប់​ការអនុវត្ត​ពាណិជ្ជកម្ម និង​ការ​វិនិយោគ​ដែល​មាន​លក្ខណៈ​ប្រឆាំង​នឹង​ការ​ប្រកួតប្រជែង និង​មិន​ស្មើភាព ហើយ​ចង់​ឃើញ​ចិន​គោរព​តាម​ការ​ប្តេជ្ញា​ចិត្ត​របស់​ខ្លួន​ក្នុង​ការ​បើក​ចំហ​ទីផ្សារ។ សហរដ្ឋអាមេរិក​ពន្យល់​ថា មូលហេតុ​ដែល​នាំ​ឱ្យ​មាន​ជម្លោះ​ពាណិជ្ជកម្ម​នេះ​ឡើង គឺ​ដោយសារតែ​ចិន បាន​អនុវត្ត​នូវ​គោលនយោបាយ​ពាណិជ្ជកម្ម​មិន​ស្មើភាព ប្រឆាំង​នឹង​ការ​ប្រកួតប្រជែង ដែល​ធ្វើ​ឱ្យ​ប៉ះពាល់​ដល់​អាជីវកម្ម​របស់​ខ្លួន​។ សហរដ្ឋអាមេរិក ផ្ដល់​អំណះអំណាង​ថា ទង្វើ​របស់​ចិន​ទាំងនោះ​រួមមាន​ដូចជា​៖ ការ​លួច​កម្មសិទ្ធិបញ្ញា ការសម្ងាត់​ពាណិជ្ជកម្ម និង​ព័ត៌មាន​ពាណិជ្ជកម្ម​របស់​អាមេរិក​ពី​សំណាក់​ភាគី​ចិន។ មិនតែប៉ុណ្ណោះ ដំណើរការ​ច្បាប់ និង​បទប្បញ្ញត្តិ​របស់​ចិន មានការ​រើសអើង​ប្រឆាំង​នឹង​ក្រុមហ៊ុន​បរទេស ដោយ​បាន​តម្រូវ​ឱ្យ​មាន​ការផ្ទេរ​បច្ចេកវិទ្យា ឬ​បង្ខំ​ឱ្យ​ផ្ដល់​អាជ្ញាប័ណ្ណ​មិន​ស្របតាម​លក្ខខណ្ឌ​ទីផ្សារ ដែល​ផ្ដល់​ប្រយោជន៍​ដល់​ឧស្សាហកម្ម​ចិន។ ស្ថានទូត​សហរដ្ឋអាមេរិក ក៏​លើកឡើង​ដែរ​ថា រដ្ឋាភិបាល​ចិន​ជា​អ្នក​នៅ​ពីក្រោយ​ការវាយប្រហារ​ប្រព័ន្ធ​ព័ត៌មានវិទ្យា ធ្វើ​ចារកម្ម ដើម្បី​ទទួល​បាន​នូវ​បច្ចេកវិទ្យា​ចុងក្រោយ​របស់​អាមេរិក យក​ទៅ​គាំទ្រ​ដល់​ក្រុមហ៊ុន​ចិន​និង​ថា​ភាគី​ចិន​មានការ​រឹតត្បិត​វិនិយោគ​បរទេស។

