ក្រុមសភានិយាយភាសាបារាំងនឹងជួបប្រជុំគ្នានៅខេត្តសៀមរាបនៅថ្ងៃទី២៨ មករា
2016.01.27
ក្រុមសភានិយាយភាសាបារាំង មកពី ១៦ប្រទេស មានគម្រោងនឹងជួបប្រជុំគ្នានៅក្នុងខេត្តសៀមរាប នៅព្រឹកថ្ងៃទី២៨ ខែមករា ដោយប្រធានរដ្ឋសភានៃប្រទេសកម្ពុជា នឹងធ្វើជាម្ចាស់ផ្ទះនៃកិច្ចប្រជុំនេះ។
នៅព្រឹកថ្ងៃទី២៧ ខែមករា គណៈប្រតិភូនៃសភានិយាយភាសាបារាំង ដែលហៅកាត់ជាភាសាអង់គ្លេសថា អេ.ភី.អេហ្វ (APF) ទាំងនោះ បានមកដល់ខេត្តសៀមរាប ជាបន្តបន្ទាប់។
ប្រធានក្រុមលេខាធិការដ្ឋានសភានិយាយភាសាបារាំង គឺលោក ហេង រដ្ឋា។ លោកមានប្រសាសន៍នៅថ្ងៃពុធ ទី២៧ ខែមករា ថាជារៀងរាល់ឆ្នាំ គណៈកម្មាធិការអចិន្ត្រៃយ៍នៃសភានិយាយភាសាបារាំង តែងជួបប្រជុំគ្នាក្នុង ១ឆ្នាំ២ដង។
លោក ហេង រដ្ឋា បញ្ជាក់ថា កិច្ចប្រជុំដែលនឹងធ្វើឡើងនៅខេត្តសៀមរាប នៅថ្ងៃទី២៨ ខែមករា នោះ នឹងធ្វើការអនុម័តទៅលើកំណត់ហេតុនៃកិច្ចប្រជុំរបស់គណៈកម្មាធិការអចិន្ត្រៃយ៍កាលពីឆ្នាំ២០១៥ និងកិច្ចការមួយចំនួនទៀត៖ «គេនឹងនិយាយអំពីការអនុម័តទៅលើប្រទេសដែលជាសមាជិកមានប្រទេសដែលទើបតែចូលថ្មី ឬក៏ប្រទេសដែលមិនគោរពតាមលក្ខខណ្ឌ គេព្យួរបេក្ខភាពជាដើម»។
សភានិយាយភាសាបារាំង មកពីប្រទេសចំនួន១៦ ដែលនឹងចូលរួមប្រជុំទាំងនោះមានមកពីប្រទេសស្វីស (Sweden) មកពីសាធារណរដ្ឋប្រជាមានិតកុងហ្គោ (Congo) មកពីបែលហ្សិក (Belgium) ម៉ាដាហ្គាស្កា (Madagascar) វៀតណាម (Vietnam) ប្រទេសសេណេហ្គាល់ (Senegal) ប្រទេសម៉ារ៉ុក (Morocco) ប្រទេសកាណាដា និងលុចហ្សំបួរ (Luxembourg) ជាដើម៕