បក្សប្រឆាំងបង្កើតគណៈកម្មាធិការព្រំដែននិងអន្តោប្រវេសន៍ ខណៈព្រំដែនកម្ពុជារងការយាយីពីវៀតណាមជាថ្មី
2020.07.13
លោក សម រង្ស៊ី ប្រធានស្ដីទីគណបក្សសង្គ្រោះជាតិ បានបង្កើត គណៈកម្មាធិការព្រំដែន និងអន្តោប្រវេសន៍ ខណៈព្រំដែនកម្ពុជារងការយាយីពីវៀតណាមជាថ្មី។ អ្នកនាំពាក្យគណបក្សកាន់អំណាចចោទប្រកាន់ថា គណៈកម្មាធិការនេះជាក្រុមខុសច្បាប់ និងថាគ្មានប្រទេសណាធ្វើការងារជាមួយឡើយ។
លោក សម រង្ស៊ី បានសម្រេចតែងតាំង តំណាងរាស្ត្រគណបក្សគណបក្សសង្គ្រោះជាតិដែលធ្លាប់ចេញមុខធ្វើរឿងព្រំដែនគឺលោក អ៊ុំ សំអាន ជាប្រធាន អ្នកជំនាញកិច្ចការព្រំដែនផ្សេងទៀត និងមន្ត្រីជាន់ខ្ពស់នៃគណបក្សសង្គ្រោះជាតិមួយចំនួន ជាអនុប្រធាន សមាជិក និងជាទីប្រឹក្សា។
ប្រធាន គណៈកម្មាធិការកិច្ចការព្រំដែននិងអន្តោប្រវេសន៍ លោក អ៊ុំ សំអាន ឱ្យអាស៊ីសេរីដឹងថ្ងៃទី១៣ ខែកក្កដា ថា ការបង្កើតគណៈកម្មការនេះគឺដោយលោកសង្កេតឃើញថា រដ្ឋាភិបាលលោក ហ៊ុន សែន នៅតែអសមត្ថភាពក្នុងការដោះស្រាយបញ្ហាព្រំដែននិងបញ្ហាអន្តោប្រវេសន៍។ តំណាងរាស្ត្រគណបក្សសង្គ្រោះជាតិដែលកំពុងរស់នៅក្រៅប្រទេសរូបនេះឱ្យដឹងទៀតថា កិច្ចការដំបូងដែលចាប់ផ្ដើមធ្វើ គឺបញ្ហាវៀតណាមបោះតង់នៅកម្ពុជា ហើយលោកក៏គ្រោងសរសេរលិខិតទៅនាយករដ្ឋមន្ត្រីវៀតណាម ឱ្យរើតង់ចេញពីកម្ពុជានិងទាមទារកោះត្រល់ និងកោះក្រចកសេះមកវិញ ជាដើម៖ «ដំបូងនេះគឺសិក្សាស្រាវជ្រាវកិច្ចការព្រំដែនដើម្បីរកឱ្យឃើញថា ចំណុចណាដែលរដ្ឋាភិបាលធ្វើទៅមានចន្លោះប្រហោងដែលធ្វើឱ្យបាត់បង់ទឹកដីកម្ពុជា ទៅប្រទេសជិតខាងជាពិសេសប្រទេសវៀតណាម»។
អ្នកវិភាគនយោបាយ និងសង្គមដែលហ៊ានរិះគន់លោក ហ៊ុន សែន ឥតសំចៃមាត់ និងកំពុងនិរទេសខ្លួននៅក្រៅប្រទេស លោក គឹម សុខ យល់ថា គណៈកម្មាធិការកិច្ចការព្រំដែននិងអន្តោប្រវេសន៍ អាចពិបាកនឹងទទួលបានលទ្ធផលធំ ខណៈក្រុមការងារនេះភាគច្រើននៅក្រៅប្រទេស។ អ្នកវិភាគរូបនេះចង់ឃើញថា គណបក្សសង្គ្រោះជាតិបង្កើតក្រុមការងារណាមួយ ឬគណៈកម្មាធិការអ្វីមួយ គួរមានការឯកភាពផ្ទៃក្នុងបក្សជាមុនសិន ដោយលោកសង្កេតឃើញថា មានមន្ត្រីគណបក្សនេះមួយចំនួនប្រកាសមិនទទួលស្គាល់ គណៈកម្មាធិការកិច្ចព្រំដែននិងអន្តោប្រវេសន៍នេះឡើយ៖ «ធ្វើបានទូលំទូលាយទៅទៀត លុះត្រាតែផ្ទៃក្នុងគណបក្សសង្គ្រោះជាតិធ្វើការស្រុះស្រួលស្របមតិគ្នាដាក់ជាយុទ្ធសាស្ត្រក្នុងការស្រាវជ្រាវនិងផ្សព្វផ្សាយ ហើយបើនិយាយពីប្រសិទ្ធភាពក្នុងការកៀបឱ្យរដ្ឋាភិបាលលោក ហ៊ុន សែន ប្រយ័ត្នប្រយែងក្នុងការដោះស្រាយបញ្ហាព្រំដែន និងអន្តោប្រវេសន៍នោះដូចជាមានប្រសិទ្ធភាពតិចតួច»។
ជុំវិញគណបក្សសង្គ្រោះជាតិ បង្កើតគណៈកម្មាធិការកិច្ចការព្រំដែន និងអន្តោប្រវេសន៍នេះ អាស៊ីសេរីមិនអាចសុំការអត្ថាធិប្បាយពីអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី១៣ ខែកក្កដា ។ ចំណែក ប្រធានគណៈកម្មាធិការចម្រុះកិច្ចការព្រំដែនកម្ពុជា លោក វ៉ា គឹមហុង ក៏មិនអាចសុំការបំភ្លឺបានដែរដោយលោកប្រាប់ថា ជាប់ប្រជុំ។
រីឯអ្នកនាំពាក្យគណបក្សប្រជាជនកម្ពុជា លោក សុខ ឥសាន ចោទប្រកាន់ថា គណៈកម្មាធិការរបស់គណបក្សសង្គ្រោះជាតិនេះគឺជាក្រុមខុសច្បាប់ ព្រោះបង្កើតដោយក្រុមមនុស្សខុសច្បាប់។ លោកបន្តថា គណៈកម្មាធិការនេះនឹងគ្មានប្រទេសណាធ្វើការជាមួយឡើយ ព្រោះកិច្ចការព្រំដែននិងរឿងអន្តោប្រវេសន៍គឺរដ្ឋាភិបាលកម្ពុជាមានស្ថាប័នដឹកនាំត្រឹមត្រូវនិងកំពុងធ្វើការងារជាមួយប្រទេសជិតខាង និងបណ្ដាប្រទេសផ្សេងទៀត៖ «អត់មានប្រសិទ្ធភាពអីដល់ក្នុងស្រុកទេ សួរថាប្រទេសណាគេសហការធ្វើជាមួយគណៈកម្មាធិការខុសច្បាប់ហ្នឹង អត់ទេ! ព្រោះប្រទេសនិងប្រទេសគេទទួលស្គាល់គ្នាទៅវិញទៅមករវាងរដ្ឋាភិបាល និងរដ្ឋាភិបាល អ៊ីចឹងទេគណៈកម្មាធិការព្រំដែនក្រុមឧទ្ទាមក្រៅច្បាប់ជាក្រុមព្រំដែនខុសច្បាប់ទេ»។
រដ្ឋាភិបាលលោក ហ៊ុន សែន តែងរងការរិះគន់ថា បណ្ដែតបណ្ដោយឱ្យជនជាតិវៀតណាម ចូលមករស់នៅក្នុងប្រទេសកម្ពុជាយ៉ាងច្រើន ដោយមិនបានអនុវត្តន៍តាមច្បាប់អន្តោប្រវេសន៍។ លើសពីនេះ ខណៈមានការផ្ទុះឡើងនៃករណីជំងឺកូវីដ-១៩ (Covid-19) កាលពីខែមីនាមក ប្រទេសវៀតណាម បានចាប់ផ្ដើមចូលមកបោះតង់ដោយឯកតោភាគីចំនួន២៥៦កន្លែង នៅតាមព្រំដែន ។ ក្រៅពីនេះពលរដ្ឋរស់នៅតាមព្រំដែនក្នុងខេត្តត្បូងឃ្មុំចោទប្រកាន់ថា ទាហានវៀតណាមប្រដាប់ដោយអាវុធរារាំងមិនឱ្យពួកគាត់ធ្វើស្រែចម្ការលើដីខ្មែរជាដើម។
យោងតាមសេចក្ដីសម្រេចស្ដីពីការបង្កើតគណៈកម្មាធិការកិច្ចការព្រំដែន និងអន្តោប្រវេសន៍របស់គណបក្សសង្គ្រោះជាតិ ចុះថ្ងៃទី១១ កក្កដា បង្ហាញថា គណៈកម្មាធិការនេះ មានភារកិច្ច ស្រាវជ្រាវ ប្រមូលព័ត៌មាន និងឃ្លាំមើលបញ្ហាព្រំដែនកម្ពុជា និងបញ្ហាជនអន្តោប្រវេសន៍។ ផ្សព្វផ្សាយ និងលើកទឹកចិត្តដល់ពលរដ្ឋ ជាពិសេសយុវជនឱ្យមានការយល់ដឹងអំពីបូរណភាពទឹកដី និងផលវិបាកនៃការហូរចូលជនអន្តោប្រវេសន៍ខុសច្បាប់។ តស៊ូមតិ និងចេញសេចក្ដីថ្លែងការណ៍ក្នុងនាមគណបក្សចំពោះការរំលោភបូរណភាពទឹកដី និងសកម្មភាពខុសច្បាប់របស់ជនអន្តោប្រវេសន៍ដែលរស់នៅប្រទេសកម្ពុជា។
គណៈកម្មាធិការនេះមានអនុប្រធាន និងសមាជិកមួយចំនួនដែលជំនាញខាងព្រំដែនរួមមាន៖ លោក ប៉ាង សុខឿន ជាអនុប្រធាន លោក ឆាំ ឆានី លោក អៀរ ចាន់ណា លោក យ៉េន វីរៈ និងលោក នូហែម ព្រហ្មវីរៈ ជាសមាជិក។ ក្រៅពីនេះក៏មាន មន្ត្រីជាន់ខ្ពស់នៃគណបក្សសង្គ្រោះជាតិផ្សេងទៀតជាទីប្រឹក្សាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។