បក្ស​ប្រឆាំង​កំពុង​ពន្លឿន​ការ​ដក​រូប​លោក សម រង្ស៊ី និង​លោក កឹម សុខា ចេញ​ពី​ស្លាក​សញ្ញា​បក្ស

ដោយ ប្រាជ្ញ ចេវ
2017-07-29
អ៊ីម៉ែល
មតិ
Share
បោះពុម្ព
លោក សម រង្ស៊ី (ស្ដាំ) និង​លោក កឹម សុខា ចាប់​ដៃ​គ្នា​នៅ​​ក្នុង​វេទិកា​ជួប​ជាមួយ​ប្រជាពលរដ្ឋ នា​សង្កាត់​ព្រែកលៀប ខណ្ឌ​ជ្រោយចង្វារ កាល​ពី​​ថ្ងៃ​ទី​១៨ មករា ២០១៥។ RFA/Morm Moniroth
លោក សម រង្ស៊ី (ស្ដាំ) និង​លោក កឹម សុខា ចាប់​ដៃ​គ្នា​នៅ​​ក្នុង​វេទិកា​ជួប​ជាមួយ​ប្រជាពលរដ្ឋ នា​សង្កាត់​ព្រែកលៀប ខណ្ឌ​ជ្រោយចង្វារ កាល​ពី​​ថ្ងៃ​ទី​១៨ មករា ២០១៥។ RFA/Morm Moniroth
RFA/Morm Moniroth

ខណៈ​ច្បាប់​ស្ដីពី​គណបក្ស​នយោបាយ​ថ្មី​បាន​ចូល​ជា​ធរមាន​ភ្លាមៗ ក្រោយ​ប្រមុខ​រដ្ឋ​ស្ដីទី​ចុះ​ហត្ថលេខា​នោះ នៅ​ពេល​នេះ​គណបក្ស​ប្រឆាំង​ដែល​រងគ្រោះ​ព្រោះ​ច្បាប់​ថ្មី​នេះ កំពុង​ប្រឹងប្រែង​ពន្លឿន​ដក​រូប​លោក សម រង្ស៊ី កាន់​ដៃ​លោក កឹម សុខា ចេញ​ពី​ស្លាក​គណបក្ស​នៅ​ទូទាំង​ប្រទេស​ឲ្យ​អស់​ត្រឹម​ចុង​ខែ​សីហា ខាង​មុខ។

​​បើ​ទោះ​ជា​ច្បាប់​គណបក្ស​នយោបាយ​ថ្មី​ចូល​ជា​ធរមាន​នៅ​ពេល​នេះ​ហើយ​ក្ដី ប៉ុន្តែ​ច្បាប់​នេះ​មិន​ទាន់​ដាក់​ទោស​លើ​គណបក្ស​នយោបាយ​ដែល​ជាប់​ពាក់ព័ន្ធ​នឹង​ទណ្ឌិត​ភ្លាមៗ​នោះ​ទេ។ ច្បាប់​នេះ​ទុក​រយៈពេល​ឲ្យ​គណបក្ស​នយោបាយ ៩០​ថ្ងៃ ក្រោយ​ចូល​ជា​ធរមាន ដើម្បី​កាត់​ផ្ដាច់​ទំនាក់ទំនង​ចេញ​ពី​ទណ្ឌិត។

​ទាក់ទង​ករណី​នេះ តំណាងរាស្ត្រ និង​ជា​សមាជិក​គណៈកម្មការ​អចិន្ត្រៃយ៍​នៃ​គណបក្ស​សង្គ្រោះ​ជាតិ លោ គីមសួរ ភីរិទ្ធ ឲ្យ​អាស៊ីសេរី ដឹង​នៅ​ថ្ងៃ​ទី​២៩ ខែ​កក្កដា ថា គណបក្ស​ត្រូវ​ការ​រយៈពេល​ប្រមាណ​មួយ​ខែ​ទៀត​ដើម្បី​ដក​រូប​លោក សម រង្ស៊ី និង​រូប លោក កឹម ផង​នោះ ចេញ​ពី​ស្លាក​គណបក្ស។ រី​ឯ​ការ​ចំណាយ​ថវិកា លោក​គ្រាន់​តែ​បញ្ជាក់​ថា ផ្ទាំង​ស្លាក​សញ្ញា​ថ្មី​ដែល​ត្រូវ​ធ្វើ គឺ​ចំណាយ​ប្រាក់​ពីរ​ដុល្លារ​ក្នុង​មួយ​ម៉ែត្រការ៉េ«ចុង​ខែ​សីហា យើង​កំណត់​ថា​ឲ្យ​ផុត​ខែ​ប្រាំបី ត្រូវ​ប្ដូរ​ស្លាក​សញ្ញា​ឲ្យ​ហើយ ព្រោះ​យើង​មាន​រយៈពេល ៩០​ថ្ងៃ​ណា​ក្រោយ​ច្បាប់​ចូល​ជា​ធរមាន»

