រដ្ឋសភាមិនទាន់ចាត់វិធានការករណីអំពើពុករលួយនិងការតែងតាំងក្រុមគ្រួសារ
2014.10.29
កិច្ចប្រជុំសភាអនុម័តសេចក្តីព្រាងច្បាប់ចំនួន៣ ពាក់ព័ន្ធនឹងប្រព័ន្ធតុលាការ កាលពីថ្ងៃទី២២ ខែឧសភា ឆ្នាំ២០១៤។
រដ្ឋសភាមិនទាន់ចាត់វិធានការតាមសំណើរបស់តំណាងរាស្ត្រ លោក ស៊ុន ឆ័យ អនុប្រធានគណៈកម្មការទី២នៃរដ្ឋសភា ដែលបានស្នើសុំឲ្យរដ្ឋសភាស៊ើបអង្កេតករណីអំពើពុករលួយ និងការតែងតាំងក្រុមគ្រួសារ ដើម្បីលួចបំបាត់ថវិការដ្ឋសភានៅឡើយ។ មន្ត្រីជាន់ខ្ពស់រដ្ឋសភា បដិសេធធ្វើអត្ថាធិប្បាយពាក់ព័ន្ធទៅនឹងករណីអំពើពុករលួយនេះ។
លោក ស៊ុន ឆ័យ បញ្ជាក់ថា លោកនឹងដាក់ពាក្យបណ្ដឹងមួយទៀតនៅពេលឆាប់ៗខាងមុខនេះ ទៅប្រធានរដ្ឋសភា លោក ហេង សំរិន និងអនុប្រធានរដ្ឋសភា លោក កឹម សុខា ចាត់វិធានការលើបណ្ដឹងពុករលួយនេះ។
លោក ស៊ុន ឆ័យ កាលពីថ្ងៃទី២១ តុលា បានផ្ញើលិខិតមួយច្បាប់ទៅ លោក ឡេង ប៉េងឡុង អគ្គលេខាធិការរដ្ឋសភា ឲ្យផ្តល់បញ្ជីបុគ្គលិកនៃអគ្គលេខាធិការដ្ឋានរដ្ឋសភា និងពន្យល់ពីការគ្រប់គ្រងបុគ្គលិក និងការចំណាយមិនត្រឹមត្រូវ។
លិខិតរបស់ លោក ស៊ុន ឆ័យ បញ្ជាក់ថា លោក មិត្ត ការ៉េន អគ្គលេខាធិការរងនៃរដ្ឋសភា ដែលធ្លាប់មានតួនាទីជាអគ្គនាយករដ្ឋបាល និងហិរញ្ញវត្ថុ បានយកឥទ្ធិពល តែងតាំងក្រុមគ្រួសារជាច្រើននាក់ឲ្យបម្រើការ និងផ្តល់តួនាទីសំខាន់ៗក្នុងរដ្ឋសភាថែមទៀត។
លិខិតនោះរៀបរាប់ថា លោក មិត្ត ការ៉េន មានកូនប្រសា និងកូនស្រីបង្កើត បម្រើការងារនៅអគ្គនាយកដ្ឋានរដ្ឋបាល និងហិរញ្ញវត្ថុ។ ចំណែកកូនប្រុសបង្កើត និងក្មួយ ធ្វើជាប្រធាននាយកដ្ឋានសវនកម្មផ្ទៃក្នុង និងប្រធានការិយាល័យសវនកម្មទី២ ហើយប្អូនថ្លៃពីរនាក់ និងកូនប្រសាម្នាក់ផ្សេងទៀត មានតួនាទីជាន់ខ្ពស់ក្នុងនាយកដ្ឋានបុគ្គលិក និងគ្រប់គ្រងប្រាក់បៀវត្សតំណាងរាស្ត្រ។
លោក ស៊ុន ឆ័យ បញ្ជាក់បន្ថែមទៀតថា ការតែងតាំងកូន និងក្មួយនេះ ប្រសិនបើជាការពិតនោះ ជាអំពើពុករលួយមានលក្ខណៈជាប្រព័ន្ធទ្រង់ទ្រាយធំ ដែលរដ្ឋសភាចាំបាច់ចាត់វិធានការបន្ទាន់ ដើម្បីបញ្ចប់តួនាទីទាំងនោះ៖ «ទីមួយ ជម្លោះផលប្រយោជន៍ការដាក់រៀបចំគ្រួសារនោះ ដើម្បីប្រព្រឹត្តបទល្មើសតែម្តង។ មកទល់ថ្ងៃនេះ ដូចជាគ្មានស្ថាប័នណាដែលរៀបចំគ្រប់គ្រងចេញពីគ្រួសារមួយដូចរដ្ឋសភានេះទេ យើងមានភស្តុតាងរួចទៅហើយពីការលួចបំបាត់លុយ»។
លោក ស៊ុន ឆ័យ កាលពីខែតុលា ក៏បានស្នើឲ្យរដ្ឋសភា បង្កើតគណៈកម្មការមួយ ដើម្បីស៊ើបអង្កេតការប្រើប្រាស់ថវិការដ្ឋសភាក្នុងរយៈពេល ១០ឆ្នាំចុងក្រោយនេះ។ សំណើនេះ ធ្វើឡើងបន្ទាប់ពីលោករកឃើញថា រដ្ឋសភាបានចំណាយថវិកាប្រមាណ ៣ម៉ឺន ៥ពាន់ដុល្លារ ទិញម៉ាស៊ីនថតចម្លងមួយគ្រឿង។
របាយការណ៍ចំណាយឆ្នាំ២០១៤ និងគ្រោងចំណាយឆ្នាំ២០១៥ ដែលវិទ្យុអាស៊ីសេរី ទទួលបានបង្ហាញថា ថវិកាដែលសភាប្រើប្រាស់ឆ្នាំ២០១៤ មានជាង ២៩លានដុល្លារសហរដ្ឋអាមេរិក និងគ្រោងចំណាយក្នុងឆ្នាំ២០១៥ មានជាង ៤៣លានដុល្លារសហរដ្ឋអាមេរិក។
មន្ត្រីនាំពាក្យរដ្ឋសភា លោក ឈាង វុន បដិសេធមិនធ្វើអត្ថាធិប្បាយពាក់ព័ន្ធនឹងពាក្យបណ្ដឹងរបស់ លោក សុន ឆ័យ នោះទេ កាលពីថ្ងៃទី២៨ តុលា៖ «ខ្ញុំមិនដឹងអ្វីទាំងអស់ ខ្ញុំឃើញឯកសារសិន ចាំគេយកដាក់ឯកសារលើតុខ្ញុំដឹងហើយ»។
ចំណែក លោក គាំម កុសល មន្ត្រីជាន់ខ្ពស់អធិការកិច្ចរដ្ឋសភា ក៏បដិសេធមិនធ្វើអត្ថាធិប្បាយនឹងករណីអំពើពុករលួយក្នុងរដ្ឋសភានេះដែរ។
ដោយឡែក លោក មិត្ត ការ៉េន បានប្រាប់សារព័ត៌មានក្នុងស្រុកថា ការតែងតាំងក្រុមគ្រួសាររបស់លោក ធ្វើឡើងស្របច្បាប់ និងមានការវាយតម្លៃត្រឹមត្រូវ។ លោក មិត្ត ការ៉េន អះអាងថា មន្ត្រីទាំងនោះត្រូវបានតែងតាំងកាលពីសម្ដេចក្រុមព្រះនរោត្តម រណឫទ្ធិ ជាប្រធានរដ្ឋសភាម្ល៉េះ។
ឆ្លើយតបទៅនឹងការចោទប្រកាន់នេះ ប្រធានខុទ្ទកាល័យសម្ដេចក្រុមព្រះ លោក ម៉ា ជន បញ្ជាក់ថា សម្ដេចក្រុមព្រះ មិនជាប់ពាក់ព័ន្ធនឹងការតែងតាំងមន្ត្រីគណបក្សប្រជាជនកម្ពុជា ឡើយ។ លោកបន្តថា កាលពីសម្ដេចក្រុមព្រះ ជាប្រធានរដ្ឋសភា គណបក្សប្រជាជនកម្ពុជា បានតែងតាំងមន្ត្រីបក្សកាន់អំណាចគ្រប់គ្រងថវិការដ្ឋសភា៖ «សំឡេង»។
