អ្នកវិភាគថា រដ្ឋាភិបាលគួរទាក់ទាញមនុស្សទៅរស់នៅតាមតំបន់ព្រំដែន
2024.08.30
(រូបឯកសារ) បណ្ឌិត ឡៅ ម៉ុងហៃ អ្នកវិភាគនយោបាយចាស់វស្សា។
អ្នកវិភាគថាការរៀបចំហេដ្ឋារចនាសម្ព័ន្ធ និងការបង្កើតគោលនយោបាយផ្ដល់ដីធ្លីដល់ពលរដ្ឋ ដែលគ្មានដីឱ្យទៅរស់នៅតាមព្រំដែន គឺជារឿងសំខាន់ ដើម្បីទប់ទល់ការពារការឈ្លានពាន ពីសំណាក់ប្រទេសជិតខាង។ តែយ៉ាងណាក្ដី ពួកគាត់ថា រដ្ឋាភិបាល ក៏ត្រូវគិតឱ្យបានគ្រប់ជ្រុងជ្រោយ ជាពិសេស ផ្ដោតសំខាន់លើតម្លាភាព និងផលប្រយោជន៍ជាតិ។ អ្នកនាំពាក្យបក្សកាន់អំណាចថា រដ្ឋាភិបាលប្ដេជ្ញាចិត្តការពារផលប្រយោជន៍ជាតិ និងតម្លាភាព ពុំមានការកេងប្រវ័ញ្ចដើម្បី ប្រយោជន៍បុគ្គលនោះឡើយ។
អ្នកវិភាគនយោបាយចាស់វស្សា បណ្ឌិត ឡៅ ម៉ុងហៃ ប្រាប់វិទ្យុអាស៊ីសេរី នៅថ្ងៃទី៣០ ខែសីហាថា ដើម្បីបញ្ឈប់ការព្រួយបារម្ភរបស់ពលរដ្ឋ ជុំវិញបញ្ហាព្រំដែនរវាងកម្ពុជា និងវៀតណាម រដ្ឋាភិបាលគួរតែរៀបចំគោលនយោបាយ ឬគម្រោងទាក់ទាញពលរដ្ឋឱ្យទៅរស់នៅតាមបន្ទាត់ព្រំដែនឱ្យបានច្រើន និងអភិវឌ្ឍន៍តំបន់ទាំងនោះ ឱ្យមានសាលារៀន មន្ទីរពេទ្យ វត្តអារាម និងផ្លូវជាដើម។ លោកថា ការធ្វើបែបនេះ ដើម្បីកុំឱ្យមានការឈ្លានពានពីប្រទេសជិតខាង។ បណ្ឌិត ឡៅ ម៉ុងហៃ ហៅយុទ្ធសាស្ត្រនេះថា ជាការ «យកមនុស្សទៅទប់មនុស្ស» តាមរយៈជួយពលរដ្ឋអត់ដីធ្លី ពីតំបន់ផ្សេងៗ ឱ្យពួកគាត់មករស់នៅទីនោះ។
បន្ថែមពីនោះ បណ្ឌិត ឡៅ ម៉ុងហៃ ក៏ជំរុញឱ្យរដ្ឋាភិបាល ត្រូវមានផែនការច្បាស់លាស់ រួមនឹងមានតម្លាភាព និងគិតផលប្រយោជន៍ជាតិជាធំ តាមរយៈមធ្យោបាយមួយចំនួនដូចជា រដ្ឋាភិបាលត្រូវមានច្បាប់លុបចោល និងហាម សម្បទាន លក់ ជួលដី ក្នុងភូមិឃុំ ស្រុកជាប់តាមព្រំដែន ឱ្យទៅពលរដ្ឋណាដែលគ្មានឪពុកម្ដាយជាជនជាតិខ្មែរ និងតែងតាំងនាយទាហានជាន់ខ្ពស់ជាអភិបាលស្រុក ហើយតែងតាំងមេឃុំ និងជំទប់ឃុំ នៅតាមព្រំដែន ដោយពុំចាំបាច់បោះឆ្នោត។ លោកថា ការធ្វើបែបនេះ ដើម្បីបង្កភាពងាយស្រួល ឱ្យពួកគាត់អាចទៅរស់នៅតាមបន្ទាត់ព្រំដែន។
