ស្ថានទូតអូស្ត្រាលីរៀបចំពិព័រណ៍រូបថតរំឭកខួបលើកទី៣០ឆ្នាំរបស់អ៊ុនតាក់
2022.04.25
លោកឧត្តមសេនីយ៍ឯក ចន សេនដឺសុន (John Murray Sanderson AC) អតីតមេបញ្ជាការអូស្ត្រាលីផ្នែកយោធារបស់អាជ្ញាធរអន្តរកាលអង្គការសហប្រជាជាតិនៅកម្ពុជា (UNTAC) បានឡើងថ្លែងសុន្ទរកថាក្នុងកម្មវិធី ANZAC ដែលបានប្រារព្ធនៅក្នុងស្ថានទូតអូស្ត្រាលីប្រចាំកម្ពុជានៅព្រឹកថ្ងៃទី២៥ ខែមេសា ឆ្នាំ២០២២។
រូប៖ ស្ថានទូតអូស្ត្រាលីប្រចាំកម្ពុជា
ស្ថានទូតអូស្ត្រាលីប្រចាំកម្ពុជា រៀបចំពិព័រណ៍រូបថតរំឭកខួបលើកទី៣០ឆ្នាំនៃបេសកកម្មថែរក្សាសន្តិភាពរបស់អង្គការសហប្រជាជាតិនៅកម្ពុជា ហៅកាត់ថា អ៊ុនតាក់ (UNTAC)។ ពិព័រណ៍នេះនឹងបើកជូនសាធារណជនដោយសេរី ចាប់ពីថ្ងៃទី២៩ ខែមេសា ដល់ថ្ងៃទី២៨ ខែឧសភា នៅសណ្ឋាគារ រ៉ាហ្វល ហូតែល ឡឺរ៉ូយ៉ាល់ (Raffles Hotel Le Royal) ក្រុងភ្នំពេញ។
អូស្ត្រាលី គឺជាប្រទេសដ៏សំខាន់មួយដែលបានចូលរួមចំណែកក្នុងបេសកកម្មថែរក្សាសន្តិភាពរបស់អ៊ុនតាក់នៅកម្ពុជាកាលពីឆ្នាំ១៩៩២ ដល់ឆ្នាំ១៩៩៣។ បេសកកម្មនេះបើកផ្លូវឱ្យកម្ពុជាអាចរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ជាលើកដំបូង ក្រោយពីប្រទេសនេះបានឆ្លងកាត់សង្គ្រាមស៊ីវិលអស់ជាង ២ទសវត្ស។ អូស្ត្រាលីបានផ្តល់បុគ្គលិកជាង១២០០នាក់ដល់អ៊ុនតាក់។
អតីតអគ្គមេបញ្ជាការរបស់អ៊ុនតាក់ជាជនជាតិអូស្ត្រាលី គឺឧត្តមសេនីយ៍ឯក ចន សេនដឺសុន (John Murray Sanderson AC) និងភរិយា បច្ចុប្បន្នកំពុងបំពេញទស្សនកិច្ចនៅកម្ពុជាចាប់ពីថ្ងៃទី២៣ ខែមេសា ដល់ថ្ងៃទី២ ខែឧសភា ដើម្បីអបអរខួបទី៣០ឆ្នាំ នៃអ៊ុនតាក់ និងជាផ្នែកមួយនៃការអបអរខួបទី៧០ឆ្នាំ នៃទំនាក់ទំនងការទូតរវាងអូស្ត្រាលី និងកម្ពុជា។
លោកគ្រោងជួបជាមួយក្រុមមេដឹកនាំកម្ពុជា និងតំណាងសង្គមស៊ីវិល ដើម្បីឆ្លុះបញ្ចាំងពីការចូលរួមចំណែក និងមិត្តភាពរវាងអូស្ត្រាលី និងកម្ពុជា។
កាលពី៣០ឆ្នាំមុន អតីតអគ្គមេបញ្ជាការរបស់អ៊ុនតាក់រូបនេះ បានបញ្ជាកងកម្លាំងពហុភាគីដ៏ធំមួយរបស់អង្គការសហប្រជាជាតិនៅកម្ពុជា ក្នុងនោះរួមមាន អ្នកសង្កេតការណ៍យោធា និងនគរបាលស៊ីវិល សរុបចំនួន ២ម៉ឺន២ពាន់នាក់ (២២.០០០នាក់) មកពីជាង៤០ប្រទេសនៅលើពិភពលោក។
អ៊ុនតាក់ត្រូវបានបង្កើតឡើងដោយអង្គការសហប្រជាជាតិក្នុងឆ្នាំ១៩៩២ ដើម្បីត្រួតពិនិត្យការអនុវត្តកិច្ចព្រមព្រៀងសន្តិភាពទីក្រុងប៉ារីស ការធ្វើមាតុភូមិនិវត្តន៍របស់ពលរដ្ឋកម្ពុជាដែលបានផ្លាស់ទីលំនៅដោយសារសង្គ្រាមស៊ីវិល និងការបោះឆ្នោតជាតិឆ្នាំ១៩៩៣។ បេសកកម្មនេះ បានចំណាយអស់ទឹកប្រាក់ជាង ២ពាន់លានដុល្លារ ដោយបានជួយនាំមកនូវលទ្ធិប្រជាធិបតេយ្យ និងឈានទៅបញ្ចប់សង្គ្រាមស៊ីវិលនៅកម្ពុជានៅចុងឆ្នាំ១៩៩៨។ ក៏ប៉ុន្តែ បេសកកម្មរបស់អ៊ុនតាក់នេះ រងនូវការរិះគន់ថា មិនបានសម្រេចបាននូវគោលដៅចម្បងនៃការធានាឱ្យមាននូវលទ្ធិប្រជាធិបតេយ្យជាយូរអង្វែងនៅកម្ពុជាឡើយ។
គណបក្សប្រជាជនកម្ពុជា ដែលបានចាញ់ឆ្នោតកាលពីឆ្នាំ១៩៩៣ បានគំរាមបំបែកទឹកដីកម្ពុជាជាពីរផ្នែក។ ការសម្រុះសម្រួលនយោបាយបាននាំឱ្យកម្ពុជាក្លាយជាប្រទេសតែមួយក្នុងប្រវត្តិសាស្ត្រពិភពលោក ដែលមានតំណែងនាយករដ្ឋមន្ត្រីដល់ទៅពីរនាក់។ មិនយូរប៉ុន្មាន លោក ហ៊ុន សែន ដែលកាលនោះជានាយករដ្ឋមន្ត្រីទី២ បានដឹកនាំធ្វើរដ្ឋប្រហារបង្ហូរឈាមដណ្តើមអំណាចនៅដើមខែកក្កដា ឆ្នាំ១៩៩៧។ ទាហានដែលស្មោះស្ម័គ្រនឹងអតីតនាយករដ្ឋមន្ត្រីទី១ គឺព្រះអង្គម្ចាស់នរោត្តម រណឫទ្ធិ និងជនស៊ីវិលរាប់រយនាក់ត្រូវបានសម្លាប់ និងរងរបួសក្នុងរដ្ឋប្រហារដែលដឹកនាំដោយលោក ហ៊ុន សែននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