អនុប្រធានមន្ទីរព័ត៌មានរាជធានីភ្នំពេញ១រូបរងការអស់តួនាទីក្រោយរិះគន់ទឹកលិចក្រុង
2017.09.25
ប្រធានមន្ទីរព័ត៌មានរាជធានីភ្នំពេញ បានដាក់សំណើទៅរដ្ឋមន្ត្រីក្រសួងព័ត៌មានឲ្យដកតួនាទីអនុប្រធានមន្ទីរព័ត៌មានអ្នកស្រី ឃុត សុភាព ចេញពីតំណែងដោយសារតែអ្នកស្រីសរសេររិះគន់តាមបណ្ដាញសង្គមពាក់ព័ន្ធនឹងទឹកភ្លៀងជន់លិចរាជធានីភ្នំពេញ។
លិខិតផ្ញើទៅរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ របស់ប្រធានមន្ទីរព័ត៌មានរាជធានីភ្នំពេញ លោក ឃុត សំខាន់ ចោទថា អ្នកស្រី ឃុត សុភាព បានប្រព្រឹត្តកំហុសជាច្រើនលើកប៉ុន្តែមិនបានកែខ្លួន។ លោកបន្តថា កំហុសចុងក្រោយ គឺការរិះគន់ភ្លៀងលិចផ្លូវ និងប្រមាថពូជសាសន៍ខ្មែរ។ អាស៊ីសេរី មិនអាចទាក់ទងអ្នកស្រី ឃុត សុភាព ដើម្បីសាកសួរចំពោះការចោទប្រកាន់បែបនេះបានទេ កាលពីថ្ងៃទី២៣ កញ្ញា។ ប៉ុន្តែអ្នកស្រីបានសរសេរក្នុងទំព័រហេ្វសប៊ុក (Facebook) អ្នកស្រី ថា ពិតជាមានមោទនភាពណាស់ ដែលកើតជាខ្មែរ។ អ្នកស្រីបន្តថា ពេលទៅក្រៅប្រទេសម្ដងៗស្ទើរតែមិនហ៊ានថាមកពីណាហើយជនជាតិអីទេ។ អ្នកស្រីបន្តថា សូមជាតិណាៗកុំឲ្យកើតជាខ្មែរ។
ក្នុងសារនោះដែរ អ្នកស្រីក៏បានដាក់រូបភាពជាច្រើនបង្ហាញពីផ្លូវលិចដោយសារទឹកភ្លៀងហើយអ្នកស្រីសរសេរបន្ថែមទៀតថា នេះគ្រាន់តែភ្លៀងត្រឹមតែ២ម៉ោងទេ៕