មន្ត្រីគណបក្សសង្គ្រោះជាតិបារម្ភពីការបំផ្លាញបដាដោះលែងលោក កឹម សុខា
2017.09.29
មន្ត្រីគណបក្សប្រឆាំង ខេត្តកំពង់ចាម ស្នើឱ្យអាជ្ញាធរជួយស្វែងរកជនអនាមិកដែលប៉ុនប៉ងបំផ្លាញបដាសុំឱ្យដោះលែង លោក កឹម សុខា នៅមុខស្នាក់ការគណបក្សរបស់ខ្លួននៅខេត្តកំពង់ចាម។ ការស្នើនេះ ក្រោយពេលមានក្រុមជនអនាមិក ពីរនាក់ ចូលទៅធ្វើសកម្មភាពបំផ្លាញបដានោះ កាលពីយប់រំលងអធ្រាត្រឈានចូលថ្ងៃទី២៩ កញ្ញា ម៉ោងប្រមាណ២ ទាបភ្លឺ ប៉ុន្តែមិនបានសម្រេច។
មន្ត្រីគណបក្សសង្គ្រោះជាតិ ខេត្តកំពង់ចាម ចាត់ទុកការបំផ្លាញស្លាក ថាជារឿងនយោបាយ។ ប្រធានប្រតិបត្តិគណបក្សសង្គ្រោះជាតិ លោក សាន សឿង មានប្រសាសន៍ថា កាលពីម៉ោងប្រមាណ២ ទាបភ្លឺ ថ្ងៃទី២៩ កញ្ញា មានមនុស្សចំនួនពីរនាក់ដោយពាក់មួកសុវត្ថិភាពជិត ហើយម្នាក់ ដើរចូលទៅមុខ ស្នាក់ការគណបក្សរបស់ខ្លួនទាញកន្ត្រាក់បដាដែលចងដាក់ស្នើឱ្យដោះលែងលោក កឹម សុខា ម្ដងជាពីរដង ប៉ុន្តែដោយសារខ្សែចងបដានោះមាំ ទើបពួកគេធ្វើសកម្មភាពមិនបានសម្រេចនិងនាំគ្នាចេញទៅ។ ក្រោយមកពួកគេទាំងនោះចូលមកធ្វើសកម្មភាពម្តងទៀត ប៉ុន្តែមិនបានសម្រេចដដែល។ មន្ត្រីគណបក្សប្រឆាំងរូបនេះ ហៅសកម្មភាពប៉ុនប៉ងបំផ្លាញបដានោះថា ជាការបំពារបំពានសិទ្ធិមកលើគណបក្សប្រឆាំង ដែលមានច្បាប់ទទួលស្គាល់ត្រឹមត្រូវ៖ «វាជារូបភាពគំរាមកំហែងមកដល់ទីស្នាក់ការ គណបក្សនយោបាយ ហើយជាពិសេសទៅទៀតនោះ គំរាមកំហែងស្មារតី សមាជិកសមាជិកា អ្នកគាំទ្រគណបក្ស»។
បដាដែលមានរូបភាពលោក កឹម សុខា និងអ្នកគាំទ្រ គណបក្សខ្លួនត្រូវបាន មន្ត្រីគណបក្សប្រឆាំងខេត្តកំពង់ចាម ចងនៅមុខស្នាក់គណបក្សខេត្តកាលពីថ្ងៃទី២៥ កញ្ញា ដើម្បីទាមទារឱ្យតុលាការដោះលែងលោក កឹម សុខា ឱ្យមានសេរីភាពឡើវិញដោយគ្មានលក្ខខណ្ឌ ពីព្រោះពួកគេយល់ថាការចាប់ខ្លួន និងឃុំខ្លួនប្រធានគណបក្សរបស់ខ្លួនគឺជារឿងខុសច្បាប់។
លោក សាន សឿង បន្ថែមថា សកម្មភាពប៉ុនប៉ងបំផ្លាញបដានោះ គឺជារឿងនយោបាយ។ ទន្ទឹមគ្នានេះ លោកស្នើឱ្យអាជ្ញាធរជួយស្វែងរកជនល្មើស មកផ្ដន្ទាទោសតាមច្បាប់ទៀតផង៖ «យើងក៏មានការព្រួយបារម្ភចំពោះស្ថានការណ៍ដែលកើតមាន ប៉ុន្តែយើងនៅតែរក្សាស្លាកសញ្ញា យើងនៅតែរក្សាបដារបស់យើង ព្រោះយើងយល់ថា ការលើកឡើង ការទាមទារគឺជាសិទ្ធិទូទៅរបស់ប្រជាពលរដ្ឋខ្មែរ»។
នៅខេត្តកំពង់ចាម បដាស្នើឱ្យដោះលែងលោក កឹម សុខា គឺមានតែនៅស្នាក់ការខេត្តតែមួយប៉ុណ្ណោះ ចំណែកនៅតាមបណ្ដាស្រុកមិនទាន់មានដាក់នៅឡើយទេ។ លោក កឹម សុខា ត្រូវបានសមត្ថកិច្ចចាប់ខ្លួនទាំងកណ្ដាលអធ្រាត្រ កាលពីយប់ថ្ងៃទី៣ កញ្ញា ដោយចោទប្រកាន់ពីបទក្បត់ជាតិ ហើយលោកត្រូវបានបញ្ជូនមកឃុំខ្លួន នៅពន្ធនាគារត្រពាំងផ្លុង ខេត្តត្បូងឃ្មុំភ្លាមៗដែរ។
កាលពីពេលថ្មីៗនេះ បដារូបប្រធានគណបក្សសង្គ្រោះជាតិ ទាមទារឱ្យតុលាការដោះលែងដោយគ្មានលក្ខខណ្ឌនោះ នៅតាមតំបន់ខ្លះ រងការគំរាមកំហែង និងបញ្ជាឲ្យរុះរើចោលវិញ។ បដានៅឯខេត្តកំពតឯណោះ ត្រូវបុរសមិនស្គាល់អត្តសញ្ញាណបួននាក់ មកលួចដោះចេញទៅទាំងយប់។
មន្ត្រីជាន់ខ្ពស់ក្រសួងមហាផ្ទៃ ធ្លាប់លើកឡើងថា ការដាក់បដាឱ្យដោះលែងលោក កឹម សុខា គឺជាសញ្ញានៃបដិវត្តន៍ពណ៌ទៀតផង។ ក៏ប៉ុន្តែ ការលើកឡើងបែបនេះ ក៏ត្រូវបានមន្ត្រីគណបក្សសង្គ្រោះជាតិច្រានចោល និងអះអាងថា ការលើបដាដើម្បីតស៊ូមតិដោយអហិង្សា ឲ្យមានការដោះលែងលោក កឹម សុខា គឺជាសិទ្ធិដែលធានាដោយរដ្ឋធម្មនុញ្ញ។
មន្ត្រីអង្កេតសមាគមការពារសិទ្ធិមនុស្សអាដហុក (ADHOC) ខេត្តកំពង់ចាម លោក មាន ព្រហ្មមុនី យល់ថា ការលើកបដាបង្ហាញពីការមិនពេញចិត្តចំពោះចំណាត់ការរបស់សមត្ថកិច្ច និងស្នើឱ្យតុលាការដោះលែង លោក កឹម សុខា គឺពុំមែនជាសញ្ញានៃបដិវត្តន៍ទេ ប៉ុន្តែវាជាការសម្ដែងមតិដែលស្របតាមរដ្ឋធម្មនុញ្ញតែប៉ុណ្ណោះ៖ «អាហ្នឹងវាមិនមែនជាបដិវត្តន៍ពណ៌អីទេ វាជាយុទ្ធនាការសិទ្ធិសម្ដែងមតិ ដែលមានចែងក្នុងរដ្ឋធម្មនុញ្ញ»។
លោកបន្ថែមថា ករណីបែបនេះប្រសិនបើកើតឡើងទៅលើស្លាកសញ្ញា ឬបដារបស់គណបក្សកាន់អំណាច អាជ្ញាធរប្រាកដជាមិនឱ្យជនល្មើស ឬជនសង្ស័យរួចខ្លួនទេ ប៉ុន្តែសម្រាប់គណបក្សប្រឆាំងវិញគឺពិបាកនឹងទទួលបានយុត្តិធម៌ណាស់។ យ៉ាងនេះក្ដី លោកស្នើឱ្យអាជ្ញាធរស៊ើបអង្កេត និងចាត់វិធានការលើករណីនេះ បើពុំដូច្នេះ បង្ហាញពីភាពទន់ខ្សោយរបស់មន្ត្រីមានសមត្ថកិច្ចតែម្ដង៕