​ស្រប​ពេល​ព្រះមហាក្សត្រ​មិន​គង់​ក្នុង​ប្រទេស អនុ​ប្រធាន​គណបក្ស​ប្រជាជន​កម្ពុជា លោក សាយ ឈុំ និង​ជា​ប្រធាន​ព្រឹទ្ធ​សភា សម្រេច​ចុះ​ហត្ថលេខា​ប្រកាស​ឲ្យ​ប្រើ​ច្បាប់​ស្ដីពី​វិសោធនកម្ម​ច្បាប់​ស្ដីពី​គណបក្ស​នយោបាយ ក្នុង​នាម​លោក​ជា​ប្រមុខ​រដ្ឋ​ស្ដីទី។ ការ​សម្រេច​នេះ ត្រឹម​រយៈពេល​មួយ​ខែ​ប៉ុណ្ណោះ ក្រោយ​លោក​នាយករដ្ឋមន្ត្រី ហ៊ុន សែន និង​ប្រធាន​គណបក្ស​ប្រជាជន​កម្ពុជា ទាមទារ​កែ​ច្បាប់​ជា​លើក​ទី​២ កាល​ពី​ថ្ងៃ​ទី​២៨ ខែ​មិថុនា។ គណបក្ស​ប្រឆាំង​សម្រេច​ដក​រូប​លោក សម រង្ស៊ី និង​រូប​លោក កឹម សុខា ចាប់​ដៃ​គ្នា​ពី​រូប​គណបក្ស​ដោយ​ទុក​ត្រឹម​រូប​សញ្ញា​ព្រះអាទិត្យ។

​អ្នក​នាំពាក្យ​គណបក្ស​ប្រជាជន​កម្ពុជា លោក សុខ ឥសាន ថា ច្បាប់​នេះ​មិន​មែន​ធ្វើ​ឡើង​ដើម្បី​បំពេញ​ចិត្ត​អ្នក​រិះគន់​ទេ។  លោក​បន្ត​ទៀត​ថា ការ​កែ​ច្បាប់​នេះ​មិន​មែន​តាម​ការ​ចង់​បាន​របស់​លោក ហ៊ុន សែន ទេ ប៉ុន្តែ​ដើម្បី​បម្រើ​ប្រយោជន៍​ជាតិ និង​ប្រជាជន«អត់​មាន​តម្រូវ​ចិត្ត​អី​ទេ សុំ​ជម្រាប​ជូន​ថា សម្ដេច​នាយក​រដ្ឋមន្ត្រី​ក្នុង​នាម​ជា​នាយក​រដ្ឋមន្ត្រី​ដែល​មាន​ចែង​នៅ​ក្នុង​រដ្ឋធម្មនុញ្ញ ព្រះមហាក្សត្រ ប្រធាន​រដ្ឋសភា នាយក​រដ្ឋមន្ត្រី​មាន​សិទ្ធិ​ផ្ដួចផ្ដើម​គំនិត​ធ្វើ​ច្បាប់ និង​វិសោធនកម្ម​ច្បាប់»

​ប៉ុន្តែ​តំណាងរាស្ត្រ​គណបក្ស​សង្គ្រោះ​ជាតិ លោ គីមសួរ ភីរិទ្ធ យល់​ថា អ្វី​ដែល​គណបក្ស​កាន់​អំណាច​ត្រូវ​ដោះស្រាយ​ចំពោះ​មុខ គឺ​ដោះស្រាយ​បញ្ហា​ធ្លាក់​ថ្លៃ​កសិផល​របស់​កសិករ និង​បញ្ហា​គ្រោះ​ទឹកជំនន់​ដែល​កំពុង​ធ្វើ​ឲ្យ​លិចលង់​លំនៅឋាន និង​អាយុ​ជីវិត​របស់​ពលរដ្ឋ។ រី​ឯ​អ្នក​ពាក្យ​ពាក្យ​គណបក្ស​កាន់​អំណាច​ឆ្លើយ​តប​វិញ​ថា រដ្ឋាភិបាល​បាន​ធ្វើ​រឿង​នេះ​ហើយ ប៉ុន្តែ​មិន​ទាន់​ឃើញ​បក្ស​ប្រឆាំង​​ចុះ​ជួយ​ពលរដ្ឋ​នៅ​ឡើយ​ទេ។

​អ្នក​វិភាគ​នយោបាយ លោក សូ ចន្ថា  និយាយ​ថា ច្បាប់​នេះ​នឹង​ធ្វើ​ឲ្យ​គណបក្ស​ចុះ​ខ្សោយ​តា​រយៈ​ការ​កាត់​ផ្ដាច់​ទំនាក់ទំនង​លោក សម រង្ស៊ី ចេញ​ពី​គណបក្ស«ចំណុច​ទាំងអស់​ហើយ​ដែល​ជា​ការ​កាត់​បន្ថយ​នូវ​លំហ​សេរីភាព​បក្ស​ប្រឆាំង​ក្នុង​ការ​ប្រកួត​ប្រជែង​នៅ​កម្ពុជា»

​ទាក់ទង​រឿង​ទំនាក់​របស់​មន្ត្រី​គណបក្ស​សង្គ្រោះ​ជាតិ ជាមួយ​ទណ្ឌិត​ដែល​ជា​ទំនាក់ទំនង​បុគ្គល​នោះ តំណាងរាស្ត្រ​គណបក្ស​សង្គ្រោះ​ជាតិ លោ គីមសួរ ភីរិទ្ធ សង្កេត​ឃើញ​ថា ច្បាប់​នេះ​មិន​បាន​ចែង​ឲ្យ​ច្បាស់លាស់​សោះ​ពី​ទំនាក់ទំនង​បុគ្គល​ដែល​ជា​សមាជិក​គណបក្ស​នយោបាយ​ជាមួយ​ទណ្ឌិត។ លោក​ថា ក្រៅ​ពី​ផែនការ​ដក​រូបថត គណបក្ស​កំពុង​ពិភាក្សា​ជាមួយ​ក្រុម​មេធាវី ដើម្បី​សិក្សា​ថា តើ​គណបក្ស​គួរ​មាន​ទំនាក់​ទំនង​ត្រឹម​ណា​ជាមួយ​ទណ្ឌិត ខណៈ​មន្ត្រី​ជាន់​ខ្ពស់​គណបក្ស​សង្គ្រោះ​ជាតិ មួយ​ចំនួន​កំពុង​ជាប់​ឃុំ និង​មាន​ឈ្មោះ​ជា​ទណ្ឌិត ហើយ​អ្នក​ដឹក​នាំ​គណបក្ស គឺ​ត្រូវ​ទៅ​សួរ​សុខ​ទុក្ខ​ដល់​មន្ទីរឃុំឃាំង«យើង​កំពុង​ពិនិត្យ​មើល​បញ្ហា​មួយ​ចំនួន​នៃ​ការ​ធ្វើ​ទំនាក់ទំនង​ច្បាប់​នេះ ជះ​ឥទ្ធិពល​យើង​ក្នុង​ការ​សួរ​សុខ​ទុក្ខ​អ្នក​ដែល​ជាប់​ឃុំ​ព្រោះ​ការ​ចោទ»

​ច្បាប់​ស្ដីពី​គណបក្ស​នយោបាយ​ថ្មី​នេះ ហាម​គ្រប់​គណបក្ស​នយោបាយ​មិន​ត្រូវ​ប្រើប្រាស់​សារ​ជា​សំឡេង រូបភាព ឯកសារ​ជា​លាយលក្ខណ៍អក្សរ ឬ​សកម្មភាព​របស់​ទណ្ឌិត​ជាប់ទោស​ពី​បទ​ឧក្រិដ្ឋ ឬ​ពី​បទ​មជ្ឈិម ដើម្បី​ជា​ផលប្រយោជន៍​នយោបាយ​សម្រាប់​គណបក្ស​របស់​ខ្លួន។

