កម្ពុជា-វៀតណាមសហការរុករកអដ្ឋិធាតុទាហានវៀតណាមស្លាប់ក្នុងសង្គ្រាមនៅសៀមរាប
2015.03.31
មន្ត្រីយោធា និងអាជ្ញាធរខេត្តសៀមរាប កំពុងសហការជាមួយអាជ្ញាធរខេត្តតៃនិញ នៃប្រទេសវៀតណាម ដើម្បីបើកកិច្ចសហប្រតិបត្តិការតាមរកអដ្ឋិធាតុទាហានវៀតណាម ជាច្រើន ដែលបានស្លាប់ក្នុងសម័យសង្គ្រាមនៅកម្ពុជា ចាប់ពីឆ្នាំ១៩៧០ រហូតមកដល់ឆ្នាំ១៩៨៩។
ប្រតិបត្តិការរុករកនេះ បានចាប់ផ្ដើមរយៈពេលជាងកន្លះខែមកហើយ នៅតាមតំបន់ខ្លះរបស់ខេត្តសៀមរាប។
មន្ត្រីយោធានៃតំបន់ប្រតិបត្តិការសឹកខេត្តសៀមរាប ឲ្យដឹងថា ការចាប់ផ្ដើមបើកប្រតិបត្តិការរុករកអដ្ឋិធាតុលើកទី១៤ ចាប់ផ្ដើមធ្វើរយៈពេលជាងកន្លះខែមកហើយ តែគេទើបតែរកឃើញអដ្ឋិធាតុទាហានវៀតណាម ដែលស្លាប់នៅក្នុងទឹកដីខេត្តនេះចំនួន ៤នាក់ប៉ុណ្ណោះ ក្នុងចំណោមអ្នកស្លាប់រាប់រយនាក់ផ្សេងទៀត។
មេបញ្ជាការរងនៃតំបន់ប្រតិបត្តិការសឹកខេត្តសៀមរាប និងជាសហប្រធាននៃកិច្ចសហប្រតិបត្តិការរុករកអដ្ឋិធាតុនោះ គឺលោកវរសេនីយ៍ឯក នៅ ជា។ លោកមានប្រសាសន៍កាលពីរសៀលថ្ងៃអង្គារ ទី៣១ ខែមីនា ថា កិច្ចសហប្រតិបត្តិការរវាងអាជ្ញាធរខេត្តសៀមរាប និងអាជ្ញាធរខេត្តតៃនិញ របស់វៀតណាម ដែលតាមរកអដ្ឋិធាតុយុទ្ធជនស្លាប់កាលពីសម័យសង្គ្រាមនោះ បានចាប់ផ្ដើមឡើងតាំងតែពីថ្ងៃទី១០ ខែមីនា ហើយរហូតមកដល់ថ្ងៃទី៣១ ខែមីនា នេះ មានរយៈពេល ២១ថ្ងៃមកហើយ។
ក្រុមប្រតិបត្តិការចម្រុះកម្ពុជា-វៀតណាម បានទៅរុករកអដ្ឋិធាតុយុទ្ធជនវៀតណាម ដែលស្លាប់ក្នុងសម័យសង្គ្រាមនៅកម្ពុជា នៅតាមតំបន់ជាច្រើន៖ «រកនៅស្រុកពួក ស្រុកអង្គរជុំ វ៉ារិន យើងឲ្យកម្លាំងស្រាវជ្រាវចុះតាមមូលដ្ឋាន។ ពេលប្រជាជនរាយការណ៍បានយើងទៅ ហើយយើងទៅរកខ្លះឃើញ ខ្លះក៏អត់ ចាប់ពីខែ៣ ខែ៤ នេះទៅដល់ខែ៦ ភ្លៀងធ្លាក់ គឺចប់ភារកិច្ចទៅវិញ»។
កាលពីថ្ងៃទី១១ ខែមីនា កន្លងទៅ អភិបាលខេត្តសៀមរាប បានចុះហត្ថលេខាលើលិខិតបញ្ជាបេសកកម្មឲ្យមានក្រុមការងារចម្រុះ ដោយខាងភាគីកម្ពុជា ចំនួន ៦រូប និងភាគីវៀតណាម ចំនួន ១៦រូប ដើម្បីចុះបំពេញបេសកកម្មសហប្រតិបត្តិការតាមរកអដ្ឋិធាតុទាហានវៀតណាម ដែលស្លាប់ក្នុងសង្គ្រាមរយៈពេល ២០ឆ្នាំនៅកម្ពុជា នេះ។
នាយករងរដ្ឋបាលនៃសាលាខេត្តសៀមរាប លោក សុខ ថុល មានប្រសាសន៍ថា នេះជាលើកទី៣ ហើយដែលរដ្ឋាភិបាលវៀតណាម បានបញ្ជូនមន្ត្រីរបស់ខ្លួនឲ្យមកតាមរកអដ្ឋិធាតុយុទ្ធជនវៀតណាម ដែលស្លាប់ដោយសង្គ្រាមនៅទឹកដីខេត្តសៀមរាប។
កាលពីឆ្នាំមុន អាជ្ញាធរវៀតណាម ធ្លាប់បានរុករកឃើញអដ្ឋិធាតុទាហានរបស់ខ្លួនជាច្រើននាក់នៅក្នុងទឹកដីខេត្តសៀមរាប ហើយបានធ្វើមាតុភូមិនិវត្តន៍ទៅវិញ។
មន្ត្រីយោធាខ្មែរនៃតំបន់ប្រតិបត្តិការសឹកខេត្តសៀមរាប ឲ្យដឹងថា ចាប់តាំងពីអំឡុងឆ្នាំ១៩៧០ ដល់ឆ្នាំ១៩៨៩ ដែលវៀតណាម ចូលមកធ្វើសង្គ្រាមនៅក្នុងប្រទេសខ្មែរ គឺមានទាហានវៀតណាម ប្រមាណជាង ១.០០០នាក់ បានស្លាប់នៅក្នុងទឹកដីខេត្តសៀមរាប។ ប៉ុន្តែចាប់តាំងពីឆ្នាំ២០០៣-២០០៤ ដែលរដ្ឋាភិបាលវៀតណាម បានបញ្ជូនមន្ត្រីឲ្យតាមរកអដ្ឋិធាតុមក គឺគេបានរកឃើញតិចតួច ដោយសារតែបាត់ស្លាកស្នាម និងទីកន្លែងបញ្ចុះសាកសពទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន