គណបក្សភ្លើងទៀននឹងប្ដឹងទៅក្រុមប្រឹក្សារដ្ឋធម្មនុញ្ញ ក្រោយពី គ.ជ.ប បដិសេធមិនឱ្យចុះបញ្ជីចូលរួមការបោះឆ្នោត
2023.05.15
មន្ត្រីជាន់ខ្ពស់គណបក្សភ្លើងទៀនសោកស្ដាយ ចំពោះការខិតខំប្រឹងប្រែងរបស់ខ្លួន ដែលទទួលបានលទ្ធផលបរាជ័យក្នុងការស្នើសុំចុះបញ្ជីចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧ នៅខែកក្កដាខាងមុខនេះ ដោយសារត្រូវបដិសេធពីស្ថាប័នគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប។ មន្ត្រីគណបក្សនេះថា គណបក្សរបស់ខ្លួននឹងតស៊ូរហូតដល់ដង្ហើមចុងក្រោយ ដើម្បីសុំចុះឈ្មោះចូលរួមការបោះឆ្នោត ដោយគណបក្សនឹងដាក់ឯកសារប្ដឹងទៅក្រុមប្រឹក្សារដ្ឋធម្មនុញ្ញ។
អ្នកនាំពាក្យគណបក្សភ្លើងទៀនលោក គីមសួរ ភីរិទ្ធ ប្រាប់វិទ្យុអាស៊ីសេរីនៅថ្ងៃទី១៥ ឧសភាថា ថ្នាក់ដឹកនាំគណបក្សនៅសល់ពេល៥ថ្ងៃទៀត ដើម្បីរៀបចំដាក់ឯកសារប្ដឹងទៅក្រុមប្រឹក្សារដ្ឋធម្មនុញ្ញ ពាក់ព័ន្ធនឹងការបដិសេធរបស់ គ.ជ.ប ដែលមិនទទួលស្គាល់ឯកសារសុំចុះបញ្ជីចូលរួមការបោះឆ្នោត។
ទោះជាយ៉ាងណាក៏ដោយ មន្ត្រីគណបក្សប្រឆាំងរូបនេះ ហាក់មិនមានសង្ឃឹមច្រើនក្នុងការស្វែងរកដំណោះស្រាយតាមផ្លូវច្បាប់ឡើយ ព្រោះឯកសារដែលបានដាក់ទៅ គ.ជ.ប ដើម្បីចូលរួមការបោះឆ្នោតជាតិក្នុងឆ្នាំ២០២៣នេះ ជាឯកសារតែមួយដែលគណបក្សធ្លាប់បានដាក់ទៅ គ.ជ.ប ហើយ គ.ជ.ប បានទទួលស្គាល់និងអនុញ្ញាតឱ្យចូលរួមការបោះឆ្នោតជាបន្តបន្ទាប់ ដូចជាការបោះឆ្នោតក្រុមប្រឹក្សាឃុំសង្កាត់ឆ្នាំ២០២២ និងការបោះឆ្នោតក្រុមប្រឹក្សាក្រុងអរិយក្សត្រឆ្នាំ២០២៣ នេះ។
លោក គីមសួរ ភីរិទ្ធ លើកឡើងថា លោកមានសង្ឃឹមច្រើន ប្រសិនបើរឿងនេះ អាចដោះស្រាយតាមផ្លូវនយោបាយ ប៉ុន្តែផ្លូវនេះក៏ហាក់ទៅមិនរួចទៅទៀត បន្ទាប់ពីលោក ហ៊ុន សែន មិនយល់ព្រមជួបក្រុមមេដឹកនាំគណបក្សភ្លើងទៀន នៅមុនការបោះឆ្នោតជ្រើសតាំងតំណាងរាស្ត្រនៅក្នុងខែកក្កដានេះឡើយ។
