លោក ស ខេង ថា លោក​ជា​អ្នក​នៅ​ពីក្រោយ​នៃ​ការ​ប្ដូរ​ទីតាំង​ឃុំខ្លួន​លោក កឹម សុខា ក្នុង​ផ្ទះ

សេក បណ្ឌិត
2018-09-16
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​មហាផ្ទៃ លោក ស ខេង (ឆ្វេង) ចាប់​ដៃ​ជាមួយ​អនុប្រធាន​គណបក្ស​សង្គ្រោះ​ជាតិ លោក កឹម សុខា មុន​អ្នក​នាំ​ពាក្យ​បក្ស​ទាំង​២ ធ្វើ​សន្និសីទ​កាសែត​ស្ដីពី​លទ្ធផល​នៃ​ជំនួប​នៅ​ថ្ងៃ​ទី​១៩ ខែ​កុម្ភៈ ឆ្នាំ​២០១៦ នា​វិមាន​រដ្ឋ​សភា។
រដ្ឋមន្ត្រី​ក្រសួង​មហាផ្ទៃ លោក ស ខេង (ឆ្វេង) ចាប់​ដៃ​ជាមួយ​អនុប្រធាន​គណបក្ស​សង្គ្រោះ​ជាតិ លោក កឹម សុខា មុន​អ្នក​នាំ​ពាក្យ​បក្ស​ទាំង​២ ធ្វើ​សន្និសីទ​កាសែត​ស្ដីពី​លទ្ធផល​នៃ​ជំនួប​នៅ​ថ្ងៃ​ទី​១៩ ខែ​កុម្ភៈ ឆ្នាំ​២០១៦ នា​វិមាន​រដ្ឋ​សភា។
RFA/Rann Samnang

រដ្ឋមន្ត្រី​ក្រសួងមហាផ្ទៃ អួតអាង​ថា លោក​ជា​អ្នកបញ្ជា​ឲ្យ​ដឹកជញ្ជូន លោក កឹម សុខា ចេញពី​ពន្ធនាគារ​ត្រពាំង​ផ្លុង​ទាំង​យប់ និង​ខិតខំ​កែច្នៃ​អោយ​ការ​ឃុំខ្លួន​នៅផ្ទះ​ស្របតាម​ច្បាប់។ ទង្វើ និង​សេចក្ដី​សម្រេច​របស់ លោក ស ខេង ដែល​ជា​អនុប្រធាន​គណបក្ស​ប្រជាជន​កម្ពុជា​ផង​នោះ ហាក់​ធ្វើ​ឡើង​ជំនួស​កិច្ចការ​របស់​តុលាការ ដែល​បាន​ប្រកាស​ថា ការ​ដោះលែង លោក កឹម សុខា គឺ​ដោយសារ​ស្ថានភាព​ជំងឺ ប៉ុន្តែ​ស្ថិត​ក្រោម​ការ​ត្រួតពិនិត្យ​របស់​តុលាការ។ អ្នកវិភាគ មើល​ឃើញ​ថា ការ​ប្ដូរ​ទីតាំង​ឃុំខ្លួន លោក កឹម សុខា មិនមែន​ដោយសារ​ចិត្តធម៌​នោះ​ទេ គឺ​ដោយសារ​ក្រុម​មេដឹកនាំ​របប ហ៊ុន សែន បារម្ភ​ពី​សម្ពាធ​អន្តរជាតិ​លើ​របប​ថ្មី​របស់​បក្ខ​ពួក​ខ្លួន។

