លោក ស ខេង យល់ព្រមជួបលោក កឹម សុខា
2017.01.06
រដ្ឋមន្ត្រីក្រសួងមហាផ្ទៃ លោក ស ខេង (ឆ្វេង) ចាប់ដៃជាមួយអនុប្រធានគណបក្សសង្គ្រោះជាតិ លោក កឹម សុខា មុនអ្នកនាំពាក្យបក្សទាំង២ ធ្វើសន្និសីទកាសែតស្ដីពីលទ្ធផលនៃជំនួបនៅថ្ងៃទី១៩ ខែកុម្ភៈ ឆ្នាំ២០១៦ នាវិមានរដ្ឋសភា។
RFA/Rann Samnang
លោក ស ខេង យល់ព្រមជួបចរចាជាមួយលោក កឹម សុខា ហើយ ដើម្បីដោះស្រាយបញ្ហានយោបាយនៅសេសសល់តាមសំណើរបស់ លោក កឹម សុខា។ តាមគម្រោង ជំនួបនេះនឹងធ្វើឡើងនៅមន្ទីររដ្ឋសភា ក្រោយថ្ងៃទី១១ ខែមករា។ តែទោះយ៉ាងនេះក្ដី ទាំងអ្នកនាំពាក្យគណបក្សកាន់អំណាច និងអ្នកនាំពាក្យគណបក្សប្រឆាំង មិនបង្ហើបឲ្យដឹងពីពេលវេលាជាក់លាក់ ឬក៏ប្រធានបទអ្វីច្បាស់លាស់នៅឡើយដែរ ដោយគ្រាន់តែបញ្ជាក់ថា ដើម្បីស្វែងរកដោះស្រាយបញ្ហានយោបាយនៅសេសសល់។
គម្រោងជួបគ្នារវាងប្រធានក្រុមដឹកនាំតំណាងរាស្ត្រនៃគណបក្សប្រជាជនកម្ពុជា និងប្រធានថ្នាក់ដឹកនាំតំណាងរាស្ត្រគណបក្សសង្គ្រោះជាតិ ត្រូវបានលោក កឹម សុខា បង្ហោះនៅលើទំព័រហ្វេសប៊ុក (Facebook) របស់លោក នៅព្រឹកថ្ងៃទី៦ ខែមករា។
លិខិតរបស់លោក កឹម សុខា បានផ្ញើទៅលោក ស ខេង កាលពីថ្ងៃទី៥ ខែមករា ស្នើទៅលោក ស ខេង កំណត់ពេលវេលាសមស្របណាមួយក្នុងខែមករា នេះ ដើម្បីរួមគ្នាដោះស្រាយបញ្ហាប្រទេសជាតិ និងពលរដ្ឋដោយសន្តិវិធី សមស្របតាមបំណងប្រាថ្នារបស់សាធារណជនដែលទន្ទឹងចង់ឃើញ។
ជាការឆ្លើយតប លោក ស ខេង បានសរសេរនៅលើលិខិតរបស់លោកវិញថា លោកសង្ឃឹមថា ជំនួបរវាងក្រុមការងារគណបក្សទាំងពីរអាចនឹងធ្វើឡើងក្រោយថ្ងៃទី១១ ខែមករា។ ចំពោះពេលវេលាជាក់ស្ដែង ខុទ្ទកាល័យរបស់លោក ស ខេង នឹងជូនដំណឹងនៅពេលក្រោយ។
អ្នកនាំពាក្យរដ្ឋសភា លោក ឡេង ប៉េងឡុង បញ្ជាក់បន្ថែមថា គណបក្សទាំងពីរនឹងជួបគ្នានៅមន្ទីររដ្ឋសភា។ អ្វីផ្សេងពីនេះ លោក ឡេង ប៉េងឡុង មិនបានទទួលព័ត៌មាននៅឡើយទេ។ រីឯអ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ចាប់ពីក្រោយថ្ងៃទី៧ ខែមករា លោក ស ខេង អាចមានពេលវេលាជជែកជាមួយលោក កឹម សុខា។ ប៉ុន្តែលោកក៏មិនទាន់ដឹងពេលវេលាជាក់លាក់នោះដែរ៖ «ឥឡូវប្រហែលក្រោយថ្ងៃបុណ្យ៧ មករា គាត់ (លោក ស ខេង) អាចដកឃ្លាការងារបានធូរស្រាលតិច បានគាត់យល់ព្រមជួប អ៊ីចឹងទេសបញ្ជាក់ឲ្យឃើញថា គ្មានគំនិតអីគេចវេះមិនជួបទេ»។
ទាក់ទងប្រធានបទនៃការចរចារវាងគណបក្សទាំងពីរ លោក សុខ ឥសាន បង្វែរសំណួរនេះទៅគណបក្សសង្គ្រោះជាតិ ដែលជាអ្នកស្នើជួបចរចា។ ចំណែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ គ្រាន់តែប្រាប់ថា ការចរចាគ្នានោះ គឺជាការជជែកគ្នារឿងនយោបាយដែលនៅសេសសល់។ ទោះយ៉ាងនេះក្តី លោកថា គណបក្សសង្គ្រោះជាតិ បានត្រៀមរួចរាល់អស់ហើយ ហើយបើជួបគ្នាកាន់តែឆាប់កាន់តែល្អ៖ «ធ្វើម៉េចឲ្យស្ថានការណ៍នយោបាយហ្នឹងវិលទៅរកភាពប្រក្រតីវិញ នេះយើងជូនជាគំនិតរួមប៉ុណ្ណឹង ចំណែកលំអិតក្នុងការជជែកយើងមិនទាន់អាចជម្រាបបានទេ»។
កាលពីខែធ្នូ ក្រោយពេលព្រះមហាក្សត្រព្រះរាជទានការលើកលែងទោសដល់លោក កឹម សុខា លោក ស ខេង បានសន្យាថា នឹងជជែកគ្នាបន្តទៀតនៅចុងខែធ្នូ ដើម្បីនិយាយរឿងដោះលែងមន្ត្រីសិទ្ធិមនុស្សអាដហុក (ADHOC) ៤រូប និងអគ្គលេខាធិការរង គ.ជ.ប មួយរូប ប៉ុន្តែត្រូវខកខាន។
ទាក់ទងរឿងដោះលែងមន្ត្រីសិទ្ធិមនុស្ស និងមន្ត្រី គ.ជ.ប នេះដែរ ទាំងអ្នកនាំពាក្យបក្សកាន់អំណាច និងអ្នកនាំពាក្យបក្សប្រឆាំង ក៏មិនអាចបញ្ជាក់ថា ជំនួបនោះនឹងលើករឿងនេះមកជជែក ឬយ៉ាងណាទេ។
តែទោះយ៉ាងនេះក្តី អ្នកសិក្សាការអភិវឌ្ឍសង្គម លោកបណ្ឌិត មាស នី យល់ថា គណបក្សទាំងពីរនឹងជជែកទាក់ទងដោះលែងមន្ត្រីសិទ្ធិមនុស្សអាដហុក ៤រូប និងអគ្គលេខាធិការរង គ.ជ.ប ព្រោះលោក ស ខេង បានសន្យាថា នឹងជជែករឿងនេះតាំងពីចុងឆ្នាំ២០១៦ ម្ល៉េះ។ យ៉ាងណាក៏ដោយចុះ អ្នកតាមដានស្ថានការណ៍នយោបាយរូបនេះយល់ថា ដើម្បីឲ្យការចរចានេះមិនត្រូវលើកពេលដូចមុនទៀត លោក សម រង្ស៊ី ប្រធានបក្សប្រឆាំងដែលកំពុងរស់នៅក្រៅប្រទេស គួរប្រយ័ត្នប្រយែងក្នុងការថ្លែងសារនយោបាយ៖ «យើងសង្ឃឹមថា ឯកឧត្ដម សម រង្ស៊ី ប្រហែលជាដឹងថា អ្វីដែលឯកឧត្ដមត្រូវធ្វើចាប់ពីពេលនេះរហូតទៅដល់មានការដោះលែងមន្ត្រីសិទ្ធិមនុស្ស អ្នកនយោបាយ និងមន្ត្រី គ.ជ.ប នៅពេលខាងមុខ»។
ប្រធានគណបក្សសង្គ្រោះជាតិ លោក សម រង្ស៊ី ធ្លាប់លើកឡើងថា ការដែលបក្សកាន់អំណាចមិនដោះលែងមន្ត្រីសិទ្ធិមនុស្ស និងមន្ត្រី គ.ជ.ប គឺជាលេសរបស់គណបក្សកាន់អំណាច និងចង់រក្សាអ្នកកំពុងជាប់ឃុំនោះ ឲ្យបន្តស្ថិតនៅក្នុងពន្ធនាគារដដែលដើម្បីជាគំរូកុំឲ្យអ្នកដទៃទៀតហ៊ានរិះគន់រដ្ឋាភិបាលលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
អត្ថបទពេញនិយម
នយោបាយ
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ
- តុលាការថៃចេញដីកាចាប់ខ្លួនជនសង្ស័យជនជាតិខ្មែរគឺលោក លី រតនរស្មី ករណីឃាតកម្មលើលោក លិម គិមយ៉ា
- អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១ មករា
- អាជ្ញាធរត្រៀមបញ្ជូនអតីតឧកញ៉ា ហេង សិទ្ធី មកកម្ពុជា ក្រោយចាប់ខ្លួនបាននៅរុស្ស៊ី