នាយកប្រតិបត្តិអង្គការតម្លាភាពកម្ពុជា លោក ព្រាប កុល បញ្ជាក់ថា ការតែងតាំងក្រុមគ្រួសារក្នុងស្ថាប័នកំពូលរបស់ជាតិនេះ ជាជម្លោះផលប្រយោជន៍បណ្ដាលឲ្យកើតមានអំពើពុករលួយធ្ងន់ធ្ងរ។ លោកស្នើឲ្យអង្គភាពប្រឆាំងអំពើពុករលួយ ត្រូវធ្វើការស៊ើបអង្កេតករណីនេះជាបន្ទាន់៖ «នៅក្នុងប្រទេសកម្ពុជា យើងមានទម្លាប់ និងការអនុវត្តខ្លះ ដែលយើងមើលពីស្តង់ដារអន្តរជាតិទៅវាខុសឆ្គងទាំងស្រុង។ ក៏ប៉ុន្តែនៅកម្ពុជា យកតាមទម្លាប់យកតាមគ្នា គាត់ថាស្ថាប័នក្រសួងរដ្ឋផ្សេងទៀត គាត់ធ្វើបាន ស្ថាប័នរដ្ឋសភាក៏ជាស្ថាប័នជាតិដែរក៏តាមគ្នា។ តែយើងមើលស្តង់ដារអន្តរជាតិ ជាទំនាស់ផលប្រយោជន៍ មិនអាចទទួលយកបានទេ»។
អំពើពុករលួយក្នុងរដ្ឋសភា មិនមែនជារឿងចម្លែកទេ។ អំពើពុករលួយបានកើតឡើងមុនពេលអគាររដ្ឋសភាថ្មីសាងសង់ទៅទៀត។ កាលពីឆ្នាំ២០០៣ ក្រុមហ៊ុនក្នុងស្រុកសហការនឹងក្រុមហ៊ុនអូស្ត្រាលី ឈ្មោះ យ៉ាងស៊ី (Giang Shi) បានប្ដឹង លោក ជាម យៀប ប្រធានគណៈកម្មការហិរញ្ញវត្ថុ និងធនាគារនៃរដ្ឋសភា និងជាប្រធានគណៈកម្មាធិការសាងសង់សភា អំពីអំពើពុករលួយ ក្រោយពេលលោកបញ្ឈប់ក្រុមហ៊ុនយ៉ាងស៊ី ដែលបានដេញថ្លៃសាងសង់រដ្ឋសភា ទៅឲ្យក្រុមហ៊ុនក្នុងស្រុកមួយដែលកូនប្រសារបស់លោកជានាយក។ កាលនោះ ក្រុមហ៊ុនយ៉ាងស៊ី មានគម្រោងប្រើប្រាស់ថវិកា ២៥លានដុល្លារសាងសង់អគារ ដោយមិនប្រើប្រាស់ថវិការដ្ឋឡើយ ប៉ុន្តែក្រុមហ៊ុនកូនប្រសា លោក ជាម យៀប វិញ បានយកថវិកាជាតិ ដើម្បីសាងសង់អគាររដ្ឋសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
អត្ថបទពេញនិយម
នយោបាយ
- សមាជិកសភាម៉ាឡេស៊ីជំរុញឱ្យមានសវនាការពិសេស ពាក់ព័ន្ធការនិរទេសពលករខ្មែរពីម៉ាឡេស៊ីទៅកម្ពុជាទាំងបង្ខំ
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- នាយករដ្ឋមន្ត្រីថៃ ជំរុញកម្ពុជាឱ្យឆាប់ដោះស្រាយបញ្ហាឧក្រិដ្ឋកម្មឆបោក និងការជួញដូរគ្រឿងញៀនឆ្លងដែន
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង
- ពលករខ្មែរនៅកូរ៉េខាងត្បូងធ្វើបាតុកម្មភ្លើងទៀនទាមទារឱ្យរដ្ឋាភិបាលកម្ពុជាស្តារប្រជាធិបតេយ្យ