មន្ត្រីគណបក្សប្រឆាំងថា អំពើពុករលួយនៅច្រកអន្តរជាតិដូង ស្ថិតក្នុងស្រុកកំរៀង ខេត្តបាត់ដំបង ជាប់ពាក់ព័ន្ធនឹងមន្ត្រីថ្នាក់ខេត្ត ដែលជាអ្នកបើកផ្លូវឱ្យប៉ូលិសអន្តោប្រវេសន៍យកលុយពីពលករដែលឆ្លងដែនទៅប្រទេសថៃ។ សង្គមស៊ីវិលស្នើឱ្យអាជ្ញាធរថ្នាក់លើស្រាវជ្រាវរឿងនេះ ដើម្បីលុបបំបាត់អំពើពុករលួយនៅតាមច្រកព្រំដែន។
មន្ត្រីច្រកទ្វារអន្តរជាតិដូង និងអភិបាលខេត្តបាត់ដំបង ទំនងជាមិនសប្បាយចិត្តនឹងការអន្តរាគមន៍ពីសមាជិកគ្រួសារត្រកូលហ៊ុន ដែលធ្វើឱ្យពួកគេបាត់បង់ផលប្រយោជន៍ពីការយកលុយពីពលករដែលឆ្លងដែនទៅធ្វើការនៅប្រទេសថៃ ទើបពួកគេនិយាយវាយប្រហារគ្នានៅក្នុងបណ្ដាញសង្គមដូច្នេះ។
ប្រធានប្រតិបត្តិគណបក្សសង្គ្រោះជាតិប្រចាំខេត្តបាត់ដំបង លោក ជា ជីវ ប្រាប់វិទ្យុអាស៊ីសេរីនៅថ្ងៃទី២៣ មេសា ថា ទំនាស់នៃបក្ខពួកបុគ្គលអ្នកមានអំណាចទាំង២ក្រុមនេះ កើតចេញពីការមិនពេញចិត្តរបស់មន្ត្រីច្រកព្រំដែនទៅលើគ្រួសារត្រកូល ហ៊ុន ដែលជ្រៀតជ្រែកការងាររបស់មន្ត្រីថ្នាក់ខេត្ត ដែលធ្វើឱ្យពួកគេបាត់បង់ផលប្រយោជន៍។ លោកសង្កេតឃើញថា តាមរយៈទំនាស់បុគ្គលទាំង២ក្រុមនេះអភិបាលខេត្តបាត់ដំបង លោក សុខ លូ ហាក់មានទំនាក់ទំនងជិតស្និទ្ធជាមួយមន្ត្រីច្រកព្រំដែន ទើបធ្វើមិនដឹងមិនឮ ហើយបណ្ដោយឱ្យមន្ត្រីនៅទីនោះយកលុយពីពលករខ្មែរ បើទោះបីជាមានការតវ៉ា និងការរិះគន់របស់ប្រជាពលរដ្ឋ នៅលើបណ្ដាញសង្គមជាហូរហែមកហើយក្ដី។
លោក ជា ជីវ៖ «ក្នុងនាមគាត់(អ្នកស្រី ហ៊ុន ស៊ីណាត)ជាប្អូនស្រីសម្ដេចនាយក គាត់ទៅមានសិទ្ធិអ្វី ក្នុងការបង្គាប់បញ្ជាអភិបាលខេត្ត។ ហើយម្យ៉ាងវិញទៀតរឿងអភិបាលខេត្តគាត់កាន់ការងាររបស់ខ្លួននៃទឹកដីខេត្តបាត់ដំបង ធ្លាប់បានធ្វើការដឹកនាំ ប៉ុន្តែវាប្រាកដជាមានការទទួលអត្ថប្រយោជន៍ ពីមន្ត្រីក្រោមឱវាទរបស់ខ្លួនដែរ»។
ការលើកឡើងនេះ បន្ទាប់ពីអ្នកស្រី ហ៊ុន ស៊ីណាត ដែលត្រូវជាប្អូនបង្កើតរបស់លោក ហ៊ុន សែន បានចែករំលែកសារនៅលើបណ្ដាញសង្គម កាលពីថ្ងៃទី១៨ មេសា ដែលប្រជាពលរដ្ឋបានបង្ហោះរិះគន់មន្ត្រីច្រកទ្វារអន្តរជាតិដូង បានយកលុយពីពលករខ្មែរ ហើយអ្នកស្រី ហ៊ុន ស៊ីណាត បានសរសេរសារស្នើឱ្យអភិបាលខេត្តបាត់ដំបង លោក សុខ លូ ចុះទៅពិនិត្យច្រកអន្តរជាតិដូង។ ក្នុងនោះ អ្នកស្រី ហ៊ុន ស៊ីណាត បាននិយាយចំៗថា មន្ត្រីច្រកព្រំដែន បានប្រព្រឹត្តអំពើពុករលួយមិនចេះឆ្អែតឆ្អន់ និងធ្វើស្រែលើខ្នងរាស្ត្រ។
ក្រោយពីទទួលការប្រដៅណែនាំពីជំទាវត្រកូល ហ៊ុន បានមួយថ្ងៃ អភិបាលខេត្តរូបនេះបានចុះទៅពិនិត្យស្ថានភាពច្រកទ្វារអន្តរជាតិដូង ស្រុកកំរៀង និងបានប្រាប់ឱ្យមន្ត្រីនិងសមត្ថកិច្ចប្រចាំការនៅទីនោះឈប់យកលុយពីប្រជាពលរដ្ឋ។ ចំណែកឯមន្ត្រីនគរបាលអន្តោប្រវេសន៍ប្រចាំច្រកអន្តរជាតិដូង លើកឡើងថា ការចោទប្រកាន់ប៉ូលិសអន្តោប្រវេសន៍ថា បានយកលុយពីពលករ គឺជាការយល់ច្រឡំ។
ប៉ុន្តែកាលពីថ្ងៃទី២២ មេសា អ្នកស្រី ហ៊ុន ស៊ីណាត ហាក់ខ្វាយខ្វល់នឹងប្រជាប្រិយភាពរបស់លោក ហ៊ុន សែន ដែលជាបងប្រុសបង្កើត បានបង្ហោះវីដេអូបែកធ្លាយសារសម្លេងឆ្លើយឆ្លងគ្នា របស់អភិបាលខេត្តបាត់ដំបង លោក សុខ លូ និងប្រធានមន្ទីរសាធារណការ និងដឹកជញ្ជូនខេត្តបាត់ដំបង លោក ព្រួញ រិទ្ធថា ថាបានប្រមាថមកលើលោកស្រី។ ក្នុងសារសម្លេងនោះ លោក សុខ លូ និងលោក ព្រួញ រិទ្ធថា បានហៅអ្នកស្រី ហ៊ុន ស៊ីណាត ថា “ស្រីនាសម័យតេជោ” និងពាក្យមិនសមរម្យមួយចំនួនទៀត និងបានប្រមាថទៅលើលោក ផែង វណ្ណៈ ដែលជាមនុស្សជំនិតនឹងអ្នកស្រី ហ៊ុន ស៊ីណាត និងជាអ្នករិះគន់មន្ត្រីអន្តោប្រវេសន៍នៅច្រកអន្តរជាតិដូងផងដែរ។
វិទ្យុអាស៊ីសេរីមិនអាចទាក់ទង អ្នកស្រី ហ៊ុន ស៊ីណាត និងអភិបាលខេត្តបាត់ដំបង លោក សុខ លូ ដើម្បីសុំការអធិប្បាយបន្ថែមបានទេ នៅថ្ងៃទី២៣ មេសា។ ចំណែកមេប៉ុស្តិ៍ច្រកទ្វារអន្តរជាតិដូង លោក ផាត់ វីរៈ ក៏អាស៊ីសេរីមិនអាចទាក់ទងបានដែរ។
ជុំវិញរឿងនេះ ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា (CIREA) លោក ឌិន ពុទ្ធី យល់ឃើញថា អន្តរាគមន៍ករណីអំពើពុករលួយនៅច្រកព្រំដែនអន្តរជាតិដូងនេះហាក់យឺតពេល ព្រោះពលករភាគច្រើនបានឆ្លងដែនទៅកាន់ទឹកដីថៃរួចទៅហើយ។ លោកបន្តថា បញ្ហាអំពើពុករលួយនៅតាមច្រកព្រំដែននេះ គឺកើតមានគ្រប់ច្រក និងច្រើនឆ្នាំមកហើយ ដូច្នេះការអន្តរាគមន៍តែមួយឆាវមុនការបោះឆ្នោតថ្នាក់ជាតិខាងមុខនេះ មិនអាចលុបបំបាត់អំពើពុករលួយនេះតាមច្រកព្រំដែនបាននោះទេ។ លោកស្នើឱ្យអាជ្ញាធរថ្នាក់លើស្រាវជ្រាវរឿងនេះ ដើម្បីលុបបំបាត់អំពើពុករលួយនៅតាមច្រកព្រំដែនទាំងអស់។
លោក ឌិន ពុទ្ធី៖ «យើងនិយាយទៅច្រកនីមួយៗហ្នឹង ជាពិសេសច្រកបានឡែមហ្នឹង យើងឃើញថា ល្បីរឿងពុករលួយយកលុយខ្លាំងជាងគេ។ ហើយមេច្រកអន្តោប្រវេសន៍នៅច្រកហ្នឹង គួរតែគិតគូរឡើងវិញពាក់ព័ន្ធនឹងបញ្ហាពុករលួយ។ មួយទៀតអង្គភាពប្រឆាំងអំពើពុករលួយគួរតែចាត់វិធានការ ព្រោះទាំងអស់ហ្នឹង សុទ្ធតែខុសច្បាប់ទាំងអស់ហ្នឹង»។
ច្រកទ្វារអន្តរជាតិដូង ស្ថិតក្នុងស្រុកកំរៀង ខេត្តបាត់ដំបង ត្រូវបានក្រុមពលករលើកឡើងថា ជាច្រកទ្វារដែលមានអំពើពុករលួយច្រើនជាងគេដែលមានការសហការគ្នារវាងប៉ូលិសអន្តោប្រវេសន៍ ជាមួយមេខ្យល់នាំពលករឆ្លងដែនខុសច្បាប់ និងផ្ដល់សិទ្ធិឱ្យមានក្រុមអ្នកដឹកអីវ៉ាន់ឆ្លងដែន និងអ្នករត់តាក់ស៊ីដែលទារថ្លៃពីអ្នកដំណើរកប់ពពក។ ទោះបីជាមានការរិះគន់ពីប្រជាពលរដ្ឋយ៉ាងណាក្ដី ក៏កន្លងមកមិនដែលមានការអន្តរាគមន៍ពីមន្ត្រីថ្នាក់ខេត្ត និងមន្ត្រីថ្នាក់ជាតិនោះទេ ហើយមន្ត្រីថ្នាក់ខេត្តបាននិយាយការពារឱ្យមន្ត្រីច្រកព្រំដែនទៅវិញ។
ទោះជាយ៉ាងណា អ្នកតាមដានសង្គមកំពុងតាមដានមើលថា ការលូកដៃចូលអន្តរាគមន៍អំពើពុករលួយនៅតាមច្រកព្រំដែនពីសំណាក់ អ្នកស្រី ហ៊ុន ស៊ីណាត ដែលត្រូវជាប្អូនស្រីបង្កើតលោក ហ៊ុន សែន នេះ នឹងទទួលជោគជ័យយូរអង្វែងដែរឬទេ? ហើយលោក ហ៊ុន សែន នឹងអន្តរាគមន៍បែបណារវាងបងប្អូន និងមន្ត្រីក្នុងបក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។