អ្នកគាំទ្របក្សប្រឆាំងរាប់ពាន់នាក់ត្រៀមទៅទទួលលោក សម រង្ស៊ី ត្រឡប់មកកម្ពុជា ដោយមិនខ្លាចអាជ្ញាធរចាប់ខ្លួន
2019.01.22
មន្ត្រីគណបក្សប្រឆាំងនៅតាមខេត្តមួយចំនួន បានត្រៀមសកម្មជននិងអ្នកគាំទ្រគណបក្សខ្លួនរាប់ពាន់នាក់ ដើម្បីទៅទទួលស្វាគមន៍ប្រធានស្ដីទីគណបក្ស សង្គ្រោះជាតិ គឺលោក សម រង្ស៊ី វិលត្រឡប់ចូលស្រុកវិញនៅពេលខាងមុខ។ ប៉ុន្តែអ្នកនាំពាក្យរបបក្រុងភ្នំពេញ មិនជឿថាលោក សម រង្ស៊ី ហ៊ានវិលមកកម្ពុជាដូចការអះអាងថ្នាក់ដឹកនាំគណបក្សប្រឆាំងនោះឡើយ។
មន្ត្រីគណបក្សប្រឆាំងនៅតាមខេត្តអះអាងថា ពួកគាត់បានប្ដេជ្ញារួមគ្នាជាធ្លុងមួយក្នុងការទៅអមដំណើរលោក សម រង្ស៊ី វិលចូលស្រុកវិញឲ្យទាល់តែបាន ហើយមិនខ្លាចអាជ្ញាធរគំរាមកំហែងចាប់ដាក់គុកនោះឡើយ។
អនុប្រធានគណបក្សសង្គ្រោះជាតិខេត្តកំពង់ចាមលោក ថាន សុរិទ្ធិ មានប្រសាសន៍ប្រាប់អាស៊ីសេរី នៅព្រឹកថ្ងៃទី២២មករាថា ពួកគាត់នៅតាមមូលដ្ឋានសប្បាយចិត្តយ៉ាងខ្លាំង នៅពេលទទួលដំណឹងជាក់លាក់ពីថ្នាក់ដឹកនាំគណបក្សខ្លួននៅឯនាយសមុទ្រ ហើយក្នុងនោះមានអ្នកគាំទ្រគណបក្សជិត១ពាន់ហើយដែលបានត្រៀមចាំទៅទទួលប្រធានស្ដីទីគណបក្សសង្គ្រោះជាតិនោះ។ លោកអះអាងទៀតថា បើទោះបីជាថ្មីៗ របបលោកហ៊ុន សែន បានចាប់សកម្មជនគណបក្សប្រឆាំងជាបន្តបន្ទាប់ក៏ដោយ ក៏ពួកគាត់មិនខ្លាចដែរ ព្រោះពួកគាត់យល់ថា មានតែការសាមគ្គីគ្នាជាធ្លុងមួយទេដែលអាចយកឈ្នះរបបដឹកនាំសព្វបាន៖ «មូលហេតុសំខាន់គាត់យល់ថាស្ថានភាពនៅកម្ពុជា វាអាចជួបរឿងមិនល្អទាក់ទងនឹងសេដ្ឋកិច្ច និងប្រជាធិបតេយ្យ ហើយធ្វើឲ្យប៉ះពាល់ដល់ជីវភាពគ្រួសាររបស់ពួកគាត់ច្រើនណាស់ ជាពិសេសថ្នាក់ដឹកនាំឃុំសង្កាត់ដែលរបបលោកហ៊ុន ភ្លន់តំណែងមេឃុំចៅសង្កាត់ពីពួកគាត់ដែលប្រជាពលរដ្ឋបោះឆ្នោតឲ្យ»។
ចំណែកអតីតសមាជិកក្រុមប្រឹក្សាខេត្តបាត់ដំបងឯណោះវិញ គឺលោក ឌឹម សារឿន ថ្លែងឲ្យដឹងថា គិតត្រឹមថ្ងៃទី២២មករា មានសកម្មជន ដែលស្រឡាញ់គណបក្សសង្គ្រោះជាតិមិនតិចជាង១ពាន់ទេដែលបានប្ដេជ្ញាទៅចូលរួមអមដំណើរលោក សម រង្ស៊ី វិលចូលស្រុកវិញនោះ៖ «យើងប្ដេជ្ញាចិត្តថាទោះជាមានការរារាំងយ៉ាងណាក៏នៅតែឲ្យគោលដៅកន្លែងទទួលលោក សម រង្ស៊ី ហើយគេធ្វើបាបយើងយូរហើយបើយើងមិនទៅទទួលគាត់មកវិញទេ គេរឹតតែធ្វើបាបយើងច្រើនជាងនេះទៀត ដូច្នេះហើយកម្លាំងយើងច្រើនត្រូវតែទទួលគាត់។ព្រោះប្រជាធិបតេយ្យមិនមែនបានដោយងាយស្រួលទេទាល់តែយើងតស៊ូទាំងអស់គ្នា។ទោះបីជាខ្ញុំស្លាប់តែកូនខ្ញុំរស់ តែបើមិនយើងប្ដូរខ្លះទេ អាចក្មេងៗជំនាន់ក្រោយគេស្ដីបន្ទោសយើងថាមិនចេះគិតគួររឿងប្រទេសជាតិ»។
លោកបន្តថា ស្ថានការណ៍សព្វថ្ងៃមានតែលោក សម រង្ស៊ី និងលោក កឹម សុខា ទេដែលអាចជួយស្ដារប្រជាធិបតេយ្យនៅកម្ពុជាឲ្យរស់ឡើងវិញបាន ដូច្នេះនេះជាឱកាសល្អសម្រាប់ពួកគាត់ក្នុងការចូលរួមគាំទ្រនយោបាយ ដើម្បីឲ្យកម្ពុជាមានមុខមាត់ប្រសើរឡើងវិញនៅលើឆាកអន្តរជាតិ។
អនុប្រធានគណបក្សសង្គ្រោះជាតិ អ្នកស្រី មូរ សុខហួ មានប្រសាសន៍នៅក្នុងកិច្ចសម្ភាសន៍ជាមួយវិទ្យុអាស៊ីសេរីកាលពីថ្ងៃទី២១មករាថា លោក សម រង្ស៊ី នឹងវិលចូលស្រុកវិញ នៅអំឡុងពេល៣ខែខាងមុខ ដើម្បីទៅចូលស្ដារប្រជាធិបតេយ្យនៅកម្ពុជា។ការសម្រេចវិលចូលស្រុកនេះធ្វើឡើងដោយការប្រជុំថ្នាក់ដឹកគណបក្សប្រឆាំងនៅសហរដ្ឋអាមេរិក កាលពីថ្ងៃទី២០ មករា។
ទាក់ទងនឹងបញ្ហានេះអ្នកនាំពាក្យរបបក្រុងភ្នំពេញលោក ផៃ ស៊ីផាន មានប្រសាសន៍ប្រាប់អាស៊ីសេរីថា លោក សម រង្ស៊ី ជាមាន់សម្លដែលជលបានតែនៅក្រៅសង្វៀន ដូច្នេះលោកមិនហ៊ានវិលចូលមកកម្ពុជាវិញឡើយ ព្រោះមានឧទាហរណ៍ជាច្រើនលើកច្រើនសារហើយ ដែលប្រធានស្ដីទីគណបក្សរូបនេះថាវិលចូលស្រុក ប៉ុន្តែមិនបានត្រឡប់មកវិញដូចការអះអាងនោះទេ៖ «ឥឡូវនេះដោយសារភាពមិនខ្លាហាននេះហើយយើងឃើញការបញ្ចេញសាររបស់គាត់ឬក្រុមរបស់គាត់នឹងត្រូវតែមានអ្នកនាំគាត់មក ប៉ុន្តែយើងដឹងកម្ពុជាមានអធិបតេយ្យភាព ហើយអ្នកនាំមកយើងចាត់ទុកគាត់ជាភ្ញៀវរបស់កម្ពុជាទេ ហើយខ្លួនគាត់នៅតែប្រឈមជាមួយតុលាការនោះឯង ប៉ុន្តែនិយាយឲ្យចំទៅរដ្ឋាភិបាលស្វាគមន៍ឲ្យគាត់មកកម្ពុជាវិញ»។
អ្នកនាំពាក្យរបបក្រុងភ្នំពេញរូបនេះ ក៏បានព្រមានដល់អ្នកដែលត្រៀមទៅទទួលលោក សម រង្ស៊ី ត្រូវសុំច្បាប់ពីអាជ្ញាធរដែនដីឲ្យបានត្រឹមត្រូវ បើមិនដូច្នោះទេ ពួកគាត់ក៏ប្រឈមនឹងការមានទោសដែរ។
អ្នកនាំពាក្យសមាគមការពារសិទ្ធិមនុស្ស អាដហុក (Adhoc) លោក សឹង សែនករុណា លើកឡើងថា ច្បាប់សិទ្ធិមនុស្សអន្តរជាតិមិនបានដាក់ទោសទៅលើប្រជាពលរដ្ឋដែលទៅទទួលស្វាគមន៍មេដឹកនាំគណបក្សនយោបាយនោះទេ ព្រោះជាសិទ្ធិសេរីភាពក្នុងការគាំទ្រគណបក្សនយោបាយ។លោកបន្ថែមទៀតថា ការធ្វើទុក្ខបុកម្នេញលើអ្នកគាំទ្រគណបក្សនយោបាយ គឺជាការអនុវត្តច្បាប់ស្តង់ដារ២ ព្រោះកន្លងមក គណបក្សកាន់អំណាចតែងធ្វើការបិទផ្លូវជាច្រើនថ្ងៃ ដើម្បីការជួបប្រជុំគ្នាឬការរៀបចំពិធីសម្ពោធអ្វីមួយ៖ «ដូច្នេះហើយអ្នកនយោបាយកាលណាគាត់មានអ្នកគាំទ្រ ហើយអ្នកគាំទ្របង្ហាញពីការគាំទ្រណាមួយដោយសន្តិវិធី ដោយអហិង្សាយើងគិតថាវាជាសេរីភាពក្នុងការចូលរួមយ៉ាងសកម្មក្នុងជីវភាពនយោបាយដែលមានចែងក្នុងរដ្ឋធម្មនុញ្ញរបស់កម្ពុជាផងដែរ។ហើយក្នុងនោះក៏យើងមានកតិកាសញ្ញាស្ដីពីសិទ្ធិធ្វើនយោបាយដែលជាច្បាប់សិទ្ធិមនុស្សអន្តរជាតិនោះក៏កម្ពុជាយើងហត្ថលេខីទទួលស្គាល់យកមកអនុវត្តនៅកម្ពុជាផងដែរ»។
មន្ត្រីការពារសិទ្ធិមនុស្សរូបនេះ ក៏សម្ដែងការព្រួយបារម្ភពីការវិលស្រុកវិញរបស់មេដឹកនាំគណបក្សប្រឆាំងនេះដែរ ព្រោះលោក សម រង្ស៊ី មានអ្នកគាំទ្រដល់ទៅរាប់លាននាក់ឯណោះ ដែលងាយនឹងមានការប៉ះពាល់ទង្គិចគ្នាដោយហិង្សាកើតឡើងបាន ប្រសិនបើអាជ្ញាធរធ្វើការបង្ក្រាបទៅលើអ្នកគាំទ្រគណបក្សប្រឆាំង ដូចដែលលោកហ៊ុន សែន ធ្លាប់បានគំរាមកម្ទេចគណបក្សរួចមកហើយនោះ។ លោក សឹង សែនករុណា អំពាវនាវឲ្យអ្នកដឹកនាំគណបក្សនយោបាយទាំងសង្ខាងបញ្ចៀសការប្រើអំពើហិង្សាដាក់គ្នា ដោយមានការជជែកគ្នារកដំណោះស្រាយជាមុនប្រសើរជាងការប្រឈមមុខដាក់គ្នា នាំឲ្យគ្រោះថ្នាក់ដល់អាយុជីវិតមនុស្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។