មេ​ឃុំ​នៅ​សៀមរាប​រង​ការ​ចោទ​ថា​គំរាម​សម្លាប់​អ្នក​គាំទ្រ​បក្ស​ប្រឆាំង

ច្បាប់​ស្ដីពី​ការ​បោះឆ្នោត​ជ្រើស​តាំង​តំណាង​រាស្ត្រ​ដែល​ដាក់​ឱ្យ​ប្រើប្រាស់ កាល​ពី​ខែ​ធ្នូ ឆ្នាំ​១៩៩៧ ត្រង់​មាត្រា​៧១ បាន​ចែង​ថា គណបក្ស​នយោបាយ និង​បេក្ខជន​ទាំងអស់​មិន​ត្រូវ​ញុះញង់​អ្នក​គាំទ្រ ឬ​អ្នក​បោះឆ្នោត​ឱ្យ​ប្រព្រឹត្ត​អំពើ​រំលោភ​គំរាម​កំហែង ប្រើ​ហិង្សា ឬ​បំភិត​បំភ័យ​ទៅ​លើ​បុគ្គល ឬ​គណបក្ស​នយោបាយ​ដទៃ​ឡើយ។
ដោយ ហង្ស សាវយុត
2013-07-20
អ៊ីម៉ែល
មតិ
Share
បោះពុម្ព

ប្រសិន​បើ​មាន​ករណី​នេះ​កើត​ឡើង ច្បាប់​ត្រូវ​ផ្ដន្ទាទោស​អ្នក​ប្រព្រឹត្តិ ដោយ​ពិន័យ​ជា​ប្រាក់​ពី ៥ ទៅ​ដល់ ១០​លាន​រៀល ដោយ​ពុំ​ទាន់​គិត​អំពី​ទោស​ព្រហ្មទណ្ឌ​ផ្សេង​ទៀត ឬ​នឹង​ត្រូវ​ដក​ហូត​ប័ណ្ណ​បោះឆ្នោត​រយៈពេល ៥​ឆ្នាំ​ផង។ បើ​ទោះ​បី​ជា​ច្បាប់​បាន​ចែង​យ៉ាង​នេះ​ក៏ដោយ ក៏​អាជ្ញាធរ​នៅ​តាម​មូលដ្ឋាន​ខ្លះ​នៅ​តែ​គំរាម​កំហែង​ប្រជាពលរដ្ឋ​មួយ​ចំនួន ដែល​គាំទ្រ​គណបក្ស​ប្រឆាំង ក្នុង​ពេល​ដែល​យុទ្ធនាការ​ឃោសនា​រក​សំឡេង​ឆ្នោត​កំពុង​ដំណើរ​ការ​នេះ។

ក្រុម​ប្រជាពលរដ្ឋ​មួយ​គ្រួសារ​រស់នៅ​ឃុំ​ពាក់ស្នែង ស្រុក​អង្គរធំ ចម្ងាយ​ជាង ៤០​គីឡូម៉ែត្រ​ភាគ​ខាង​ជើង​ឆៀង​ខាង​លិច​ពី​ទី​រួម​ខេត្ត​សៀមរាប កំពុង​ព្រួយ​បារម្ភ​អំពី​សុវត្ថិភាព​គ្រួសារ បន្ទាប់​ពី​មេ​ឃុំ​ទី​នោះ​បាន​ទៅ​គំរាម​កំហែង​ប្រមាថ​ដល់​អាយុ​ជីវិត។