បណ្ឌិត ឡៅ ម៉ុងហៃ៖ «មុននឹងធ្វើបែបនេះ គេគិតគូរជាស្រេចថា តើវាមានការខាតអ្វីខ្លះ ចំណេញអ្វីខ្លះ។ ខ្ញុំគ្រាន់តែសំណូមពរទេ រឿងមូលនិធិយកលុយពីប្រជាពលរដ្ឋ ហ្នឹង ត្រូវតែ មានតម្លាភាពដែរ យកទៅចាយហ្នឹង ត្រូវគិតគូរទៅ ១គីឡូម៉ែត្រអស់ប៉ុន្មានអីប៉ុន្មាន ពីត្រឹមណាទៅត្រឹមណា»។
នៅថ្ងៃទី២៦ ខែសីហា លោកនាយករដ្ឋមន្ត្រី ហ៊ុន ម៉ាណែត បាន បង្កើតមូលនិធិសាងសង់ ហេដ្ឋារចនាសម្ព័ន្ធតាមព្រំដែន ដោយប្រមូលលុយពីមន្ត្រីរាជការ ឧកញ៉ា និងប្រជារាស្ត្រ ហើយគិតត្រឹមថ្ងៃទី២៩ ខែសីហា រដ្ឋទទួលបានថវិកា ១១លានដុល្លារ។ ការធ្វើបែបនេះ លោក ហ៊ុន ម៉ាណែត ថាដើម្បីផ្ដល់ឱកាសឱ្យពលរដ្ឋខ្មែរគ្រប់មជ្ឈដ្ឋានទាំងក្នុងនិងក្រៅប្រទេសបានចូលរួម ចំណែកដោយផ្ទាល់ជាមួយរដ្ឋាភិបាល ក្នុងការអភិវឌ្ឍជាតិ និងរក្សាអធិបតេយ្យ បូរណភាពទឹកដី។ បន្ថែមពីនោះ លោក ហ៊ុន ម៉ាណែត ប្រកាសថា រដ្ឋាភិបាល ក៏ត្រៀមរៀបចំចែកដីជូនដល់ប្រជាជន ដែលគ្មានដីឱ្យទៅរស់នៅ និងតាំងទីលំនៅៗ នៅតាមព្រំដែនផងដែរ។
ជុំវិញរឿងនេះ អ្នកនាំពាក្យបក្សប្រជាជនកម្ពុជា លោក សុខ ឥសាន្ត ប្រាប់វិទ្យុអាស៊ីសេរីថា កន្លងទៅនេះ រដ្ឋាភិបាលបានរៀបចំឱ្យប្រជាពលរដ្ឋទៅរស់នៅ តាំងទីលំនៅតាមព្រំដែនរួចមកហើយ។ ដូចជា តាមតំបន់ព្រំដែន ខេត្តកំពង់ចាម និងត្បូងឃ្មុំជាដើម។ លោកថាថ្មីៗនេះ រដ្ឋាភិបាល ក៏ប្ដេជ្ញាចិត្តរៀបចំកិច្ចការងារទាំងនេះ នៅតាមខេត្តផ្សេងៗ ទៀតផងដែរ ដោយឈរលើគោលការណ៍តម្លាភាព ពុំមានការ កេងប្រវ័ញ្ចថវិកាជាតិ ឬថវិកាដែលទទួលបានពីពលរដ្ឋ ដើម្បីផលប្រយោជន៍បុគ្គលនោះដែរ។
លោក សុខ ឥសាន្ត៖ «នាយករដ្ឋមន្ត្រីទៅកេងប្រវ័ញ្ចលុយពីសប្បុរសជនយ៉ាងម៉េច។ មានតែគាត់ខិតខំកសាងស្នាដៃគាត់ នៅតាមព្រំដែន ដើម្បីឱ្យប្រជាពលរដ្ឋទាំងក្នុងប្រទេស គេទុកចិត្តថា ឥឡូវនេះនាយករដ្ឋមន្ត្រី ហ៊ុន ម៉ាណែត គាត់ធ្វើអ៊ីចឹង វាពិតប្រាកដ មានបង្គោលព្រំដែនមួយជាន់ហើយ មានហេដ្ឋារចនាសម្ព័ន្ធ នៅតាមខ្សែបន្ទាត់ព្រំដែនទៀត ហើយមានប្រជាជនទៅនៅទៀត ហើយសុទ្ធតែធ្វើផ្ទះល្អៗ ឱ្យទៅនៅ»។