អនុប្រធាន​គណបក្ស​កាន់អំណាច និង​ជា​រដ្ឋមន្ត្រី​ក្រសួងមហាផ្ទៃ​លោក ស ខេង អះអាង​ថា លោក​បាន​រៀបចំ​យុទ្ធសាស្ត្រ បញ្ជា​ឲ្យ​មន្ត្រី​ម្នាក់ ទៅ​សម្របសម្រួល​ជាមួយ លោក កឹម សុខា នៅ​ក្នុង​ពន្ធនាគារ​ត្រពាំង​ផ្លុង ដោយ​យក​លិខិត​មួយ​ច្បាប់ ឲ្យ​លោក កឹម សុខា សរសេរ​ផ្ទាល់ដៃ ស្នើសុំ​កងកម្លាំង​ការពារ​ខ្លួន​នៅ​ក្នុង​ផ្ទះ មុននឹង​ត្រូវ​បាន​អនុញ្ញាត​ឲ្យ លោក កឹម សុខា ត្រលប់​មក​ឃុំខ្លួន​ក្នុង​ផ្ទះ​វិញ។ លោក ស ខេង បញ្ជាក់​ថា លោក ជា​អ្នក​រៀបចំ​គូស​វាស់ដី​ឲ្យ​លោក កឹម សុខា ដើរ៖ «បើ​កម្លាំង​យើង​ដាក់​នៅផ្ទះ​អត់​បានទេ ពីព្រោះ​ឃុំខ្លួន​នៅ​ក្នុង​ផ្ទះ​វា​អត់​មាន​ច្បាប់ តែ​យើង​ដាក់​ខុសច្បាប់។ អ៊ីចឹង​មានតែ​គូស​រង្វង់​ផ្ទះ កឹម សុខា នៅ​ហ្នឹង​អ៊ីចឹង​ទៅ អា​រង្វង់​ផ្លូវ​ខាងជើង ខាង​ត្បូង ខាងលិច ខាងកើត ហ្នឹង​ប៉ុន្មានៗ អ៊ីចឹង​ទៅ ហើយ​យើង​ការពារ​ហ្នឹង។ ដល់​អ៊ីចឹង វា​នៅ​ក្នុង​បរិវេណ​ខាងក្នុង ក្នុង​រង្វង់​ហ្នឹង​វា​ទូលាយ​ពេក ដល់​អ៊ីចឹង​យើង​រក​វិធី​មួយ​ថា ឥឡូវ​ចេះ​ព្រាង​សំបុត្រ​មួយ​ឲ្យ​ហើយ ដើម្បី​ធានា​សន្តិសុខ ដោយ​បញ្ហា​សន្តិសុខ អ៊ីចឹង​ទៅ ខ្ញុំ​សូម​ស្នើ​អគ្គស្នងការ​នគរបាល​ជាតិ ជួយ​រៀបចំ​ការពារ​សន្តិសុខ សុវត្ថិភាព​សម្រាប់​ខ្ញុំ ហើយ​យើង​យក​ទៅ ផាន គេ​យក​ទៅ​ចរចា ចរចា​ឯកភាព។ ឯកភាព តែ​យើង​អត់​យក​ក្រដាស​វ៉ៃ​ពុម្ព​​​ហើយ​ទៅ​ទេ អក្សរ​កុំព្យូទ័រ អូស​ពី​កុំព្យូទ័រ ហើយ​ទៅ​ទេ ឲ្យ​សរសេរ​ដៃ។ ដំបូង​ដាក់​ថា ការពារ​គេហដ្ឋាន ហើយ​ដល់​បងប្អូន​រាយការណ៍​មក​ថា ឥលូវ​គេ​សុំ​លុប​ពាក្យ​គេហដ្ឋាន​ហ្នឹង ខ្ញុំ​ថា​ក៏បាន​ដែរ​ឲ្យ​តែ​ការពារ​សន្តិសុខ​ហ្នឹង​បាន​ហើយ ការពារ​សន្តិសុខ​ហ្នឹង មិនមែន​២​គីឡូ​ទេ ការពារ​សន្តិសុខ​នៅ​ជាប់​ហ្នឹង ការពារ​បាន។ អ៊ីចឹង​លុប​អា​ពាក្យ​ហ្នឹង មិនមែន​ថា ដាក់​នៅ​ផ្ទះ​មិនបាន​ណា ដើម្បី​ការពារ​សន្តិសុខ​ដាក់​នៅ​ហ្នឹង​ផ្ទះ​ហ្នឹងហើយ។ មាន​អី គាត់​អត់​ចោទ​យើង​កើត​ទេ ពីព្រោះ​អី គាត់​អ្នក​សុំ​កម្លាំង​ការពារ ព្រោះ​ច្បាប់​យើង​អ៊ីចឹង ច្បាប់​យើង​អត់​មាន​ឲ្យ​ឃុំខ្លួន​នៅផ្ទះ​ផង។ សម្រាប់លោក កឹម សុខា នេះ​គឺ​ទេ ខ្ញុំ​និយាយ​ទៅ​វា​នេះ ប៉ុន្តែ​ថា យើង​ត្រូវតែ​ដំណើរការ​តាម​នីតិវិធី​ឲ្យ​ចប់ ពីព្រោះ​បើកាលណា យើង​មិន​ធ្វើតាម​នីតិវិធី​តាម​តុលាការ​ទេ រដ្ឋាភិបាល​ជា​អ្នក​ខុស ជា​អ្នក​ខុស ការចោទប្រកាន់​គេ​មិន​ត្រឹមត្រូវ។ នេះ​ហើយ​ជា​បញ្ហា​ដែល​យើង​ត្រូវ​ដឹង​ទាំងអស់​គ្នា​ថា​អ៊ីចឹង។ ទោះបីយ៉ាងណា​ក៏ដោយ វា​ត្រូវ​មាន​ទី​បញ្ចប់​បញ្ហា»

លោក ស ខេង ថ្លែង​បែបនេះ នៅ​ព្រឹក​ថ្ងៃ​ទី​១៦ កញ្ញា ក្នុង​ពេល​លោក ចូលរួម​ជា​អធិបតីភាព​ក្នុង​កិច្ចប្រជុំ​បូកសរុប​សកម្ម​ភាព​ការងារ និង​លទ្ធផល ព្រឹត្តិការណ៍​បោះឆ្នោត ថ្ងៃ​ទី​២៩ កក្កដា ២០១៨ នៅ​ទីស្នាក់ការ​គណបក្ស​ប្រជាជន​កម្ពុជា សាខា​ខេត្ត​ព្រៃវែង។

កាលពី​ម៉ោង​ប្រមាណ​៣​ទៀបភ្លឺ នៅ​ថ្ងៃទី១០ ខែ​កញ្ញា តុលាការ​របប​ហ៊ុន សែន បាន​ដោះលែង​ប្រធាន​គណបក្ស​សង្គ្រោះ​ជាតិ លោក កឹម សុខា ឱ្យ​នៅ​ក្រៅ​ឃុំ​ជា​បណ្ដោះអាសន្ន និង​បាន​ដឹក​លោក​ពី​ពន្ធនាគារ​ត្រពាំង​ផ្លុង មក​ដល់​គេហដ្ឋាន​របស់​លោក នៅ​ទីក្រុង​ភ្នំពេញ​វិញ ដោយ​ស្ងាត់ៗ ទាំង​យប់។