បុរស​អាយុ ៣១​ឆ្នាំ​ម្នាក់ ដែល​រស់នៅ​ភូមិ​ពាក់ស្នែងថ្មី ឃុំ​ពាក់ស្នែង គឺ​លោក ញន សុភា។ លោក​បាន​អះអាង​ថា កាល​ពី​ថ្ងៃ​ទី១៣ ខែ​កក្កដា កន្លង​ទៅ លោក​បាន​ចូលរួម​ដង្ហែ​ក្បួន​យុទ្ធនាការ​ឃោសនា​ឱ្យ​គណបក្ស​សង្គ្រោះ​ជាតិ។ លុះ​នៅ​វេលា​ម៉ោង​ប្រមាណ​ជា ៨​យប់​ថ្ងៃ​ដដែល មេ​ឃុំ​ពាក់ស្នែង ដែល​មាន​គ្នា ៣-៤​នាក់​ទៀត បាន​ចូល​ទៅ​ផ្ទះ​របស់​លោក ហើយ​គំរាម និង​ប្រមាថ​ដល់​អាយុ​ជីវិត៖ «គេ​បើក​ឡាន​ចាក់​ម៉ាញ៉េ​ក្នុង​ឡាន​ឱ្យ​កោកៗ រួច​គេ​បិទ​ទ្វារ​ទឹងទាំង ហើយ​ចូល​មក​ផ្ទះ​ខ្ញុំ។ ខ្ញុំ​អញ្ជើញ​គាត់​ឱ្យ​អង្គុយ​លេង ដល់​ពេល​នោះ គេ​លើក​ដៃ​ចង្អុល គេ​ថា​ពួក​អា ៤-៥​ក្បាល​នេះ អញ​ចង់​ចំណាយ​ចោល​ថ្ងៃ​ណា​ក៏​បាន​ដែរ។ គំរាម​ខ្លាំងៗ​ដល់​អាយុ​ជីវិត​ទៅ​ទៀត​នោះ បាន​ន័យ​ថា គេ​ចង់​ឱ្យ​ស្លាប់​ថ្ងៃ​ណា​ក៏​បាន​ដែរ។ គេ​អ្នក​ដឹកនាំ​ឃុំ​មួយ​រូប​ដែរ គេ​មក​ប្រមាថ​ប្រជាពលរដ្ឋ​អីចឹង យើង​ចេះ​តែ​មាន​ការ​ភ័យ​បារម្ភ​កាន់​តែ​ខ្លាំង​រាល់​ថ្ងៃ»

ទោះ​យ៉ាង​ណា មេ​ឃុំ​ពាក់ស្នែង លោក រៀម ប៊ុន បាន​បដិសេធ​ចោល​ការ​ចោទ​ប្រកាន់​មក​លើ​រូប​លោក​នោះ​ថា​ជា​ការ​មិន​ពិត។ លោក​មេ​ឃុំ​ពាក់ស្នែង បាន​មាន​ប្រសាសន៍​ថា កាល​ពី​យប់​ថ្ងៃ​ទី១៣ ខែ​កក្កដា កន្លង​ទៅ​នោះ គឺ​លោក​បាន​ចូល​ទៅ​ផ្ទះ​របស់​ឈ្មោះ ញន សុភា មែន ដើម្បី​សួរ​បញ្ជាក់​ថា តើ​ពិត​ជា​បាន​ទៅ​ចូលរួម​ហែ​ក្បួន​គណបក្ស​សង្គ្រោះ​ជាតិ មែន​ឬ​ទេ? ក៏ប៉ុន្តែ លោក​មិន​បាន​គំរាម និង​ប្រមាថ​ដល់​ជីវិត​ដូច​ការ​ចោទ​ប្រកាន់​នោះ​ឡើយ៖ «អត់​មែន​ទេ ថា​សម្លាប់​ចោល​ថ្ងៃ​ណាៗ​នោះ អត់​មាន គឺ​គេ​ដាក់​ពាក្យ គេ​ចោទ​បង្កាច់​ខ្ញុំ​ទេ។ បើ​សិន​ជា​ចង់​ដឹង​ច្បាស់​យ៉ាង​ម៉េច ខ្ញុំ​ចង់​ស្បថ​ប្រាំ​ធាន ព្រះ​វត្ត​តាកាំ យ៉ាង​ណា​ក៏​ខ្ញុំ​មិន​ខ្លាច​ដែរ»

