មន្ត្រីជាន់ខ្ពស់គណបក្សសង្គ្រោះជាតិបានចាកចេញពីសហរដ្ឋអាមេរិកទៅកាន់ប្រទេសអាស៊ាន ដើម្បីត្រៀមខ្លួនអមដំណើរលោក សម រង្ស៊ី
2019.10.16
មន្ត្រីជាន់ខ្ពស់ និងសកម្មជន គណបក្សសង្គ្រោះជាតិនៅក្រៅប្រទេសបានចាប់ផ្ដើមចេញដំណើរទៅកាន់ប្រទេសមួយចំនួនក្បែរកម្ពុជា ដើម្បីត្រៀមខ្លួនចាំទទួលលោក សម រង្ស៊ី ដែលគ្រោងវិលចូលមាតុប្រទេសវិញនៅថ្ងៃទី៩ វិច្ឆិកាខាងមុខនេះ។ មន្រ្តីរបបលោក ហ៊ុន សែន ថា រដ្ឋាភិបាលនេះធ្លាប់រំលាយខ្មែរក្រហម ដូច្នេះ រដ្ឋាភិបាលមិនខ្លាចសកម្មជនគណបក្សសង្គ្រោះជាតិនោះទេ។
អនុប្រធានគណបក្សសង្គ្រោះជាតិ លោកស្រី មូរ សុខហួរ បញ្ជាក់ថា មន្ត្រីជាន់ខ្ពស់គណបក្សសង្គ្រោះជាតិជាច្រើននាក់ បានប្រមូលផ្ដុំគ្នាបន្តបេសកកម្មប្រវត្តិសាស្ត្រ ដើម្បីនាំអោយមានការផ្លាស់ប្ដូរយ៉ាងពិតប្រាកដនៅកម្ពុជា។
លោកស្រីបញ្ជាក់ថា មានមនុស្សមួយចំនួនបានទៅប្រទេសក្បែរៗ ខាងកម្ពុជាដើម្បីចូលរួមអមលោក សម រង្ស៊ី វិលចូលមាតុប្រទេសវិញ នៅថ្ងៃទី៩ វិច្ឆិកាខាងមុខនេះ។ លោកស្រីបញ្ជាក់ថា មន្ត្រីជាន់ខ្ពស់ និងមន្ត្រីគណបក្សទាំងនោះបានធ្វើដំណើរចេញពីសហរដ្ឋអាមេរិក បារាំង អូស្ត្រាលី និង កាណាដា៖ «ធ្វើមាតុភូមិនិវត្តន៍នេះ ដើម្បីដោះស្រាយបញ្ហាជាតិទាំងអស់គ្នាជាមួយគ្នា ជាផែនការរួម មិនមែនជាផែនការផ្ដួលរំលំរបបលោក ហ៊ុន សែន ទេ។ តែជាផែនការឈានទៅការស្ដារឡើងវិញនៃលទ្ធិប្រជាធិបតេយ្យ និងអោយមានការផ្លាស់ប្ដូរជាវិជ្ជមាន យើងធ្វើកិច្ចការងារអន្តរជាតិ ធ្វើកិច្ចការងារទូតនិងកិច្ចការងារសង្គមពាក់ព័ន្ធទាំងអស់ដែលទាក់ទិននឹងការធ្វើមាតុភូមិនិវត្តន៍»។
លោក សម រង្ស៊ី ប្រធានស្ដីទីគណបក្សសង្គ្រោះជាតិ បានប្រកាសតាមហ្វេសប៊ុក កាលពីសប្ដាហ៍មុនថា ផែនការវិលត្រឡប់ទៅកាន់មាតុប្រទេសវិញរបស់លោកគ្មានអ្វីផ្លាស់ប្ដូរទេ ហើយលោកបញ្ជាក់ថា នឹងធ្វើដំណើរទៅកាន់ប្រទេសមួយចំនួនជិតប្រទេសកម្ពុជា ៥ថ្ងៃមុនថ្ងៃកំណត់ដែលលោកវិលចូលមាតុប្រទេសវិញ។
អតីតសមាជិកព្រឹទ្ធសភាខាងគណបក្សសម រង្ស៊ី ដែលកំពុងនិទ្ទេសខ្លួននៅប្រទេសកាណាដា លោក សោ ចាន់ដេត មានប្រសាសន៍ថា លោកនឹងចាកចេញពីកាណាដាក្នុងពេលឆាប់ៗ ខាងមុខនេះ ដើម្បីចូលរួមអមដំណើរជាមួយលោក សម រង្ស៊ី។ លោកបញ្ជាក់ថា ថ្ងៃទី៩ វិច្ឆិកាខាងមុខនេះច្បាស់ណាស់នឹងធ្វើឲ្យមានការប្រែប្រួលស្ថានការណ៍នយោបាយយ៉ាងពិតប្រាកដពីព្រោះអ្វីដែលលោក ហ៊ុន សែន កំពុងតែធ្វើ និងបន្តធ្វើសព្វថ្ងៃនេះ គឺរំលោភបំពានច្បាប់យ៉ាងធ្ងន់ធ្ងរ៖ «ខ្ញុំ សោ ចាន់ដេត ត្រូវតែធ្វើដំណើរវិលត្រឡប់ទៅប្រទេសកម្ពុជាវិញជាមួយលោកប្រធានសម រង្ស៊ី នៅថ្ងៃទី៩ វិច្ឆិកាខាងមុខនេះ ពីព្រោះវាជាពេលវេលា ជាឱកាសដ៏ល្អបំផុតក្នុងការសង្គ្រោះប្រទេសជាតិយើងពីកណ្ដាប់ដៃក្រុមគ្រួសារនិងបក្សពួកលោក ហ៊ុន សែន»។
ក្រៅពីមន្ត្រីជាន់ខ្ពស់គណបក្សសង្គ្រោះជាតិនៅសហរដ្ឋអាមេរិក និង កាណាដា។ សកម្មជន និងអ្នកគាំទ្រគណបក្សប្រឆាំង ក៏បានត្រៀមខ្លួនចូលរួមអមដំណើរជាមួយលោក សម រង្ស៊ី ផងដែរ។
ប្រធានក្រុមចលនាយុវជនគណបក្សសង្គ្រោះជាតិនៅប្រទេសបារាំងកញ្ញា លឹម កន្និកា ប្រាប់អាស៊ីសេរីថា អ្នកគាំទ្រគណបក្សសង្គ្រោះជាតិជាច្រើននាក់បានត្រៀមខ្លួនរួចហើយនឹងចាកចេញពីប្រទេសបារាំងក្នុងពេលឆាប់ៗនេះ។
កញ្ញាបញ្ជាក់ថា នេះជាពេលវេលាដ៏សំខាន់សម្រាប់ឲ្យពលរដ្ឋ ខ្មែរទាំងក្នុងនិងក្រៅប្រទេសរួមសាមគ្គីគ្នា ដើម្បីនាំឲ្យមានការផ្លាស់ប្ដូរដោយសន្តិវិធីនៅកម្ពុជា៖ «ដោយសារយើងស្រឡាញ់ជាតិ យើងដឹងហើយថា បើយើងមិនងើបឈរសម្រាប់ប្រទេសកម្ពុជាអត់មានអ្នកណាងើបឈរទេ។ មូលហេតុទី២ ដោយសារតែយើងឃើញគេចាប់ក្រុមយុវជននៅក្នុងពន្ធនាគារដោយសារគេចង់ចូលរួមថ្ងៃទី៩ ខែវិច្ឆិកាហ្នឹង។ យើងចង់បង្ហាញថា យុវជនមានសាមគ្គីភាពតាំងពីស្រុកបារាំង និងនៅទូទាំងពិភពលោក»។
សម្រាប់មន្ត្រីរបបក្រុងភ្នំពេញវិញមិនមានជំនឿថា លោក សម រង្ស៊ី នឹងវិលតាមការសន្យានោះទេ ដោយសារតែនេះមិនមែនជាលើកទីមួយទេដែលមេគណបក្សប្រឆាំងរូបនេះប្រកាសចូលមាតុប្រទេសនោះ។
ទោះបីជាយ៉ាងណា អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា រដ្ឋាភិបាលមិនហាមឃាត់លោក សម រង្ស៊ី ទេ។ ប៉ុន្តែព្រមានថា នៅពេលដែលលោក សម រង្ស៊ី ឈានជើងចូលដល់កម្ពុជាភ្លាមអាជ្ញាធរមានសមត្ថកិច្ចនឹងចាប់ដាក់ខ្នោះបញ្ជូនទៅពន្ធនាគារភ្លាម៖ «ខ្ញុំយល់ថា ប៉ុល ពត មានទាហាន រាប់កងពលក៏នៅតែបង្ក្រាបបានចុះបងប្អូនទៅប៉ុន្មានយន្តហោះ មកពីបារាំងប៉ុន្មានកងពល ពីអាមេរិកមកប៉ុន្មានកងពល អាហ្នឹងចាំនិយាយគ្នា។បើមិនទាន់ឃើញជាក់ស្ដែងនិយាយមិនទាន់បានទេពីព្រោះការឆ្លើយតបរបស់រដ្ឋាភិបាលគឺស្របទៅតាមអ្វីដែលកើតឡើងជាក់ស្ដែង»។
គិតត្រឹមថ្ងៃទី១៥ ខែតុលា ការសន្យាវិលចូលប្រទេសកម្ពុជាវិញរបស់លោក សម រង្ស៊ី នៅសល់តែ ២៥ថ្ងៃទៀតប៉ុណ្ណោះ ដែលទំនងជាធ្វើឱ្យអ្នកគាំទ្របក្សប្រឆាំងកាន់តែអន្ទះសាចង់ទៅទទួលដំណើរមាតុភូមិនិវត្តន៍របស់លោកចូលទៅកាន់មាតុប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។