លោក គីមសួរ ភីរិទ្ធ៖ «នៅស្រុកយើង វាមានការលំបាកតិច ដោយសារហេតុផលខ្លះ ដែលជាហេតុផលនយោបាយ។ ព្រោះតាមផ្លូវច្បាប់ យើងមានលិខិតបញ្ជាក់ពីក្រសួងមហាផ្ទៃអីហ្នឹង វាល្មមគ្រប់គ្រាន់ ថាយើងអាចចូលរួមប្រកួតប្រជែង(ការបោះឆ្នោត)ហើយ ព្រោះយើងធ្លាប់ប្រកួតប្រជែងថ្នាក់ឃុំ ថ្នាក់ស្រុក ថ្នាក់ក្រុងថ្មីៗនេះទៅទៀត។ ហើយនៅពេល(ប្រកួតប្រជែង)ថ្នាក់ជាតិ គេបដិសេធ អាហ្នឹងធ្វើឱ្យយើងពិបាក ពីព្រោះគេទាមទារយកក្រដាស មិនមែនទាមទារយកផ្លូវច្បាប់ ថាយើងបានចុះបញ្ជីគណបក្សនយោបាយត្រឹមត្រូវ តម្កល់នៅក្រសួងមហាផ្ទៃ ដូចក្រសួងមហាផ្ទៃ ចេញលិខិតបញ្ជាក់ឱ្យយើងឯណា។ អាហ្នឹង (សុំដោះស្រាយតាមផ្លូវនយោបាយ) ខាងគណបក្សបានដាក់ពាក្យសុំជួបទៅខាងសម្ដេចនាយករដ្ឋមន្ត្រីដែរ ប៉ុន្តែលោកថា ជួបនៅក្រោយការបោះឆ្នោត អាហ្នឹងវាពិបាក យើងមិនដឹងថាម៉េច»។
ការលើកឡើងពីមន្ត្រីគណបក្សភ្លើងទៀននេះ ធ្វើឡើងបន្ទាប់ពីគណបក្សគណៈកម្មាធិការជាតិរៀបចំការបោះឆ្នោត បានចេញផ្សាយសេចក្ដីសម្រេចនៅរសៀលថ្ងៃទី១៥ ឧសភា បដិសេធមិនទទួលស្គាល់ឯកសារសុំចុះបញ្ជីចូលរួមការបោះឆ្នោតរបស់គណបក្សភ្លើងទៀន។
សេចក្ដីសម្រេចដែលចុះហត្ថលេខាដោយលោក ប្រាជ្ញ ច័ន្ទ ប្រធាន គ.ជ.ប បានបញ្ជាក់ថា អង្គប្រជុំរបស់ គ.ជ.ប កាលពីថ្ងៃទី១៥ ឧសភា បានបដិសេធការចុះបញ្ជីរបស់គណបក្សភ្លើងទៀន ដោយសារមូលហេតុគណបក្សនេះ មិនបានភ្ជាប់ប្រកាសស្ដីពីការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម ដោយរដ្ឋបាលរាជធានី ខេត្ត ក្រុង ស្រុក ខណ្ឌ នៅការិយាល័យច្រកចេញចូលតែមួយ ឱ្យបានត្រឹមត្រូវស្របតាមកថាខណ្ឌទី២ និងចំណុចទី១ ក្នុងមាត្រា២៧ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។
ប៉ុន្តែជាក់ស្ដែង ច្បាប់ស្ដីពីការបោះឆ្នោតជ្រើសតាំងតំណាងរាស្ត្រឆ្នាំ២០១៥ មាត្រា២៧ ត្រង់កថាខណ្ឌទី២ និងចំណុចទី១ ដែល គ.ជ.ប លើកយកមកអះអាងនេះ ពុំបានតម្រូវឱ្យគណបក្សនយោបាយយកសេចក្ដីចម្លងលិខិតបញ្ជាក់ការចុះបញ្ជីគណបក្សនៅក្រសួងមហាផ្ទៃ ទៅបញ្ជាក់នីត្យានុកូលកម្មដោយរដ្ឋបាលធានី ខេត្ត ក្រុង ស្រុក ខណ្ឌឡើយ។
អ្នកច្បាប់ និងអ្នកជំនាញការបោះឆ្នោត យល់ឃើញថា ការបង្កបញ្ហាស្មុគស្មាញមិនឱ្យគណបក្សភ្លើងទៀន ចុះឈ្មោះចូលរួមការបោះឆ្នោតនៅពេលនេះ ហាក់ជារឿងនយោបាយច្រើនជាង ពីព្រោះគណបក្សនេះ បានក្លាយជាគណបក្សប្រឆាំងដ៏ធំ ដែលបង្កការព្រួយបារម្ភដល់គណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។