គណបក្សភ្លើងទៀនស្នើរដ្ឋាភិបាល ឱ្យទម្លាក់ចោលការចោទប្រកាន់លើលោក ទាវ វណ្ណុល
2024.07.26
(រូបថតឯកសារ) ខាងឆ្វេង៖ លោក ទាវ វណ្ណុល ប្រធានគណបក្សភ្លើងទៀន និងលោក សុន ឆ័យ អតីតអនុប្រធានគណបក្ស ក្នុងពិធីអបអរសាទរខួប ១៧ឆ្នាំ នៃគណបក្សភ្លើងទៀន កាលពីថ្ងៃទី៩ ខែវិច្ឆិកា ឆ្នាំ២០២២។។
រូបពីពលរដ្ឋ
គណបក្សភ្លើងទៀនស្នើរដ្ឋាភិបាលកម្ពុជា ឱ្យទម្លាក់ចោលការចោទប្រកាន់លើប្រធានគណបក្សភ្លើងទៀន លោក ទាវ វណ្ណុល។ សំណើនេះ ធ្វើឡើងបន្ទាប់ពីសាលាដំបូងរាជធានីភ្នំពេញ សម្រេចឱ្យលោក ទាវ វណ្ណុល សងជំងឺចិត្តដល់រដ្ឋាភិបាលលោក ហ៊ុន ម៉ាណែត ជាដើមបណ្ដឹង ក្នុងបទបរិហារកេរ្តិ៍ជាសាធារណៈចំនួន ៦ពាន់លានរៀល ឬប្រហាក់ប្រហែល ១លាន ៥សែន ដុល្លារអាមេរិក។
សេចក្ដីថ្លែងការណ៍របស់ គណបក្សភ្លើងទៀន កាលពីថ្ងៃទី២៥ ខែកក្កដា បានបង្ហាញការសោកស្ដាយ ចំពោះសាលក្រមសាលាដំបូងរាជធានីភ្នំពេញ ដែលបានសម្រេចផ្ដន្ទាទោស និងទាមទារសំណងពីប្រធានគណបក្សភ្លើងទៀន លោក ទាវ វណ្ណុល ចំនួន ៦ពាន់លានរៀល ឬប្រហែលនឹង ១លាន ៥សែនដុល្លារ តាមពាក្យបណ្ដឹងរបស់រដ្ឋាភិបាល លោក ហ៊ុន ម៉ាណែត។
គណបក្ស ភ្លើងទៀន បានលើកឡើងពីក្ដីបារម្ភ ដោយសារសិទ្ធិសេរីភាព នៃការបញ្ចេញមតិនៅកម្ពុជា ហាក់ត្រូវបានរឹតត្បិត ចំណែកបរិយាកាសនយោបាយ ហាក់រួមតូច សម្រាប់អ្នកនយោបាយ មាននិន្នាការក្រៅរដ្ឋាភិបាល។ គណបក្ស ភ្លើងទៀន ស្នើឱ្យរដ្ឋាភិបាល ពិចារណាឡើងវិញ ដោយទម្លាក់រាល់ការចោទប្រកាន់ផ្ដន្ទាទោសលោក ទាវ វណ្ណុល។
លោក ហ៊ុន ម៉ាណែត ប្ដឹងលោក ទាវ វណ្ណុល បន្ទាប់ពីមេបក្សប្រឆាំងរូបនេះ ផ្ដល់កិច្ចសម្ភាសន៍ជាមួយសារព័ត៌មាន នីកេ អេសៀ (Nikkei Asia) របស់ជប៉ុន និងវិទ្យុបារាំងអន្តរជាតិ (RFI) អំពីការធ្វើទុក្ខបុកម្នេញរបស់បក្សកាន់អំណាចលើបក្សប្រឆាំង និងការធ្លាក់ចុះប្រជាធិបតេយ្យ ក្រោមអំណាចដឹកនាំរបស់លោក ហ៊ុន ម៉ាណែត ក្រោយពីលោកត្រឡប់មកពីបំពេញទស្សនកិច្ចនៅប្រទេសជប៉ុន កាលពីខែកុម្ភៈ។
នៅដំណាលគ្នានេះ គណបក្សឆន្ទៈខ្មែរ ដែលជាគណបក្សក្នុងសមាជិក «សម្ព័ន្ធភាពឆ្ពោះទៅអនាគត» ជាមួយគណបក្សភ្លើងទៀន ក៏បានចេញសេចក្ដីថ្លែងការណ៍ ដែលមានអត្ថន័យ ដូចគ្នានឹងគណបក្សភ្លើងទៀនដែរ។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីសុំការបកស្រាយរឿងនេះបានទេ នៅថ្ងៃទី២៦ ខែកក្កដា។
ការសម្រេចរបស់តុលាការឱ្យលោក ទាវ វណ្ណុល ចាញ់ក្ដី ក្នុងបទបរិហារកេរ្តិ៍ដោយសារបណ្ដឹងរបស់រដ្ឋាភិបាលលោក ហ៊ុន ម៉ាណែត គឺមានលក្ខណៈស្រដៀងគ្នានឹងករណីរបស់អតីតមន្ត្រីគណបក្សភ្លើងទៀន ២រូប គឺអតីតអនុប្រធានគណបក្ស លោក សុន ឆ័យ ត្រូវបានគណបក្សប្រជាជនកម្ពុជារបស់លោក ហ៊ុន សែន ប្ដឹងទាមទារជំងឺចិត្ត ១លានដុល្លារ ក្នុងរឿងបរិហារកេរ្តិ៍ទាក់ទងលទ្ធផលបោះឆ្នោតឆ្នាំ២០២២។ ចំណែកអតីតឧត្ដមទីប្រឹក្សាគណបក្សភ្លើងទៀន គឺលោក គង់ គាំ ក៏ត្រូវគណបក្សកាន់អំណាចប្ដឹងពីបទបរិហារកេរ្តិ៍ ដូចគ្នានេះដែរ កាលពីខែមករា ឆ្នាំ២០២៣ ដោយទាមទារសំណងជំងឺចិត្ត ចំនួន ៥០លានដុល្លារ ហើយធ្ងន់ធ្ងរជាងនេះ លោក គង់ គាំ ត្រូវរដ្ឋាភិបាលរឹបអូសដី និងផ្ទះ ដែលមានតម្លៃមិនតិចជាង ១០លានដុល្លារទៀតផង។
