បក្សប្រឆាំងនឹងប្រជុំពិភាក្សាពីផែនការដករូបលោក សម រង្ស៊ី និងលោកកឹម សុខា នៅថ្ងៃ២៥ កក្កដា
2017.07.22
ពីឆ្វេង៖ ប្រធានគណបក្សសង្គ្រោះជាតិ លោក កឹម សុខា អនុប្រធានបក្ស លោក ប៉ុល ហំម អ្នកស្រី មូរ សុខហួរ និងលោក អេង ឆៃអ៊ាង ក្នុងសមាជវិសាមញ្ញគណបក្សជ្រើសរើសថ្នាក់ដឹកនាំថ្មី នៅថ្ងៃទី២ ខែមីនា ឆ្នាំ២០១៧។ RFA/Sorn Chanratha
RFA/Sorn Chanratha
គណបក្សឆាំងនឹងប្រជុំផ្ទៃក្នុងជាមួយមន្ត្រីជាន់ខ្ពស់របស់ខ្លួនទូទាំងប្រទេស នៅថ្ងៃទី២៥ ខែកក្កដា ខាងមុខ ដើម្បីប្រាប់អំពីការឈប់ប្រើប្រាស់រូបលោក សម រង្ស៊ី និងលោក កឹម សុខា តទៅទៀត ដោយប្រើប្រាស់ត្រឹមរូបសញ្ញាព្រះអាទិត្យរះ។
គណបក្សនយោបាយដែលរងគ្រោះព្រោះច្បាប់គណបក្សនយោបាយថ្មីដែលនឹងចូលជាធរមានក្នុងពេលខាងមុខយ៉ាងខ្លី នឹងប្ដូរទាំងរូបសញ្ញា និងឈ្មោះគណបក្សរបស់ខ្លួន។ ទាំងគណបក្សសង្គ្រោះជាតិ និងគណបក្ស សម រង្ស៊ី ដែលជាប់ពាក់ព័ន្ធជាមួយលោក សម រង្ស៊ី បានកំណត់យកថ្ងៃប្រជុំដូចគ្នា គឺថ្ងៃទី២៥ ខែកក្កដា ខាងមុខ ដើម្បីជៀសវាងការរំលាយគណបក្សចោល នៅពេលច្បាប់គណបក្សនយោបាយថ្មីចូលជាធរមាន។
គណបក្សសង្គ្រោះជាតិ គឺគ្រាន់តែឈប់ប្រើរូបលោក សម រង្ស៊ី និងលោក កឹម សុខា កាន់ដៃគ្នានោះតទៅទៀត ដោយដាក់ត្រឹមរូបព្រះអាទិត្យរះ ដែលជាស្លាកសញ្ញាផ្លូវការរបស់គណបក្សនេះ។ ចំណែកគណបក្ស សម រង្ស៊ី ដែលសព្វថ្ងៃកំពុងមានអាសនៈនៅក្នុងព្រឹទ្ធសភា ក៏នឹងប្ដូរឈ្មោះគណបក្សចេញដែរ។
អនុប្រធានគណបក្សសង្គ្រោះជាតិ លោក អេង ឆៃអ៊ាង ឲ្យអាស៊ីសេរី ដឹងនៅថ្ងៃទី២២ ខែកក្កដា ថា កិច្ចប្រជុំនោះគណបក្សនឹងណែនាំទៅថ្នាក់ដឹកនាំទាំង២៥ខេត្ត រាជធានី ពីការឈប់ប្រើរូបទាំងនោះនៅលើបដាផ្សព្វផ្សាយរបស់គណបក្ស។ ទាក់ទងការចំណាយលើការផ្លាស់ប្ដូរនេះ លោក អេង ឆៃអ៊ាង ថាគណបក្សមិនបានគិតពីការចំណាយទេ ព្រោះនេះជាការចូលរួមពីពលរដ្ឋ និងអ្នកគាំទ្រគណបក្ស៖ «យើងហៅប្រជុំថ្នាក់ដឹកនាំខេត្តទូទាំងប្រទេស ដើម្បីការងារទាក់ទងការកែសម្រួលស្លាកហ្នឹង»។
លោក អេង ឆៃអ៊ាង ឲ្យដឹងទៀតថា គណៈកម្មាធិការអចិន្ត្រៃយ៍នៃគណបក្សសង្គ្រោះជាតិ បានសម្រេចប្រើតែស្លាកសញ្ញារបស់គណបក្ស គឺរូបព្រះអាទិត្យរះ តាំងពីសប្ដាហ៍ទី២ នៃខែកក្កដា នេះ។
ចំណែកតំណាងរាស្ត្រ និងជាសមាជិកគណៈកម្មការអចិន្ត្រៃយ៍នៃគណបក្សសង្គ្រោះជាតិ លោ គីមសួរ ភីរិទ្ធ ឲ្យដឹងថា ការផ្លាស់ប្ដូររូបដោយដាក់ស្លាកសញ្ញាគណបក្សសង្គ្រោះជាតិ ទូទាំងប្រទេស មកដល់ពេលនេះទើបបានប្រមាណ ១០ភាគរយប៉ុណ្ណោះ។ លោកថា ក្រោយលទ្ធផលកិច្ចប្រជុំថ្ងៃទី២៥ ខាងមុខ គណបក្សនឹងមានជួនដំណឹងជាផ្លូវការ ណែនាំទៅសាខាបក្សទាំងក្នុង និងក្រៅប្រទេស មិនឲ្យធ្វើអ្វីដែលច្បាប់គណបក្សនយោបាយថ្មីហាមឃាត់។
ស្រដៀងគ្នានេះដែរ ប្រធានស្ដីទីគណបក្ស សម រង្ស៊ី ទាវ វណ្ណុល និងជាសមាជិកព្រឹទ្ធសភាមកពីគណបក្ស សម រង្ស៊ី ប្រាប់ថា គណបក្សរបស់លោកនឹងប្រជុំសមាជិកអចិន្ត្រៃយ៍ថ្ងៃទី២៥ ខែកក្កដា ខាងមុខដែរ ដើម្បីកំណត់ថ្ងៃធ្វើសមាជបក្សប្ដូរឈ្មោះគណបក្សនៅពេលខាងមុខទៀត។ លោកប្រាប់ថា ចំពោះលោកផ្ទាល់ដែលជាប្រធានស្ដីទីគណបក្ស សម រង្ស៊ី លោកចង់ប្ដូរឈ្មោះគណបក្ស សម រង្ស៊ី ទៅជាគណបក្ស ពន្លឺប្រជាធិបតេយ្យ៖ «ខ្ញុំស្រឡាញ់ឈ្មោះនេះ ព្រោះរក្សាសញ្ញាភ្លើងទាននៅដដែល ហើយយើងដឹងថាប្រវត្តិគណបក្ស សម រង្ស៊ី ជាគណបក្សប្តូរផ្តាច់ឲ្យប្រជាធិបតេយ្យ»។
លោក សម រង្ស៊ី អតីតប្រធានគណបក្សសង្គ្រោះជាតិ កំពុងជាប់ទោសមានឈ្មោះជាទណ្ឌិត ព្រោះតុលាការក្រុងភ្នំពេញ ចោទប្រកាន់ជាច្រើនករណី បើទោះលោក សម រង្ស៊ី ផ្ទាល់ថា លោកមិនមែនជាទណ្ឌិត ព្រោះលោកត្រូវបានកាត់ទោសដោយតុលាការអាយ៉ងក្ដី។
តំណាងរាស្ត្រគណបក្សប្រជាជនកម្ពុជា សម្រេចកែច្បាប់ស្ដីពីគណបក្សនយោបាយយ៉ាងប្រញាប់មិនខ្វល់នឹងការរិះគន់។ ខ្លឹមសារមាត្រាខ្លះដែលទើបកែប្រែថ្មីនេះ ហាមគ្រប់គណបក្សនយោបាយមិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយសម្រាប់គណបក្សរបស់ខ្លួន។ ចំពោះទោសទណ្ឌដល់គណបក្សនយោបាយដែលបានប្រព្រឹត្តផ្ទុយពីច្បាប់នេះវិញ គឺតុលាការអាចសម្រេចផ្អាកសកម្មភាពគណបក្សនយោបាយនោះមិនលើសពី ៥ឆ្នាំ ឬអាចរំលាយគណបក្សនោះចោលតែម្ដង។
ក្រោយពេលច្បាប់គណបក្សនយោបាយថ្មីឆ្លងផុតរដ្ឋសភា និងព្រឹទ្ធសភា នៅពេលនេះ វិសោធនកម្មច្បាប់ស្ដីពីគណបក្សនយោបាយបានដល់ក្រុមប្រឹក្សាធម្មនុញ្ញហើយ។
ប្រធានស្ដីទីគណបក្ស សម រង្ស៊ី ទាវ វណ្ណុល យល់ថា ច្បាប់នេះនឹងចូលដល់ស្ថាប័នព្រះរាជវាំងក្នុងអំឡុងមួយអាទិត្យទៀត។ ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏យល់ដូចគ្នានេះដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការដែលគណបក្សប្រឆាំងមានផែនការច្បាស់លាស់ក្នុងការផ្លាស់ប្ដូររូបភាព សញ្ញា និងឈ្មោះ ដែលជាប់ទាក់ទងនឹងលោក សម រង្ស៊ី ព្រោះគណបក្សនេះដឹងថា ខ្លួនមិនអាចរារាំងច្បាប់គណបក្សនយោបាយថ្មីបាន៖ «គាត់ជំទាស់ គឺជំទាស់ហើយ ប៉ុន្តែគាត់ត្រៀមខ្លួនអនុវត្តបានសេចក្តីថា គាត់លេងផ្លូវពីរផ្លូវខាងណាក៏ត្រូវ»។
ក្រុមតំណាងរាស្ត្រគណបក្សសង្គ្រោះជាតិ កាលពីប៉ុន្មានថ្ងៃមុនបានថ្វាយលិខិតទៅព្រះមហាក្សត្រស្នើទៅព្រះអង្គកុំឲ្យឡាយព្រះហស្តលេខាលើវិសោធនកម្មច្បាប់ស្ដីពីគណបក្សនយោបាយ។ ប៉ុន្តែមិនទាន់ការឆ្លើយតបណាមួយពីស្ថាប័នព្រះរាជវាំងនៅឡើយ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា អះអាងថា ច្បាប់នេះនឹងមានសុពលភាព អនុវត្តភ្លាមៗក្រោយពេលព្រះមហាក្សត្រឡាយព្រះហស្តលេខាលើព្រះរាជក្រមប្រកាសឲ្យប្រើប្រាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន