លោក ហ៊ុន សែន ថាអ្នកស្រី យីងឡាក់ មិនបានប្រើប្រាស់ទឹកដីកម្ពុជាដើម្បីគេចខ្លួនទេ
2017.08.27
អតីតនាយករដ្ឋមន្ត្រីថៃ អ្នកស្រី យីងឡាក់ ស៊ីណាវ៉ាត្រ (Yingluck Shinawatra) នៅវិមានសន្តិភាព រាជធានីភ្នំពេញ កាលពីអំឡុងឆ្នាំ២០១១។
Photo: RFA
លោកនាយករដ្ឋមន្ត្រី ហ៊ុន សែន ថ្លែងថា អតីតនាយករដ្ឋមន្ត្រីថៃ អ្នកស្រី យីងឡាក់ មិនបានប្រើប្រាស់ទឹកដីកម្ពុជា ដើម្បីគេចខ្លួនទេ។ ការអះអាងរបស់លោកនាយករដ្ឋមន្ត្រី គឺដកស្រង់ដោយមន្ត្រីនាំពាក្យរដ្ឋាភិបាល និងជារដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដែលសរសេរលើទំព័រហ្វេសប៊ុករបស់លោក នៅព្រឹកថ្ងៃទី២៧ សីហា។
លោក ខៀវ កាញារីទ្ធ បញ្ជាក់បន្ថែមថា អ្នកស្រី យីងឡាក់ បានប្រើប្រាស់ផ្លូវផ្សេងទៀតសម្រាប់ការរត់គេចខ្លួន។
សម្រង់ប្រសាសន៍របស់លោកនាយករដ្ឋមន្ត្រីនៅពេលនេះ គឺជាការបញ្ជាក់បន្ថែមលើការអះអាងរបស់អ្នកនាំពាក្យក្រសួងមហាផ្ទៃ លោក ខៀវ សុភ័គ ដែលមានប្រសាសន៍នៅថ្ងៃទី២៦ សីហា ថា សមត្ថកិច្ចកម្ពុជា មិនបានទទួលព័ត៌មានថា អ្នកស្រី យីងឡាក់ មានវត្តមាន ឬបានឆ្លងកាត់ប្រទេសកម្ពុជា នោះឡើយ។ លោកថា កម្ពុជា រីករាយសហការជាមួយតុលាការថៃ៖ «អនុវត្តច្បាប់ គឺអនុវត្តច្បាប់ គឺបើថាតុលាការគេមានដីកាចាប់ខ្លួនហើយ រត់មកពឹងយើង ប្រទេសយើងមិនមែនសម្រាប់អ្នកអស់ហ្នឹងជ្រកកោនទេ»។
កាលពីឆ្នាំ១៩៩៨ រដ្ឋាភិបាលថៃ និងកម្ពុជា បានចុះកិច្ចព្រមព្រៀងបត្យាប័ននឹងគ្នា ដែលជាកិច្ចព្រមព្រៀងមួយសម្រាប់បញ្ជូនអ្នកទោសឲ្យគ្នាទៅវិញទៅមករវាងប្រទេសទាំងពីរ។
អ្នកស្រី យីងឡាក់ ត្រូវបានតុលាការកំពូលរបស់ថៃ បង្គាប់ឲ្យចូលខ្លួនទៅស្ដាប់ការប្រកាសសាលក្រមកាលពីថ្ងៃទី២៥ សីហា ក្នុងសំណុំរឿងនយោបាយទិញស្រូវពីកសិកររបស់អ្នកស្រី ដែលបរាជ័យ។ អ្នកស្រីមិនបានបង្ហាញខ្លួននៅតុលាការទេ ហើយមេធាវីប្រាប់ថា អ្នកស្រីមានបញ្ហាសុខភាព។
ការបដិសេធនេះ ក៏ជាការឆ្លើយតបចំពោះព័ត៌មាន ដូចដែលកាសែត បាងកក ប៉ុស្តិ៍ (Bangkok Post) ផ្សាយកាលពីថ្ងៃទី២៦ សីហា ដែលគូសវាសថា អ្នកស្រី យីងឡាក់ គេចខ្លួនតាមច្រកខេត្តកោះកុង កម្ពុជា មុននឹងជិះយន្តហោះទៅសិង្ហបុរី និងក្រុងឌុយបៃ (Dubai) របស់អារ៉ាប់រួមអេមីរ៉ាត (United Arab Emirates)។ នៅព្រឹកថ្ងៃទី២៧ សីហា កាសែតដដែលស្រង់ព័ត៌មានពីប្រភពមន្ត្រីការពារព្រំដែនថៃ ដែលជឿថា អ្នកស្រី យីងឡាក់ បានគេចខ្លួនតាមផ្លូវទឹកច្រើនជាង ដោយជិះកាណូតលឿនពីខេត្តរ៉ៈយ៉ង ទៅកោះឆាង កោះគុត និងកោះឡៅយ៉ា ខេត្តត្រាត មុនចូលមកកម្ពុជា។ ប្រភពកងនាវាចរណ៍ថៃ ថ្លែងថា ឥស្សរជនដូចជាអ្នកស្រី មិនរើសការឆ្លងកាត់តាមច្រកផ្លូវការទេ ហើយក៏មិនកាត់តាមច្រករបៀងគ្មានមនុស្សដែរ ព្រោះសម្បូរណ៍គ្រាប់មីន។ កងការពារព្រំដែន ក៏បានត្រួតពិនិត្យគ្រប់យានយន្តចេញចូលទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន