អង្គការ​​ខ្មែរ-អាមេរិកកាំង​​​គ្រោង​​​ដាក់​​ញត្តិ​​ទៅ​ប្រធានាធិបតី​អាមេរិក​និង​ស្ថាប័ន​​រដ្ឋសភា ព្រឹទ្ធសភា ​ដើម្បី​​​សុំ​​អន្តរាគមន៍​​ដោះ​លែង​កញ្ញា សេង ធារី

ដោយ សុជីវី
2022.07.05
Share on WhatsApp
Share on WhatsApp
អង្គការ​​ខ្មែរ-អាមេរិកកាំង​​​គ្រោង​​​ដាក់​​ញត្តិ​​ទៅ​ប្រធានាធិបតី​អាមេរិក​និង​ស្ថាប័ន​​រដ្ឋសភា ព្រឹទ្ធសភា ​ដើម្បី​​​សុំ​​អន្តរាគមន៍​​ដោះ​លែង​កញ្ញា សេង ធារី កញ្ញា សេង ធារី ពេលសមត្ថកិច្ចចាប់​ក្រៀក ក្នុង​សំលៀកបំពាក់​ជា​រូប​សំណាក​អ្នក​នាង​សេរីភាព នៅ​ថ្ងៃ​ប្រកាសសាលក្រម នៅ​ព្រឹក​ថ្ងៃទី១៤ ខែ​មិថុនា ឆ្នាំ​២០២២។ រូបភាព / AFP
រូប៖ AFP

ក្រុមអង្គការ​សង្គម​ស៊ីវិល​ចាប់​ផ្ដើម​ធ្វើយុទ្ធនាការ​ប្រមូល​ហត្ថលេខា​គាំទ្រ​ញត្តិ តាម​អ៊ិធឺណិត ឬ​អនឡាញ ដើម្បី​ស្នើ​សុំ​អន្តរាគមន៍​ពី​ប្រធានាធិបតី​អាមេរិកលោក ចូ បៃឌិន (Joe Biden) និងរដ្ឋបាល​របស់​លោក ព្រឹទ្ធសភា និង​សមាជិកសភា ព្រមទាំង​គណៈកម្មការ​សិទ្ធិមនុស្ស​ក្នុង​រដ្ឋសភា នៅ​សហរដ្ឋអាមេរិក ដើម្បីជំរុញ​ឱ្យ​មាន​ការដោះលែងកញ្ញា សេង ធារី និង​អ្នកជាប់​ទោស​នយោបាយ​ដទៃទៀត​ឱ្យ​មាន​សេរីភាព។

អ្នកស្រី អ៊ុង នីកូល (Nicole Ung) ដែល​ជា​តំណាង​របស់​ក្រុម​អង្គការ​សង្គម​ស៊ីវិល និង​ជា​គណៈគ្រប់គ្រង​នៃ​អង្គការ​ខ្មែរ-អាមេរិកកាំង ដើម្បី​សិទ្ធិមនុស្ស និង​លទ្ធិប្រជាធិបតេយ្យ ហៅ​កាត់​ថា ខារ៉ាត​ (CAHRAD)​ មាន​​ប្រសាសន៍​ប្រាប់​វិទ្យុ​អាស៊ីសេរី កាល​ពី​យប់​ថ្ងៃទី៥ ខែកក្កដា​ថា ក្រុម​អ្នកការពារ​សិទ្ធិមនុស្ស និង​ឈឺឆ្អាល​បញ្ហា​ប្រជាធិបតេយ្យ​នៅ​កម្ពុជា យល់​ថា​ ការដាក់​ទោសទណ្ឌ និង​ចាប់​ឃុំខ្លួន កញ្ញា សេង ធារី និងសកម្មជន​សង្គម និង​នយោបាយ​ដទៃទៀត​ជា​រឿង​អយុត្តិធម៌។ អ្នកស្រី អំពាវ​នាវ​ដល់​ពលរដ្ឋ​ទូទៅ ដែល​​និយម​ប្រ់ើ​អិនធឺណិត ឱ្យ​ចូលរួម​ចុះហត្ថលេខា​លើ​ញត្តិ ដែល​រៀបចំ​ដោយ​ក្រុមអង្គការ​សង្គម​ស៊ីវិល​នេះ៖ «អ្នកនាង​កញ្ញា សេង ធារី ជា​វីរជន​សម្រាប់​ខ្មែរ​ ជា​អ្នកការពារ​សិទ្ធិ​របស់​មនុស្សយើង ហើយ​គាត់អត់មាន​ធ្វើខុសអី​ពី​សិទ្ធិ ដែល​មាន​នោះ​ទេ ហើយ​រដ្ឋាភិបាល​ខ្មែរ​ហ្នឹង​រំលោភ​ទៅ​លើសិទ្ធិ​មនុស្ស​របស់​គាត់។ សិទ្ធិ​ជាអន្តរជាតិហ្នឹង​ធ្វើ​ឱ្យ​យើង​មាន​សិទ្ធិ​សម្ដែង​មតិ និង​ចូលរួម​ក្នុង​​នយោបាយ និង​សិទ្ធិ​របស់​ខ្លួន​ឯង​បាន​ដោយសេរី មិនអាច​រដ្ឋាភិបាល​ខ្មែរ​ហ្នឹង​​ម៉ោចោទ​ថាសិទ្ធិ​របស់​គាត់ហ្នឹង​ជាសិទ្ធិ​ខុសច្បាប់។ គឺ​រដ្ឋាភិបាល​ទេ​ដែល​ខុសច្បាប់ ដែល​ចាប់គាត់ និង​អ្នកទោសនយោបាយ​ទាំង​ប៉ុន្មាន​យក​ទៅ​ដាក់​គុក»

អ្នកស្រី នីកូល បញ្ជាក់​ថា អ្នកដែល​ចង់​ចុះ​ហត្ថលេខា​លើ​ញត្តិ​នេះ អាច​ជ្រើសរើស​មធ្យោបាយ​៣​ក្នុង​នោះរួមមាន ការប្រើប្រាស់​ដំណភ្ជាប់ (link) ញត្តិ ដែល​ក្រុមអង្គការ​សង្គម​ស៊ីវិល និង​អ្នកការពារសិទ្ធិមនុស្ស​បាន​ផ្ញើ​តៗគ្នា​នៅ​លើបណ្ដាញ​សង្គម និង​តាម​អ៊ីម៉ែល https://docs.google.com/forms/d/e/1FAIpQLSc1SL9DDbGbGvZOkAOtQol7Xacpk9tD2CpgrHvFUDGcItC63A/viewform?fbclid=IwAR0qrShqm7_l8TJCUcf7tws-ycwVSpe4G888HW35PS3ebwBWNj_KzxiGzU4ឬ​ចូលទៅកាន់​ហ្វេសប៊ុក​របស់​អង្គការ​ខ្មែរ-អាមេរិកកាំង ដើម្បី​សិទ្ធិមនុស្ស និង​លទ្ធិប្រជាធិបតេយ្យ ឈ្មោះ​ Cambodian-Americans ( https://www.facebook.com/CambodianAmericansដែល​មាន​បង្ហាញ​តំណភ្ជាប់​ទៅ​ញត្តិ ឬ​ចូលទៅ​កាន់​គេហទំព័រ​របស់ខារ៉ាត (CAHRAD) ដោយផ្ទាល់ ដើម្បី​ចុះ​ហត្ថលេខា​លើញត្តិ​នោះ​ក៏​បាន http://www.cahrad.org/cahrad2016/index.php/home)

អ្នកស្រី អ៊ុង នីកូល បញ្ជាក់​ទៀត​ថា ក្នុង​យុទ្ធនាការ​នេះ​មាន​ញត្តិ​ទាំងអស់​ចំនួន​៣ ដែល​ក្រុម​របស់​អ្នកស្រី គ្រោង​នឹង​ផ្ញើ​ទៅ​ប្រធានាធិបតី​អាមេរិក លោក ចូ បៃឌិន (Joe Biden) និងរដ្ឋបាល​របស់​លោក ព្រឹទ្ធសភា និងសមាជិកសភា​សហរដ្ឋអាមរិក ព្រមទាំង​គណៈកម្មការ​សិទ្ធិមនុស្ស ថមលេនថូស (The Tom Lantos Human Rights Commission) ដើម្បី​សុំ​អន្តរាគមន៍។

កញ្ញា សេង ធារី ជា​ខ្មែរ-អាមរិកកាំង ដែល​ជំនាញ​ច្បាប់ និង​កិច្ចការអន្តរជាតិ​កំពុង​ជាប់​ឃុំ​នៅ​ពន្ធនាគារ​ខេត្តព្រះវិហារ បន្ទាប់​ពី​ចៅក្រម​នៅ​សាលាដំបូង​ក្រុងភ្នំពេញ កាល​ពី​ថ្ងៃទី១៤ ខែមិថុនា បាន​កាត់​ឱ្យ​កញ្ញា​ជាប់​ពន្ធនាគារ​រយៈ៦ឆ្នាំ ដោយ​ចោទ​ប្រកាន់​ពី​បទញុះញង់ និង​រួមគំនិត​ក្បត់ ពាក់ព៏ន្ធ​នឹង​ដំណើរ​វិល​ត្រឡប់​ទៅ​កម្ពុជា​វិញ​របស់ លោក សម រង្ស៊ី កាល​ពី​ខែ​វិច្ឆិកា ឆ្នាំ២០១៩។ ជាមួយគ្នា​នោះ​ក៏​មាន​មេដឹកនាំ និង​សកម្មជន​គណបក្ស​សង្រ្គោះជាតិ​ចំនួន​ជាង​៤០​នាក់​ផ្សេង​ទៀត​ក៏ត្រូវ​តុលាការ​កាត់ទោស​ដាក់​ពន្ធនាគារ​ក្នុង​សំណុំរឿង​ដូចគ្នា​នេះ​ដែរ។

ក្រុមអង្គការ​សង្គម​ស៊ីវិលជាតិ និង​អន្តរជាតិ រួម​ទាំង​អ្នកជំនាញ​អង្គការសហប្រជាតិ​អំពាវនាវ​ឱ្យ​អាជ្ញាធរ​កម្ពុជា​ត្រួត​ពិនិត្យ​ឡើង​វិញ​ជា​បន្ទាន់​ចំពោះ​ដំណើរការ​នីតិវិធី​កាត់ទោស​ក្នុង​សវនាការ​ទ្រង់ទ្រាយ​ធំ​បែប​នេះ។ ពួកគេ​លើកឡើង​ថា​ករណី​នេះ​បង្កើត​ឱ្យ​មាន​គំរូ​នៃ​ការ​ជំនុំជម្រះ​បែប​នយោបាយ និង​បង្ហាញ​ពី​កំហុស​ឆ្គង​របស់​តុលាការ។ ក្រុម​អ្នក​ជំនាញ​ដដែល​ជំរុញ​ឱ្យ​រដ្ឋាភិបាល​កម្ពុជា​ពិនិត្យ និង​កែតម្រូវ​ឡើង​វិញ​ជា​បន្ទាន់​ចំពោះ​ដំណើរការ​ក្ដី​នេះ ដើម្បី​ធានា​នូវ​សិទ្ធិ​ទទួល​បាន​ការជំនុំជម្រះ​ដោយ​យុត្តិធម៌​របស់​ជនជាប់ចោទ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។