​ចំពោះ​គណបក្ស​​ណា​ដែល​ហ៊ាន​បំពាន ប្រព្រឹត្ត​ផ្ទុយ​ពី​ច្បាប់​នេះ គឺ​តុលាការ​អាច​សម្រេច​ផ្អាក​សកម្មភាព​នយោបាយ​រយៈពេល ៥​ឆ្នាំ ឬ​អាច​រំលាយ​គណបក្ស​នោះ​ចោល​តែម្ដង។ ច្បាប់​នេះ ក្រៅ​ពី​គណបក្ស​ប្រឆាំង​រិះគន់ ក៏​រង​ការ​រិះគន់​ពី​សង្គម​ស៊ីវិល​ជាតិ និង​អន្តរជាតិ ថា​ផ្ទុយ​ទៅ​នឹង​រដ្ឋធម្មនុញ្ញ ខណៈ​ច្បាប់​កំពូល​មួយ​នេះ ថា​ពលរដ្ឋ​ទាំង​អស់​មាន​ចូលរួម​ក្នុង​កិច្ចការ​នយោបាយ។

​នាយក​ប្រតិបត្តិ​ទទួល​បន្ទុក​កិច្ចការ​តំបន់​អាស៊ី​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) អំពាវនាវ​ឲ្យ​សមាជិក​ទាំង​អស់​នៃ​ក្រុមប្រឹក្សា​ធម្មនុញ្ញ មាន​ភាព​ក្លាហាន​ហ៊ាន​ចុះ​ចេញ​ពី​តំណែង​ជា​បន្ទាន់ ព្រោះ​អ្នក​ទាំង​នោះ​មិន​បាន​បំពេញ​ការងារ​របស់​ខ្លួន​ជា​អ្នក​ការពារ​កុំ​ឲ្យ​មាន​ការ​រំលោភ​រដ្ឋធម្មនុញ្ញ។ លោក​ថា គ្មាន​ប្រទេស​ប្រជាធិបតេយ្យ​ណា​គេ​ហាមឃាត់​មេដឹកនាំ​គណបក្ស​ប្រឆាំង មិន​ឲ្យ​ចូល​រួម​ក្នុង​ជីវិត​នយោបាយ​នោះ​ឡើយ។

​លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ កំពុង​ជាប់​ទោស​មាន​ឈ្មោះ​ជា​ទណ្ឌិត ព្រោះ​តុលាការ​ក្រុង​ភ្នំពេញ ចោទ​ប្រកាន់​​ជា​ច្រើន​ករណី។ លោក សម រង្ស៊ី បាន​បង្ហោះ​រូប​លោក​ជាមួយ​លោក ហ៊ុន សែន លោក ស ខេង និង​លោក សាយ ឈុំ ដោយ​អត្ថាធិប្បាយ​បែប​ឌឺ​ដង​ថា "ចាប់​ពី​សប្ដាហ៍​ក្រោយ​ទៅ ដោយសារ​តែ​ច្បាប់​ចេញ​ថ្មី នរណា​ហ៊ាន​បង្ហាញ​រូប​ខ្ញុំ​ជាមួយ​លោក កឹម សុខា នឹង​មាន​ទោស។ តែ​បើ​បង្ហាញ​រូប​ខ្ញុំ​ជាមួយ​ជន ៣​នាក់ (សូម​ទោស​សម្ដេច ៣​អង្គ នៅ​ខាង​ឆ្វេង​រូបថត​នេះ) តើ​នឹង​មាន​ទោស​ដែរ ឬ​ទេ?"៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

HS closer to the dead end tunnel

Tell Hun Sen must remove its posters on the billboard like u or face criminal charge in near future and millions khmer people will judge him and execution in 2018"fair play/no threatening to other"the whole world watching u.

Jul 31, 2017 04:17 AM

Thida

ពី Takeo

Let me ask the law makers one question.
Does this law represent the interest of Khmer citizens? if yes answer, these law makers are people representatives and the world leaders will cooperate with them.
If no answer, these law makers are not people representatives and world leaders will not cooperate with them and they must resign immediately before this law held them accountable for many reasons.

Jul 29, 2017 05:59 PM

Mr.Mirror

ពី PP

No matter what CNRP tries to comply to CPP's law, it will be endless for CNRP to get away from CPP's law of traps. Traps after traps, and these traps are so obvious in the eyes of world community. The law of harassment or persecution targeting CNRP which represents the Cambodian people make no difference of holding Cambodian people hostages.The question is how can CPP become legitimate for doing this?

Jul 29, 2017 05:34 PM

គេហទំព័រ​ទាំងមូល