អ្នក​ជំនាញ​វិទ្យាសាស្ត្រ​នយោបាយ លោក ឯម សុវណ្ណារ៉ា ប្រាប់​អាស៊ីសេរី​តាម​ទូរស័ព្ទ​កាលពី​ថ្ងៃ​ទី ១៨ មិថុនា​ថា កម្ពុជា​គួរតែ​បង្ហាញ​ពី​ភាព​អព្យាក្រឹត​របស់​ខ្លួន​លើ​បញ្ហា​នេះ ជាជាង​ទៅ​ចោទប្រកាន​ភាគី​ណាមួយ​នោះ៖ «នៅ​ក្នុង​ជម្លោះ​ពាណិជ្ជកម្ម​រវាង​សហរដ្ឋអាមេរិក និង​ចិន​នេះ កម្ពុជា គឺជា​រដ្ឋ​នៅតែ​ទទួល​ការ​រង​គ្រោះ​នៃ​ឥទ្ធិពល​ជម្លោះ​ពាណិជ្ជកម្ម​រវាង​មហាអំណាច​ទាំងពីរ មិន​អាច​គេច​ផុត​ទេ ពីព្រោះ​កម្ពុជា​យើង​អត់​ទាន់​មាន​សមត្ថភាព​រឹងមាំ ដែល​ធ្វើ​ឱ្យ​សេដ្ឋកិច្ច​ខ្លួន​អាច​ឯករាជ្យ លែង​ពឹង​ពាក់​មហាអំណាច​ទាំង​នឹង​បាន។ យើង​នៅតែ​ទទួលរង​ឥទ្ធិពល»

លោក ឯម សុវណ្ណារ៉ា យល់ថា ក្នុង​បញ្ហា​នេះ កម្ពុជា​គួរតែ​រក្សា​ជំហរ​រវាង​ប្រទេស​ទាំងពីរ​ឱ្យ​មាន​តុល្យភាព ហើយ​កម្ពុជា​គួរតែ​ងាក​ទៅ​រក​ប៉ូល​នយោបាយ​ផ្សេង ដែល​អាច​ដោះស្រាយ​បញ្ហា​ឥទ្ធិពល​នៃ​ជម្លោះ​ពាណិជ្ជកម្ម​រវាង​សហរដ្ឋអាមេរិក និង​ចិន​នេះ។

សង្គ្រាម​ពាណិជ្ជកម្ម​រវាង​ចិន និង​សហរដ្ឋអាមេរិក បាន​ផ្ទុះឡើង​កាល​ពី​ឆ្នាំ​២០១៨ កន្លង​ទៅ ក្រោយ​សហរដ្ឋអាមេរិក​បាន​ដំឡើង​ពន្ធ​រហូតដល់ ២៥ %​លើ​ទំនិញ​របស់​ចិន​នាំចូល​សហរដ្ឋអាមេរិក ដែល​មាន​តម្លៃ​ដល់​ទៅ​ជាង ២៥០ ពាន់​លាន​ដុល្លារ​អាមេរិក។ ទំនិញ​ទាំងនោះ​រួមមាន គ្រឿង​អេឡិចត្រូនិក ចំណែក​យន្តហោះ ឧបករណ៍​បរិក្ខារ​ពេទ្យ ដែក និង​អាលុយមីញ៉ូម​ជាដើម​។ ជា​ការ​ឆ្លើយតប​វិញ ចិន​បាន​ដំឡើង​ពន្ធ​ពី ៥ % ទៅ ២៥ % លើ​មុខទំនិញ​របស់​អាមេរិក​នាំចូល​ប្រទេស​ចិន​វិញ ដែល​មាន​តម្លៃ​សរុប​ជាង ១១០ ពាន់​លាន​ដុល្លារ​អាមេរិក ផ្តោត​លើ​ផលិតផល​កសិកម្ម សារធាតុ​គីមី ធ្យូងថ្ម និង​គ្រឿង​បរិក្ខារ​ពេទ្យ​ជាដើម។ ប្រធានាធិបតី​ចិន និង​អាមេរិក គ្រោង​ជួប​ចរចា​គ្នា​ឡើងវិញ​ជុំវិញ​ជម្លោះ​ពាណិជ្ជកម្ម​នេះ នៅ​ឯ​កិច្ចប្រជុំ​កំពូល​របស់​ក្រុម​ប្រទេស​ដែល​មាន​ឧស្សាហកម្ម​ជឿនលឿន ហៅ​កាត់​ថា G 20 ដែល​នឹង​ប្រព្រឹត្តិ​ទៅ​នៅ​ប្រទេស​ជប៉ុន នៅ​ចុងខែ​មិថុនា​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល