មន្ត្រីបក្សប្រឆាំងច្រានចោលការសម្រេចរបស់ គ.ជ.ប ករណីពិន័យអ្នកធ្វើយុទ្ធនាការម្រាមដៃស្អាត
2018.08.08
មន្ត្រីគណបក្សប្រឆាំងខេត្តបាត់ដំបង ច្រានចោលសេចក្ដីសម្រេចរបស់គណៈកម្មការជាតិរៀបចំការបោះឆ្នោត (គ.ជ.ប) ដែលតម្កល់សំណុំរឿងអ្នកធ្វើយុទ្ធនាការម្រាមដៃស្អាតចំនួន ៣រូប ចំណោម ៥រូប ក្នុងនោះមានលោក ជា ជីវ ទុកជាការតាមសេចក្ដីសម្រេចរបស់គណៈកម្មការរៀបចំការបោះឆ្នោតខេត្តបាត់ដំបង និង ២រូបផ្សេងទៀត ពិន័យជាប្រាប់ម្នាក់ ៥លានរៀល។ មន្ត្រីបក្សប្រឆាំងខេត្តបាត់ដំបងចាត់ទុកសេចក្ដីសម្រេចនេះថា ជារឿងអយុត្តិធម៌មិនអាចទទួលយកបាន។
មន្ត្រីគណបក្ស សង្គ្រោះជាតិ ខេត្តបាត់ដំបង ដែលរបបលោក ហ៊ុន សែន រំលាយចោលនោះ បានចាត់ទុកការសម្រេចរបស់ គ.ជ.ប លំអៀងទៅរកគណបក្សកាន់អំណាច ហើយមិនឈរលើគោលការណ៍។
តំណាងអ្នករងបណ្ដឹងទាំងប្រាំរូប លោក សួន ចំរើន ឲ្យដឹងក្រោយបញ្ចប់សវនាការនៅរសៀលថ្ងៃទី៨ សីហាថា អ្នកធ្វើយុទ្ធនាការម្រាមដៃស្អាតទាំង ៥រូប គ្មានកំហុសដូចការចោទប្រកាន់របស់គណៈកម្មការជាតិរៀបចំការបោះឆ្នោតនោះទេ ព្រោះការធ្វើយុទ្ធនាការនេះ ជាសិទ្ធិរបស់ប្រជាពលរដ្ឋដែលមានកំណត់ដោយរដ្ឋធម្មនុញ្ញ៖ «»
ប្រធាន គ.ជ.ប លោក ស៊ិក ប៊ុនហុក បានសម្រេចចោទប្រកាន់អ្នកធ្វើយុទ្ធនាការម្រាមដៃស្អាតនៅខេត្តបាត់ដំបង ចំនួន ៣រូបក្នុងចំនួន ៥រូប ក្នុងនោះលោក ជា ជីវ រក្សាទុកតាមសេចក្ដីសម្រេចរបស់គណៈកម្មការរៀបចំការបោះឆ្នោតខេត្ត ដែលពិន័យជាប្រាក់ ១០លានរៀល។ ចំណែកលោក ថោង សារឿន និងលោក គ្រុយ គឹមសាំង ពិន័យជាប្រាក់ម្នាក់ ៥លានរៀន។ ហើយទម្លាក់ការចោទប្រកាន់ពីរនាក់។
លោក ស៊ិក ប៊ុនហុក អះអាងថា មូលហេតុដែលចោទប្រកាន់ដោយសារយុទ្ធនាការម្រាមដៃស្អាតនេះ បានជះឥទ្ធិពលដល់អ្នកចេញទៅបោះឆ្នោត ធ្វើឲ្យសន្លឹកឆ្នោតមិនបានការរហូតដល់ទៅជាង ៨ភាគរយ៖ «»
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបាត់ដំបង លោក យិន ម៉េងលី លើកឡើងថា ការអនុវត្តច្បាប់ដោយ គ.ជ.ប នេះ មិនត្រឹមត្រូវនោះទេ ព្រោះយុទ្ធនាការម្រាមដៃស្អាតរបស់អ្នកទាំង ៥នាក់ ជាការសម្ដែងមតិ ហើយមិនមែនជាការរារាំងអ្នកបោះឆ្នោតនោះទេ។
លោក យិន ម៉េងលី អះអាងទៀតថា ការចោទប្រកាន់នេះ ដោយ គ.ជ.ប បានអនុវត្តខុសទាំងនីតិវិធីនឹងការបិទសិទ្ធិសេរីភាពរបស់ពួកគាត់ ដូច្នេះ គ.ជ.ប ត្រូវតែទម្លាក់ការចោទប្រកាន់ ទៅលើអ្នកទាំង ៥រូបមិនមែនទម្លាក់ការចោទត្រឹមតែ ២រូបនោះទេ។ «»
គ.ជ.ប បានបើកសវនាការនៅព្រឹកថ្ងៃទី៨ ខែសីហា ជំនុំជម្រះបណ្ដឹងរបស់សមាជិកក្រុមប្រឹក្សាជាប់ឆ្នោតនៃគណបក្ស សង្គ្រោះជាតិ ចំនួន ៥រូប ដែលបានប្ដឹងជំទាស់នឹងសេចក្ដីសម្រេចរបស់គណៈកម្មការ រៀបចំការបោះឆ្នោត (គ.ខ.ប) ខេត្តបាត់ដំបង ដែលបានសម្រេចពិន័យពួកគេម្នាក់១០លានរៀល បន្ទាប់ពីបានបង្ហោះសារតាមបណ្ដាញសង្គមហ្វេសប៊ុក អំពាវនាវកុំអោយពលរដ្ឋទៅបោះឆ្នោត។
អ្នកទាំងប្រាំ ដែលរងការចោទប្រកាន់នោះរួមមាន លោក ជា ជីវ លោក ថោង សារឿន លោក ម៉ាង ឈុន លោក ពៅ តាំង និងលោក គ្រុយ គឹមសាំង។ ពួកគេបានបង្ហោះនៅលើបណ្ដាញសង្គមហ្វេសប៊ុក ដោយមានរូបភាពលើកម្រាមចង្អុលដៃ ជានិមិត្តរូបនៃការធ្វើពហិការមិនទៅបោះឆ្នោតថ្ងៃទី២៩ កក្កដា កន្លងទៅ ដែលមជ្ឈដ្ឋានជាតិ និងអន្តរជាតិចាត់ទុកថា ជាការបោះឆ្នោតក្លែងក្លាយ។
ការបង្ហោះសារអំពាវនាវ កុំអោយពលរដ្ឋទៅបោះឆ្នោត តាមបណ្ដាញសង្គមនៅមុនការបោះឆ្នោតថ្ងៃទី២៩ កក្កដា កន្លងទៅ ត្រូវបានអ្នកច្បាប់ចាត់ទុកថា ជាការអនុវត្តសិទ្ធិបញ្ចេញមតិរបស់ពលរដ្ឋ ដែលមានចែងក្នុងរដ្ឋធម្មនុញ្ញ មិនមានអ្វីខុសច្បាប់នោះទេ។
តំណាងអ្នករងបណ្ដឹងទាំង ៥រូប និងក្រុមមេធាវីការពារក្ដីនឹងបន្តឹងបន្តទៅក្រុមប្រឹក្សាធម្មនុញ្ញ ដើម្បីឲ្យទម្លាក់ចោលការចោទប្រកាន់នេះក្នុងពេលឆាប់ៗ៕