ចៅក្រមសាលាដំបូងរាជធានីភ្នំពេញ នឹងប្រកាសសាលក្រមលោក សម រង្ស៊ី នៅថ្ងៃទី២ ឧសភា ក្នុងសំណុំរឿងញុះញង់កងទ័ព និងប្រមាថព្រះមហាក្សត្រ
2019.04.22
មេធាវីការពារក្ដីឲ្យលោក សម រង្ស៊ី ប្រធានស្ដីទីគណបក្សសង្គ្រោះជាតិ គឺលោកមេធាវី សំ សុគង់ ប្រាប់អាស៊ីសេរី តាមទូរស័ព្ទ នៅក្រោយសវនាការក្នុងសំណុំរឿង លោក សម រង្ស៊ី ថា ចៅក្រមសាលាដំបូងរាជធានីភ្នំពេញ នឹងប្រកាសសាលក្រមពាក់ព័ន្ធរឿងនេះ នៅថ្ងៃទី២ ឧសភា ខាងមុខ។
របបក្រុងភ្នំពេញប្ដឹងលោក សម រង្ស៊ី ជាច្រើនករណី ហើយសវនាការនៅថ្ងៃចន្ទនេះ គឺពាក់ព័ន្ធនឹងបណ្ដឹងចោទរឿងលោក សម រង្ស៊ី ញុះញង់កងទ័ព និងបទចោទ ប្រមាថព្រះមហាក្សត្រ។
ប៉ុន្តែ លោកមេធាវី សំ សុគង់ ចូលការពារក្ដី តែមួយសំណុំរឿងទេ គឺបទញុះញង់កងទ័ព។ ចំណែកបទប្រមាថព្រះមហាក្សត្រ លោក សម រង្ស៊ី គ្មានមេធាវីការពារក្ដីឡើយ។
លោក សំ សុគង់ ប្រាប់ថា ក្នុងសវនាការនៅរសៀលថ្ងៃទី២២ មេសា ចៅក្រមបានយកខ្សែវីដេអូ របស់លោក សម រង្ស៊ី ផ្សាយតាមបណ្ដាញហ្វេសប៊ុក (facebook) ប្រហែលជិត ២នាទី ដែលបានអំពាវនាវ កាលពីកំឡុងខែធ្នូ ឆ្នាំ២០១៧ ឲ្យកងទ័ពមិនស្ដាប់បញ្ជាជនផ្ដាច់ការ មកធ្វើជាទឡ្ហីករណ៍ និងចោទប្រកាន់ តាមមាត្រា៤៧១ និង៤៧២ នៃក្រមព្រហ្មទណ្ឌ ទាក់ទងនឹងអំពើញុះញង់កងទ័ព។
លោកមេធាវីថា ក្រៅពីនេះ ក៏មានការលើកឡើង អំពីការអំពាវនាវទៅកងទ័ពជាបន្តបន្ទាប់ទៀត របស់លោក សម រង្ស៊ី កុំឲ្យកងទ័ពកុំស្ដាប់បញ្ជាជនផ្ដាច់ការដែរ ប៉ុន្តែដោយសារករណីនេះ គ្មានព្យសនកម្ម ឬការខូចខាតដល់សង្គម ដូច្នេះ ចៅក្រមមិនដាក់បញ្ចូលក្នុងអង្គជំនុំជម្រះទេ។
ទោះបែបណាក្ដី លោកមេធាវី សំ សុគង់ មានសង្ឃឹមតិចណាស់ថា ចៅក្រមទម្លាក់ចោលបទចោទញុះញង់កងទ័ពប្រឆាំងលោក សម រង្ស៊ី ព្រោះនេះជាករណីនយោបាយ៖ «អង្គហេតុពិតប្រាកដនៅក្នុងរឿងនេះ វាមិនអាចជាអង្គហេតុនៃការញុះញង់ មិនឲ្យយោធាស្ដាប់បង្គាប់ទេ។ អាចថា ជាការបរិហារកេរ្តិ៍ជាសាធារណៈ។ អានេះ ជាទិដ្ឋភាពជាក់ស្ដែង។ ប៉ុន្តែដោយសាររឿងនេះ ជារឿងនយោបាយ អ៊ីចឹងថា តុលាការពិចារណា លើអង្គហេតុពិតប្រាកដនោះ ខ្ញុំគិតថា ប្រហែលជាមិនអាចពិចារណាលើអង្គហេតុពិតប្រាកដទេ គឺប្រហែលជាមានការកាត់ទោសកូនក្ដី ទៅតាមការចោទប្រកាន់»។
គិតត្រឹមពេលនេះ លោក សម រង្ស៊ី កំពុងជាប់បណ្ដឹងយ៉ាងហោចណាស់ ៩ នៅតុលាការកម្ពុជា ដែលប្ដឹងដោយក្រុមមេដឹកនាំរបបក្រុងភ្នំពេញ ដូចជា លោក ហ៊ុន សែន លោក ហេង សំរិន លោក ហោ ណាំហុង លោក សោម សឿន មេយោធា លោក វង្ស ពិសេន និងសមាជិកមូលដ្ឋានបក្សកាន់អំណាច អ្នកនាង ធី សុវណ្ណថា។
លោក សម រង្ស៊ី អះអាងថា មិនខ្វល់នឹងបទចោទទាំងនោះទេ ដោយបទចោទទាំងអស់ ប្រឆាំងរូបលោក និងលោក កឹម សុខា ប្រធានគណបក្សសង្គ្រោះជាតិ គឺសុទ្ធតែរបបឯកបក្ស ប្រឌិតឡើង ដើម្បីផាត់លោកទាំងពីរ កុំឲ្យមានឱកាសដើម្បីអំណាចពីលោក ហ៊ុន សែន តាមការចង់បានរបស់ពលរដ្ឋ។
ទោះជាជាប់បណ្ដឹងច្រើនយ៉ាងនេះក្ដី លោក សម រង្ស៊ី ប្រកាសថា នឹងបង្កើនវោហារសាស្ត្រអំពាវនាវកងទ័ពប្រឆាំងលោក ហ៊ុន សែន បន្ថែមទៀត ខណៈលោក ហ៊ុន សែន បញ្ជាឲ្យកងទ័ពឈប់ឆ្លងឆ្លើយជាមួយលោក សម រង្ស៊ី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។