ទោះជាយ៉ាងណាក្ដី អ្នកវិភាគ និងពលរដ្ឋលើកឡើងថា ការរៀបចំឱ្យមានមូលនិធិកសាងសាងហេដ្ឋារចនាសម្ព័ន្ធ និងការចែក ដីដល់ពលរដ្ឋ ឱ្យទៅរស់នៅពេលនេះ របស់រដ្ឋាភិបាល ធ្វើឡើង ភ្លាមៗ ក្រោយពីពលរដ្ឋ ទាំងក្នុង និងក្រៅប្រទេស តវ៉ាទាមទាររដ្ឋាភិបាល ឱ្យដកខេត្តចំនួន៤ ចេញពី កិច្ចសហប្រតិបត្តិការត្រីកោណអភិវឌ្ឍន៍ CLV-DTA។ ករណីនេះ អ្នកវិភាគព្រួយបារម្ភថា រដ្ឋាភិបាលហាក់ធ្វើឡើងដោយគ្មានផែនការច្បាស់លាស់ ក្នុង ការរៀបចំហេដ្ឋារចនាសម្ព័ន្ធតាមព្រំដែន ដូច្នេះ ងាយប្រឈមបរាជ័យ និង ខ្វះតម្លាភាព ខណៈដែលពេលនេះ នៅមិនទាន់ដឹងផែនការ លម្អិត ដែលរដ្ឋាភិបាលនឹងធ្វើបែបណាខ្លះនោះឡើយ។
ពលរដ្ឋរស់នៅក្រុងបាវិត ខេត្តស្វាយរៀង ជាប់ព្រំដែនវៀតណាម លោក សួន វុត្ថា សាទរប្រសិនបើរដ្ឋាភិបាលអាចអភិវឌ្ឍន៍នៅតាមបណ្ដោយព្រំដែនមែននោះ ព្រោះថា បច្ចុប្បន្ននេះ ដីធ្លីដែលនៅតាមបណ្ដោយព្រំដែន គឺគ្មានការអភិវឌ្ឍន៍ ចំណែកការធ្វើកសិកម្ម ក៏ពុំសូវបានផល ដែលធ្វើឱ្យពលរដ្ឋពុំសូវចង់រស់នៅ។ ទោះជាយ៉ាងណាក្ដី លោកថា ដីធ្លីនៅតាមព្រំដែន គឺភាគច្រើន ពលរដ្ឋពុំសូវមាននោះទេ តែជាកម្មសិទ្ធិរបស់អាជ្ញាធរ ដូចជា ប៉ូលិស និងទាហាន ដែលធ្លាប់ឈរជើងប្រចាំការនៅទីនោះ ហើយដីមួយចំនួនបានដាក់ជួលឱ្យទៅជនជាតិវៀតណាមធ្វើកសិកម្ម។
លោក សួន វុត្ថា៖ «គម្រោងរដ្ឋាភិបាលជោគជ័យទៅបានទាល់តែឱ្យពលរដ្ឋទៅនៅ ប្រកបរបរកសិកម្ម មានទឹកមានផ្លូវ មានភ្លើង។ មួយទៀតត្រូវតែមានដីស្រែ សម្រាប់ឱ្យគាត់ធ្វើស្រែ អាចប្រកបមុខរបរចិញ្ចឹមជីវិត រស់ដោយស្រួល អាហ្នឹងបានគាត់អាចរស់នៅបានយូរ»។
លោកបន្តថា កម្ពុជាគួរតែដល់ពេលហើយ ដែលត្រូវអភិវឌ្ឍន៍នៅតាមតំបន់ព្រំដែនឱ្យបានត្រឹមត្រូវ ដូចនឹងប្រទេសជាតិខាង ជាពិសេស ប្រព័ន្ធទឹក ភ្លើង សាលារៀន មន្ទីរពេទ្យជាដើម ដើម្បីទាក់ទាញពលរដ្ឋឱ្យមករស់នៅ ប្រកបរបរចិញ្ចឹមឱ្យបានច្រើន និងចូលរួមការការពារតាមតំបន់ព្រំដែន។ លោកថា ករណីឈ្លានពានទឹកដីពីសំណាក់ប្រទេសជាតិខាង គឺជារឿងដែលគួរឱ្យបារម្ភ ជាពិសេស បញ្ហាជួល លក់ និងការសម្បទានដីឱ្យទៅប្រទេសដទៃ បង្កឱ្យមានការហូរចូលជនបរទេសខុសច្បាប់ អាចនឹងកើតមានកាន់តែច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ
អត្ថបទពេញនិយម
នយោបាយ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន