គណបក្សសង្គ្រោះជាតិបដិសេធព័ត៌មានបែកបាក់ផ្ទៃក្នុងនិងរឿងពុករលួយ
2014.12.28
លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិ ជួបជាមួយអ្នកគាំទ្រប្រមាណ ២ម៉ឺននាក់ នៅទីលានប្រជាធិបតេយ្យ រាជធានីភ្នំពេញ កាលពីរសៀលថ្ងៃទី២៦ ខែសីហា ឆ្នាំ២០១៣។
គណបក្សសង្គ្រោះជាតិ បដិសេធចំពោះព័ត៌មានបែកបាក់ផ្ទៃក្នុងបក្ស និងអំពើពុករលួយដែលទម្លាយដល់អ្នកកាសែតដោយអ្នកស្រី ឡាក់ សុភាព សមាជិកគណៈកម្មាធិការវិន័យនៃគណបក្សនេះ។ មន្ត្រីគណបក្សសង្គ្រោះជាតិចាត់ទុកជារឿងគួរឱ្យអស់សំណើច។
ការបដិសេធរបស់គណបក្សសង្គ្រោះជាតិនេះ គឺបន្ទាប់ពីមានបណ្ដាញព័ត៌មានមួយចំនួនចុះផ្សាយប្រសាសន៍របស់អ្នកស្រី ឡាក់ សុភាព ជាសមាជិកគណៈកម្មាធិការវិន័យនៃគណបក្សសង្គ្រោះជាតិ និងជាជំនួយការលោក កឹម សុខា អនុប្រធានគណបក្ស ថា ថ្នាក់ដឹកនាំបក្សនេះកំពុងបែកបាក់ផ្ទៃក្នុង និងមានអំពើពុករលួយកិបកេងលុយរាប់លានដុល្លារ។
ប្រធានគណៈកម្មាធិការវិន័យនៃគណបក្សសង្គ្រោះជាតិ លោក អ៊ូ ច័ន្ទឫទ្ធិ មានប្រសាសន៍ថា បញ្ហាលើកឡើងដោយអ្នកស្រី ឡាក់ សុភាព គឺខុសការពិត និងហួសចិត្ត៖ «យើងមានការភ្ញាក់ផ្អើល ព្រោះយើងមិនមានការចាប់អារម្មណ៍ថា យើងមានការបែកបាក់គ្នាទេ។ យើងមានការរួបរួមគ្នា ដូចជាមិនមានបញ្ហាផ្ទៃក្នុង ហើយទីពីររឿងពុករលួយ ដែលគាត់លើកឡើងហ្នឹង គឺជារឿងមួយដែលយើងភ្ញាក់ផ្អើល។ យើងមិននឹកឃើញថា គាត់លើកឡើងវាហួសហេតុពេក។ ខុសពីការពិត ហើយគ្មានអីច្បាស់លាស់ ដែលគាត់លើកឡើងរបៀបនេះ។ យើងមានការភ្ញាក់ផ្អើល ហើយយើងក៏មិនឱ្យសមាជិកណាម្នាក់មកនិយាយប៉ះពាល់ថ្នាក់ដឹកនាំ ឬគណបក្ស ប៉ះពាល់កិត្តិយសបែបនេះទេ»។
អ្នកស្រី ឡាក់ សុភាព ត្រូវបានបណ្ដាញសារព័ត៌មានស្រង់សម្ដីចុះផ្សាយពេលដែលអ្នកស្រីមានប្រសាសន៍ពីការបែកបាក់ផ្ទៃក្នុង និងអំពើពុករលួយរបស់ថ្នាក់ដឹកនាំគណបក្សសង្គ្រោះជាតិទាំងពីរ។ អ្នកស្រីបន្តថា ទាំងនៅក្នុងប្រទេស និងក្រៅប្រទេសសមាជិកគណបក្សក៏មិនសូវស៊ីសង្វាក់គ្នាដែរ ជាពិសេស ការបែងចែកអំណាច ការរើសអើងរវាងអ្នកជាប់ឆ្នោត និងអ្នកមិនជាប់ឆ្នោត។ អ្នកស្រីយល់ថាបញ្ហានេះ គឺជាការផុយស្រួយ និងបែកបាក់នៃគណបក្សសង្គ្រោះជាតិ។
ស្របពេលដែលមានព័ត៌មានអំពីការបែកបាក់ និងពុករលួយនេះ នៅទី២៧ ធ្នូ មានលិខិតនៃសេចក្ដីថ្លែងការណ៍ ដែលប្រើរូបសញ្ញា និងត្រារបស់គណបក្សសង្គ្រោះជាតិមួយច្បាប់ បានចាត់ទុកការនិយាយរបស់អ្នកស្រី ឡាក់ សុភាព ជាមួយព័ត៌មានបែបនេះ គឺជាចេតនាបំបែកបំបាក់សាមគ្គីភាពផ្ទៃក្នុងបក្សប៉ុណ្ណោះ ហើយផ្ទុយទៅវិញ គឺអ្នកស្រី ឡាក់ សុភាព ទេ ដែលជាបុគ្គលបង្កើតឱ្យមានបក្សពួករបស់ខ្លួននៅក្នុងគណៈកម្មាធិការនាយក ដោយបែងចែកក្រុម និងមូលនិធិខាងអនុប្រធានបក្សដាច់ដោយឡែក និងបង្កើតអំពើពុករលួយក្នុងក្រុមរបស់ខ្លួន ដោយមូលនិធិដែលប្រមូលបានពីក្រៅប្រទេស មិនបានយកមកដាក់បញ្ចូលក្នុងមូលនិធិរបស់គណបក្សឡើយ។
លិខិតនោះបន្តថា គណបក្សសង្គ្រោះជាតិ អំពាវនាវឱ្យអ្នកស្រី ឡាក់ សុភាព ឈប់និយាយផ្ដេសផ្ដាសរបៀបនេះបន្តទៀត។ បើពុំដូច្នេះទេ អ្នកស្រីនឹងប្រឈមមុខចំពោះគណៈកម្មាធិការវិន័យរបស់គណបក្សសង្គ្រោះជាតិជាមិនខាន។
ទាក់ទងនឹងសេចក្ដីថ្លែងការណ៍នេះ លោក អ៊ូ ច័ន្ទឫទ្ធិ ប្រធានគណៈកម្មាធិការវិន័យ នៃគណបក្សសង្គ្រោះជាតិ មានប្រសាសន៍ថា មិនមែនជាសេចក្ដីថ្លែងការណ៍របស់គណបក្សសង្គ្រោះជាតិទេ ហើយលោកហៅសេចក្ដីថ្លែងការណ៍នោះថា ជាការក្លែងក្លាយ ដែលមិនអាចទទួលយកបានទេ។
លោកថា រហូតមកដល់ពេលនេះ ខាងគណបក្សសង្គ្រោះជាតិមិនទាន់បានចេញលិខិតផ្លូវការណាមួយនៅឡើយទេ ទាក់ទងនឹងបញ្ហានេះ។ ក៏ប៉ុន្តែ លោកឱ្យដឹងទៀតថា គណៈកម្មាធិការវិន័យ នៃគណបក្សសង្គ្រោះជាតិបានជួបពិភាក្សាគ្នាអំពីបញ្ហានេះ នៅល្ងាចថ្ងៃទី២៨ ធ្នូ៖ «យើងអត់មានចេញសេចក្ដីថ្លែងការណ៍អីទេ ប៉ុន្តែគណៈកម្មាធិការវិន័យនៃគណបក្សសង្គ្រោះជាតិហ្នឹង រៀបចំដើម្បីអញ្ជើញគាត់មកបំភ្លឺជាផ្លូវការជាមួយគណៈកម្មាធិការវិន័យ នូវអ្វីដែលបានថ្លែងទៅកាន់អ្នកសារព័ត៌មាន ក៏ដូចជាសាធារណជន ទាក់ទងទៅនឹងអ្វីដែលគាត់ចោទប្រកាន់ថា មានការបែកបាក់ផ្ទៃក្នុង មានអំពើរលួយជាដើម ហើយយើងនឹងអញ្ជើញគាត់មកបំភ្លឺ គណៈកម្មាធិការវិន័យក្នុងពេលឆាប់ៗនេះ»។
វិទ្យុអាស៊ីសេរី មិនអាចទាក់ទងអ្នកស្រី ឡាក់ សុភាព ដើម្បីថ្លែងទាក់ទងនឹងបញ្ហានេះបានទេ ចាប់តាំងពីថ្ងៃទី២៧ ធ្នូ មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន