បក្សកាន់អំណាចប្រកាសជាឱឡារិកទទួលយកលទ្ធផលឆ្នោតក្រុមប្រឹក្សាទាំងមានការរិះគន់
2019.06.08
គណបក្សប្រជាជនកម្ពុជាប្រកាសជាឱឡារិកទទួលយកលទ្ធផលឆ្នោតក្រុមប្រឹក្សារាជធានី-ខេត្តក្រុង-ស្រុក-ខណ្ឌអាណត្តិទី៣នេះ បន្ទាប់ពីគណៈកម្មាធិការជាតិរៀបចំការបោះឆ្នោតប្រកាសលទ្ធផលជាផ្លូវការ នៅថ្ងៃទី៨ ខែមិថុនា។ មន្ត្រីបកប្រឆាំងនិងមន្ត្រីសង្គមស៊ីវិលដែលជំនាញខាងកិច្ចការបោះឆ្នោត មិនចាប់អារម្មណ៍ចំពោះការប្រកាសលទ្ធផលនេះទេ ព្រោះចាត់ទុកថាជារឿងមិនត្រឹមត្រូវនិងជាល្បែងបាយឡុកបាយឡរបស់គណបក្សប្រជាជនកម្ពុជា។
សេចក្ដីថ្លែងការណ៍ចុះផ្សាយថ្ងៃទី៨ ខែមិថុនា គណបក្សប្រជាជនកម្ពុជាចាត់ទុកលទ្ធផលបោះឆ្នោតនេះបានមកពីការបោះឆ្នោតដោយសេរីត្រឹមត្រូវ និងយុត្តិធម៌។
លទ្ធផលផ្លូវការដែលគណៈកម្មាធិការជាតិរៀបចំការបោះឆ្នោតផ្សព្វផ្សាយនៅថ្ងៃទី៨ ខែមិថុនាបង្ហាញថា អាសនៈនៅក្រុមប្រឹក្សារាជធានី-ខេត្តគណបក្សប្រជាជនកម្ពុជា ទទួលបាន៥៥០ គណ បក្សហ៊្វុនស៊ិនប៉ិចទទួលបាន ៣ និងគណបក្សខ្មែររួបរួមជាតិទទួលបាន៦។ ចំណែកលទ្ធផលអាសនៈនៅថ្នាក់ក្រុមប្រឹក្សាក្រុង-ស្រុក-ខណ្ឌគណបក្សប្រជាជនកម្ពុជាទទួលបាន ៣.៤៨៤ គណបក្សហ៊្វុនស៊ិនប៉ិច ៣៣ និងគណបក្សខ្មែររួបរួមជាតិទទួលបាន៣៨។
ប្រធានប្រតិបត្តិរបស់គណបក្សសង្គ្រោះជាតិរាជធានីភ្នំពេញដែលរបបក្រុងភ្នំពេញរំលាយចោលគឺលោក ម៉ន ផល្លា លើកឡើងថា លទ្ធផលនៃការបោះឆ្នោតក្រុមប្រឹក្សារាជធានី-ខេត្តក្រុង-ស្រុក-ខណ្ឌអាណត្តិទី៣ដែលរៀបចំដោយគ.ជ.ប សព្វថ្ងៃនេះ គឺគ្រាន់តែជាល្បែងបាយឡុកបាយឡមួយ និងគ្រាន់តែជាការរៀបចំឱ្យរួចតែពីដៃពីជើងនោះទេ ដើម្បីបំភ័ន្តភ្នែកប្រជាពលរដ្ឋខ្មែរ និងអន្តរជាតិប៉ុណ្ណោះ។ លោកជឿថា ប្រសិនបើរបបក្រុងភ្នំពេញមិនរំលាយគណបក្សសង្គ្រោះជាតិ និងប្លន់តួនាទីក្រុមប្រឹក្សាឃុំ-សង្កាត់របស់គណបក្សសង្គ្រោះ ជាតិដែលពលរដ្ឋបោះឆ្នោតគាំទ្រកាលពីឆ្នាំ២០១៧ នោះទេ គឺគណបក្សសង្គ្រោះជាតិ នឹងដណ្ដើមយកកៅអីក្រុមប្រឹក្សារាជធានីខេត្ត ក្រុង ស្រុក ខណ្ឌជាច្រើនទៅគ្រប់គ្រងមិនជាក់ជាមិនខាន៖ «បើរបបភ្នំពេញមិនរំលាយគណបក្សសង្គ្រោះជាតិទេគណបក្សសង្គ្រោះជាតិនឹងទទួលបាននៅការគាំទ្រពីក្រុមប្រឹក្សាឃុំ-សង្កាត់បោះឆ្នោតជ្រើសរើសក្រុម ប្រឹក្សាខណ្ឌក្រុមប្រឹក្សាស្រុក ក្រុងនិងក្រុមប្រឹក្សារាជធានីខេត្ត ច្រើនលើសលប់ ដូច្នេះហើយគណបក្សសង្គ្រោះជាតិនឹងអាចគ្រប់គ្រងក្រុមប្រឹក្សានូវរាជធានីភ្នំពេញនិងខេត្តមួយចំនួនទៀត។ ហេតុដូច្នេះហើយទើបគណបក្សប្រជាជនកម្ពុជារៀបចំគម្រោង ប្លន់លទ្ធផលឆ្នោតនិងហាមឃាត់កុំឱ្យគណបក្សសង្គ្រោះជាតិចូលរួមការបោះឆ្នោតគ្រប់ដំណាក់»។
ចំណែកមន្ត្រីសម្របសម្រួលផ្នែកអង្កេត និងតស៊ូនៃអង្គការឃ្លាំមើលការបោះឆ្នោតខុមហ្វ្រែល (COMFREL) លោក កន សាវាង្ស ហាក់អស់សំណើចចំពោះសេចក្ដីថ្លែងការណ៍របស់គណបក្សប្រជាជនកម្ពុជាដែលប្រកាសជាឱឡារិកទទួលយកលទ្ធផលឆ្នោត និងចាត់ទុកថាការបោះឆ្នោតត្រឹមត្រូវនិងយុត្តិធម៌។ លោកលើកឡើងថា បើគេនិយាយពីការបោះឆ្នោតគឺគេនិយាយពីការប្រកួតប្រជែងរវាងគណបក្សនយោបាយដែលមានកម្លាំងគាំទ្រខ្លាំងដូចគ្នា។ លោកសង្កេតឃើញថា ក្រោយឆ្នាំ២០១៧ គឺមានតែគណបក្សសង្គ្រោះជាតិ និងគណបក្សប្រជាជនកម្ពុជានោះទេដែលមានកម្លាំងប្រកួតប្រជែងទាំងថ្នាក់ក្រុមប្រឹក្សារាជធានី-ខេត្តក្រុង-ស្រុក-ខណ្ឌនិងការប្រកួតប្រជែងនៅថ្នាក់ព្រឹទ្ធសភាថែមទៀត៖ «ប៉ុន្តែក្រោយការរំលាយសង្គ្រោះជាតិមក គឺអត់មានទេសំឡេងប្រកួតប្រជែងនេះ គឺមានតែគណបក្សប្រជាជនកម្ពុជាអ៊ីចឹងសួរថា តើសំឡេងមានតែមួយហើយយើងទៅប្រកាសថា ប្រវត្តិសាស្ត្រជោគជ័យ និងសេរីយុត្តិធម៌កន្លែងណា? ខ្ញុំក៏មិនយល់ដែរព្រោះវាមានសំឡេង តែម្នាក់ឯងសឹងថា មិនបាច់រៀបចំបោះក៏វាឈ្នះរួចស្រេចទៅហើយ»។
តាមច្បាប់បោះឆ្នោតកម្ពុជាការបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌ អាណត្តិទី៣នេះមិនត្រូវបានជ្រើសរើសដោយសាធារណជននោះទេ ប៉ុន្តែអ្នកដែលអាចជ្រើសរើសបាននោះមានតែក្រុមប្រឹក្សាឃុំសង្កាត់ចំនួន ១១.៥៧២នាក់ដែលភាគច្រើនមកពីគណបក្សកាន់អំណាចក្រោយ រំលាយគណបក្សសង្គ្រោះជាតិ និងបានដណ្ដើមយកអាសនៈរបស់ក្រុមប្រឹក្សាឃុំសង្កាត់គណបក្សប្រឆាំង អស់ជាង ៥ពាន់ (៥.០០៧) អាសនៈដែលស្មើជិតពាក់កណ្ដាលនៃអង្គបោះឆ្នោតទាំងមូល។មានគណបក្សចំនួន ៧ចូលរួមប្រកួតប៉ុន្តែបក្សខ្លះគ្មានអង្គបោះឆ្នោតទេ៕