ដោយឡែក កាលពីខែកុម្ភៈ ឆ្នាំ២០២៤ នេះ លោក ហ៊ុន សែន បានប្ដឹងអតីតមន្ត្រីអង្គការសិទ្ធិមនុស្សអាដហុក លោក ស៊ឹង សែនករុណា ម្នាក់ទៀត អំពីបទ “បង្កចលាចល ញុះញង់បង្កើតឱ្យមានការស្អប់ រើសអើង ចំពោះគណបក្សប្រជាជនកម្ពុជា” និងទារសំណងជំងឺចិត្តចំនួន ២ពាន់លានរៀល ឬប្រមាណ ៥០ម៉ឺនដុល្លារ បន្ទាប់ពីសារព័ត៌មាន ឌឹ ខេមបូឌា ដេលី (The Cambodia Daily) ចុះផ្សាយពីសម្រង់សម្ដីរបស់លោក ស៊ឹង សែនករុណា នៅក្នុងរឿង “លោក សុន ឆ័យ គ្រោងលក់ផ្ទះចុងក្រោយរបស់លោក ជាង ១លានដុល្លារ ដើម្បីសងជំងឺចិត្តបក្សកាន់អំណាច”។
ទាក់ទិនរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា យល់ឃើញថា ការប្ដឹងទាមទារសំណង ពីសំណាក់រដ្ឋាភិបាល ទៅលើគណបក្សប្រឆាំង និងសង្គមស៊ីវិល ហាក់មានចំនួនលើសលប់ ពីព្យសនកម្ម ឬការខូចខាត ដែលករណីនេះ ធ្វើឱ្យភាគីចាញ់ក្ដី រងសម្ពាធហិរញ្ញវត្ថុ និងមានការលំបាក សងសំណងទៅឱ្យភាគីឈ្នះក្ដី។ លោក នី សុខា លើកឡើងថា នៅក្នុងសង្គមប្រជាធិបតេយ្យ ការបញ្ចេញមតិរិះគន់ គឺជារឿងធម្មតា ហើយអ្នកនយោបាយ មិនគួរចាប់ទោសអូសដំណើរគ្នាឡើយ។
លោក នី សុខា៖ «ខ្ញុំគិតថា រឿងក្ដីក្ដាំ ដែលវាពាក់ព័ន្ធនឹងអ្នកនយោបាយ ពេលខ្លះគេមិនត្រូវការយកបញ្ហាសំណងហ្នឹងជាចម្បងទេ វាគ្រាន់តែជាការសម្រេចមួយ ក្នុងន័យថា ដើម្បីឱ្យដឹងថា អ្នកណាចាញ់ អ្នកណាឈ្នះ ដើម្បីជាការដាក់ពិន័យ ទៅលើអ្វីដែលមហាជន ជាអ្នកមើលឃើញ។ ប្រសិនបើ ជូនកាលគេអាចទាមទារសំណង ទៅក្នុងកម្រិតមួយតូច ជាថវិកា អ្នកខ្លះគេទារតែមួយដុល្លារផងក៏មានដែរ»។
ទោះជាយ៉ាងណាក៏ដោយចុះ គណបក្សភ្លើងទៀន បានប្រកាសពីការរក្សាគោលជំហរបន្តធ្វើសកម្មភាពនយោបាយរបស់ខ្លួន ដោយបំពេញតួនាទីជាគណបក្សក្រៅរដ្ឋាភិបាលធំជាងគេ ដើម្បីចូលរួមពង្រីកប្រជាធិបតេយ្យ និងការលើកកម្ពស់សិទ្ធិសេរីភាពរបស់ប្រជាពលរដ្ឋ ដោយឈរលើស្មារតីបង្រួបបង្រួម សាមគ្គីភាព និងឯករាជ្យភាព និងកិច្ចព្រមព្រៀងសន្តិភាព ទីក្រុងប៉ារីស២៣ តុលា ឆ្នាំ១៩៩១៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
អត្ថបទពេញនិយម
នយោបាយ
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី
- ពលរដ្ឋខ្មែរប្រកាសនាំគ្នាតវ៉ាប្រឆាំងលោក ហ៊ុន សែន នៅមុខអគាររៀបចំវេទិកាចំណេះដឹងពិភពលោកក្នុងប្រទេសកូរ៉េខាងត្បូង
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
- ពលរដ្ឋខ្មែរនៅកូរ៉េនឹងធ្វើបាតុកម្មប្រឆាំងវត្តមានលោក ហ៊ុន សែន ដែលនឹងចូលរួមវេទិកានៅកូរ៉េ
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»