ចៅក្រម​ស៊ើបសួរ​សាលាដំបូង​រាជធានី​ភ្នំពេញ លោក គី ឫទ្ធី បាន​ចេញ​ដីកា​បង្គាប់​ឱ្យ​ដោះលែង​ប្រធាន​គណបក្ស​សង្គ្រោះជាតិ លោក កឹម សុខា នៅ​ថ្ងៃ​ទី​៩ កញ្ញា​។ ប៉ុន្តែ លោក ស ខេង អះអាង​ថា នៅ​ពីក្រោយ​រឿង​នេះ លោក​បាន​បញ្ជា​ឲ្យ​មន្ត្រី​ទៅ​ចរចា​ជាមួយ លោក កឹម សុខា នៅ​ក្នុង​ពន្ធនាគារ​ទាំង​យប់ ហើយ​បញ្ជា​ឲ្យ​ដឹកជញ្ជូន​ចេញពី​ពន្ធនាគារ​ត្រពាំង​ផ្លុង​ទាំង​យប់ ធ្វើ​យ៉ាងណា យក​ទៅ​ដល់​ផ្ទះ​លោក កឹម សុខា វិញ ឲ្យ​បាន​មុន​ម៉ោង​ ៥​ព្រឹក​ថ្ងៃ​ទី​១០ កញ្ញា៖ «ឥឡូវនេះ យើង​យក​មក​ទុក​នៅ​ហ្នឹង​ផ្ទះ។ ច្បាប់​យើង អត់​មាន​ច្បាប់ អា​ដែង​នែ ព្រហ្មទណ្ឌ​ហ្នឹង​ណា អត់​អនុញ្ញាត​ឲ្យ​ឃុំខ្លួន​នៅផ្ទះ​ទេ អត់​មាន​ទេ គឺថា ឃុំខ្លួន​នៅ​ក្នុង​ដែនដី​ណាមួយ​ជា​កំណត់ ជា​កំណត់ អ៊ីចឹង​ធ្វើ​ម៉េច​ឥលូវ ចន្លោះ​ដែរ អ្នក​សរសេរ​ច្បាប់ព្រហ្មទណ្ឌ​ហ្នឹង អត់​មាន​ច្បាប់​ឃុំខ្លួន​នៅផ្ទះ ដល់​អ៊ីចឹង​រក​វិធី។ ខ្ញុំ​ថា ឥឡូវ​​ព្រាង​​ឲ្យ​​ហើយ​​ទៅ ឲ្យ​ ផាន យក​ទៅ ប៉ាវ ហមផាន ព្រាង​ឲ្យ​ហើយ កាន់​ពី​ហ្នឹង​ទៅ ទៅដល់​ចរចា​ជាមួយ កឹម សុខា ខ្លួនឯង ព្រោះ​ ផាន ហ្នឹង​ទៅ​យក​មក។ ជជែក​គ្នា​ម៉ោង​៣ ប៉ុន្តែ​ថា ធ្វើ​ម៉េច​ម៉ោង​ ៥​ភ្លឺ​យ៉ាង​យូរ ត្រូវ​យក​មនុស្ស​ហ្នឹង​មក​ឲ្យ​ដល់​ភ្នំពេញ ប្រកបដោយ​សុវត្ថិភាព ហើយ​ទម្រាំ​ជជែក​គ្នា​ហើយ ម៉ោង​៦​ហើយ បាន​ចែក​ផ្លូវ​គ្នា​ធ្វើការ»

នៅ​ថ្ងៃ​ទី​១០ កញ្ញា អ្នកនាំពាក្យ​សាលាដំបូង​រាជធានី​ភ្នំពេញ បាន​សេចក្ដីប្រកាស​ព័ត៌មាន​អះអាង​ថា ការ​ដោះលែង​នេះ ធ្វើឡើង​ដោយ​ផ្អែកលើ​ហេតុផល​សុខភាព និង​ដោយមាន​ការធានា​ខាង​ផ្នែក​នីតិវិធី​ច្បាស់លាស់ ថា លោក កឹម សុខា និង​មិន​អាច​រត់​គេច​ខ្លួន​ពី​នីតិវិធី​តុលាការ។

សកម្មជន​គណបក្ស​សង្គ្រោះជាតិ​ម្នាក់ លោក គង់ ម៉ាស់ ឲ្យ​ដឹង​ថា នៅមុខ​ផ្ទះ​ដែល​គេ​ឃុំឃាំង លោក កឹម សុខា នៅ​ខណ្ឌ​ទួលគោក មាន​កងកម្លាំង​ប៉ូលិស​ជាច្រើន​ត្រូវ​បាន​គេ​ពង្រាយ​គ្រប់​ទិស​ជុំវិញ​ផ្ទះ​នោះ ហើយ​នៅ​ពេល​ដែល​មាន​នរណា​ម្នាក់​ទៅ​គាំទ្រ លោក កឹម សុខា នៅ​ខាងក្រៅ​ផ្ទះ​នោះ កងកម្លាំង ដែល​ស្លៀកពាក់​ស៊ីវិល បាន​ទៅ​ថតរូប​អ្នកគាំទ្រ ធ្វើ​ឲ្យ​សកម្មជន​មួយ​ចំនួន​មានការ​ភ័យខ្លាច។ ទោះជា​យ៉ាងណា សកម្មជន​បក្ស​ប្រឆាំង​រូប​នេះ អះអាង​ថា លោក កឹម សុខា មិនដែល​បាន​ចេញ​ពី​ក្នុង​ផ្ទះ មក​ជួប​អ្នកគាំទ្រ​នៅមុខ​ផ្ទះ​ទេ៖ «ប៉ូលិស​គេ​ដាក់​គ្រប់​ជ្រុង កន្លែង​ខាងជើង ខាង​ត្បូង ហ្នឹង​គ្រប់កន្លែង​តែម្ដង គេ​ពាក់​ឯកសណ្ឋាន​ជា​លក្ខណៈ​ស៊ីវិល ហើយ​ចាំ​ថត​សកម្មជន ឬក៏​អ្នក​មោ ចុះ​មក​សួរសុខទុក្ខ មក​អើតមើល​ផ្ទះ​លោក​ប្រធាន គេ​តែងតែ​យក​កាមេរ៉ា​ថត គេ​ចាប់​កាមេរ៉ា​គ្រប់​ទិស​តែម្ដង​អ៊ីចឹង​ណា។ ហើយ​ជាពិសេស​គេ​ថត​យក​មុខ​តែម្ដង។ សំនួរ​មាន​តំណាងរាស្ត្រ​មក​ទេ​។ មាន មាន​តំណាងរាស្ត្រ​យើង​មួយ​ចំនួន​គាត់​បាន​មកដល់​មុខ​ផ្ទះ​ដែរ តែ​គាត់​ចុះ​មក​មួយ​ភ្លេតៗ អ៊ីចឹង​ទៅ គាត់​អត់​មាន​ចូល​ទេ ព្រោះ​មាន​គេ​តាម​ថត តាម​អីចឹង​ទៅ គេ​ការពារ​ខ្លាច គេ​ចោទ​ប្រកាន់​ថា តំណាងរាស្ត្រ​ចូល​មក​ផ្ទះ​លោក​ប្រធាន​អីចឹង​ទៅ​ណា។ អ៊ីចឹង​គាត់ (ក្រុម​តំណាងរាស្ត្រ​) មក​ដែរ មក​ជួប​គ្នា​ចឹង​ទៅ អង្គុយ​ជជែក​គ្នា​តិច​ទៅ គាត់​ចេញទៅ​វិញ​ទៅ»

ក្នុង​ដីកា​ដោះលែង ចៅក្រម​ស៊ើបសួរ លោក គី ឬទ្ធី បាន​ព្រមាន​មិន​ឲ្យ​លោក កឹម សុខា ជួប​និយាយ​ជាមួយ​អ្នកនយោបាយ ឬ​ជនបរទេស​ទេ។ លោក ស ខេង ឲ្យ​ដឹង​ថា ប្រធាន​បក្ស​ប្រឆាំង​ខេត្ត​ព្រៃវែង​ម្នាក់ គ្រោង​រៀបចំ​កេណ្ឌ​អ្នកគាំទ្រ​ឲ្យ​ទៅ​រៀបចំ​ពិធីជប់លៀង នៅផ្ទះ លោក កឹម សុខា តែ​មិនបាន​សម្រេច។ លោក ស ខេង អះអាង​ថា លោក បាន​អនុញ្ញាត​រួចហើយ ឲ្យ​លោក កឹម សុខា ផ្ញើ​សារ​ជា​សំឡេង បណ្ដេញ​អ្នកគាំទ្រ​ចេញពី​មុខ​ផ្ទះ​វិញ ប៉ុន្តែ មិន​អនុញ្ញាត​ឲ្យ លោក កឹម សុខា អំពាវនាវ​មនុស្ស​ទៅ​ជួបជុំ​នៅមុខ​ផ្ទះ​លោក​ទេ។

សមាជិក​ក្រុម​អ្នកវិភាគ​វ័យក្មេង លោក បុង ដែត យល់ថា លោក ស ខេង ខិតខំ​ប្រឹងប្រែង រៀបចំ​យុទ្ធសាស្ត្រ ដើម្បី​ឲ្យ​ស្របតាម​ច្បាប់​ក្នុង​ការ​ដោះលែង លោក កឹម សុខា បែបនេះ គឺ បង្ហាញ​ថា មេដឹកនាំ​របប ហ៊ុន សែន ទាំងអស់ កំពុង​ភ័យខ្លាច ឥទ្ធិពល​សហគមន៍​អន្ដរជាតិ ដែល​កំពុង​សើរើ ការ​សម្លាប់​លទ្ធិ​ប្រជាធិបតេយ្យ​នៅ​កម្ពុជា។ លោក បុង ដែត បញ្ជាក់​ថា ក្រុម​មេដឹកនាំ​របប​ហ៊ុន សែន បារម្ភ​ការ​ផ្ដាច់​ការ​អនុគ្រោះ​ពន្ធ​ពី​សហគមន៍​អន្តរជាតិ ជាង​នរណា​ទាំងអស់ ពីព្រោះ​អ្នក​ចំណេញ​ពី​ការ​អនុគ្រោះ​ពន្ធ​ពិតប្រាកដ​មិនមែន​ពលរដ្ឋ​ខ្មែរ ដែល​ទទួល​បាន​ប្រាក់​ឈ្នួល​បន្តិចបន្តួច​ទេ គឺ​ក្រុម​មេដឹកនាំ​របប​ហ៊ុន សែន និង​ក្រុមហ៊ុន​ចិន​ទេ ដែល​ទទួល​បានការ​ចំណេញ​យ៉ាង​ច្រើន ពី​ការ​អនុគ្រោះ​ពន្ធ​នេះ៖ «​ជា​ការ​ភ័យខ្លាច​របស់​គណបក្ស​ប្រជាជន​កម្ពុជា មិនមែន​របស់ លោក ស ខេង ម្នាក់ឯង​ទេ គឺ​តាំងពី​របស់​លោកនាយក​រដ្ឋមន្ត្រី ហ៊ុន សែន តាំងពី លោក ស ខេង។ អ៊ីចឹង​អ្វី​ទាំង​អស់ហ្នឹង គឺ​សុទ្ធតែ​ជា​ការភ័យខ្លាច​ការ​សើរើ​ឡើងវិញ លទ្ធិប្រជាធិបតេយ្យ​របស់​សហភាព​អឺរ៉ុប»

អ្នកវិភាគ​រូប​នេះ យល់ថា ជំហាន​បន្ត ក្រុម​មេដឹកនាំ​នៃ​របប​លោក ហ៊ុន សែន នឹង​រិះរក​យុទ្ធសាស្ត្រ បន្ត ដើម្បី​ដោះលែង លោក កឹម សុខា ឲ្យ​មាន​សេរីភាព​ឡើងវិញ ប៉ុន្តែ​ត្រូវតែ​ប្ដូរ​នឹង​ភាព​ស្របច្បាប់​នៃ​របប​ថ្មី ដើម្បី​បក្ខពួក លោក ហ៊ុន សែន អាច​បន្ត​ក្ដោប​ក្ដាប់​អំណាច​បន្ដ​ទៀត។ លោក បុង ដែត យល់ថា នៅ​ពេល​ដែល​សម្ពាធ​អន្តរជាតិ កាន់តែ​ធ្ងន់ធ្ងរ របប ហ៊ុន សែន អាច​នឹង​ប្រើ​ហេតុផល​បង្រួបបង្រួម​ជាតិ ដើម្បី​ជា​ថ្នូរ​ដោះលែង លោក កឹម សុខា និង​ការ​បន្ត​រក្សា​អំណាច​របស់​បក្ខ​ពួក​ខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

anonymous

Like comrade Ta Sar Kheng like comrade Ta Hun Sen,like comrade Ta Hun Sen like comrade Ta Sar Kheng[like 1+1=2 not 3,4,5 or up],must be smart all khmer pple time to determinate this horrible regime from power...stop waste your time,stop waste your money and stop waste your energy with these horrible men anymore...stop fear all these mafia govm't anymore.

Sep 30, 2018 03:19 PM

GW.Bush

ពី Ha Noi

WHAT DISGUSTING!

Sep 16, 2018 01:18 PM

គេហទំព័រ​ទាំងមូល