លោក​មេ​ឃុំ​ពាក់ស្នែង បាន​អះអាង​ថា លោក​មាន​អ្នក​ដឹង​ឮ​រឿង​នេះ​ចំនួន ២-៣​នាក់​ផ្សេង​ទៀត ដែល​ជា​សាក្សី​អាច​បញ្ជាក់​ថា លោក​ពុំ​បាន​គំរាម​ប្រមាថ​ដល់​អាយុ​ជីវិត​ប្រជាពលរដ្ឋ​ទេ។

ប្រជាពលរដ្ឋ​មួយ​គ្រួសារ​បាន​ដាក់​ពាក្យ​ប្ដឹង​មេ​ឃុំ​ពាក់ស្នែង ស្ដីពី​ការ​គំរាម និង​ប្រមាថ​ដល់​អាយុ​ជីវិត​នេះ ទៅ​គណៈកម្មការ​រៀបចំ​ការ​បោះឆ្នោត​ប្រចាំ​ឃុំ ក៏ប៉ុន្តែ កាល​ពី​ថ្ងៃ​ទី១៨ ខែ​កក្កដា កន្លង​ទៅ គណៈកម្មការ​រៀបចំ​ការ​បោះឆ្នោត​ឃុំ​ពាក់ស្នែង មិន​អាច​ដោះស្រាយ​ករណី​នេះ​បាន​ទេ គឺ​ត្រូវ​បញ្ជូន​បន្ត​ទៅ​គណៈកម្មការ​រៀបចំ​ការ​បោះឆ្នោត​ខេត្ត​សៀមរាប។

អ្នក​ស៊ើប​អង្កេត​សមាគម​ការពារ​សិទ្ធិ​មនុស្ស​អាដហុក (Adhoc) ខេត្ត​សៀមរាប លោក សួស ណារិន ដែល​ចុះ​ស្រាវជ្រាវ​ករណី​នោះ បាន​រក​ឃើញ​ថា តាម​ការ​សាកសួរ​ទៅ​លើ​សាក្សី និង​គណៈកម្មការ​រៀបចំ​ការ​បោះឆ្នោត​ឃុំ​ពាក់ស្នែង ផង គឺ​លោក​មេ​ឃុំ​ពិត​ជា​បាន​គំរាម និង​ប្រមាថ​ដល់​អាយុ​ជីវិត​ប្រជាពលរដ្ឋ​ម្នាក់ ដែល​ទៅ​ចូលរួម​ដង្ហែ​ឃោសនា​ឱ្យ​គណបក្ស​សង្គ្រោះ​ជាតិ មែន៖ «ពិត​ហើយៗ​មេ​ឃុំ​ហ្នឹង​បាន​សុំ​អង្វរ​ថា កុំ​ឱ្យ​បញ្ជូន​បណ្ដឹង​ហ្នឹង​មក ប៉ិច (PEC) ទៀត​ណា»

លោក សួស ណារិន បាន​ហៅ​សកម្មភាព​របស់​មេ​ឃុំ​ពាក់ស្នែង ថា ជា​ការ​គាប​សង្កត់​ខុស​ច្បាប់​ទៅ​លើ​សិទ្ធិ​ប្រជាពលរដ្ឋ មិន​ឱ្យ​ចូលរួម​គណបក្ស​នយោបាយ​ណា​មួយ​ដែល​គេ​ស្រឡាញ់​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Farmer

ពី Poy Pet

Together, bring the commune chief to the court. Please be remembered if cpp want to buy each of us each of us will not sell our heads. And also if cpp intimidates us we will not fear. Each of us keeps practicing these important things for sure we will be able to change the number 4.

Jul 22, 2013 02:45 AM

អ្នក​អាន​អនាមិក

The member of cpp in majority,they have the reaction to khmer people as an animal,because they copy the reaction of their big master hun sen.

Jul 21, 2013 05:48 AM

គេហទំព័រ​ទាំងមូល